【突發】有個巴打PM我，話我聽佢死左。: 玖

當我沉思緊鋒哥細佬番說話個陣
我行到走廊左邊盡頭既lift口前
呢個時候我先發現原來右邊盡頭企左一個女人。

個女人比我矮，體型瘦削，估計都有五十歲。
佢眼定定咁望實我，郁都唔郁，面如死灰成隻鬼咁


突然間lift到，我即刻衝入去撳閂門
嚇死我咩，d人話公屋比較邪，唔通係真？！






呢個時候，我終於收到鋒哥既pm
早唔send遲唔send，依家做鬼都做到咁臭寸既

主題：「唔好怪佢。」
內容：「怪我就好，都係我既錯。你介唔介意聽日去多一次搵佢，我求下你。幅畫好重要。」


唔係下化，你細佬咁好脾氣，我仲要去？




於是我決定打電話問下Sharon意見
睇下有冇辦法哄到佢細佬比幅畫我。


「呀鋒細佬？我之前都有聽佢提起過既，但我唔太清楚喎……」

「佢地關係係咪好差架？」

「我估係佢細佬單方面唔中意啊哥掛。佢細佬都係我地學校架，細我地一屆。不過佢細佬好出名架，讀書好叻，成日做優異生、拎獎學金。」





「咁所以，佢就鄙視呀鋒？」

「都似係，有時學校撞到對方，佢細佬都會扮睇唔到閃人。」

突然我諗起佢細佬話呀鋒係「比d畫害死」
難道係因為鄙視呀鋒搞藝術，不務正業？


「係呢……艾莉嘉，你係咪仲有同高登個呀鋒聯絡啊？」

「係呀，我地有事個陣就會pm往來咁囉。」

「我覺得呢，你都係疏遠佢比較好。我當然信呀鋒係好人，但上次你講完風鈴件事之後，個晚我有認真諗過，我覺得件事太唔合理，點會有死人用pm……」

「呢層我都知……」





「我擔心你有危險啊。你諗下，每次佢叫你去邊，你就跟住做，例如去佢屋企，去學校。萬一佢係冒認既，背後跟住你既話，咁點算？」

Sharon講一講，我先至意識到自己真係太癲
佢咁講我先發現原來我d行為真係好危險。

「不過，佢每次講既人，我都真係搵得到……」

「咁啦，一係聽日我同你一齊去呀鋒屋企啦，我唔想你一個人冒險呀。而且……當時我有份傷害呀鋒，我有責任去完成佢既心願。」

於是我同Sharon就約定左聽日一齊去搵呀鋒細佬。