(青春極少甜)原來曖昧真係最好既階段: 9-籃球比賽
秋天最興搞埋D運動比賽，今日就係高form既級際籃球，唔洗諗都知呀逸一定有份，所以平時冇乜女仔睇既運動比賽，今次都多人到塞滿左成個操場。
現實唔係拍戲，唔會有女好似花痴咁尖叫某個男仔既名，唔會有人爭住幫某個男仔抹汗，更唔會有成班女舉唒牌撐邊個邊個，最多都係幫最多自己班或者自己級個隊加油。
但都會有D「假公濟私」既情況出現，例如扮幫自己班打氣，實情就淨係為其中一個尖叫；又例如表面團結有愛，遞水抹汗，關心同級人，事實上係關心特定既一個人。
係，
我、就、係、講、緊、我、眼、前、呢、幾、條、扮、唒、野、痴、住、呀、逸、既、女。
平時都唔見佢地咁團結，明明最興自己幾個小圈子講是非，今日突然自願幫老師買野飲送俾呀逸個組男仔，就連係平時成日俾佢地串既毒撚都有份。
一切都係為左一個人——周銘逸。
「多謝唒妳地呀，辛苦妳地幾個搬咁多野飲過黎。」呀逸笑笑口咁講。
「老師俾錢架嘛，多咩謝喎，傻咩。」其中一條女講。
咦，呢招咪我用開既扮自然？
呀逸只係用微笑回應佢。
「林侑淇，妳條毛巾可唔可以俾我用？」呀逸突然望住我問。
「呃……我……」我望下條毛巾又望下佢，又望下佢隔離條女個個扮唒笑但其實睥住我個樣。
呀逸行過黎拎走我條毛巾，好快速咁哄埋黎我耳邊一下。
「唔該唒。」
我可憐既小心臟又再次起勢咁跳。
我捉住手上淨低既一條毛巾。心諗好彩我醒，買左兩條。
「喂o靚妹，妳黎睇我架呢。」有人拍左我個頭一下。
叫得我o靚妹即係魏天齊啦。
「睇你個頭。」我唔諗住轉身。
「睇偶像要準備架，水呢？毛巾呢？」
佢行黎我面前，用頭帶札唒D頭髮上去，著住件籃球衫。
原來佢輪廓都幾深，但我懷疑只係因為佢太黑。
「我買～一定買呀，不過唔係買俾你囉。」
「唔買俾我仲可以買俾邊個。」
「呀逸……廿三號同學囉。」
講漏口添，希望佢聽唔到希望佢聽唔到……
佢望上場，尋找著住23號波衫既人……
我都跟住尋找，因為我都係隨口講……
「唔係掛！買俾毒撚都唔買俾我？」
咁o岩講中左個四眼仔添……
「係呀，買俾佢都唔買俾你呀！」我邊笑邊扮惡。
「好呀，o拿妳唔買正淆底獸。」
「你大我呀，買咪買囉！」我轉身就走，然後去校務處買左兩條毛巾。
我平復番我既心跳之後，走向魏天培。
「冇走數呀！買左喇！」我揚下揚下條毛巾。
「又話送俾毒撚，原來送俾男神。」佢有D不屑咁講。
點解會俾佢見到架……
「佢自己拎架，又唔係我俾佢。」
「點知妳姐。」講完，魏天培就行開左。
「喂！咁呢條點呀？」我大叫。
隔左三秒。
「掉過黎！我用！」魏天培背住我行住講。
我將毛巾搓埋一舊掟過去。
明明我就掉得勁唔準，明明佢就冇望過黎，點解佢又會可以一手接住架呢？
佢行行下停低：
「妳會撐我個隊架可？」仍然係背對我。
「我就撐毒撚個隊既。」我做左個好串既樣，但唔記得佢根本睇唔到。
「理得妳，我入籃妳唔幫我尖叫既話黎緊呢個禮拜妳唔洗旨意有薯仔食。」講完佢就繼續行。
死人薯仔佬！！！
「我、死、都、唔、撐、你呀！」我好大聲咁講。
嗶——
比賽開始，我全神貫注望住呀逸，佢一下子就搶到個波，飛快咁運球去對面。但佢冇獨食，一有機會就傳球俾第二個，不停互傳，好有默契。好快佢地就入左第一球，全場歡呼。
個波一跌番落黎，一隻大手拍走左個波，我倒抽一口氣。望番隻手既主人，係魏天培，佢得到個波之後極速運番過呀逸個籃。
有冇搞錯呀！唔好俾佢贏呀呀逸！
呀逸果然力追，一直跟係魏天培隔離，但魏天培好多假動作，令呀逸遲遲未搶得走個波。
我唔覺意留意到個兩條……掛係佢地兩個頸上面，一樣款既毛巾。
直到去到三分線，魏天培出乎意料，竟然一躍而起，入左個三分波。全場尖叫聲響起。
呢場真係幾好睇，呀逸同魏天培都係籃球隊，通常比賽都係同一隊，今次舉辦活動既學生會請佢地分開兩隊，就係想睇下D火花。
比賽繼續，兩邊得分都差唔多，暫時呀逸個隊領先緊。呀逸再次運球到籃底，準備上籃，魏天培同一個同隊既人都想封呀逸蓋，點知三個同時跳起既時候，好用力咁撞埋一齊。
「！！」
在場好多人驚呼。
「嗶！」球證都吹雞暫停。
三個人坐唒係地下，好似真係幾痛咁。
呀逸同魏天培撞到膊頭，另一個就撞到手肘。
我好擔心，拎起支水就跑去呀逸休息個張凳到等佢過黎。
幾個同學將佢地扶上凳到坐，我見到呀逸成個膊頭紅唒。我皺唒眉，想開聲講D咩，先發現自己咁樣坐過黎其實好奇怪。
好擔心呀逸，但我都係咩都冇講就咁坐住，望住呀逸個膊頭。
「我冇事呀，傻妹。」呀逸笑住同我講。
「真係？」我唔信佢。
「係呀，撞左下姐嘛。」佢按住膊頭個位轉左幾下，然後用頸上既毛巾抹汗。
「唔得就唔好格硬黎，休息啦。」我遞支已經扭開左既水俾佢。
「知道喇。」又係呀逸既招牌溫暖笑容。
本來前幾秒仲皺到緊一緊既眉頭，一下就俾呀逸溶開左。
呢個時候，班八婆都趕到黎「關心」呀逸，我就行開左。
「魏天培你唔好頂硬上啦，好快有校際比賽架喇，學校呢D你唔洗咁chur喎。」我聽到一個男仔咁講。
望向聲音發出既地方，我見到魏天培。佢唔單止膊頭紅左，膝頭都擦損左，仲有D血。
「得架喇，我先冇咁笨。」魏天培用毛巾一下一下印走D血，印印下又停左手，若有所思咁。佢好似意識到我望住佢，抬高頭望番住我。
「你冇事呀嘛魏天……」我開口。
但我未講完，佢就企起身行向醫療室。
「喂魏天培！我問你野呀！」我跑去佢前面。
「番去睇住妳個毒撚啦。」佢轉頭用下巴示一示意一個方向，之後繼續行去醫療室。
我望一望個個方向，淨係見到俾成班女包圍住既呀逸。
魏天培係我手上拎既毛巾，就咁搭左係凳上面。
算點喎，知道我關心呀逸都唔洗咁架，咁惡算係點喎。
佢地兩個都冇繼續比賽，齊齊去左醫療室。而最後，呀培個隊贏左。
我睇完比賽，由操場望上醫療室既窗口，諗緊佢兩個有冇事。不過我冇上去，因為我知道上面一定唔止我呢個關心者。
我邊行番屋企邊拎出手機，想搵出呀逸電話Whatsapp，發現第一個Whatsapp對話就係佢。
呀逸：我真係冇事，唔洗擔心
淨係睇呢一行字，我都已經幻想到佢笑住個樣。
呀逸：聽日星期六，有咩做？
！！！！！！！！
周銘逸係咪約我出街？？？
我：我得閒
咪住咪住，林侑淇妳既矜持呢？
我：做咩？
呀逸：我想睇我的少女時代，可唔可以俾我請妳睇場戲？
雖然我已經睇過一次……但同呀逸睇喎……又唔係自己俾錢……不過都唔可以俾佢覺得我lur飯應。
我：我睇過呢齣喇喎
呀逸：同唔同人睇唔同感受 咁你想唔想同我睇？
我：都得既 我冇咩所謂
呀逸：咁聽日四點旺角等 好冇？
我：Ok
我、要、同、呀、逸、單、獨、出、街、喇！