【突發】有個巴打PM我，話我聽佢死左。: 拾參

「唔好喊啦，已經過左去。我地只能做既係，面對現在同將來。」我一邊安慰Sharon，一邊講。

「加上，呢件事責任並不完全在妳身上，所有人都有份，包括呀鋒自己本人。好啦，我地快d去學校比幅畫佢VA老師。妳帶我去搵佢得唔得？」

Sharon點頭，就帶我搭巴士去佢學校。


「Miss Tang，有兩個女仔搵妳呀。」剛好係落堂時間，學生離開課室個陣見到我地企係門口。

「你地係……？」Miss Tang走出黎，見到我地唔係佢學生，有點疑惑。





於是Sharon略略介紹左我比Miss Tang識，然後我地就等其他學生走曬之後再講成件事佢聽。

Miss Tang一邊聽，一邊放返佢原本紥住既馬尾。當佢d頭髮放左落黎，唔知點解我覺得有d熟悉既感覺。


「呢幅畫就係佢叫你地帶過黎既？」Miss Tang睇見幅畫，竟然好冷靜咁睇，完全冇驚訝既反應。

我同Sharon比佢既反應嚇親，互相一臉疑惑咁對望。





「做咩事呀？我講錯野？」

「唔係，只係呢幅畫有d奇特……」

「哦，妳地唔明我點解咁冷靜，係咪？」Miss Tang小心奕奕咁放幅畫上木架上面，「呀鋒生前同我最熟，咩都會同我講，所以幅畫既內容我就略知一二。」

「咁……呀鋒有冇同你提過我呀？例如我令佢唔開心之類。」Sharon有d擔心咁問，可能佢好驚自己係間接害死呀鋒既兇手。

「我知道呀，佢有講過，妳係佢暗地裏既知己呀嘛。」





Sharon聽到「暗地裏」呢三個字，面色一沉，可能佢更加為自己以前對呀鋒既態度感到歉疚。


「我覺得，唔關妳事，呀鋒本人都有自己責任。」我拍一拍Sharon膊頭。

「嗯？點解咁講呢？妳明明唔識呀鋒架喎？」Miss Tang一臉好奇咁望住我，似乎幾期待我既答案。

「如果佢係唔開心，點解唔直接同當事人講？點解要選擇同妳呻，唔直接同Sharon講？」

「咁有時好難開口既，我估。」

「但心結就係要同當事人講先至解得開呀！佢唔開心，點解要收埋係心呢？唔講出黎得出個答案，所有野都只會鬱係心入面。」

Miss Tang聽到，有幾分驚訝。





我行前一步，繼續講，「無論網友又好，老師都好，都唔係導致佢唔開心既人，佢應該去解決件事，同佢爸媽，同Sharon等等既人傾啊！否則私下有幾辛苦，佢點樣同唔關事既人呻，都只係無補於事呀！」

Miss Tang聽完，笑左笑，

「小姐，妳係網友，我就知道妳既反應一定係批評受害者。」Miss Tang突然態度唔多友善，「妳講起網友，妳知唔知佢就係因為網友所以死？佢死前有同網友呻，結果班人反而叫佢去死，佢先會萬念俱灰……」

「咁我只係理性分析緊件事，想講雙方都有錯姐。呀鋒佢自殺，無非都係想人關心佢姐。」

「咩意思？」

「想人掛住佢，想人會後悔，想自己會被記住其他人心上。講到底都係因為想人關心自己，甚至覺得只要換來呢d野，就算死都值得。」

「……嗯。」Miss Tang聽完，似乎有點認同。

「自私。愛佢既人只會因此自責而受苦一世。而唔愛佢既人，就只會無視佢既死亡，唔好咁天真以為佢死會令唔愛佢既人突然愛佢。」





我轉身望向幅畫，「雖然網友把口係好臭，係有問題，如果佢地肯勸止下，個結局可能真係會唔同。但係，佢地就係我所講既「唔愛佢既人」，點解要咁傻，走去搵個唔愛自己既人關心自己？個結果係點，大家都心裏有數，邊個會咁認真叫佢唔好死？佢真係好傻……」


咦，咪住，如果呀鋒係因為見到巴打們既惡言而決心去自殺，咁佢應該未同Miss Tang講個post既事，點解Miss Tang會知……？