【突發】有個巴打PM我，話我聽佢死左。: 捌

主題：「幫我做件事」
內容：「我有一幅畫，一直放係我間房。我有一個細佬，可唔可以叫佢比幅畫你。我想比幅畫我VA老師。夜晚7點前，屋企只有我細佬係度。我地址如下……」


玩咩鋒哥，幫你幫到上埋屋企。
不過一不做二不休，反正冇咩做又見佢咁慘
我就決定去佢屋企度
我望一望鋒哥地址，原來鋒哥係住公屋既。






（叮噹……）

「妳搵邊位呀？」開門既係一個同我年齡相約既男仔。

「我係XX鋒既朋友，你係咪佢細佬呀？」

「妳搵錯地方。我唔識咁既人。」

我行後兩步望下門口，明明就冇搵錯地方。
WTF？唔通呢個係佢細佬？




點解佢唔肯認鋒哥呢？

點知我都未問，佢就砰一聲閂左門。


「喂！你咪閂門呀！妳明明係佢細佬！」我好用力咁拍個鐵閘。

「走啦妳！」屋入面傳出佢細佬大叫既聲。






「個姐姐做緊咩……」門外有個小朋友拖住佢媽指住我問

「乜事咁嘈呀？嘈生曬……」有個呀伯開門伸個頭出黎鬧我。

我見個勢都係失敗，決定呢埋一二邊等一陣先
廢事嘈親人，順便send個pm問下鋒哥點算。


主題：「喂，你細佬唔認你喎。」
內容：「佢依家閂左門，唔肯開，話唔識你喎。」


點知等左成個鐘，鋒哥都冇覆我。






正當我想放棄個陣，佢細佬咁岩出黎倒垃圾。

「喂！你終於肯出黎！」

「頂，乜妳仲未走……妳想點呀？」

「我有事搵你。你哥話有幅畫係佢房，叫我拎。」

「哈……又係畫……」細佬冷笑一下，然後試圖走返入屋想閂門。

「喂！你咪閂門呀！」我衝上前撳住度門。

「唔好再同我提起個畫字！我唔知佢有咩畫！有既我都會燒曬佢！」

「你哥都已經唔係度，你何必仲要咁樣……」





「哈！就係因為d畫，佢先會死！妳再唔走我就報警！」

我只好作罷鬆手比佢閂門。


點解個細佬會話鋒哥係因為d畫而死架呢？