【突發】有個巴打PM我，話我聽佢死左。: 拾壹

「就係佢講既三隻狗……冇兄弟姐妹？」我呆左呆，先至醒起鋒哥一開始比我既pm。

「妳講咩話？」呀俊突然有d嬲，一野推我埋牆度追問，「到底佢死前同妳講過咩黎？妳係咪一早知佢會自殺！」

「唔係死之前……其實我根本唔係你地學校既人，我唔係佢個級既……」

「夠啦，呀俊！你聽佢解釋先。」Sharon走過黎，拉走發曬火既呀俊。

於是我就拎手機開返d pm比呀俊睇，解釋曬成件事佢聽。





「佢咩意思？佢覺得我地係狗？佢生時要爸媽咁擔心佢，死後仲要話我地係狗？正賤人……」呀俊更加激動，想衝去整爛幅油畫。


「你冷靜d先！人都唔係度，發脾氣都冇用！」Sharon盡力扯住佢。

「係囉，同埋，d pm根本証明唔到依家用緊呢個acc既人係呀鋒本人，可能幅畫係另有意思呢。」

「我唔會原諒佢！你地同我走啊！走啊！唔好再提起呢個人！」

呀俊好用力咁推我同Sharon出去，仲掟左幅畫出走廊。





「就當佢係冇兄弟姐妹啦！我唔識得呢個人！」

就係佢掟幅畫出去之後，幅畫反轉左，我地行埋去執個陣，先見到木製畫框既背面原來寫左d字。



《償還》






「幅畫叫償還？即係咩意思啊……」Sharon見我呆左，就行過黎睇。

呀俊企左係門口，望住我地。


「唔好怪佢，怪我就好，都係我既錯。」

突然間，我醒起呀鋒pm入面叫我唔好怪呀俊。

「唔通呀鋒覺得自己虧欠左你地，所以甘願承受你地對佢既厭惡，甚至認為自己死，就係對你地既償還？」

呀俊聽到，先係呆一呆，然後就轉身想閂鐵閘。

「你咪閂門住！」我企起身，行到佢門口，「你見到啦，呀鋒死唔係因為逃避責任、將所有野推比你，而係因為佢見你地平時咁憎佢，令佢太自責！就係因為你d態度咁小朋友咁暴躁，先會導致佢自殺咋！」





呀俊背向我企係度
但唔知點解直覺話比我知
佢偷偷地喊緊。

「其實你咁激動、咁大反應，你根本就好在乎你呀哥，係咪？」呀俊聽到，忽然緊握拳頭，「你呀哥可能讀書冇你咁叻，淨係中意畫畫，呢d野我都明，因為呢個係現實社會。但係，如果你肯坦白表達出你有幾擔心佢，而唔係一直係學校扮唔識佢、係屋企就惡言相向，佢就唔會咁自責，然後就唔會……」

「其實……」呀俊突然有d哽咽，「當日話佢係狗、話自己冇兄弟姐妹既人，係我講既。或者，係佢眼中，我地唔理解佢，反而不停責怪佢，我地先至似惡犬……但點解，佢唔直接反擊我，而係責怪自己……」

「夠啦艾莉嘉，比佢一個人靜下啦。」Sharon拎起幅畫，想我同佢一齊走。


走到lift口時，我回頭一望，只見呀俊捱住鐵閘坐左係度，抱膝痛哭。