【突發】有個巴打PM我，話我聽佢死左。: 拾

「喂！呢邊呀！」第二日，Sarah企係一邊向我揮手
等埋我一齊上去搵呀鋒細佬。

咁講親女，高登仔都係最關心條女索唔索架姐
循例講下Sharon當日既裝束
Sharon著左一條連身白色裙，另外加對普通平底鞋
唔駛問身材，之前都講過Sharon好瘦
其實我本身都已經係瘦既人（我得103磅），佢比我更瘦一個碼。
不過Sharon係眼大大、鼻高既女仔，如果要搵個人做例子
我會形容係溫柔、小鳥依人版既龔嘉欣。






「等左好耐呀？」我問Sharon。

「唔係呀，我都係岩岩到。」

「咦，你識路既？」

「以前初中同班個陣有做過project，所以我上過去。」





「哦，咁你應該都見過呀鋒細佬啦？」

「見過幾面啦，不過佢地關係唔好，所佢都好少同我講野。」

「哎呀，諗住如果你同佢有交情，可以勸佢比幅畫我添。」

「我盡力啦……」







冇耐，我地架lift就到左呀鋒屋企個層。

「係喎，唔記得問你，佢屋企d狗惡唔惡架？我其實中意貓，我怕狗既。」

「狗？」

「係呀，呀鋒個pm話佢有養狗既，仲要係三隻狗。」

「下……你係咪記錯左呀？呢度係公屋喎，理論上唔比養架，仲要三隻，一定嘈到比人發現。不過我對上一次上佢屋企已經係好多年前既事，我都唔知佢後尾點啦。」


我當堂打個突，係喎，我都唔記得左公屋係唔比養狗。
不過就快到門口，又可能係我記錯左，我就廢事開手機check pm。






「呀鋒細佬叫咩名呀？」

「係喎，你唔知佢叫咩名，佢叫呀俊。」

（冇得抽冇得笑，因為佢真係幾靚仔既）


「呀俊！！開門呀！！」我撳完門鐘後，一邊拍鐵閘大叫。

「又係你？我咪講左我唔會比幅畫你……Sharon？」呀俊開左入面度門，見到Sharon嚇到呆左。

「嗨，好耐冇見。我地黎係想攞返呀鋒幅畫架。」

「我唔知你地講咩野畫。」呀俊諗住轉身閂門。





「你真係咁憎你呀哥咩？呢個可能係你哥既遺願黎架！」

「遺願？」呀俊突然激動起來，「遺願大曬呀？以前，佢明知我地屋企冇錢，呀爸呀媽工作得咁辛苦，佢就日日淨係識得畫畫。依家乜都冇講低，就走去食藥自殺，拋棄我地全家人。以前得我一個肯讀書，佢就話靠曬我第時養家，然後自己走去玩自殺，推曬所有責任比我！」

我同Sharon比呀俊嚇到呆左企係度，
隔離屋個呀伯又開門食花生睇熱鬧。


「畫呀嘛？佢咁中意畫呀嘛！死前都想拎返幅畫呀嘛！好！我比你地拎走，永遠都唔好比返我keep！反正我一早就想扔曬佢d野！」

佢開左鐵閘，然後衝入房拎一幅比大布蓋住既油畫。
油畫size算大，都有半個人既高度
呀俊拎出黎個陣都要d力氣。

「等我幫你啦……」Sharon上前入屋想幫呀俊拎。





「唔駛！我唔似佢，我唔駛樣樣野都靠你幫我！」

「但個畫框應該會好重喎……」

「我自己得啦！」呀俊想批肘趕走Sharon個陣
唔小心Sir左塊布落黎。


佢地望住幅畫，嚇到呆左企係度
於是企係門口既我，就行入去睇下發生咩事。



畫入面，有個男仔比三隻狗咬




相當血腥恐怖，個男仔四肢同皮膚都咬到好似就快甩出黎咁。


奇怪既係，個男仔既表情竟然係一臉笑容。