有一晚一個來電: 愛與痛的邊緣(上)
中二既學期，終於開始。
今日，我特意地，早起床了，打算行路回學校。
我的校服，已經被媽媽，給摺好，並放在梳化上。
吃過早餐後，我穿上中一時買起的校服。
嗯，恤衫有點紮身了。
我望望褲腳，亦比中一的時候稍稍高了。
我．．長高了嗎．．．
看來我要等媽媽下班後，才能把褲腳再放長一點點。
我將恤衫上的鈕子，逐粒，逐粒去扣上。
扣好尾二的一粒時，我望著頸喉上，
並沒有扣上的那粒鈕子，
想起了我和阿力的第一句對話，
想起了當初中一傻頭傻腦的我，
竟然把那鈕子給扣上了。
這顆鈕子，由最初我買校服回來時，
只是扣過一次而已。
很久很久，也沒有再用手去觸碰它了，
這顆鈕子，長年也沒有人去理會，
它，會感到空虛，會感到寂寞嗎？
穿好黑鞋，綁好鞋帶後，
我便出門上學。
九月了，
步行路上，
再次看見每天早上背起書包上學時的街景。
路面忙得很，
不同學校的學生也在上學呢，
有的還是帶著睡眼惺忪的樣子。
上班的大人們，都走得特別急，
趕得要命般在人群中穿插。
我慢條斯理地沿著斜路，
慢慢地踏著，重覆著
不知道幾多次的腳步，
再熟悉不過的道路去上學。
我，不再是中一開學時，
那個連路也會蕩失，
差點弄得自己遲到的阿樂。
上到校門前，我站一站著，
望著這所學校的感覺，
比起以前親切得多了，
不會再感到恐懼，
不會再感到陌生。
因為我知道，入面，
有我最要好的朋友在等我，
阿欣，阿力，Amy。
阿紫，今天是妳第一天到新校上學，
妳習慣嗎？
想完那些有的沒的之後，
我便踏入校門去。
步入校門後，
同學們之間的吵鬧聲便愈來愈大。
此時，有人從我背後拍一拍我。
感覺就像阿紫以往做的一樣．．．
我轉轉身望過去，是阿力。
阿力：喂，阿樂，
冇見你成個月，好似高左咁喎。
我：哈哈，係咩，
發育時期係咁架啦。
但我睇你好似冇咩點高咋喎，
又話成日去打波！
阿力：頂，我就係成日去打波，
想高ｄ。屌！點知打左成個暑假，
好似一ｄ都冇高到，你叫我點溝女呀！！
我：唔緊要既，你雖然冇高到，
換黎既係黑碳既膚色呀麻！
一定迷死女啦！
阿力：屌你啦！又會既，
阿紫應該去到新學校讀啦喎。
我心情沉一沉，話：嗯．．．
唔知佢適唔適應呢．．．
阿力：唔駛擔心喎，
佢呢種性格咁易識到朋友，
點會適應唔倒。
阿力說得也對，阿紫的確是討人喜歡的性格，
但這樣，究竟是好是壞？
我淡淡咁講：又係既．．
睇黎我擔心都係多餘。
阿力答一答我膊頭，話：唔好咁愁啦，
岩岩開學就咁既樣，
黎啦，去小食部買支野飲先。
於是，我地就去到小食部。
嗯！？見到一個熟識既背影。
阿力：係阿欣黎喎，你果位補習姐姐。
佢今年中幾呀？
我：中四啦．．
阿力：哦，原來大兩年。
我走埋去：喂，阿欣．．
咁早既．．！？
阿欣：係呀，開學前一日訓唔著咪早ｄ返黎囉．．．
阿樂．．你，好似高左咁既？
我：係咩．．應該係掛．．少少啦．．
阿力即刻自卑：頂你阿樂，個個人都話你高左．．
冇人話我有高到．．．屌，你食咩大架！
阿欣：哈哈，阿力我見你都好似大隻左呀。
阿力比阿欣咁樣講一講，又重獲返ｄ自信，
即刻show佢手臂肌肉出黎。
我：得啦得啦，
知你大隻知你大隻！
阿欣：阿樂，你買野飲？
我：嗯．．．．
阿欣同老闆講：唔該一盒凍朱古力奶呀．．
我：阿欣．．你又知我想買．．呢隻既
阿欣：點會唔知呀，你補習果時成日飲奶，
我仲話過你架麻！！正死蠢黎，成日都冇記性。
阿欣買完之後，遞一遞比我。
以前．．阿紫負責買既．．
而家，卻換成了阿欣．．．．．
我同阿力跟住就走返去集隊。
我望望條隊．．
阿紫，果然唔會返黎，
果一刻我仲笑自己，點解會仲抱住希望．．．
又係既，始終呢度都唔係真正屬於佢既地方。
阿力：阿欣都幾細心喎，
會記得你飲咩！
我：唔好亂講啦，
我同佢補習時成日都有盒係身，
佢先會知姐，我地朋友黎架咋。
阿力：係唔係朋友都好，我始終覺得你有女仔緣。
我：哈哈，唔抵得？
你都唔差呀，男人婆仲等緊你呢可能。
阿力：我屌你你仲提喎，
算吧啦，我同佢冇可能架啦。
呢個時候，校鐘亦響起，
一輪悶到仆街而重覆既早宣又開始。
中二了，不只人長高了，
連班房也要上多一層才到。
入到班房後，
我地都各自搵個位坐低，
冇坐位表既情況下，大家都同返大家玩開果ｄ坐架啦。
沒想到，除左阿紫走左呢個轉變之外，
就連班主任，亦都換埋，唔再係misschan。
班主任入到黎，同大家講：
大家好！我叫misslee。
係今年你地既班主任，黎緊我會教你地英文既，
座位表我聽日會幫你地安排好。
好啦！咁地而家就選兩位班長去拎ｄ簿上黎先！
（呢個missd語氣有點嚴肅，唔似以前misschan咁友善)
做班長呢ｄ野，我一向都唔會勇躍，一於少理。
由同學去投票同提名，
爭吵一輪過後，估唔到阿力做左男班長。
而女班長，我亦唔記得係邊個．．．
總之，唔會再係阿紫．．．
抄好時間表，講完一輪無無聊聊既野之後，
其實好快到晏就。因為新開學日既關係，我地返半日就放學。
我見時間過得咁快，我好開心．．．
我估阿紫都係返半日，
所以我好快就可以返到屋企聽到阿紫把聲。
返到家之後，
冇耐，我就已經急不及待咁，打比阿紫。
我：阿紫，
你放左學未呀？
阿紫：放左啦，我而家係屋企啦，
好近咋麻我同間學校。
我：點呀，有冇ｄ咩唔適應呀？
阿紫：都暫時未有既，
先返左一日學，唔駛咁緊張喎阿樂。
我：阿紫．．
我見唔到你係度真係好唔慣呀，
我已經好掛住好掛住你啦！！
阿紫：阿樂，
我明白架，我都好唔慣，
但係你要乖ｄ呀，
我地又唔係見唔到面，
你要乖乖地留心上堂呀知麻！
耐心ｄ等下啦阿樂。
估唔到，我亦開始變得有ｄ痴身，
開始依賴住阿紫．．．
熱戀期間唔可以日日見面，
真係好痛苦，好難忍受。
我既要求其實唔係好過份，
點解連每日見面既時間都要剝削我地！
點解你地父母要咁忍心要阿紫去搬屋轉校！
點解呀！
第二日調位時，我地仍然要好似中一果時咁，
企係班房外面等，同時間，我亦都冇左果份未知既期待，
始終呢一班大部分同學都係上年中一同我同班既。
調係邊度坐，係唔係同女仔坐，
我亦都已經冇咩所謂了．．．
最後，我被派去坐左一個女仔既隔離坐。
Ａｍｙ同阿力都唔係我周近，
而阿紫佢．．更加唔再係我前面坐。
以前每日返到學校課室，
都幾乎有一盒朱古力奶放係台面。
而家，卻消失了。
我深知道，自己買既意義，已經好唔同。
因為，盒奶既本身，已經失去了
阿紫那一份關心，以及她雙手既微溫。
諗野諗得太入神，
完全忘記左同隔離個女仔打一聲招呼。
其實呢個女仔我係認得，
因為上年同我一班，
等我甚少同佢接觸過，因為大家既圈子都唔同。
但係．．．我坐佢隔離，真係唔係一件好事．．．
佢係玩得好癲果ｄ女仔黎，仲喪過Amy．．．
完全又係男仔性格，上天點解要咁對我！！
我屌咩！
我想開口say個hi既時候，
佢已經開左聲。
??：我認得你，你係阿樂呀麻！
成績咁好，點會唔知！！
我：我都識你，你叫阿薇呀麻！
阿薇：係呀！！估唔到你會知我個名喎，
我成績又唔係好。
我：同過一班，就算唔熟，ｄ名都會認得既。
佢即刻用力咁拍一拍我膊頭，
對我講：識貨呀果然！！
睇佢只係比正常女仔肥少少，係少少咁多，
估唔到份怪力仲勁過ａｍｙ。
好！你做初一我做十五！
咁．．．我都唔客氣啦！！
正好比我發洩！！
我即刻好大力咁拍返佢膊頭：大家咁話啦！！！
唔同呢個世界，就再搵唔到一個同阿紫同一類既人，
天呀！！！真係屌啦媽！！
數學堂時，我比較在意教我地果位數學老師，
會唔會仲係misschan。
點知唔係，係misswong．．．．
心入面，又少左一份對中一時果份懷念，果份親切感。
每一科都唔通晒老師，點搞呀．．．
不過，我始終有ｄ野要搵返misschan，所以我打算小息去搵佢。
上左幾堂之後，我發覺阿薇姐，
好鍾意上堂既時間睇小說。
所以上中史堂咁撚悶既時候，
我就同佢單打左幾句。
我：阿薇格格，
睇咩小說呀？
唔係幻想緊自己係宮廷美女呀？
我拎一拎阿薇既小說，
睇睇佢既封面。
屌！就係果ｄ咩撚野尋夢園系列既愛情小說。
即係個封面將ｄ女仔畫到好撚似真人果ｄ呢．．．
我：睇唔出喎薇姐你，
男人老狗學人睇愛情小說．．
做咩，少女懷春呀而家？
阿薇：妖，梗係唔係啦，
你唔識野架啦！不知幾好睇．．
我再望望佢櫃筒，
我即刻笑住講：喂屌你駛唔駛有四本係度呀．．
你睇得晒架啦？
阿薇：一日一本差唔多啦，
喂！阿樂！幫我抄中史筆記啦！
我唔得閒呀！
我：頂，你有幾唔得閒呀．．
阿薇：戲玉呀戲玉呀！
我好奇問：屌，咩戲玉呀！！？
點知睇一睇．．．即刻笑撚到我呢．．
內容大概係咁既"他輕輕脫去阿儀的上衣，用手指輕輕在她身上游走。
氣若柔絲般輕喘的阿儀，放蕩地吻著他的咀唇。
他變本加厲，肆無忌憚地在阿儀那傲人的雙峰上
揉搓著，再用舌頭輕嚐她豐乳上的那朵粉紅蓓蕾"
我：喂！屌你睇咸野都睇得咁高級。
用晒比喻，咩”粉紅蓓蕾”喎，
屌咪即係lin頭！！
阿薇即刻笑左聲：哈哈，阿樂你都幾咸濕架喎！
咁寫小說梗係架啦，
唔同寫話”我咬左你粒lin頭"咩！！
傻既你都！
同佢坐有個好處，講野完全唔駛有顧慮，
屌啦媽佢根本係一個，會睇愛情小說既男仔黎。
阿薇：喂！快抄啦！
唔好扮晒野呀！
我：得啦得啦，
鬼唔知你睇到扯晒旗咩！
（雖然佢係女仔，我咁話佢唔係幾好，但我真係忍唔住）
然後佢又即刻拎本書拍鳩我．．
無幾耐，小息鐘聲打起．．．
我要落去搵一搵misschan了。
小息時候，我落到去搵missChan。
MissChan見到我搵佢，都有點驚訝。
MissChan：阿樂，
點呀，搵我有咩事呢？
我：MissChan，我想問，
我數學仲駛唔駛繼續補？
MissChan：阿樂，其實我見你數學考試既成績都進步左好多。
其實原本我只係打算中一就已經完架啦，
我亦冇諗過你中二會繼續想補。
補唔補你自己做決定吧，
如果想補既，就自己同阿欣講啦。
同時亦都要睇佢得唔得閒先，話晒佢已經中四。
我：哦，咁呀。
咁我一係搵佢溝通下先啦。
唔該你呀MissChan。
MissChan：唔駛客氣，升到中二即使我冇教你數學，
你都要好好比心機唔好偷懶呀知麻？
我：知啦。
既然MissChan咁講，我就惟有夜晚先打去問阿欣吧。
Lunch既時候，換左間午膳供應商。
一食既時候，我就知奶野。
我即刻好大聲咁話：嘩頂！咁難食既呢個餐！
講完之後即刻有好多人一路笑住一路望鳩我，
搞到我有ｄ唔好意思。
阿薇：超！又係你地貪新鮮話換左個供應商，
而家咪自己拎黎賤囉！
我睇睇阿薇個餐，
同佢講：喂！呃錢喎呢個餐，少野成咁既。
阿薇：減肥餐係咁架啦！！（中學都有減肥餐供應咁體貼）
食完lunch之後，
我見無咩野做，就落去行下。
平時之前中一既日子，我都有阿紫陪住我行下，係學校散下步。
而家．．．得返自己一個行既時候，愈行就愈無癮。
我對眼，再見唔到阿紫既樣貌同佢既身影，
我雙耳，再聽唔到佢甜美可人既聲線，
我個鼻，亦都再聞唔到佢身體，甚至頭髮既香氣。
我雙手，更加，觸摸唔到佢。
就好似，觸不到的戀人一樣．．．．
彷彿我已經盲了，聾了似的．．．．
呢個時候，Amy同阿力行緊過黎．．．．．
Ａｍｙ：喂！阿樂！做咩咁愁既樣呀？
成日悶悶不樂咁既？
阿力：相思病呀佢！！
Ａｍｙ：哦！掛住阿紫下話，
又難怪既無神神轉左校，
見唔到係有ｄ唔慣架啦！！
我：我冇野喎真係．．．
Ａｍｙ：冇野就唔會好似而家咁既樣啦！
拿！唔好話我唔益你。
我蝕底ｄ，比你當住我係阿紫先勒。
最多我每日都買盒朱古力奶比你，
小息同你遊下學校啦！（屌你個ａｍｙ玩ｄ咁既野，仲見我未夠死咩）
我聽到即刻笑住講：哈哈，唔駛啦ａｍｙ！
我唔想飲你ｄ奶！
同你一齊係學校散步，只會令我既相思病情況更加糟糕！
你既好意，我都係心領啦！
Ａｍｙ：哈哈，阿樂你真係有寶都唔識執！
我有咩比唔上阿紫呢！
阿力即刻笑鳩住講：哈哈，ａｍｙ你同阿紫好大差別喎，
體型上係最明顯架啦！
Ａｍｙ：超，你唔抵得我有豐滿既身材同迷人既曲線姐。
我：你身材既曲線曲到圓咁濟啦喎！
拿！即係咁，你有冇睇過無記拍既尋秦記先。
Ａｍｙ：有呀！我晚晚都追呢套劇既。
我：你明唔明白點解導演明知道係拍緊一套古代劇，
都要搵一ｄ又瘦又靚既女主角去拍咁唔寫實？
Ａｍｙ：唔知喎，點解呀！
我：就係因為導演明知道，比著佢自己係項少龍呀，
返到古代見到全部都係你咁既身型既龐然大物，
都即刻返返黎現代啦，
咁套劇仲駛做既？一集就大結局啦！
ａｍｙ：頂你阿樂把口真係衰過人既。
我：所以我都係當唔倒你係阿紫架啦。
不過我知你咁做係想引我笑，你成功左啦！
ａｍｙ，你都係快點回去古代啦，
係現代好危險，我同你都冇可能架啦，哈哈。
放學既時候，
自己背起書包，
落到樓下中一果層既時候，
經過自己中一之前既班房．．．
估唔到，已經人去樓空，
只剩下一位工友伯伯係度打掃。
寂寞既心境，
又再一次一次被無情既現實喚醒起來。
阿紫，你係度做緊咩野？
我好掛住你。
返到屋企，我就打個電話比阿欣，
同佢講返，有關以後補習既事．．．．．
我：喂，阿欣，阻唔阻住你？
阿欣：唔阻呀，做咩？
我：冇，我問過misschan佢話數學補習已經完晒，
佢同我講話補唔補就要睇我同你咁話。
阿欣：咁你自己既意思係點．．？
我：為左成績既話，我當然想補．．．
只不過，以我而家既心情．．我相信我未必有心機了
阿欣有點愕然，問：點解？
係咪因為．．．．阿紫轉左校．．？
我：嗯．．．
我始終好唔慣．．未適應倒．．
冇左佢係度既時候，我個心總係好唔安樂，好亂，
冇晒安全感。
阿欣：阿樂，好明顯你係一個缺乏安全感既人黎架啦。
我：嗯．．．我諗係因為自小家庭問題所影響．．
（所以，我實在好倚賴阿紫，佢係我惟一既依靠黎）
阿欣：阿樂！拍拖還拍拖！
你咁樣既心情會影響學業架你知唔知呀！（阿欣語氣帶點嚴厲）
你唔係話你一直想拎好ｄ成績比你媽咪睇架咩！？
做咩呀？而家就放棄啦．．．
我：唔係．．．．．
阿欣：其實我都明白你既痛苦，
你有咩都可以打黎同我講，當渲洩又好咩都好麻．．
我唔想見到你成日唔開心呀！
我即刻呆左一呆：阿欣．．．你．．
阿欣好口快咁答：我係你交心既朋友呀麻．．
呢ｄ野好正常姐！
阿欣繼續話：其實我中四選左科之後，
ｄ野都深左，我未必花倒太多時間比你，
所以每個星期一次就真係冇可能架啦！
你有唔識先搵我咪得囉！
我：咁樣會唔會麻煩倒你？我真係冇咩所謂．．．
阿欣：唔麻煩！你唔好咁長氣啦！
總之我唔想再見你咁唔開心落去啦，
再係咁我打到你笑為止架！
就係咁，開學之後，
我有咩唔識先再搵阿欣。
係九月中果時，我同阿紫約好左．．．
話九月尾既周末可以見面。
果一刻，我真係覺得好開心．．．
等左咁耐，終於有機會見到阿紫，係實實質質咁見到．．
不過，同以前相比，落差相在太大．．．．
中一既時候，我地幾乎日日見面．．．
而家中二，我地亦只係一個月見一次面．．．
有時候．．甚至．．一個月都冇一次．．．
同我想像中，每兩個星期見一次面，
實在相差得太遠，太遠。
試問見一次面既時間，點樣可以填補我一個月見唔到你果種空虛呢．．
或許我應該唔可以再成日拎以前同而家黎相提並論，
因為根本無得比．．．
咁樣只會令自己更加唔開心。
每日每日，我只係可以同到阿紫傾一次電話．．．
雖然都維持住一小時．．．
但係，我地果種愛情既感覺，
好似有點兒，稍稍唔通左．．．
係我既錯覺嗎．．．．．
中二既興趣班，我只係報左乒乓球學會。
因為乒乓波既運動量冇其他運動咁大，
對自己本身個病，都安全少少。
一星期一次既練波，早已習以為常。
今日，我竟然見到阿欣。
佢見到我之後，笑住咁向我揮手示意。
我叫第二個代我打住先，我就行一行埋佢度。
我：做咩，搵我有事？
阿欣：冇呀，見冇野做咪過黎睇一睇你打波囉。
我：冇野做又唔走既？
阿欣：差唔多啦！
頭先見你教中一ｄ學生喎！
勁啦！升到中二果然唔同ｄ呀下！
識教人啦！
我：哈哈，咪玩啦！職責所在姐．．
阿sir叫我教唔通我唔教咩。
阿欣：咁幾時再教我姐。
我：你唔係話好忙架咩？
阿欣：忙極都有時間輕鬆下既．．．
我：但我好忙喎！
阿欣：玩野呀靚仔！
而家吊高黎賣啦！！
我：哈哈，點敢呀，欣姐你叫到，
我幾時都奉陪到底既。
你想打果時先約我啦！！
阿欣：嗯，歐歐手指尾。
（估唔到，阿欣會好呢一味既玩意）
我：仲細咩你！！低ｂ婆！
阿欣：頂，叫你歐就歐啦！
然後，我同佢就歐左一歐。
阿欣繼續話：阿樂你樽水飲晒未呀？
我望一望個樽：飲晒啦，做咩？
阿欣：你比一比我呀，我過去飲水機幫你添ｄ水呀！
阿欣佢．．幾時變到咁體貼，令到我有點受寵若驚
所謂有朋自遠方來，非奸即盜！
我：唔．．唔該你。
比完佢之後，佢就拿拿林跑去飲水機果度。
以前，阿紫佢間唔中，都會落黎睇下我，又或者，
見我口渴，會買埋一盒凍朱古力奶比我。
而家，阿紫走左之後．．
換黎既係阿欣，雖然唔係成日見到佢落黎，
但係，每次佢同我講，話幫我添水果陣．．．
我彷彿都可以係佢身上，搵到阿紫既感覺，
令到我果種熟悉感，又再返返黎。
佢加完水之後，
同我講左一聲拜拜。
我望住佢呢番舉動，
依然帶半分莫名奇妙，
點解．．阿欣要咁做呢？
果一刻，望住佢離開我既視線．．
別有一番感慨．．．佢．．．身材好似好左。
臨近九月尾既週末，
我同阿紫就約左出街。
出街去邊？嗯，我仔細想想過後，
我想同佢去溜冰。
其實我唔識溜，我亦問過佢，
佢都唔想溜既。
咁岩啦，大家一齊學下呀麻。
我就約左佢直接係溜冰場等，
心諗：唔知今日有冇短褲仔睇呢！
見到佢黎既時候，哈哈，好明顯大失所望啦，
佢著左一條長既黑色運動褲。
佢一黎到我面前，
我實在忍唔住．．．．．．．．．．
．．．．．．．．．．．．．．．．
．．．．．．．．．．．．．．．．
走去攬住佢。
當我緊緊咁攬住佢果一刻，
我已經咩都唔理，
旁人既眼光對我黎講已經唔重要。
仲重要既係，阿紫而家真係係我身邊啦，
我終於可以真真正正感受到阿紫既體溫同觸感。
我一路攬住佢，一路講：
阿紫，我終於見到你啦．．．
你知唔知我呢個月黎真係好掛住你！
阿紫見到我咁大既舉動，當然會嚇到呆左，
但係我相信佢會明白。
阿紫：傻佬，我都好好好掛住你呀，
我都等左呢日好耐啦．．．
估唔到，差唔多成個月冇見．．
我知你等到好辛苦架啦，阿樂。
阿紫果時亦緊緊抱緊住我。
過左一陣之後，我放開手。
我：係呢，學校果度慣唔慣？
阿紫：慣呀，一個月啦．．
總算叫適應左。
係見唔到你始終有ｄ唔慣姐。
我：咁．．今日可以玩到幾點？
阿紫：我諗六點倒我就要走架啦．．
如果唔係會比屋企人話．．
我：真係唔可以食埋晚飯．．．？
阿紫：我諗唔得啦．．
唔好意思呀阿樂．．．
（果時既阿紫，對佢屋企人既命令係一ｄ都唔敢反抗）
我甚感失望．．．一個月見一次．．
佢父母都要．．．．．．唉．．．
阿紫見我咁樣，就錫左我一啖。
同我講：阿樂，笑返啦笑返啦好唔好？
我地快ｄ入去溜啦！
跟住，我地就踏足第一次溜冰場。
入到溜冰場，加上商場上既冷氣，
其實都幾凍，阿紫著長褲黎都係一個明智既決擇。
我地揀完岩自己尺寸既溜冰鞋之後，
我地就坐係度著鞋。
因為我揀左個大我隻腳少少既尺碼，所以著落去都方便同快好多。
而阿紫佢，我見佢好似著得好慢咁．．
於是．．．．
我：阿紫，我幫你著呀。
我叫阿紫坐係度，
然後我就蹲一蹲下係阿紫對腳面前。
我小心翼翼咁，將阿紫隻腳
慢慢套入個鞋度，
因為我見有點窄，所以我都盡量輕手一點，
費事整痛阿紫。
我一路幫阿紫著既時候，
一路同阿紫講：傻瓜，下次揀對大小小架麻，
岩岩好既話好難著入去架。
阿紫就面紅紅咁，同我講：阿樂，
唔該你．．．
冇見你咁耐依然都係咁細心。
我就反問：咁你男朋友叫咩名先？
阿紫就笑笑口：咪叫阿樂囉。
我：咁佢份人本身細唔細心架？
阿紫：嘻，細心，一直都好細心。
我：咁咪係囉阿紫，我不嬲都咁細心架啦，
你又唔係唔識我。
幫佢著完鞋之後，我就輕輕咁，
幫佢將鞋帶綁上，
打結既時候，
我問佢：會唔會太緊？
阿紫拎一拎頭：唔會呀，岩岩好。
我起一起身，同阿紫講：咁得啦，
我地行出去囉。
阿紫即刻cool住我隻手：好呀，阿樂你唔好走開呀，
我驚一陣會跌呀。
我摵一摵阿紫塊面：唔驚唔驚，有我扶住你麻。
我同阿紫小心翼翼咁，
行去溜冰場度。
因為我地都唔識，當然要係個扶手
邊邊度撚兩撚先去溜架啦！
一直溜出去仆左街咪好瘀！！
一踏入冰面上我已經覺得好冼腳，
好彩我即刻扶一扶個扶手，
一落場就仆街真係咩霸氣都冇晒。
我見阿紫有ｄ驚，仲係唔咁行上去冰面，
我就一隻手捉緊個扶手位，
一隻手就遞比阿紫．．
我：阿紫，唔駛驚架喎，
捉實我隻手啦。
然後阿紫就比隻手我，
慢慢，慢慢咁行過黎我度，
點知，突然佢有失平衡既動作，
我驚得濟驚佢會跌，
就即刻攬實左佢條腰。
阿紫：唔該你呀阿樂．．
冇你係度我都唔知點算好。
我：阿紫，我唔可能攬住你溜冰架喎。
阿紫：車，邊個要你攬住我姐，
我識捉扶手。
我：扶手咁冷冰冰，
捉我隻手啦，暖ｄ呀麻。
於是，阿紫就拖緊我隻手，
我就同佢一齊咁，
一步一步，
由行開始。
我：阿紫，個人要向前傾先冇咁易跌架。
阿紫：係咩，等我試試先．．．．
阿紫：嘻，又好似係喎可。
我：阿紫，如果我而家吱你條腰你估會點呀拿。
阿紫即刻話：唔好呀唔好呀，
我真係會跌架，
拿你吱我我真係唔彩你架啦！
我：哈哈，好好好，唔整你唔整你。
因為行實在令隻腳好攰，
所以我自己試下溜下啦．．．
初時都好地地，
點知太多人係身邊飛黎飛去，
搞到我收唔切制，
最後都．．．．．仆左係地。
阿紫見到，即刻話：哈哈，阿樂你有冇事呀，
傻瓜唔好咁急進呀麻
點呀，痛唔痛呀。
我：車，溜冰邊有人未試過跌低喎。
我冇咩事，小事黎架姐。
我見咁多人係身邊溜得咁快，
我都係係阿紫旁邊陪住佢好ｄ，
我唔想佢比人整跌。
我：我會係你身邊保護住你架，
咁咪冇人整跌你囉。
阿紫：你唔會好悶咩？
我溜得咁慢。
我：點會呀，
單係望住你一世我都唔會覺得悶呀。
阿紫：嘻，口甜舌滑呀你。
玩左好一陣之後，
阿紫亦開始漸漸咁，溜得比岩岩入黎果時快。
我：阿紫，
我地係咪要再一個月後先見到你．．？
阿紫：阿樂，對唔住呀．．
你都知我唔係話事果個黎。
我：咁又係．．
但我真係等得好辛苦。
我咁講一講完，阿紫就再錫一錫我面豬。
阿紫：咁有冇甜ｄ呀？
我：但係甜一陣就冇啦．．．．
阿紫：咁下次見面我地先再甜咪得囉。
（阿紫咁講一講，唔知點解好令人諗埋一邊）
然後阿紫就自己滑走左去．．
我比阿紫呢句電完之後，
再醒一醒頭腦，
繼續追返阿紫啦！
係後面追阿紫既步伐，
去到埋佢旁邊既時候，
再拖一拖阿紫隻小手。