有一晚一個來電: 流星殞落的瞬間(下)
咁我再將個眼球剪開ｄ，整走埋ｄ姐喱狀物質，
拎塊晶狀體出黎，就搞掂。
不過Amy仲係慢手慢腳，
又要我幫佢。
Amy：估唔到你呢ｄ都幾有天份喎！
咁快手既！
我：呢ｄ有天份有鬼用咩！唔通第時做驗屍咩真係！
講真，牛眼真係算小兒科，
期後果ｄ豬心，蚱蜢，老鼠咪一樣咁解剖！
有次解剖蚱蜢我特登留左隻腳送比人，
嚇到條友雞咁腳走！
我：拿！拎埋出黎比你啦！
拎去洗洗佢做紀念品啦！
Amy：妖，我先唔做呀，玩完就掉左佢啦～！
仲係度揚揚揚！唔好掂到我呀同你講！
唔係頭都擰甩你！
我：得啦，麻鬼煩！
Amy：唉，你話見住呢ｄ之後點有胃口食飯呀！
我：我好有胃口喎，你唔食我食埋你果份！
Amy：你就想呀！
完左科學堂之後，過埋兩堂既沉悶英文，
我亦終於放學．．．．．．
唉，不過仲未走得呢，
又要重做！！
放左學，我就約左阿欣去
小食部等，諗住拿拿林做埋佢可以返屋企。
陰天加上落雨既天氣，
令到成個人都冇咩精神，
學習力大減（藉口）
阿欣：喂，阿樂，
坐係度啦！
我：哦，
今次麻煩你啦，
我真係完全唔識聯立方程。
阿欣：唔識又唔早ｄ黎問我？
如果唔係就唔駛重做啦！
我：費事特登麻煩你呀麻．．
阿欣：咁你而家咪又係麻煩我，
真係唔知你個腦裝咩架！
我：我數感差呀麻．．
阿欣：超，有得賴架咩呢ｄ！
九成係你上堂唔聽書！
我：哈，一半一半啦，
點及你講得咁好聽！
阿欣見我咁講一講，
即刻有點面紅紅咁望住我，
冇比反應．．．
其實我係詞不達意．．．
我澄清：我係想講，
老師唔及得你講咁易明姐。
阿欣笑住：你話如果你冇遇著我既，
你數學會點呀拿？
我：肥囉，仲駛問既！
阿欣：咁即係話我對你黎講好重要？
我比阿欣咁樣講一講，
我目定口呆．．．．
我轉過神：快ｄ做啦，
一陣五點教唔倒就大獲啦！
阿欣：嗯，有幾多題？
我：五題。
阿欣：咁好快姐！
然後，阿紫就由頭一路教我，
點樣代入，搵返x同y個value出黎。
其實，有時數學真係人夾人。
對於我呢ｄ天生蠢既人，
數學老師果種急速節奏實在唔岩我。
呢個都係令我會搵阿欣既原因，
起碼佢既教法，
會令我真係明白，同埋有進步。
我：係呢，阿欣．．．
阿欣：嗯？
我：你有冇諗過做數學老師呢？
你咁識教人．．
阿欣：我先唔鍾意做老師呀！
你知我燥底開架啦！
對住咁多好似你咁蠢既人，
實日日開火都似呀！
我：哈哈，咁又係．．
真係可惜．．
阿欣：咁你呢？你點解英文會咁勁既？
我：我？我都唔知呀，
天生英文觸覺比人好掛．．．．
阿欣：哈，咁啦，第時你教一教我英文呀，
好唔好呀？
我：但你大我兩年喎．．．
阿欣：咁我有ｄ基本野未學好呀麻！
係咪咁都托我手肘呀！！
我：唔係唔係，點敢呢！
欣姐叫到．．．
阿欣：乖！
過多一陣，我終於做完好果五題，
就諗住去交．．．
我：咁我去交野先啦，
你要返屋企既你行先啦！
阿欣：嗯．．．．
如是者，我就去左交返功課比miss。
交完野比miss之後。
咁我就去返校門走，
點知出到去，
我見到阿欣仲係度等緊．．．
我：咦？點解你仲唔走企係門口既？
阿欣：出面落緊大雨呀麻！
我：你冇帶傘？
阿欣拎一拎頭。
我有點驚訝：咁你返學果時咪濕晒囉？
阿欣：冇呀，因為我返得早，
所以趕得切未落雨之前返黎．．
估唔到，而家仲係咁大雨！
我：咁大頭蝦既你（其實我自己又係，要老母提先識）
我遮埋你啦！行啦！
咁等到幾時呀！
阿欣：你唔怕．．？
我：怕咩？
於是，我就同阿欣，
雙雙咁行去地鐵站。
阿欣：好彩撞返你，如果唔係都唔知點算！
我：春天成日落雨就最好時時放把傘係書包麻！
不過咁既天氣，我真係好憎．．
阿欣：係囉，又濕笠笠。
因為我把傘係縮骨果種，
比較細，所以其實兩個人都好勉強。
再加上，雨勢都幾大．．
從雨傘滴落黎既水花，
有時會濺到膊頭上．．．
我費事阿欣淋濕，所以我把傘專登
移過阿欣果邊少少，諗住佢可以遮大ｄ，
我就冇咩所謂．．．
阿欣留意到我膊頭濕左．．
阿欣：喂，阿樂，
你行入ｄ啦，咪顧住遮我先得架，
你搞到自己濕晒啦．．．
我：唔緊要啦，遮唔晒呀，
我濕好過你濕呀麻！
阿欣：唔好傻啦，一陣你淋病我咪仲過意唔去！
快啦，唔好嘈嘈閉啦。
我：哦，咁惡做咩呢．．
阿欣：咁係呀麻！
係呢個時間，我係褲袋拎左包紙巾比阿欣．．
我：你抹下你自己手臂啦，濕晒啦。
阿欣冇出聲，有點羞答咁接過包紙巾。
阿欣：阿樂你對每個人都係咁細心？
我：係呀，你而家先知？
阿欣：頂，唔係叫你讚自己呀！
我：咁人地有需要，我盡到力咪幫囉．．
冇話邊個唔幫邊個幫既．．．
阿欣：如果可以早ｄ識你咪幾好囉．．．
我：哈，咁又係呀，可以早ｄ問你數呀麻！
阿欣：妖，你只係掛住呢ｄ架咋！！
然後阿欣搣一搣我隻手臂，
痛到我呢．．．
我：你食咩大架，咁鬼大力既！
我冇力渣遮lu．．．
係呢個時候我特登拎開把傘，
等阿欣淋小小雨，當係報仇．．
阿欣即刻大叫左一下，
差ｄ令我耳聾：頂，咪玩啦，
濕晒啦。
然後阿欣即刻痴一痴埋黎我膊頭度．．．
我：喂，咪藉機抽水喎！我叫非禮呀！
阿欣即刻拍我隻手：鬼得閒抽你水呀！！
咸濕樂！（好似係你痴埋黎）
行左陣，我地亦都左地鐵站。
我同阿欣就一齊答地鐵．．．．
因為我早過阿欣落車．．
所以，我同佢講：喂，把傘你拎返屋企啦，
你出去果度冇瓦遮頭，費事你淋濕！
一陣你屈我醫藥費就唔好啦！
阿欣眼甘甘咁望住我：咁阿樂．．你呢．．？
我：我跑返去咪得囉，
好快咋麻！咪咁長氣啦！
阿欣：哦．．
估唔到佢都幾聽話，好少咁順攤．．．．
我：咁我走先啦，拜拜。
阿欣：阿樂，返屋企小心ｄ呀！
我：嗯．．．
之前二月份一整個新年假，
我都冇一個機會可以好好咁見阿紫，
三月終於可以比我有機會見下面。
我同阿紫，都諗住出去行下街，食下飯，
回歸返去一個簡簡單單，普遍情侶會做既野。
好老實講，係呢個年紀階段，大家都係中二，
未有ｄ咩經濟能力，加上我屋企又冇咩錢。
情侶間既生活，都無可能成日有爆點，
黎黎去去做既野，都係果ｄ，
只係不斷重複，嘗試下有冇咩新鮮感從中萌生出黎。
加上我亦都係一個平凡得很既人，
唔係出生於上流社會，過住富貴生活，
彈得一手好樂器，寫得一手流利好文，冇一個顯赫既背景。
所以，我既生活，我既故事，亦都好平民化。
可能對好多人黎講，寫得故事出黎，起碼都要有返ｄ高潮位。
但我既故事，或許所謂既高潮位，都係人人所經歷過，所體會過。
如果要我講呢個故仔既優點，或者其中一個，甚至係惟一一個優點，
就係平淡而記實，文筆就真係欠奉了。
大家之所以咁有共鳴，都係因為大家都經歷過我既故事，對吧。
對我而言，我同阿紫係邊度見面，做ｄ咩野，
係果刻其實真係唔重要。
大家試想想，若然你地代入我呢個位置做阿紫男朋友，
每個月可以見一次面時，你仲會唔會諗有咩爆點可以發生？
係果時，其實相信大家已經渴望得，只要見到面，哪怕大家咩都唔做，
坐係度，睇下電視，睇下電影，平平淡淡已經足夠。
我係果時，亦都係咁諗，學懂咩叫知足。
三月份既阿紫，多左一份少女味道。
可能換了春裝既關係，亦可能因為轉換左少少髮型吧，有少少斜陰。
我同阿紫，去左沙田新城市果邊行下。
當然，一比我既印象係，都幾大。
好似行極都行唔完咁，我又唔係太識路，惟有阿紫帶住。
我同阿紫出街既時候，
佢好多時都會撓住我手臂，同輕輕挨住我膊頭行，糖痴豆咁既款。
行下行下，或者大多數出街時，
其實我留意倒，好多人既眼光，都會投射係阿紫身上。
有時搞到我都唔知點好，但我又阻唔倒人地望佢架。
我：阿紫，你唔覺ｄ人有時會望你架咩？
阿紫：你指男仔？
我：比你識穿左我想講咩添．．．
阿紫：覺呀，咁又點呢？
我：冇．．好似唔知點咁姐。
阿紫：傻佬，我冇望佢地咪得囉。
我：係咩係咩。
阿紫：咁我而家只係集中望住你啦，咁得未呢？
然後，阿紫就一路眼甘甘係隔離望住我，一路行。
果刻我真係無佢乎。
我：哈哈，唔玩啦，你咁樣點行呀？
阿紫：唔得架，我要望住你架。
我：okok，我投降啦。
你望返前面啦，咁樣我仲唔自然。
我繼續講：係呢，你覺得你爹地錫你多ｄ定媽咪錫你多ｄ？
阿紫：爹地多ｄ。
我：點解既？
阿紫：因為成日有咩好野都預埋我同媽咪麻，無論食野又好，
去旅行又好，買野又好．．
不過．．
我：嗯？
阿紫：錫得我最多係佢，估得我最嚴亦都係佢。
我：因為佢唔比你拍拖？唔准你成日出街？
阿紫：嗯，雖然我知佢係為我好．．
我：咁如果有一日佢發現左咁點算？
阿紫：我都唔知耶，你好想佢發現咩下？
我：唔係，有時會怕姐。
阿紫：唔准成日諗埋呢ｄ野呀，
你個腦只係裝住我就夠架啦。
我地行下百貨公司囉。
我點點頭。
阿紫：咁行啦。
行百貨公司既途中，
我地都各自睇下衫咁。
老實講男仔黎黎去去都係果ｄ款，
有咩好睇呢！係都睇阿紫啦！
我：你諗住買衫？
阿紫：唔知架，睇下睇唔睇得岩啦。
我：哈哈，你屋企已經有好多衫啦喎。
阿紫：車，女仔係咁架麻。
阿紫行埋我耳邊講：咁我著靚ｄ都係比你睇姐。
你唔想咩？
然後我就面紅紅咁點點頭。
佢拖住我，同我講：過黎陪我揀呀，
你話邊件好ｄ呀拿？
我：兩件都買晒咪得囉。
咁我就可以睇晒你著啦！
阿紫：咦～蠱惑佬黎架！
唔得喎，我只係買一件，唔想晒咁多錢。
我：咁呀，性感ｄ果件囉。
阿紫：點解呀？因為貪佢性感？
我：係呀，哈哈！
阿紫：哎呀，咁點得架，
性感唔等於著得好睇架麻！
你想我成日著住佢周圍出街比人睇咩？
我比阿紫咁講一講，梗係話：唔係唔係，咁唔好買果件啦！實比人睇蝕晒。
阿紫：哈哈，阿樂你咁大男人既，
我已經比你睇蝕左啦。
我又面紅紅咁：下，我唔知你講咩喎，
果次我咩都睇唔倒。
阿紫：你知我講邊次咩？（拜拖不要再挑逗我了，叔叔不行啊）
我：唔知呀，er...
都係另一件冇咁性感既好睇，
比較少女，岩你多ｄ。
阿紫：嘻，我都係咁話。
我去試試先，你等我一陣啦。
然後，阿紫就走去試衫，
我就周圍行下．．．．
無幾耐，阿紫試完出黎，
同我講：阿樂阿樂，點呀，好唔好睇呀？
我：嗯，好ok喎！
都話人靚著咩衫都靚架啦！
非常有少女味呀！
阿紫：哈哈，係咪架，賣口乖啦你。
我：咁你自己鍾唔鍾意先？
阿紫：我鍾意呀，但最緊要既係，你都鍾意呀麻。
我：我幾時都咁鍾意你架啦。
阿紫：唔理你啦，
口甜舌滑。我去比錢先。
我：不如我送比你呀。
阿紫：傻佬，做咩無啦啦要送野比我喎。
慳返ｄ錢呀麻，應洗得洗啦。
阿紫雖然出身於比較富裕既家庭，
亦都係一個女仔，都絕對唔係大洗果種人黎，
唔太追名牌，買衫亦冇分平貴，只要岩身著落去好睇就得。
好過好多好多過份物質既女仔，果ｄ我連做朋友都費事。
我：阿紫，多謝你咁體諒我。
阿紫：我係體諒你媽咪咋，
佢咁辛苦賺錢養起頭家，真係唔容易，
所以我更加唔捨得洗你ｄ錢麻。
比阿紫咁講，我除左以笑容回報佢之外，
我真係唔知點用言語去表達一個對我咁好既女仔。
阿紫繼續講：你呀，要多ｄ錫你媽咪呀知麻？
唔好令佢咁辛苦。
我：知道，兩個都錫晒。
然後，我地就繼續行下百貨公司．．．
當我地經過內衣部既時候，
阿紫無啦啦問我．．．
阿紫：阿樂呀，如果我叫你陪我揀內衣，
你會唔會陪呀？
阿紫突如其來咁問，令到我所以不知所措．．
但咁私人既野．．．．
我：Er．．下，你．．想買內衣咩？
阿紫：你陪我揀既話，我咪買囉。
我面紅到極點：但好尷尬喎真係，
dsales又全部都係女仔。
我成個男仔入去，會唔會比人笑架．．
阿紫：你唔覺得有男朋友幫手揀內衣比女朋友係好甜蜜架咩？
我：哈，我真係唔知喎，我又唔係女仔。
阿紫：咁你陪．定．唔．陪．先．？（阿紫逐個字逐個字細細聲講．．）
我：我又唔係女仔，都比唔倒好意見你啦。
我又唔知你身材．．．．（真係講出黎都老尷，仲點向左走向右走夠膽入）
阿紫：嘻，咁你陪左我入去揀咪知囉。
你唔想知咩？
我呆左一呆。
阿紫今日食錯咩藥？
我即刻摸一摸阿紫個額頭，
阿紫問：做咩？
我：冇，睇下你有冇發燒姐，
今日有ｄ唔尋常麻。
阿紫：哈哈，
玩下你咋傻佬。
阿樂你真係好純情呀，每次見你面紅個樣我都好開心。
你有痛腳係我手啦而家，
你唔聽話既，我就捉你陪我揀！
然後阿紫即刻作撞捉我入去，嚇到我心都離一離。
我：哈哈，知啦知啦，聽晒你話得未？
阿紫：肚餓啦，我地去食下午茶囉。
阿紫同我食飯果時，
就拎返ｄ新年去韓國買既手信比我。
阿紫：阿樂，我帶左ｄ手信比你呀。
我：Yeah！零食係我至愛，多謝你呀！
阿紫：成日掛住食，究竟你識唔識掛住我。
我：咁如果手信同你，梗係你吸引好多啦。
阿紫：嘻，算你啦。
呀，仲有樣野比你呀。
我：嗯？
阿紫：拿．．（然後阿紫比左盒野我）
阿紫繼續話：係for洗面架。
我知你係偏向少少油性皮膚。
加上又就黎到夏天，
出油既機會都比較多，
用呢支洗面應該會好ｄ架。
阿紫體心到，連我日常生活看似最微不足道既事，
都照顧埋．．．因為佢知我唔太會保養皮膚，
所以就索性買埋比我．．．
我：阿紫，咁呢支野會唔會貴架？
阿紫：傻佬，韓國出名護膚品平呀麻，
唔駛同我客氣喎，我仲有好多。
我：係呢，我地下次見面應該未必可以係你正日
同你慶祝生日架啦，橫掂你同我生日又咁近，
又咁岩我地一周年紀念係正中間日子．．．．
不如我地一次過慶祝晒啦，係一日裡面。
阿紫聽完我呢個提議，
就話：好喎，反正我都冇話一定要正日。
反而我生日，加你生日，再加埋一周年紀念，
三樣野一齊慶祝仲有意義添。
我：哈哈，你都覺得係呢．．
咁你有咩想做呀，係果日？
阿紫罕有地提議：我地去行下山囉，
趁未熱得晒，我想行下山睇下風景呀。
我諗諗下我都好耐未行過山，真係好唔錯既提議！！
諗諗下，其實阿紫都係一個幾特別既女仔。
比著一般女仔，周年紀念成日離不開，
又係行街睇戲同食飯，跟住送禮物。
每年都係咁公式化，為紀念而紀念，真係好悲哀．．．
完成遺忘左背後既意義．．．
你試諗下，如果你同條女講話，
喂！今個周年紀念去行山囉！你估佢會咩反應？
但反而我明白阿紫諗咩，
佢唔係旨在呢個日子係咪咩紀念唔紀念，
佢旨在，只要大家一齊都係想做埋同一樣野，
背後既意義就已經帶左出黎。
周年紀念係為左見證大家一齊走過既日子，
如果連意思都失去既時候，感情都開始會變淡。
有邊個規定左紀念日一定要食飯慶祝？
出去行山就係唔正常？
呢d野又唔係norms，冇話咩係normal咩係abnormal。
情侶有情侶間既獨特相處方式麻，有時唔一定要跟大隊。
阿紫知我點頭應承，就繼續話：
阿樂，咁行程就交比你啦。
我：好呀，冇問題，
我地就定四月尾去行啦！
阿紫：嘻，好呀。
食完野行多陣之後，我地亦都各自返屋企。
既然阿紫將得行山個重任交托比我，
我就更加要去搜集下資料，
睇下邊度岩行。
阿紫話想行山既提議，
我每日每日都掛係心上，
一得閒就物色下夠竟有邊度好行。
識左阿紫咁耐，其實佢體能麻麻地，
見佢上體育堂時成條軟皮蛇咁就知。
正因為咁，我都唔想揀ｄ太過崎嶇難行，
又或者路途太過長既比佢。
如果唔係，行得太攰，太吃力而令到大家
都冇好好享受果一日既意義，咁就實在太浪費了。
三月份至四月份都冇咩假期，
每日返學放學都係好平淡，
只係間唔中有ｄ測驗默書之類。
每晚返屋企做完功課後，
我都會花少少時間上網，
搜集下資料，睇下行邊度岩。
每晚每晚，我都依舊同阿紫傾電話，
阿紫時刻都會好雀躍咁問我揀好未揀好未，
我就話佢聽，到時先話比佢知。
然後阿紫就會話我懶神秘，叫我唔好拐帶左佢咁話。
阿紫佢，係我心目中，真係一個又善良，又得人鍾意既傻瓜。
每次聽到佢把聲，唔知點解，無論幾攰都會變得有精神起黎。
每個月每個月，
阿紫總有段期間日特別掛住我，
就好似每個月仲有一段期間黎m咁，
呢ｄ係咪叫"調期性思念"？
每逢佢特別掛住我時，
電話裡頭既佢，口中都離不開果幾句。
”阿樂，我真係好掛住你呀"
”阿樂，如果你可以係我身邊就好啦"
"阿樂，我想攬住你訓呀"(呢句就比較敏感)
一個電話入面，佢可以重覆呢幾句不下十次。
我每次都冇好氣同佢講，
你當個cushion係我，遲ｄ見到我先比真人比你攬啦。
講完無幾耐之後，阿紫又會重複佢果幾句。
你話，阿紫究竟係咪一個傻瓜呢。
其實較早前，我已經諗好送咩做周年紀念禮物，
不過果件禮物有點貴，所以我平時都要慳ｄ駛。
正好有整個月比我做緩衝，我亦趕得切係去行山前買。
阿紫生日果日，我地唔能夠出黎慶祝，
我只係係電話同佢講聲生日快樂。
但知道佢同屋企人慶祝得好開心，我都好心滿意足。
反正有得同阿紫行山就好足夠。
到四月尾既行山前一日，即係星期六（我地星期日行的）
阿紫問我，我地要去邊度行。
我就依然保持神秘，
只係叫佢早上十點半係鑽石山地鐵站等。
聽日，一定要好好咁慶祝我地既周年紀念。
拜託，絕對要好天啊。
四月尾既星期日，
果然有天公造美，
再唔係成日遇到果種，
又潮溼，又多雨既春季。
我背起背包，
裝起必需既用品，
就出發啦。
我見早到左鑽石山，
就去商場超市買定ｄ水，
等一陣上山口渴時可以飲。
花左少少時間買野飲之後，
我就返返去巴士總站等阿紫。
等左一陣，阿紫亦黎到啦。
佢著左一件窄身少少既上衫，
同一條黑色有點鬆身既短褲，
加一對粉紅色運動鞋。
細心一睇，
阿紫既身材，好似豐滿左少少麻。
不過對腳依然咁白咁滑。
其實，我幾鍾意阿紫咁著，比較陽光氣息。
我：阿紫，遲到喎。
阿紫：我已經盡趕架啦，
你知我離鑽石山遠架啦。
我拎轉身唔望佢，講：藉口。
阿紫：哎呀，好啦，
我知你唔會咁小家既。
阿紫一路攬住我一路講。
係佢攬我果刻，我感覺到佢今日好似特別香咁．．
我：你今日ｄ香味好似唔同左咁既？
阿紫：係呀，查左防曬呀麻。
你有冇查呀？
我：哈，男仔駛咩呢ｄ野。
但你真係好輕便喎，接近冇帶野黎咁濟。
阿紫笑住話：因為我唔知行山應該要帶咩呀麻，
所以咪冇特別帶袋囉，只係帶左相機咋。
我：傻瓜，至少都帶支水呀。
阿紫經我咁講，真係碌大眼話：係喎係喎，唔記得左添，
我地而家買呀。
我：買左比你啦，
知你大頭蝦唔會帶。
阿紫：抵錫。（然後就鍚左我面豬一啖）
行啦，我地而家要去邊呀。
我：我地答巴士去西貢市先啦。
阿紫：好呀，你帶路呀，我跟住你。
從鑽石山答巴士入西貢市，
其實車程都好快，幾個字都到。
入到西貢市，我地再轉小巴係西灣亭落。
落左車之後，
我：我地就係呢度開始行啦！
阿紫：呢度係邊度黎架？
我：西灣亭。
阿紫：咁目的地呢？
我：去到你咪知囉。
阿紫：又懶神秘啦，阿樂。
你唔講我唔跟你走架。
我：哈哈，咁你留低係度囉。
一陣有變態佬拐左你唔關我事架。
然後我就行走左去，
阿紫即刻屈服話：喂，衰人阿樂，
等埋我呀。
我：做咩呀，唔係唔行架咩？
阿紫：你就想，而家開始要痴住你。
我望一望板上既地圖，其實都好容易行。
確實好之後，我地就開始行啦。
行既途中，我都放慢腳步，
同阿紫慢慢咁行。
阿紫好奇話：阿樂，你第幾次行呢度呀？
我：嗯？第一次囉。
阿紫：下，咁勁既你，第一次行地圖同指南針都唔駛帶。
怕唔怕蕩失路架。
我：做咩，唔信得過我咩你？
如果蕩失路既，我咪同你係山上面做野人囉。
阿紫：嘻，鬼同你做野人呀，認真啦。
我：傻瓜，沿路有指示牌架麻，
點會迷路呢？
阿紫：又係喎。
我：你乖乖地跟住我，就冇錯架啦。
沿途，其實都冇咩人行，
可能人地都唔會特登係星期日行下山掛，
寧願係屋企抖下。
不過咁仲好，果時世界就好似得返我同阿紫咁，
沒有外人，好讓我可以好好享受，同佢一齊既私人時間。
一路欣賞翠綠既花草，一路感受住大自然既動力，
感覺真係賞心悅目。
阿紫：阿樂，你會唔會嫌我行得好慢呀。
我一路拖住阿紫，一路講：點會呀，慢慢行啦，
大把時間。
阿紫：郊外ｄ空氣真係唔同ｄ，新鮮好多。
阿樂你應該要多ｄ黎先係架。
我：嗯？點解呀？
阿紫：呼吸多ｄ新鮮空氣，對個心都好ｄ呀麻。
我：有你係我身邊，我個心已經夠好啦。
阿紫：嘻，係咩。
我：攰可以抖陣喎，我見你行到有ｄ喘氣咁。
阿紫：我仲可以呀，繼續行得啦。
點知，行到冇耐，阿紫突然跌左一跌。
好彩我拖住佢．．
我：小心ｄ呀傻妹，
睇住路先得架麻。
阿紫：唔該你呀阿樂，
好彩你拖實我咋。
不過好似好多蚊耶．．
我望望阿紫，咁又難怪既，
佢著短褲，對腳又咁白，
比我係蚊我都吸佢血先啦。
我：我幫你噴蚊怕水啦。
阿紫：咦？你有帶呀阿樂？
我：梗係啦，我點忍心你對靚腳比蚊釘到一達一達呢。
阿紫：哈哈，唔該你呀。
得你咁細心架咋。
然後我就拎支蚊怕水出黎，
幫佢噴一噴對腳同手。
然後我話：我地行多一陣先抖啦。
阿紫點點頭。
其實沿住小徑入，都有ｄ樹蔭遮下陽光，
起碼冇咁曬。但我見阿紫有喘息開始急，
我就同佢行多一陣，然後停低休息下。
我：你望下前面。
阿紫：好靚呀，前面邊度黎架？
我：前面係萬宜水庫．．．
我都係第一次睇咋．．
係果時，我地都靜靜咁停低落黎，
一路感受下微風既吹拂。
我見阿紫喘氣仲未平息。
我就係背包入面，拎左支水出黎。
我：阿紫，你咁喘氣法，
夠竟係想要人工呼吸服務，
定係要飲水服務呢？
阿紫：咦～邊個話要你人工呼吸姐。
我揀飲水服務。
我：冇喎，飲水服務只限於係人工呼吸服務之後架喎。
阿紫：哈哈，咁奸茅架啦，咁即係冇得揀姐。
我：有，就係咩都唔要啦。
阿紫：但我好口渴喎。
我：口渴就冇法lu。
然後，阿紫就主動錫左我一啖。
我：拿，比你啦。
阿紫：阿樂你真係狡猾呀。
我：我知你都想錫既。
阿紫即刻面紅紅：邊係喎死人頭。
飲完水，大家抖左陣之後，
就繼續步行。
我諗個幾鐘頭倒，就已經去到西灣。
阿紫見到有海灘，
即刻好興奮：嘩，有個海灘喎。
仲冇咩人添。
我：係呀，轉登帶你黎行下海灘架。
阿紫：呢個海灘既水真係好清呀，
而且風景又靚。
我：哈，落去游下囉。
阿紫：傻佬黎既，都冇帶泳衣。
望住咁幼既沙，
感受住迎面而黎既海風，
同海水獨有既咸味，
一邊拖手同阿紫係海邊散下步，
一邊踏住那軟綿綿既沙。
我：阿紫，原來我隻腳印都大你幾多下喎。
阿紫：係喎可。
然後阿紫就近係我後面，
重覆咁踏住我ｄ腳印一路行。
感覺就好似一個細路女一樣。
我就專登將左腳同右腳腳印一前一後既距離拉遠ｄ，
睇佢點踏。我回望轉頭。
見阿紫，左腳踏完，跳去踏另一個腳印。
睇住佢跳下跳下既樣，動作生硬既樣，真係好想笑。
阿紫：笑咩喎，咁衰既你阿樂。
唔好行得咁快麻。
我停係度，諗住唔再行，
佢踏下踏下，跳下跳下，
跳到黎我身邊時，就從後攬住我。
阿紫：做咩唔行既，阿樂。
我轉身用手攬返住阿紫：因為我想攬住你呀麻。
一路聽住海浪聲，
一路係一個了無人煙既沙灘上，
沐浴住陽光，
沐浴在新鮮既空間之中，
我同阿紫，彼此攬住大家，
享受住我同佢所擁有既空間，所擁有既世界。
果陣時，我同阿紫講：
行啦，我都仲有第二個沙灘要去，想唔想睇下？
阿紫點點頭：咁快ｄ行囉。
離去西灣，
沿路其實都好開揚，
加上時不時有ｄ風，
感覺冇咁口渴。
雖然係咁，但我都時不時飲下水。
去到鹹田灣沙灘其實都三點幾。
我：拿，紙巾啊傻妹。
等我幫你抹啦。
然後，我就輕輕咁，
抹走阿紫面上同頸上既汗水。
阿紫：我都幫你抹返呀。
我：你肚唔肚餓呀？
我有餅干喎。
阿紫：好呀，正想問你有冇野食。
我：你想繼續要人工呼吸服務定係餅乾服務呢？
阿紫：哈哈，又黎呀，都冇得揀既。
我笑住話：傻瓜，玩下你咋，拿。
阿紫：阿樂，我餵你呀。
我：係呢，阿紫你鍾唔鍾意呢度呀？
阿紫：鍾意呀，估唔到西貢真係咁靚呀。
你仲未話我知呢度叫咩名喎。
我：其實俗稱叫大浪灣既，
有四個．．頭先一個，而家一個。
跟住就唔記得咩名lu。
阿紫：原來有咁多架？
但咁靚既地方都冇咩人黎既？
我：可能人地嫌要行掛。
阿紫：真係可惜啦。
好彩你帶我黎咋，如果唔係我都唔知。
我：咁你諗住點報答我先？
阿紫：獎你食一塊餅啦。
我：車，原本都係我既。
然後，我就行開左．．．
阿紫見我咁，就話：阿樂，你唔係嬲呀麻？
我拎左一支樹枝過返去阿紫身邊。
阿紫：做咩拎住枝樹枝呀？
我：冇呀，想寫字囉。
阿紫：寫咩字呀？
我：你睇下咪知囉。
然後我就，逐下逐下寫住係沙上面：
阿紫：
一周年紀念快樂。
我永遠都咁愛你。
阿樂．．
阿紫見我寫完之後，
好甜咁攬住左我。
阿紫：阿樂，多謝你呀。
我今日真係過得好開心。
原來有你陪住我行山，
真係唔同好多架。
我：我都係，
希望我地可以有好多好多個周年紀念。
然後阿紫拎左我個樹枝，
係我寫既字外圍，畫左個大心心。
阿紫：阿樂，我都愛你。
我地便擁吻起黎。
[
係果一刻，我真係希望，
我呢幾隻字，能夠永永遠遠都刻劃係呢個沙灘上面，
作為我地一周年既見證。
我好希望，呢幾隻字，能夠永永遠遠停留係沙灘上面，
唔會被風化，唔會被海水潮汐時所掩沒．．．
真的有可能嗎？
其實我深知唔得，
起碼第二次我自己黎既時候，
我所寫過既字，都已經消失係歲月之中。
我一路擁抱住阿紫，一路擁抱住最動人既一刻，
一路感受住，愛情上最璀璨極致既景象，
真係好扣人心弦，如果可以凝結住美滿既一刻，
你話幾好．．．．
阿紫：我地影相呀。
我：嗯，好呀。
然後我地係沙灘上，留低左幾張倩影。
就繼續我地既路程。
沿途出返去赤徑，我見阿紫都出現疲態。
然後，我就係阿紫後面，
一路搭住阿紫膊頭，一路推佢行。
我：我知你攰架啦，我推住你幫輕下你啦。
阿紫：嘻，我想你背住我多ｄ喎。
我：好呀，上黎呀。
阿紫：真架？
我：係呀，睇下你幾重都好呀麻。
阿紫：哈，咁我唔客氣啦喎。
然後，我就背住阿紫，行左一少段路。
阿紫比我想像中輕，
我背住佢果刻，同靜靜咁，挨係我膊頭。
係我耳邊，細細聲講：我愛你，有你係我身邊真係好幸福。
跟住就鍚左我耳仔一啖，
實在令我全身酥麻起黎。
背左佢一陣，我自己都頂唔順。
就放返佢落黎行。
近赤徑時，已經西斜接近黃昏。
我同阿紫，就係赤徑答返船，
去黃石．．．．．
答船既途中，我送左樣禮物比阿紫。
我：送比你架，
阿紫：可唔可以打開佢架？
我：嗯。
其實，係一條紫水晶手鏈黎，
因為真係好靚，所以我都忍唔住買左佢。
紫水晶係西斜光線既襯托下，
更加顯得瑰麗。
阿紫：好靚呀阿樂，
會唔會好貴？
我：唔會呀，唔太貴，
我見到幾靚，同時知你鍾意紫色，
所以就買左落黎送比你．．．
阿紫：好多謝你呀，我會日日戴起佢架。
我都有野比你。
我打開個袋，原來係一個銀包．．．
阿紫佢，，真係知我心意．．
阿紫：我見你個銀包已經用到好殘舊，
所以．．．我就買黎送比你啦，
唔知你鍾唔鍾意呢．．
我好開心，真係：阿紫，你又知我想換銀包？
太好啦，我真係好鍾意。
阿紫：我地晒完ｄ相出黎，咪可以放落新銀包度囉。
我：果一刻，我都不得不佩服阿紫既用心，
原來佢帶相機，就係為左咁．．
坐完船，我地去到黃石就坐返巴士去鑽石山地鐵站。
因為大家都好攰，所以冇食晚飯，
就各自返屋企。
不過，果日既周年紀念，係我人生之中，過得最浪漫，
同最有意思既一年。
果時，我仲好期待，第二年既周年紀念，
我可以用阿紫做咩好．．．
不過可惜，
我同阿紫，都冇咁既機會．．
四月份同阿紫見完面之後，
其後我五月既生日，因為阿紫出唔到黎同我慶祝，
我都係同屋企人食下蛋糕就當過去。
五月至六月期間，我只係見過阿紫一次面，
都係行下街睇下戲。
然後大家就要準備大家既考試。
一年又一年既過去，
考試期間我已經係度諗：
嗯，估唔到，我已經快要升中三．．
而我同阿紫，亦係拍拖左一年多兩個月，
由開初分開兩校時非常唔習慣既日子，
變到已經慢慢咁，習以為常。
中間既過渡期真係唔簡單。
我地已經唔係成日見，
但仲係維持住熱戀，就更加令我覺得不可思議。
拍拖既短短一年，我地都經歷左
大家唔可以成日見面既艱辛，
大家都好明白，
要維持一段比較遙遠少少既戀愛，
一個只係短短相差數十公里既戀愛，都咁困難。
但難得既係，我地既感情，
依然仲係好好，大家互相扶持，體諒。
考完試後，我亦正式放暑假，
享受無拘無束既生活．．．．．
不過，
有一晚，
我食完飯冇耐，
坐係度睇電視既時候，
突然感覺到我心口有點痛。
咁其實我都習以為常，
以為一陣就會冇事．．．
點知痛楚唔單止冇退，
仲不斷咁加劇，
我起身諗住想拎藥食既時候，
點知腳一軟，因為實在太痛，
就成個人趴左落地下．．．．
我果時成個人冇晒力，
眼既視線開始變得模糊．．
耳仔亦聽唔到屋企人講咩．．
只係隱約聽到阿媽問我做咩事，
不斷拍我．．不斷拍我．．．
跟住，我就眼前一黑．．．
彷彿同呢個世界斷絕左一切聯繫一樣．．
失去意識．．．．．
我，夠竟怎麼了？
係我未失去意識之前，
我個腦，
只係諗住一個人：
阿紫。