有一晚一個來電: 我們仨(上)
有時候，黑暗籠罩既感覺真係好恐怖，
腦部訊息突如其來咁被黑暗所吞噬，
身體功能逐漸逐漸中斷，
果陣，你想開口講野，哪怕係一句說話，
一種聲音，都冇可能發出得到。
即使我心入面有幾多野想講：
媽，對唔住，我又令你擔心。
媽，我係咪要走先？
老豆，你可唔可以唔好再令阿媽傷心？
家姐，我地既誤會可唔可以當打和？
阿紫，我愛你，你愛我嗎？
仲有，
阿力，你差我一舊未還。
呢幾句入面，我又可以揀倒邊句講？
呢幾句入面，我又究竟可唔可以完全講晒一句既內容？
上天，係咪要係我最璀璨既時候剝奪晒我既一切？
我實在唔想失去我既親人，
我既朋友，
仲有我既愛人啊，
究竟有冇人聽到？？
呢個時候，我突然間感受到有點暖意．．．
我只見到一道白光，
係呢道白光所散發出黎嗎？
突然，視線被迫向住白光所前進，
一路向前，一路向前，
由慢而快，由慢而快，
光芒愈黎愈近了．．．．．．
一道曙光，
頑固地突破我眼皮下既限制，
經過瞳孔直接到我眼神經，
令我突然有點刺眼，
我用手掩住眼睛．．．．
嗯？
原來我雙手可以郁啦喎？
我開始想習慣外周環境果一種
明亮既光線，但事實想需要花少少時間。
我，係活著嗎？
我慢慢，慢慢咁睜開眼睛，
用盡我身體既力氣，
去將呢個世界再次聯繫起黎。
終於，
我睇到了，
我實實在在咁，
睇到呢個世界。
第一個映入眼簾既，係我老母。
嗯？
原來，佢一直用隻手係咁摸我個額頭。
唔怪得，之前一直暖暖地．．．
我：媽？（聲音帶點沙啞，太耐冇講野．．．）
媽：你尋晚差ｄ嚇死我你知唔知？
我：我點解會係醫院？
媽：醫生話你痛暈左呀。
你暈左係屋企，係我叫白車送你入黎。
我：．．．．．
媽：家姐佢去買野過黎食，
而家都夜晚六點幾啦，你暈左大半日．．．
我仲以為上天要咁忍心送走我粒仔．．（開始有點飲泣）
我：媽，唔好咁啦，
呢ｄ醫院黎．．．
我而家咪係度．．．
媽：我倒杯水比你飲。
原來，我已經暈左大半日，
對我黎講，真係好似眨下眼咁．．．
好彩，我仲有機會醒返，
洞悉到眨眼過後既一切，
只要係活著，
就已經夠美好。
我一路食野，
一路問我媽：其實食醫院野咪得，駛咩特登買呢？
媽：醫院野邊度好食架？
病左就食好少少，有ｄ營養既野。
我：而家都係食粥姐，咪又係街邊野。
媽：聽日阿媽燉返ｄ雞湯比你補下身。
我：唔該．．
係呢，我幾時出得院？
媽：醫生話．．做埋個檢查就出得。
唉，又做檢查．．
究竟我個病幾時先會好？
今次暈抵左，
究竟係咪病情惡化左既先兆？
媽繼續話：咁你自己抖下啦，
差唔多過探病時間，
聽日收工再黎睇你。
媽同家姐走左之後，
病房雖然唔只係得我一個，
但感覺上，
就好似孤身隻影咁。
四周圍充斥住既藥水氣味，
忙得七手八腳既護士，
忙裡偷閒既清潔工人，
每日每日，都係度為病人服務，
真係唔簡單啊。
幸好我唔係ｄ咩手腳郁動有困難既病，
如果唔係，咁細個就要人照顧一舉一動，
內心一定唔好受。
望住床邊左右兩邊既床位，以至床上既病人，
雖然大家都唔熟識大家，
但諷刺既係，大家都係同一個時間，同一個空間裡面，
以咁樣既模式相遇，歸根究底都算是一種緣份。
每個臥床既病人，都有佢自己既故事，
自己既難處，自己既憂慮，甚至係自己既哀傷。
由細到大，
最憎最討厭既事，就係住院。
除左訓覺之外，根本唔知有咩好做．．
啊！實在太悶啦！
果一刻，我既心入面，只係得阿紫。
阿紫，你做緊咩呢．．．．？
突然先醒起，原來我根本冇手提係身。
我惟有起身，
出去用公眾電話，打比阿紫。
嗯，醫院入面，處處都係眾生相呀。
步行短短數十步，數十步，
經過無數擦身而過既護士們，
臉上總係板起慌忙既樣子。
望住步伐急促，匆匆而過既醫生，
一定係有咩特別事發生了吧，
定係，仲有手術接住要做呢？
曾幾何時，我想做一位醫生，
果時覺得，能夠醫好一位病人，
見到家屬朋友既喜悅同重燃希望既模樣，
心入面就好安慰，好滿足。
呢種使命感，我依然保留到而家，
縱使我冇可能做一位醫生。
望住係凳上面默默等待中既家屬，朋友，
臉上一股憔悴，一股無奈，彷彿已經為左
自己最親既人，花左好多時間同心機。
我打左個電話比阿紫。
我：阿紫．．
阿紫：阿樂，做緊咩呀？
點解你用無來電打黎既？
我：．．．．．
阿紫：嗯？
我：阿紫．．
阿紫：點呀傻佬，係咪有咩事呀？
我：我尋晚．．
痛到暈抵左係屋企，
而家係ｘｘｘ醫院留一兩晚。
阿紫聽到，即刻好大反應：下？阿樂你入左醫院？
點解會咁架．．．．．
嚴唔嚴重呀？醫生點講？
我：仲未知呀，要做一做檢查先清楚。
我費事瞞你，所以而家黎話聲你知．．
阿紫，你知唔知我暈抵果刻真係好驚，
好驚我以後都再見唔到你．．．
阿紫：傻佬，唔好亂講野啦。
你唔會有事架，
暑假我地仲要一齊過架麻。
拿你快ｄ休息，快ｄ好返出院，
我地一齊去拍拖好唔好？
我：嗯。
阿紫，
我好掛住你．．．．
阿紫：咁你更加要加油，
快ｄ出院就見到我啦，去休息啦。
同阿紫傾完後，
聽日將會接受檢查，
再次了解自己病情．．．
第二朝起身，
一大清早，就已經有人黎睇我。
邊個？
咪係護士姐姐囉。
護士姐姐：阿樂，早晨。
我：早晨．．
護士姐姐：循例都要探個熱既。
我：嗯。
護士望望病歷，話：有冇見心口唔舒服，
或者見頭暈呀？
我諗左一陣，講：冇呀，只係尋晚訓得唔好。
護士姐姐笑住話：好多人第一次入院都係咁架啦。
然後護士拎左我支探熱針，
當然，冇發燒啦。
根住就要去檢查。
檢查詳細就唔多詳述了，
完結時，我問醫生：我個病係咪嚴重左？
醫生：其實要睇你病發時既痛楚情況去作定論，
如果你往後發病時，痛楚明顯大過以前，
咁就證明你真係嚴重左，同時你要留意
個頻密程度。
我：即係．．．而家都未下倒定論住？
會唔會再有類似今次事件發生架？
醫生：其實好難講，好彩既係，
你到而家只係發生過一次。
我個病，唔通，永遠都只係停留係觀察期嗎？
真係唔可以完完全全根治咩？
處於一個咁被動既角色，
我就更加對我自己冇咩安全感。
萬一，有一日再係咁，咁點算？
萬一，痛楚比以前加劇，咁我仲可唔可以
維持一個正常人既生活？
醫生繼續話：不過，你始終要有個心理準備，
今次呢件事，過後可以係冇野，
亦可以係一個警號。
你自己都要多點留意。
我點點頭，如無意外，
我聽日已經可以出院。
住左一晚醫院，
已經習慣左果種藥水濃烈既氣味。
諗諗下，好似好耐冇接觸過陽光咁。
所以我就稍稍出去醫院出面，
感受係陽光帶比我既刺激。
呢種感覺，真係好懷念。
縱然我總唔可以好似自由人咁，
周圍係醫院入面行，
所以冇幾耐，我都返返去病床上。
望住電視機，
望住沒意思既節目，
成個人都變得沒意思起黎。
好彩只係住短短兩日，
如果長期住既，
我諗我一定會發癲。
好不容易撐到下晝五點幾，
哎，時間過得真係慢，令人窒息。
係果時，我再次見到一位熟悉既身影。
一位熟悉既面孔，
同時，又令我又驚又喜。
我：阿紫？？
點解．．你會黎探我．．．
短短住院兩日，我真係冇諗過會有咩人黎探我。
更何況係阿紫．．．
阿紫：我黎探我個好男友架。
我：你個好男友而家唔好啦．．
阿紫：點解呀？
我：病到要訓醫院。
阿紫坐抵左，然後捉住我雙手。
阿紫：傻佬，咁你而家有冇好ｄ呀？
醫生點講？
我：其實都未知，仲係觀察期。
係呢，點解你會出到黎？
阿紫：我同屋企人講話有朋友入左院，
咪可以出黎探下囉，
最緊要既係睇下你有冇事呀麻。
你又冇帶手提，我點知你會唔會有咩大件事架。
其實阿紫黎左，我真係好感動。
因為我真係萬萬都想唔到，佢會為左我，
特登山長水遠答車黎。
我：冇咩事架啦，唔駛擔心，
我聽日可以出院。
阿紫：咩冇事喎，你睇下你個人都憔悴晒。
我：哈，可能醫院訓得唔慣掛，
好易紮醒。
我望望阿紫手腕，
嗯，果然有戴住我送比佢條紫水晶。
我：條鏈，真係好襯你。
戴起上黎好好睇。
阿紫：都係阿樂你有眼光姐。
我：係呢，而家暑假，
我地去邊度玩好呀？
阿紫：傻佬，仲掛住玩既你。
你而家最緊要係好好養病麻，
你都識得講係觀察期。
我果時聽到阿紫咁講，
即刻有點失落．．
我：我呢個病，都唔知要觀察到幾時．．．
唔通一日未有結果，
一日都唔可以同你一齊出去咩？
阿紫：唔係，我係擔心你出去時無啦啦會暈抵呀。
乖啦，比自己少少時間，睇下會唔會成日病發先啦。
我扁扁咀，冇出聲。
我心知道阿紫係為我好，
但我更加想把握暑假呢個機會，
好好咁同阿紫一齊。
我扁扁咀，冇出聲。
我心知道阿紫係為我好，
但我更加想把握暑假呢個機會，
好好咁同阿紫一齊。
阿紫繼續話：傻佬，做咩扁咀呀？
我：嗯，冇野啊。
阿紫：我話怕你出去暈抵姐，
咁我地唔出去咪得囉．．．
我聽到阿紫咁講，
我有ｄ困惑。
我：即係點？
阿紫：我地係屋企，唔出街，
咁有咩事我都可以睇住你呀麻。
我：咁即係．．可以一齊見面．．？
阿紫摸摸我個頭，話：係呀，費事有人一陣掛到心臟病發啦。
我諗返起果次係阿紫屋企，差ｄ比佢老豆發現既情況，
心入面仲係猶有餘悸，上次真係好好彩，萬一今次又撞正咁點算？
我：但係．．去你屋企．．我怕又會撞到．．．
阿紫：所以，今次我想去阿樂你屋企啊。
橫掂都未睇過你屋企點既。
我：我屋企咁細，邊度好睇呢？
阿紫：傻既，邊個話要睇你屋企大唔大姐。
我只係想睇屬於你既野咋麻。
我：阿紫．．．．
多謝你。
阿紫溫柔咁講：多謝我咩呀？
我：我知你知我任性，
病時都想不顧一切去見你，
你怕令我失望，唔開心，所以先會提議黎我屋企，
係咪？
阿紫捉緊我雙手，
令我更加感受到佢既溫暖，
佢既體貼。
阿紫：傻佬，邊個話只係為左你架，
我自己都想見你架麻，
係為我左我自己著想咋。
阿紫咁講，我就更加感動。
我：我一訓醫院，你就可以出得黎陪我。
如果我日日都訓，我地咪日日都可以一齊囉？
阿紫：唔准你咁講呀，
邊有人好似你咁諗架，
你日日住院，我就唔黎探你，
所以一定唔可以再入返黎呀！
我：嗯，知道！
之後，阿紫陪左我一陣，
都要離開，係果一刻我真係覺得，
阿紫係全世界最好既女仔。
出左院之後，往後果一個星期，
我都係屋企，好好休養。
之前，我實萬萬都估唔到，
暑假呢段時間，竟然係要拎黎養病，
只怪我身體唔爭氣吧。
七月尾時，阿紫話今日會黎我屋企。
所以我就更加要好好咁，
趁朝早既時間，
執下屋企ｄ雜物，
清理好房間既書台。
搞掂好無耐之後，
阿紫終於打電話黎，
同我講話佢差唔多到地鐵站。
咁我就拿拿林落去接佢啦！
落到去，已經見阿紫等緊我。
我：sorry呀，等左好耐？
阿紫：唔係呀，
行囉。
我：你應該未黎過呢度吧。
阿紫：未呀，感覺好新鮮。
去度我幢大廈，
上埋我住既樓層，
因為阿紫係度既關係，
明知係去緊自己屋企，
都有點緊張。
入到屋後，
我：登登登登，呢度就係小弟既寒舍啦。
阿紫：哈哈，唔係呀，幾整齊舒服呀個感覺。
梗係，因為我執過黎呀麻！
阿紫除左鞋後，就去行埋去睇下我個電視櫃。
阿紫：阿樂，你有好多公仔喎。
我：哈哈，果ｄ已經係好細個時儲開架啦，
而家擺晒係度，封晒塵。
我繼續話：係呢，你食左野未？
阿紫：未呀，你呢？
我：我都未，頭先又醒唔起買埋上黎，
你想食咩呀？我而家落去買呀。
阿紫：傻佬，都一場上到黎，唔駛買啦，
煮咪得囉。
我：但我屋企．．得ｄ公仔面咋喎。
阿紫：加料囉，睇下雪櫃有ｄ咩。
我就去搵搵雪櫃，睇下有ｄ咩，
見到仲有罐午餐肉。
我：我地整餐蛋面啦！
阿紫：哈哈，好呀。
我黎幫手呀。
係果時，我推住阿紫出去廳度，
同佢講：拿，你坐係度睇電視就得架啦，
我去煮啦。
煎隻蛋同午餐肉呢ｄ咁簡單既野，
當然難唔倒我。
煮煮下期間，阿紫無啦啦入左黎，
從後面攬住我。
阿紫：阿樂，你整好未呀？
我：未呀傻妹，
等多陣啦，好快好快。
阿紫錫左我面豬一啖之後
就話：咁我出返去等你啦。
煮完野食之後，
我地就開始食啦。
我：我餵你呀，阿紫。
阿紫然後就微笑住咁張開口，
逐ｄ逐ｄ咁食ｄ面。
係果時候，我無啦啦諗到樣提議．．．
屌我都唔明點個腦咁多無聊野
我就話：阿紫，不如你食住呢一條面既一邊，
我食住另一邊，睇下邊個最快斷開就當輸囉。
阿紫：哈哈，好呀，駛驚你。
然後我同阿紫就各自咬住同一條面既兩邊，
一路慢慢咁食，由條面本身好長，
大家都慢慢食到變得好短，
同時大家既咀亦愈黎愈接近大家。
咁我當然老死都唔斷開啦，
到差ｄ錫倒既時候，
阿紫就斷開左。
我：喔！你輸左。
阿紫：哈哈，其實係我羸左至岩，
因為斷開左，你咪錫唔倒我囉。
我：哎呀，咁奸茅既你，
等我吱死你先得。
阿紫：哈哈，唔好唔好，
我地再黎，今次唔會斷架啦。
估唔到，兩個人食碗面，都可以玩得一餐。
食完面後，我入去廚房洗好碗，
而阿紫就負責抹乾。
我：平時係屋企，呢ｄ野應該唔駛你做吧？
阿紫：嗯，多數我工人做，不過如果得閒我都會幫下手既。
洗完碗後，
阿紫：阿樂，可唔可以睇下你間房？
我：嗯，冇問題呀。
其實我間房冇咩特別，
得張書台，衣櫃，上下格床。
阿紫入到我間房之後，
因為有張上下格床，
阿紫就問：你訓上格定下格架？
我：上格架。
阿紫：嘻，可以上去嗎？
我點點頭。
我：我開一開冷氣比你，
我驚你熱。
阿紫：唔該你呀。
咦！有個熊仔係度喎，
你攬住黎訓架？
我：哈哈，係呀，
我一兩歲時已經係度，
訓覺都已經慣左攬住訓。
阿紫：阿樂，你都上埋黎一齊呀。
我：下．．．．
阿紫：你怕？
我：唔係。
然後，我就上左去上格床，
同阿紫一齊。
我：sorry呀，張床冇你果張大，
可能會迫少少。
阿紫：唔緊要呀。
我同阿紫，
大家就坐係張床度，蓋住被。
我：想唔想睇下我以前細個ｄ相？
阿紫：好喎，快ｄ拎出黎呀。
然後我就係床邊既櫃筒拎左幾本陳年相簿出黎。
一路同阿紫睇住我既童年，一路講我既故事。
係果刻，真係好平靜，好舒服。
就好似呢段純音樂咁，希望大家一路聽住，一路睇我以下既故。
http://www.youtube.com/watch?v=94KcXdoiu1s&feature=related
（其實theholiday，係一套我好鍾意好鍾意既愛情電影，
小品故事平淡而寫實，hanszimmer既配樂更加係無容置疑。）
係果時，我就係背後，攬住阿紫。
一路講我既童年故事，
包括，我住係邊，同邊間幼稚園，邊間小學，
平時有咩做等等。
阿紫話我細個時個樣得意好多，可愛好多。
呢點我真係好認同，
我媽話，我細個時，好多人都想爭住抱我錫我。
當然大個左之後，就冇女仔爭住抱我錫我啦！
我分享完我個童年之後，
就到阿紫分享返比我聽。
我就一路，靜靜咁攬住佢，挨係佢膊頭，
一路聽佢說故事。
雖然，我一出世就帶住心臟不健全既病，
但係果一刻，
我實在好感謝上天，同時賜比我功能正常既五官。
可以令我對眼，見到咁可愛，迷人又體貼既阿紫；
雙耳，聽到佢天籟動聽既聲音；
鼻子，聞到阿紫獨有既髮香及體香；
雙手，觸及到佢身體柔軟既香肌；
甚至令我能夠輕嚐初戀帶比我既甘甜。
果剎那，我覺得愛情對我黎講，真係無價。
係果刻，擁抱住阿紫，就好似擁抱住呢個世界咁，
我人生就好似已經冇遺憾，冇憂愁，冇悲傷。
只要有阿紫係我身邊，我就能夠有勇氣去走過人生每一個階段。
同時亦令我更加覺得人生如戲，
一個咁完美既人，竟然會愛一個，咁唔完美既我。
你話怎麼可能！？
暑假八月期間，我都有保持住同阿紫出去，
頻率亦都相對比較密左，因為始於係放假唔駛返學既關係麻。
其實我唔期望太多，我只係希望我地可以做一對普通既情侶就足夠。
我仲記得，我同阿紫講過呢幾句說話．．．
我：阿紫，你識彈琴識音樂，真係好叻女。
阿紫：你想學，我都可以教你架。
我：對我黎講，
我既人生就好似一個空白既五線譜一樣。
阿紫：點解係空白既？
我：因為係未遇到你之前，
我既五線譜，只係得留白既位置，
冇任何高低。
直至．．．
阿紫：直至咩呀？
我：直至遇到你．．
而你．．就好似音符一樣，
為我既五線譜，留下印記，
令到我既生活，有高低起伏，
有停頓，有快，有慢。
直至．．愛上左你，先能夠幫我既人生．．．
譜出一首美滿而動人同時屬於我地兩個既樂章，
我既生命，先因妳而變得動聽。
我講完之後，阿紫冇出聲．．．
我見阿紫有點眼濕濕。
我：阿紫？
阿紫：阿樂．．．．
聽到你果番說話．．．
我真係好感動。
我：其實．．我都唔知點解會講倒ｄ咁既野．．．
好肉麻呀可．．
阿紫搖搖頭，話：嗯嗯，唔係呀，
比喻得好好呀，我真係好感動。
咁，如果要為我地首愛的旋律，
加上歌名，你會加咩名呀？
我：MyLove。
幸好，我個病都冇話有ｄ咩大問題。
暑假完左之後，已經係中三了。
因為中三既關係，
讀既科都多左，
功課亦比較忙起黎，
不過，始終我比較鍾意理科多ｄ．．
我依然有同阿紫保持住一個月出去一次既習慣。
係果刻，我以為我同阿紫，一路都會好地地咁發展，
我以為，我同阿紫，可以一直深愛住大家，
直到中三既聖誕，惡耗．．．．．．．．．．
中三上學期考試過後，
聖誕假期又到。
今年會係第二年同阿紫過既聖誕，
其實我地係考試前已經邀約好會去食晚飯睇燈飾，
我亦諗好左買咩聖誕禮物比阿紫。
大家都應該記得，阿紫鍾意啤啤熊。
不過我去過佢屋企兩次，佢將床上面，
都無一個啤啤熊既毛公仔。
有一日同朋友出去時，我見到一個幾岩我心水。
不過好細個，唔係要黎for攬住，
係當放係床邊做擺設only。
雖然我份人唔鍾意送擺設做禮物，
但見個熊仔手上係捧住個禮物盒，
而個禮物盒係可以打開，如果你細心既話。
（唔講真係唔覺係可以打開，果時係我手多先知）
咁我覺得幾有趣，所以先想買。
一路考試既時候，都冇咩問題，大家都有保持通話。
我考完試後果晚，我就好開心咁諗住搵阿紫。
我打電話去阿紫手提，
諗住問下佢聖誕既節目點樣安排，
叫佢比下意見，去咩餐廳食飯，食ｄ咩野等等。
不過，佢手提冇人聽。
咁我下意識覺得係佢沖緊涼，
因為平時都係咁上下呢個時候沖。
咁就諗住等佢打比我啦，
果時都夜晚十點幾。
我就一路上下網，
一路睇下野，
等下等下，
等到夜晚凌晨十二點幾，
都未有電話黎。
係果一刻，其實我內心有掙扎過打唔打比阿紫好，
不過可能佢今日考完試攰，
一返到屋企就訓左冇留意我打黎都未定。
所以我都係決定左下一日先搵，
費事阻住佢休息。
我自己亦都走左去訓覺。
到朝早，
十一點幾倒，
我就諗住比個morningcall叫醒個懶訓妹。
我打去果一刻，都仲係冇人聽。
心諗：呢個懶訓鬼呀，
有冇訓咁耐呀！因住訓肥你。
咁我就留左個言，
叫佢起身先搵我，我唔阻佢訓。
因為要等阿紫覆電話，
我又只好係屋企，
百無了賴，求求其其做下野就算。
冬天真係凍呀，
如果呢一刻有阿紫呢個人肉暖枕攬住你話幾好。
唔經唔覺，到左夜晚，
阿紫依然無覆我call，
我打電話去，
依然係冇人聽。
雖然阿紫好少咁無交待，
但我直覺覺得佢應該係有原因，
或者有少少事發生，先無打比我。
所以我都好體諒佢。
果日，係我頭一次（唔計阿紫去旅行），
足足有一整日多既時間，
冇同阿紫通過一次電話，傾過一次計．．．．
見仲有兩日就係我同阿紫約好左要出去睇燈飾既日子，
係果時我又搵唔到佢，
只好做下功課，消磨下時間。
正正因為我同阿紫每日既電話都已經成為一個習慣，
即使係冇聽佢把聲一日，我已經開始有ｄ忐忑不安。
原來我唔經唔覺已經咁依賴阿紫，
當一種習慣，有一日突然之間消失既時候，
原來失去既安全感係咁大，心入面係咁唔舒服。
我亦都唔想做一個煩人，時時刻刻炮轟住阿紫既手提，
我比好多空間比阿紫，盡量等佢打比我。
所以，我每日每日，都係由朝等到晚，
到每晚準時十點，我先會打一次，只係一次電話比佢．．．
平時假日既時候，我地會傾好幾個電話，
但係今個假日既呢一兩晚，就竟然一個聯絡都冇。
依舊，
12月23日既夜晚十點正，
電話第四次，沒有回音。
我心諗：阿紫，你到底係度做緊咩？
你．．到底係度諗緊咩？
我真係好希望你會搵返我，
即使你百忙之中，
起碼你都比個答案我，
話我知你平安，或者你收到我電話。
12月24日，朝早。
我起身既動作，就係即刻拎個手提電話黎望。
我唔係想望幾多點，而係我想知道，
到抵阿紫有冇打過比我，
有冇留過言比我，
甚或至乎，
有冇留底短訊比我。
結果，一個都冇．．．
我開始有ｄ緊張，
因為聽日，
就已經係約定出去既日子．．．
如果到今晚都冇回覆，
咁聽日既約會，
係咪已經代表住要取消？
聖誕一年一次既節日，
我真係唔想錯過，
每一年同你睇燈飾既機會。
無論每次既燈飾係咪一樣都好，
只要有你係我身邊，
我連呼吸一口空氣，
我都覺得與眾不同。
12月24日，夜晚十點正。
我每打一次電話，心入面都好緊張，心情都好複雜。
我心係打之前，一直默默咁唸住：
阿紫，拜託，拜託你一定要聽我電話。
然後我就慢慢撥打每一個號碼，
通左之後，我期待住每分每秒，
我：快ｄ，求下你，快ｄ聽我電話啦好唔好。
係果刻，我聽到了．．
係果刻，我聽到一把聲音。
不過，並唔係屬於阿紫，
而係屬於，手提轉去留言時，
果段無血無肉既，電話錄音：
你已經接駁到，xxxxxxxx，既留言信箱，
請你係咇一聲之後留抵口訊。
點解會咁？
我唔係要聽你把聲呀，
我唔係要晚晚，聽到電腦呢段留言錄音呀。
我係要阿紫把聲，可唔可以還返阿紫比我？
你可唔可以話比阿紫知，我係度搵緊佢呀！？
唉，我梗係痴左線．．．
同個電腦錄音講有咩用。
講到電話錄音，我好記得之前，
我同阿紫，係電話入面玩過一次roleplay．．
有一次，我打比阿紫既時候。
我：喂，阿紫呀？
阿紫：阿紫佢唔係度喎，
呢度係佢留言信箱，
請你係咇一聲之後留抵口訊呀，
咇－－！
我知道阿紫特登玩野，
所以我就陪埋佢，玩埋一份。
我：哦，我想搵阿紫呀，
麻煩你幫我同佢講，
有個愛人係度苦苦咁等佢電話呀。
阿紫：先生，你留完言就好收線架啦喎，
我會幫你轉達比阿紫知架啦。
我：哦，咁你係邊個呀？
阿紫：我係錄音小姐囉，
專誠幫人錄音，轉達口訊架。
我：係呀，我第一次知咋。
估唔到你把聲都幾甜喎，
你人一定生得好靚好可愛架啦。
阿紫：先生，你已經有女朋友架啦喎，
仲對我講呢ｄ說話既？
我：係呀，我真係好愛佢架，
不過佢而家扮緊錄音小姐，
所以我惟有等佢扮完先搵佢啦。
阿紫：哈哈，阿樂，咁衰架啦，
唔玩埋落去。