有一晚一個來電: 流星殞落的瞬間(上)
二月份了，
比較開心既係，二月份有新年假可以緩衝下學校沉悶既生活。
比較失望既係，阿紫係二月份應該陪唔到我過了。
因為有一晚，我打比阿紫．．．
我：阿紫，你新年假有咩做呀？
阿紫：我會同屋企人去旅行呀，你呢？
我：去旅行？今次去邊呢？
阿紫：今次去韓國。
所以阿樂唔好意思呀，
今個月應該陪唔倒你啦。
我：唔緊要唔緊要，
新年應該同屋企人團團圓圓呀麻。
阿紫：嘻，我一定知你會體諒我既。
我：咁你係我女朋友黎架麻，唔體諒你體諒邊個呢？
我今年屋企人會返大陸呀，不過我唔返啦。
阿紫：點解既？
我：冇，每次返去一定做唔倒功課既，
上年差ｄ搞到我做唔晒ｄ新年功課，
掛住係果邊玩炮杖！
阿紫：哈哈，有得玩炮杖咁正既！
我又想試下呀，最衰香港唔比玩啦。
我：係架，特別係夜晚玩先靚，
同埋好多都好平，又有好多串燒食喎。
阿紫：阿樂，如果可以跟你一齊返鄉下就好啦。
我：傻瓜，有得同你屋企人去旅行唔開心咩？
阿紫：唔係呀，但同你一齊都好開心呀麻。
阿紫繼續話：咁你屋企人返晒大陸，你咪得自己一個？
我：係呀。
阿紫：食飯點算呀？
我：冇呀，咪買飯盒或者快餐食囉，唔係點喎。
阿紫：哎呀，食咁多果ｄ野會冇益架。
我：哈哈，你ｄ語氣咁似我阿媽既。
阿紫：哼，咁你即係話我長氣啦。
我：唔係，點會呢，我最鍾意就係人地長氣架啦。
睇下點先啦，或者我得閒會自己煮呢！
你去到韓國要著多ｄ衫呀，唔好凍親知麻。
阿紫：知道啦，長氣傻瓜！
我：既然新年見唔到你，
咁首先我係呢度，預祝你，
新年快樂，心想事成，日日都咁靚女啦。
阿紫：嘻嘻，我都祝你，
身體健康，學業進步，日日都咁愛我。
雖然二月份冇得見面，
但係我心目中，
已經冇再將事情睇得咁唔開心啦，
因為我學識忍耐，
只要大家都知道，
彼此既心係向住大家既，
即使見唔到面，
我都可以體諒同包容。
我亦好實實在在感受到，
我同阿紫最璀璨既愛情時光，
就係呢一刻。
擁抱住阿紫呢份愛，就彷彿擁抱住幸福一樣。
放年假期間，真係悶到hihi。
惟有只係係屋企玩下金庸，打下恨天。
其實都好快悶，用手不斷係咁按個滑鼠，
只係間唔中同ｄ台灣佬吹下水。
其實玩onlinegame都係初中時代玩，
慢慢就覺得dgame玩得多會好悶，冇左果種樂趣同新鮮感。
加上果時咩月卡，點卡，樣樣都係錢，
當然唔會投資咁多啦！
不過咁，要毒過先叫經歷過初中架麻！岩唔岩先！
正當我打打下恨天既時候，
有人打電話比我。
我：喂，搵邊位！
阿欣：係我呀，阿欣呀。
恭喜發財！！
我：哈哈，恭喜發財！！
阿欣：冇呀，想打比你問你拎利是咋麻！
我：嘩，而家咩年代呀，
仲有人咁唔怕醜問人拎利是既？
阿欣：我份人就好厚面皮既，
況且有錢收既話，怕咩姐！
咪蝕底比你一次囉！
我：哈，咁你就唔好彩啦真係！
我屋企人返晒大陸喎！
阿欣：你屋企人返晒大陸？
點解你又唔返既！？
我：車，唔返又要匯報比你知既！
阿欣：妖，你係咪咁呀！
快ｄ講啦！
我：係既係既．．．
冇呀，我唔想返到去又掛住玩冇心機做功課咋麻！
咪諗住係屋企做下功課咁囉！
阿欣：咁你而家做緊功課？阻唔阻住你呀？
我：有ｄ阻咁啦，不過打緊機囉！
阿欣：食屎啦你！又話係屋企做野，
原來係藉口，你都係打機咋麻！
打打打，打死你呀！
我：哎呀，又關你事架喎，
我識分配時間既，ok?
阿欣：咁你每日咪要食自己囉？
我：係呀，唔係點呀！
阿欣諗左一諗：喂，既然我聽日唔駛去拜年！
不如我地一齊出去食飯囉！
我：食飯？
都好既，反正我果頭都冇咩好食！
食咩先．．．
阿欣：我地去廟街食煲仔飯囉！
而家冬天咁鬼凍，食煲仔飯暖粒粒呀麻！
我：好喎，我橫掂未食過煲仔飯！
殺你！一於咁話！
阿欣：約實你啦，聽日三點鐘地鐵站等，
不見不散。
就係咁，聽日約左阿欣食煲仔飯。
其實我已經成左兩日美心同大家樂，
真係食到人都頹，
所以阿欣呢個電話，
對我黎講都係一種解脫，
起碼我唔駛再食飯盒麻。
因為我知道，比我自己一個既話，
一定唔會走圍走特登搭車去第二度
仲要自己一個on居居咁食。
利益伸報，我會跟阿欣出去食飯係因為我屋企實在冇啖好食，
並唔係出去偷食，頂你班友唔好成日諗邪入我位
阿欣約我三點地鐵站等，咁我老死都唔遲到啦，
費事比佢嘈呢樣嘈果樣。結果我都好準時，
等左一陣之後，我亦見到阿欣既縱影啦！
佢著咩衫我已經唔記得，反正冬天都唔會著得好暴露，咁鬼凍！
碰面之後我地就一齊去答地鐵去廟街。
阿欣注一注視我有戴頸巾，
就話：咦！？阿樂，新頸巾喎！！
然後佢跟手摸一摸我條頸巾。
我：嗯，阿紫織比我架，
當係聖誕禮物喎。
阿欣：哦，唔怪得知會戴住啦，
原來係阿紫織比你既。
中一果時都唔見你戴呢ｄ野，
咁你送返ｄ咩比佢呀？
我：我送左個cushion比佢呀！
阿欣有點驚訝：下！？cushion?
你識整架咩？
我：識識地啦，家政堂學過呀麻！
阿欣：哦，你學完就即刻整比人。
我：係呀，諗住冬天咁凍，
送比阿紫夜晚攬住訓會暖ｄ呀麻．．
阿欣就反問：車，咁我冬天夠凍啦！
又唔見你親手整一個比我？
比阿欣咁樣講一講，
我真係唔知比咩反應．．．．
不過唔整比佢都好正常姐！
我：哈，冇晒材料啦，你遲左一步lu。
下年請早！
阿欣：哼！枉我成日教你野，
又唔見你送下野比我喎！
我知你係屋企冇野好食，
都特登約你出黎食好野啦！
男仔真係冇本心既。
我見佢語氣好似有少少嬲嬲地，
我：哈，你唔係咁都嬲呀麻。
阿欣見我咁講，
即刻個頭拎咩左一邊，唔望住我。
咁我就行去佢視線果邊啦，
哎呀，點知我行到時佢又拎轉第二邊。
阿欣呢個女仔，我真係對佢冇咁好氣，
估唔到而家發細路女脾氣，以前佢都唔會咁既，
今日又食錯咩藥要搵我黎開刀呢！
我見佢唔彩我，
我用手指dook一dook佢手臂啦，
dook左幾下之後．．．．
阿欣：點呀，dookdookdook！
再dook咬甩你隻手指呀啦！
我：你地女仔係咪有怪癖架，
咁鍾意咬人既？（阿紫又係咁．．．）
阿欣：咩話！！？？你成日比女仔咬咩！？
我：唔係．．．
你唔好嬲啦。
阿欣：我先無嬲呀，
我係覺得你太樣衰先唔望住你咋麻！
我：係咩，唔望住點一齊食飯喎？
阿欣：一定要望住你食架咩！唔知醜！
我見阿欣仲係拎咩左一邊唔望住我，
係呢個時候，我就拎左ｄ野出黎。
我見阿欣唔望住我，
我就將佢遞係阿欣對眼前！
阿欣見到之後，
即係碌大隻眼望住，
然後同我講：利是．．．？？
我：嗯。
阿欣：你唔係．．話
你屋企人返晒大陸架咩？
我：咁返左大陸姐，佢地會預先封定架麻，
萬一佢地返左大陸，有咩人黎我屋企拜年既話，
即使人唔係度，ｄ利是都可以照封比人，
唔好失禮麻。
阿欣：咁點解．．我又會有既？
（阿欣佢仲係眼甘甘望住我，搞到我有ｄ唔自然，
但好明顯語氣已經好返好多）
我：咁你尋日打電話黎話想要，
雖然我知你講笑，但我見你平時真係幫左我好多，
況且利是又唔係ｄ咩，只係拎個意頭姐。
不過，唔係封左好多咋。
阿欣拎住我兩封利是，
笑笑口講：我又唔係真係為錢，
幾多都冇所謂啦，
最緊要．．．．
我：嗯？最緊要咩？
阿欣：最緊要．．證明左你有心聽我講野麻．．
我：哦，咁又真係呀！我不嬲對人地ｄ野好上心既！
阿欣：咁我呢？
我：你話呢！！如果唔係頭先比你果兩封利是死架！
阿欣果時又冇出聲，只係一味捉緊果兩封利是，
好似成世人未收過咁！
我繼續話：你都幾奇怪架喎！
頭先先嬲嬲地，而家又冇咩野！
有冇變得咁快呀！
阿欣：超，你識咩姐！
我係點又要你管！
我：鬼得閒管你，咁你利是要唔要呀！？
唔要慳返！！
阿欣：梗係要啦！咩唔要呀！！
送左出去就冇得收返咁cheap架啦！
我：收左咁即係唔嬲啦？
阿欣：車，唔係喎，
發夢都冇咁早呀！
行啦！！
就係咁，我同阿欣就步出油麻地，
向廟街進發。
雖然阿欣口講就話仲嬲，
但明眼人都睇得出，其實佢根本就無野啦已經。
真係蝕水，咁就比左兩封利是佢！！
出左油麻地之後，
我對方向就變得一塌糊塗啦。
我：喂，呢度邊度黎架，
我唔識行架喎！
阿欣：你唔係呀麻！第一次黎？
我：係呀，我都唔知呢度有煲仔飯食．．
阿欣：好心你就唔好成日係屋企打機啦！
得閒咪出下街囉。
我：我都冇成日打，況且我同阿紫一個月先見一次，
出極有限啦！
阿欣：咁一定要同女朋友先出得架咩！
約下朋友出唔得既！
我：咁你又岩喎！
阿欣：係你死蠢咋麻！
行行下，我見到街邊ｄ攤子，
個格局好似似曾相識咁．．．
果一刻，我終於諗到！
我：喂！呢度咁鬼似鴨寮街既，
又係放晒ｄ攤位係兩旁，
我地有冇去錯地方呀！
阿欣：哈哈，你真係死蠢黎架！
你估香港得一條街係咁咩，
旺角花園街果邊都係啦，
又唔見你話去左旺角？
比佢咁講一講，
我係有少少唔忿氣，
但我冇聲出，
可能真係我見識少。
我：但點解我地咁晏先出黎既？
而家都四點幾．．．
阿欣：咁咪岩囉，
佢地係主要做夜晚生意架，
你唔見而家仲係唔算多人咩？
因為ｄ攤位都未開晒。
我望一望，話：係喎，但佢地開咁晏做到生意架啦？
阿欣：呢度遊客區黎架麻，
又咁多夜市餐廳，
咁佢地咪夜晚開鋪，吸引多ｄ遊客去睇囉，
一陣同你食完飯再過你睇過呀，
你會發現係兩個世界黎架。
估唔到，阿欣識咁多野，
講講下，我反而似一個遊客，
而阿欣係導遊咁，
為我介紹下呢度係咩，果度有ｄ咩好食。
做香港人做到我咁係咪算失敗
我：阿欣你真係識好多野，
你平時成日去行街架？
阿欣：間唔中啦，
但一定多過你先囉！！
都唔知你係咪香港人黎。
我同阿欣一路行，
我地就一路傾。
我：係唔係香港人唔緊要，
最緊要有人帶我食好野！
阿欣：好心你拎塊鏡照下你個死人為食樣先啦！
真係頂你唔順呀。
我：咁我地去邊度食呀？
阿欣：你跟我行就得架啦，
而家五點幾，我地去拎定位，
一陣六點幾一定好多人排隊。
我：咁又係呀，話晒新年假麻！
阿欣：我地兩個人姐，
好快有位架啦。
阿欣帶到我去果間餐廳，
其實果時已經有唔少人聚集，
估唔到食煲仔飯係咁受歡迎。
我離遠已經聞到一陣陣好香好香既味．．
實在流晒口水！
果刻我忍唔住問：喂，阿欣，
你聞唔聞到呀？
好香呀陣味。
阿欣：哦，炸蠔餅黎架，
你有興趣？
我：有呀有呀，
咁香。
但好唔好食架？
阿欣：一陣你咪知囉。
拎完位我地仲要等，
雖然而家五點幾六點，
但因為頭先果下炸蠔餅既
嗅覺衝擊，我實在好肚餓。
不過，我之前見到附近有賣
牛雜，我就問阿欣．．．．
我：阿欣，你食唔食牛雜架？
阿欣：食架，做咩？
我：我好肚餓呀，實在頂唔順．．
我想買個牛雜頂住肚先。
阿欣：真係冇你乎呀，
快ｄ去買啦，我係度等你。
就係咁，我拿拿林狗衝去買，
因為諗住share食，所以就拎多一支竹籤。
買完之後，我就返返去搵阿欣．．．
我：拿，親熱食啦，
冬天食牛雜真係別有一番風味！
熱辣辣呀麻。
我就拎住個兜，我拮左一個牛肚。
我：我唔客氣啦！
阿欣見我食完，跟住就拮第二舊食。
不過．．．
我：阿欣．．果支竹籤係我架，
你果支係呢度．．．
不過我講完既時候，阿欣已經食左。
阿欣：超，咪咁婆婆媽媽啦，
都唔會掂到口，驚有愛滋咩！
我：估唔到你係女仔都會鍾意食牛雜喎，
我以為女仔會怕食內臟添。
（因為阿紫好怕食牛雜，但其他就冇問題）
阿欣：好食既野又邊有分怕唔怕呢？
一定要食貴野先叫好食架咩？
我份人好平民咋喎！
我：其實我口味都係同你差唔多，
食野都好隨便，好食就得啦。
我好記得，因為我實在太鍾意食牛肚，
唔經唔覺好似我霸晒咁，
先發覺原來我拮住最後一件．．．
阿欣：阿樂．．
我未食過牛肚．．．
我：呀．．
唔好意思．．
呢舊比你啦。
我就將支竹籤放係阿欣個咀面前，
其實我冇諗過餵佢，
但估唔到阿欣唔用手接過，
就咁用咀咬走左個牛肚就算。
阿欣：阿樂你梗係好鍾意食牛肚呢？
我：係呀，仲有牛柏葉。
阿欣：下次有機會一齊再食呀。
我：嗯，冇問題呀。
等多一陣，我諗六點半倒，
終於有我地位啦。
隨後我地就入去食主菜啦。
入到餐廳，真係好鬼熱鬧。
因為人流實在太多，
室內既人氣比出面街既寒流實在差太遠，
雖然裝修係簡陋一點，
但對我黎講一ｄ都唔成問題，
咁有人情味既餐廳已經少之有少啦。
我：原來咁多人黎呢度食，
真係添左唔少新年氣氛呀，
咁熱鬧。
阿欣：嘻，快ｄ多謝我啦。
一路望住牆上既餐牌，
真係花多眼亂。
但亂還亂，
ｄ野食真係好鬼平，
不得不讚呀實在。
我：喂喂，阿欣，
ｄ野食真係好平喎。
阿欣：咁我地食多ｄ囉。
呢個時候，店小二就埋黎。
店小二：兩位想食咩呢？
我梗係即刻叫：一個蠔餅唔該！！
阿欣：哈哈，阿樂，
呢個唔係主菜黎架麻，
諗左食咩煲仔飯未呀？
心諗，又係喎可，
不過個蠔餅真係太吸引。
我同店小二講：要個北菇滑西飯呀！
阿欣：我要一個牛肉排骨飯呀唔該。
店小二：一個北菇滑西飯，
一個牛肉排骨飯，
一個蠔餅，好既。
要唔要湯呀？今日ｄ湯好平咋喎。
我諗諗下，其實ｄ野都算熱氣，
飲返啖清湯都好喎。
我問：今日咩湯呀？
店小二：ｘｘ豆腐湯。（唔太記得）
我：好呀，要埋呀唔該。
落左單之後，
我就同阿欣講：阿欣，唔會食唔晒架可？
阿欣：唔會既，都係湯同多個蠔餅姐。
我：哈，唔緊要，我好大食，
我實同你拆掂佢。
冇幾耐，野食亦漸漸上桌。
先黎既係炸蠔餅。
我聞一聞：嗯，等左你好耐啦！
真係好香。
阿欣：哈，唔好咁心急住，
落唔落魚露？
我：小小得啦唔該。
我試左一啖果時，
即刻碌大左隻眼望住阿欣，
真係好好食．．．．
ｄ豆瓣醬真係好夾。
我：蠔餅真係好脆口呀。
阿欣：嘻，係呀，
蠔餅係我既至愛黎。
我：你真識食！！
（果刻我真係食唔停）
阿欣：慢慢食啦阿樂，
仲有好多呀。
我：其實呢，
我係唔鍾意食生蠔架，
因為太大舊果種咬感有點噁心。
但係呢個就唔會啦，
因為size細呀麻。
阿欣：嗯，你同我一樣喎。
我都唔鍾意食大果種生蠔。
過多冇幾耐，主角煲仔飯同湯都黎齊啦。
落埋豉油就食得。
我食左兩口之後，
我：個西真係幾滑喎，
你試唔試？
阿欣：好呀，我比我ｄ牛肉你呀。
然後，我同阿欣就交換左牛肉同雞食。
食食下，阿欣同我講．．．．
阿欣：阿樂．．
你知唔知呀，
我收到你比我既利是真係好開心。
我：點解呀，好小野黎姐？
阿欣：其實唔單止係心意咁簡單，
因為我屋企唔係成日拜年，
又唔多親戚，再加上．．．．
我：再加上咩．．？
阿欣：我媽咪又同我老豆果邊ｄ親戚唔係太和好，
所以都唔會去果邊拜年．．．
聽到阿欣咁講果一刻，
我覺得阿欣真係幾慘，
新年本應係一個開開心心，一家大小團團圓圓既節日．．
但對於佢黎講，偏偏卻係一個．．．．．
因為我屋企家境同佢差唔多，都係有問題．．
所以，佢既心情，我非常之明白。
阿欣繼續講：所以，你今日代你屋企人比呢封
利是我，我果刻既感覺，就好似
多左一個親人咁，好溫暖同親切。
嗯，沒有到，兩封利是對阿欣黎講，
背後既意義係咁大，唔怪得果時係地鐵會呆左啦．．
我：你鍾意既，可以年年問我拎，
我年年都叫屋企人預留比你又點話。
阿欣聽到好開心咁話：真架？
哈，太好啦！
阿欣既笑容真係好直接同真心，
完全不加以修飾。
其實個飯都唔算太大份量，
阿欣都食得晒。
食完飯後，我幫佢裝左一碗湯，
然後我就飲埋剩低果ｄ湯佢。
食完晒之後，真係好鬼飽。
到埋單果時，我見阿欣想拎個銀包出黎，
我：哎，唔駛啦，今日我請你啦，
當係．．多謝你介紹左間咁好食既餐廳比我。
阿欣面紅紅咁點點頭。
食完野之後，個身都暖好多，
我就同阿欣，去廟街行下。
阿欣講得無錯，
晚後既廟街，真係生色不少，
人流亦相當多，
攤位林立，賣好多各式各樣既野。
真係幾有香港特色，
難怪成為旅遊購物區。
我：阿欣，
呢度真係有好多野賣喎，
古董又有，古玩又有，
連細個果時玩過ｄ玩具都有。
阿欣：係呀，有ｄ玩具都幾得意添。
我睇睇下見到ｄ非常有趣既野，
我：喂喂，六脈神劍秘笈呀，
仲有降龍十八掌添，哈哈。
阿欣：哈，你唔係對呢ｄ有興趣呀麻？
我：幾盞鬼呀，拎返去當筆記寫都好呀。
阿欣：正傻佬黎！
我：見到好多細個玩過既玩意，
ｄ童年回憶又好似返返黎，
真係好羨慕呀。
阿欣：駛咩羨慕呀，
你而家又唔係好大個，
講到好似好老咁。
我：哈，又係喎，
差ｄ唔記得左係我隔離果個
仲老我兩年添。
阿欣聽到即刻好大力咁踩我隻腳，
痛到他媽也認不了。
阿欣：抵死！唔收下你把死人口都唔得。
我：咁你都係大我兩年姐，又唔係ｄ咩秘密。
阿欣：唔鍾意就唔鍾意。
行行下，估唔到會公然見到ｄ成人性用品
係度兜售，雖然我好有興趣睇係咩黎，
但係因為太尷尬，大家都冇出聲行過就算。
係果個時候，阿欣見到ｄ野．．
阿欣：阿樂，你睇下，
原來仲有人幫人算命占卜喎。
我：係喎，果ｄ呃神騙鬼架姐！
阿欣：如果可以試下就好啦，
不過要比錢真係唔抵。
我：都唔明你地女仔成日都會諗埋呢ｄ星相命理既野架。
你想睇相咋，拎你隻手掌黎。
阿欣突然聽到我咁講，就眼眨眨咁望住我。
我：係咪唔知咩叫手掌？
阿欣聽完我咁講之後，就遞起隻手。
我捉實佢手掌，係度望左一陣。
因為果時ｄ燈光太暗，
我想去ｄ有燈既位置睇，
於是我就拉住佢隻手埋去光ｄ既位置．．
阿欣：喂．．阿樂．．．
去邊呀？
我：係呢度睇，清楚ｄ呀麻。
我仔細咁望左一陣，
我：其實你條生命線，都幾長喎，
放心，你長命百歲架啦。
阿欣：咁．．愛情線點樣？
估唔到阿欣真係信，有冇咁易呀．．
我真係勁up當秘笈咋喎果時。
咁做戲就梗係做全套啦，
果時我再望望阿欣手掌，
望返阿欣時又見到佢面紅紅咁。
我：做咩又發姣面紅紅呀。
阿欣：紅你條命呀！快ｄ啦你係咪睇架！
我：你呢條感情線．．．．
阿欣：點呀點呀？
我：嗯，冇開叉．．
好順暢．．．
阿欣：頂，你估頭髮咩，開叉開叉。
我：果然識少少野呀你，昆你唔倒添。
放心啦，你總會搵到個岩你既男仔既。
阿欣：咁．．咁咪即係冇講過野．．
死人頭黎架！係度玩我。
我：哈哈，唔玩邊有得笑喎。
阿欣：笑笑笑，自己笑飽佢啦。
然後阿欣就自己行左去。
因為都已經夜晚九點幾十點，
天都好黑啦，有佢自己一個人亂走唔係辦法。
於是我就追返上去阿欣度。
我：喂喂，唔好嬲爆爆先得架，
自己一個行好危險架。
阿欣：危唔危險又關你咩事喎！
我：你係女仔黎架麻，同埋而家已經咁夜，
我送你返屋企當補償啦，當大家和數啦。
阿欣又笑笑口：拿你話架！行啦，我地返去啦。
係果刻，我實在好懷疑到底阿欣係咪扮嬲，
真係失策，成日比佢昆倒。
不過，我同阿欣又唔係相隔住得好遠，
我亦冇咩所謂，
即使作為朋友，
玩夜左送返女仔返屋企都好應份，
更估況阿欣又係特登出黎。
答返地鐵，送到阿欣屋企樓下之後．．．
我：拿，我總算守諾言啦，
送到你樓下。
阿欣：算你啦。
我：咁我走啦，拜拜。
然後，我就轉身走．．
走左幾步之後，阿欣突然叫返我。
阿欣：阿樂．．．
然後佢就行埋黎，
突然間，用雙手掂住我臉頰．．．
佢呢一下舉動，實在令我好不知所措，
同時間，心亦跳得好快．．．．
但係，我感覺到，阿欣既雙手係出奇地溫暖，
就好似裝左發熱器一樣．．．
我：阿欣．．你．．
阿欣係果時候放返低雙手，
捉住我右手，然後比左個暖蛋我。
原來，頭先咁暖係因為佢．．．
阿欣：拎住佢啦，你雙手成日都咁凍，
費事你返屋企途中冷親麻。
我上去啦，有咩再搵我。
我：嗯．．拜拜。
估唔到阿欣會送左一隻暖蛋係for暖手。
我果時係度諗．．．．
阿紫，送左條頸巾，
阿欣，送左個暖蛋。
兩者既意義，到底何在呢．．？
送完阿欣返屋企之後，
其實都已經係夜晚十點幾。
我一路搭車返屋企途中，
一路諗：
嗯，好似好耐都冇試過同朋友玩得咁夜，
更何況係一個女仔。
我同阿紫，更加唔係成日可以出夜街。
呢種時數返屋企既日子，真係少之有少了。
雖然，咁細個成日出夜街係唔好，
但偶爾一次既機會下，令我對呢種感覺更加嚮往。
夜闌人靜。
我返到屋企門口，
罕有地，用鎖匙去解鎖，去開門，
彷彿已經對鎖匙果種鐵銹般既觸感感到陌生。
平時，我多會按門鐘，等屋企人開比我。
不過，佢地已經返晒大陸。
冷冰冰既鎖匙，冷冰冰既鐵閘，靜得連腳步聲都聽得清楚既走廊。
開門後，
我開著客廳既燈。
明亮而淡黃既廳燈依然掩蓋唔倒，
屋企果一種空間感。
原來返到屋企，發現自己得返一個人既時候，
果種感覺，係咁空虛。
一個人住既客廳，對我黎講，
突然好似變大了一樣。
少左一份人氣，一份親切感。
我坐左係梳化上，聽住鐘聲嘀嘀答答咁響，
時間真係過得好慢，慢得好緊要。
嗯，都係去沖涼吧。
我趕快咁用左十五分鐘時間去沖涼，
寒冷既天氣下，沖完一個熱水涼之後，
成個人係鬆弛既狀態下，先懂得疲倦。
我用毛巾一路抹抹自己個頭，
一路望住阿紫送比我條頸巾，
同埋阿欣送比我既暖蛋，
諗返所發生既一切一切。
其實，同阿紫阿欣見面，都分別帶到比我唔同既感覺。
同阿紫見面，果種感覺係甜蜜，溫馨，熱情同渴望。
情侶間每一下舉動既心靈衝擊都好大，會不其然處於一種亢奮狀態。
同阿欣見面，果種感覺係輕鬆，隨意，簡單同實在。
因為大家既思想相近，有好多野都黎得好自然，不造作。
對於呢兩種截然不同既感覺，
係果一刻，其實我兩種都幾嚮往，
因為一剛一柔，正好可以互相緩衝。
但咁樣，並唔代表我鍾意阿欣，
想一腳踏兩船。
只係我好慶幸同珍惜係我生活入面，
能夠同時間擁有呢兩種得黎不易既感覺，
彷彿就好似係呢個世界上，再冇遺憾一樣。
我望望個鐘，原來已經夜晚十二點。
係我準備去訓既時候，有電話打黎，係阿欣。
阿欣：喂，阿樂，你返到屋企啦？
我：係呀，已經沖埋涼，咁夜打黎唔訓？
阿欣：冇呀，想睇下你係咪安全咁返到屋企姐。
我：有幾唔安全呀，你驚我比人拐左去呀？
阿欣：點知你會唔會有咩事呀，咁多病痛。
我：哈，我而家咪生歐歐係度，你可以放心啦。
阿欣：阿樂，我今日真係過得好開心呀，多謝你請我呢餐飯。
我：傻啦，應該係我多謝你帶我出去就真，
唔係你我都識唔倒咁好食既蠔餅。
阿欣：你睇下你仲係掛住食，咁我訓啦，你都早ｄ抖啦！
返學見啦。
我：嗯，返學見。
仲有幾日，就要返學。
阿紫同我屋企人都會係返學前一日先返黎，
我都係時候要做功課，
費事屋企人返黎見到我冇做野，又鬧我。
所以，剩底果幾日，我都好努力咁趕下功課。
直到最後一日，做做下功課既時候，
屋企門就打開左，我屋企人終於返黎啦！
一開門已經見到佢地一抽二袋，估唔到回程仲比去程
拎得多野。
我：嘩，搞咩鬼拎咁多野呀？
媽：大陸ｄ親戚送架麻，
你知道農場果邊養左好多雞鴨，
佢地咪叫我拎返隻雞同鴨返黎食囉。
我望到即刻笑左，真係原隻雞同鴨黎。
媽繼續講：農場ｄ雞鴨比起香港ｄ冰鮮雞好食好多架，
ｄ肉都滑ｄ啦！一連幾晚就食雞同鴨架啦！
我聽到我老母咁講，即刻打冷震。
鬼咩！我已經連續幾日，唔係叉雞飯，燒鴨飯就係燒肉飯果類。
之前又食埋北姑滑雞飯，你而家比咩雞我食都冇味啦！
唔通，我同雞真係咁有緣！？
夜晚果時，
阿紫亦都係韓國返左黎，
佢打左個電話比我。
阿紫：阿樂，我返左黎啦。
係咪好掛住我呢！
我：掛死左我啦，而家掛左係窗出面。
阿紫：哈哈，你估你係衣架咩傻佬。
我：去韓國一定玩得好開心啦，
難為我呢幾日真係冇啖好食，日日食飯盒。
阿紫：真係陰功豬啦。
唔駛怕，我有野慰勞你呀麻。
我聽到阿紫咁講，即刻兩眼發光。
我：係咩呀？
阿紫：因為韓國都冇咩特別手信，
所以我買左ｄ野食比你呀，
有紫菜啦，泡菜啦，雞泡魚干啦等等。
我：岩晒我啦，我咁鍾意食野。
但雞泡魚唔係有毒架咩？
阿紫：係，但整得黎賣都冇毒架啦，
係果度好受歡迎架，我試過幾好食。
我：多謝你呀阿紫，我知你最錫我。
阿紫：咁我係下次見面既時候比你啦！
寒冬過去，三月份既春天都已經黎到。
除左潮溼之外，我都冇咩特別記憶。
女仔既相對濕度都無春天既天氣咁多水。
真係痴鬼線，可以一連幾日落雨唔停都有！！
加上我份人又唔鍾意拎雨傘，
嚴格黎講，應該係話成日唔記得先岩！
好彩，今日天陰陰，出門時比老母提一提我帶傘，
如果唔係真係濕過肥西老母雞。
一答完車出去就落大雨。
我一路行一路詛咒：
頂！個天真係唔向左走向右走爭氣，
一係就黑雨，一係就八號波呀麻！
而家唔湯唔水有咩為呢！
鞋又有ｄ入水！
返到學校當然唔駛集隊直接上課室啦！
上到課室，見到阿薇已經坐係度。
見到阿薇有ｄ濕，我走埋去笑勁佢。
我：抵你死啦，落雨又唔帶傘！
阿薇：鬼咩！咁出門口果時都冇落架麻！
點知差唔多到學校果時先落。
我：唔通連個天都唔鍾意你？
阿薇：食屎啦你！有冇紙巾呀！！
我：唔係呀，好似而家咁做出水芙蓉咪幾好！做得愛情小說封面啦！
你睇下你ｄ頭髮！幾有美感同動感呀！
阿薇：頂你啦，亂晒仲話有動感！
快ｄ啦！！妖！
我：拿！人同妖精都有阿媽生。
不過人係人啦媽，妖，係妖啦媽！
阿薇：死啦你，最係度講笑話，
拎唔拎架！
我：係係係。
你著返件冷衫啦，你件衫有ｄ透呀！
阿薇：係喎！係咪好性感呢？哈哈！
我：頂，想嘔！係著就認真著啦，
我唔想成堂係你隔離望你咁樣！
仲慘過出去比雨淋。
上數學堂果時，因為數學功課做得唔好，
Miss派返返黎話要重做。
唉，鬼咩，我真係唔識做呀麻。
講真，我對數學既觸感真係差。
小學時有ｄ應用題已經唔識做，
黎到中學就更加見鬼！
而家學緊果ｄ咩聯立二元一次方程我真係聽唔入耳，媽的！
係果時我send左個sms比阿欣，
睇佢可唔可以教我重做果份功課，因為放學五點前要交返。
阿欣話冇問題，叫我放學搵佢。
上完數學堂過後，就係科學堂。
今堂科學堂比較新鮮，
因為個個都要解剖牛眼。
果時得個中二雞，見到咁大隻牛眼，
真係幾核突，但又覺得幾好玩！
眼見ｄ女仔見到ｄ牛眼就鬼晒咁嘈，
又驚又尖叫，真係令到我哭笑不得！
我：喂，Amy，你唔係驚呀。
仲唔戴手套拎隻牛眼出黎！
Amy：真係好核突呀！
我：哈，你大舊個牛眼咁多，驚咩呀！
我以為你係天不怕地不怕架添！
Amy：收啦！我都係女仔黎架！
我：係喎，差ｄ唔記得添！
咁你慢慢啦，我切先啦！
Amy：喂呀，阿樂！幫我拎隻牛眼出黎啦！
真係頂唔順呀！
我：好，見係你咋！戴左手套又駛咩驚咁多呀！
然後我就一手拎左隻牛眼出黎，
仲作撞嚇下Amy添，
嚇到佢差ｄ標尿。
Amy：頂阿樂你咪玩啦，一陣我唔小心隊林左你就唔好啦！
我：小心你解剖完之後發惡夢呀，
從此隻牛眼成晚望住你！１
Amy：陰毒得你呀！你顧掂你自己先啦！
一開波，就梗係剪走晒ｄ牛眼既眼睫毛，
等佢變白虎先靚仔架麻！
不過ｄ眼睫毛真係好過長！等我一把剪向左走向右走晒佢！
我見到Amy雞手鴨腳，真係笑佢都費事。
我：等我黎啦，你估你而家去据扒咩！
比有人咁切架！剪毛先啦！
話晒Amy之前家政都幫我好多，
今次仲唔輪到我威返次！！
剪完毛就切埋出面ｄ脂肪組織。
跟住沿著角膜將牛眼剪開，
Hi！一剪即刻必汁！
有ｄ水狀液出黎！
我：嘩，咁鬼多水既！
Amy：係囉！即刻打晒冷震！