【突發】有個巴打PM我，話我聽佢死左。: 拾貳

沿路行既時候，途人都會望一望Sharon拎住既個幅畫。
可能係因為Sharon瘦，唔夠力拎，拐下拐下咁引人注目
又或者係，幅畫實在太奇特。


Sharon一路行，都係保持沉默
似乎係因為幅畫而心情變得沉重。

「不如我拎啦，幅畫應該好重下。」我試圖打破咁沉重既氣氛。





「唔駛啦，妳已經幫左我地好多野。」Sharon搖頭，堅持自己一個人拎。

「幫？哈哈，我點稱得上幫呢。我只不過係一時八卦……」

「唔係，」Sharon突然停步，「妳比我地都善良。可能，當局者迷，旁觀者清，妳反而比我地更加關心呀鋒。」

「下？」我聽到比人讚，忽然有點尷尬，「我邊係善良，只係我考完dse冇野做所以……」

「嗚……」Sharon突然扁咀，好似上次係學校咁，激動咁喊起上黎。






女人真係用水造架？
我即刻拎紙巾比佢，幫佢拎住幅畫
拉佢企埋一邊喊，廢事阻住條街。


「如果我個陣肯關心呀鋒就唔會咁啦！我明明知道佢同呀俊關係唔好，我明明知道呀俊只係唔識表達自己，但我……我因為疏遠呀鋒……所以對佢不聞不問……」

Sharon一邊講，個頭向前挨住我膊頭。





「妳點解會對呀鋒咁好……明明妳係外人黎架咋！點解……點解我地反而仲比唔上妳？呢d野應該係我地做架！」

我沉默，一時間唔知點安慰佢好。


人就係咁
有時外人，比起親友更加明白你、關心你。
可能因為對方一直係你身邊，令你麻木左
佢係你身邊既日子，你早已習以為常
你冇諗過有日會失去佢
你以為只係佢一時鬧情緒
你以為佢只係講下笑
你以為佢只係吹水，佢唔會真係去死

你以為佢不嬲都係鑽牛角尖，一向都係咁灰




所以你以為佢會一直咁樣落去
一直到永遠
一直陪到你老


直到有日，佢真係實踐左佢講既說話
你至發現
原來佢講堅架
原來一個伏筆真係可以鋪足六、七、八年
你開始懊悔，點解佢係你身邊咁耐，你睇唔到佢？
點解離遠望住佢既人，反而比你睇得更清楚？
點解佢同你講左咁多年，你都唔相信佢真係會自殺？

但無論你幾後悔，佢已經死左啦，
佢唔會返黎再同你呻，佢到底有幾唔開心






喂，你見唔見啊
你身邊會唔會都有一個人
無論係你老死又好，萍水相逢又好，高登巴打都好
佢會唔會一早等緊你救佢，叫曬救命
而你一直冇理會佢呀？

係好麻煩
但
佢係人命黎架