(青春極少甜)原來曖昧真係最好既階段: 8-商場

放學之後，麥葵係咁嘈住叫我地要去睇我的少女時代，我地惟有俾佢拖住去買飛。
我同麥葵行左手邊，tina同楊紫晴行右邊，係商場行去戲院。

「！！！」麥葵突然倒吸一口氣。
Tina即刻搭住麥葵膊頭拉開左佢。

「咩事呀？」我問。

「咩咩事呀？」Tina急急腳拉住麥葵行左去我左手邊。
「妳地行黎行去做乜春？」楊紫晴望住佢地兩個。



我以為佢兩個遮住D咩，裝極都裝唔到有咩野，就望番去右手邊，先知原來佢地係想引走我注意，

因為我見到書店入面，呀逸同張倩泳一齊拎住本書。

「喂！……」Tina大嗌。

我耷低頭，繼續行。

「……」Tina同麥葵都唔敢出聲，跟住我行。



「林侑淇。」
背後突然傳出一把男聲。

我轉頭，見到呀逸。

我睜大眼，有D訝異，冇作回應。

我地兩個就咁對望住。



「Wow……」佢三個又係到起哄。

「妳……得唔得閒講兩句？」呀逸好似有少少皺眉咁望住我。
「呃……」我唔知點答好。

「得閒！」楊紫晴推我背脊，一野拱左我出去。
「我地買住飛係上面等妳！」然後就拖埋Tina同麥葵跑走左。

……其實我係咪冇選擇權架？

我又嬲佢地又覺得好好笑但又有D尷尬，於是又皺眉又咬唇又忍笑咁。

我聽到呀逸好似笑左一聲，先記起佢，望番住佢。

「咁，妳介唔介意同我行陣街？」佢插住袋，似笑非笑咁問我。



我點點頭。

無論拍過幾多次拖，只要你愛上一個人，同佢未一齊既時候既相處，永遠都好似初戀咁，唔知要點做、點面對，依然會心跳加速。大家都唔開口，但大家都知道，而家呢段關係，叫曖昧。

就好似我而家咁。單單係企係佢隔離，同佢一齊行街，我已經覺得呼吸困難。

但我不嬲好勝，唔鍾意俾人知自己怯，所以又要做我呢排成日都做既野——扮自然。

「你……又話有野要講既？」
「係呀，我有野要講。」
「咁仲唔講？」
「我驚妳會覺得我好奇怪。」
平時好鍾意眼都唔眨咁望住對方既佢，無啦啦唔望我，望住前面。



「咁……你鍾意講就講，唔講就算啦。」

佢沉默一陣，再次開口。

「張倩泳見到我做緊份練習幾好，叫我陪佢買。」
「係咩……做咩話俾我知。」

一聽到張倩泳個名，我個心緊一緊。聽完成句，我個心都係好緊，因為我覺得，佢係解釋緊俾我聽。但我又要扮唔介意。

「因為……我想妳知……」

我覺得我應該要call白車，如果唔係既話，我長期keep住呼吸急速又要扮呼吸正常咁樣，一定會死。

「我唔知我講呢D做咩，但……就係咁。」佢都係冇望我。



「哦……咁我要上去搵番我D friend睇戲喇。」
「我送妳上去。」
「唔洗啦，我自己去得喇。」
「睇得開心D。」

我有少少想佢講多次送我。但既然佢冇，我揮左下手就走左。


 睇完套戲，麥葵又黎料。
「真係勁正呀！」佢隻手仲拎住張抹完眼淚既紙巾，都唔知有冇鼻涕。

「喂油淇，妳有冇將周銘逸代入歐陽呀？」楊紫晴彈去我前面望住我。
「呃……一開始都有既，都係男神type囉，但係後尾都唔似啦，我都冇徐太宇……」魏天培個樣係我個腦到一閃而過。
「都o岩既。」楊紫晴行番去我隔離。



我冇對於呢個一閃而過既影像諗得太多。

直到第二日番學。