有一晚一個來電: 熱戀中的暑假(下)
我果一刻呆住既時候，我仲記得我雙手．．
係捉住左阿紫雙手．．．．．
我果剎那，引唔住，將我塊面，慢慢咁靠近阿紫既小咀身上，
靠近緊既期間，阿紫仲係眼仔碌碌咁，定住咁望實我．．．
然後我就合埋眼．．輕輕咁係阿紫那雙小唇上，
留下我第一個初吻既印記。
雙唇與雙唇之間觸碰既感覺，
到而家我仲歷歷在目，柔軟而帶濕潤，
初次接吻既感覺令我心跳加速得好快好快．．．．
因為第一次錫，我雙唇輕輕點一點，就提返起．．．
見到阿紫面紅紅咁，望住我．．．
我：阿紫．．我．．．．（我係咪嚇親阿紫）
阿紫溫柔咁同我講：我比左個初吻你啦．．．
我：我都係．．．．
但．．你會唔會．．介意無啦啦咁突然．．？
阿紫用雙手環"cool"住我條頸，
用少少力將我再次壓返低．．．．．
我同佢再接吻多一次。
今次時間稍為長左一點，但我既技巧真係唔純熟。
只係定左係度，郁都唔識郁。
不過我隱約感受到，阿紫既吐息有點急，幅度亦有點大．．．
阿紫佢．．．應該都好緊張吧。
但阿紫會用行動證明佢唔介意．．．．
我果一刻真係好開心．．．
每同佢接吻時，我個心就好似比電電親一樣，
有一種酥麻感．．．．．一種好特別，又令人會上癮既感覺。
錫完之後，大家塊面都好紅，我地坐返起身。
阿紫ｄ條辮因為頭先訓左落床既關係，
好明顯見到佢條辮開始有ｄ鬆鬆地。
我用手幫阿紫，除左佢條辮個圈圈佢。
見佢個頭有點亂，我就問佢：阿紫，你拎把梳比我呀。
於是阿紫就係床頭拎比我。
然後，我就叫阿紫背住我咁，坐係床上。
我就係佢後面，輕輕咁，
用手上既梳，幫佢後面ｄ頭髮梳返整齊。
我：阿紫，你ｄ頭髮真係保養得好好，
又冇咩點打結同開叉。
阿紫：我有定期落護髮素同焗油呀麻。
（有次我記得有人問我，點樣頭髮先冇咁易開叉，
我同佢講，落柔順劑囉死蠢，然後佢同我講，
柔順劑唔係for洗衫架咩？跟住自此就比佢笑到我仆街）
我：係呀，唔怪得知keep得咁好啦，
嗯，仲有浸香味添。
阿紫：嘻，係咩。
我梳完之後，輕輕係阿紫背後，靠上阿紫既膊頭上，
我同阿紫講：阿紫，我覺得你放左頭髮落黎靚ｄ。
然後阿紫亦將個身挨住我，同我講：係咩，
咁我以後見你都放頭髮落黎啦。
然後我就用雙手，從後抱住阿紫既腰間。（我好鍾意後抱，拿唔係講後抱式扑野）
阿紫既身體，真係好柔軟，
我好希望果一刻時間唔好過得咁快，好讓我可以一直，一直咁攬住阿紫。
我後抱住阿紫既時候，阿紫個身突然再傾低ｄ。
將個頭，靠近我個心既位置。
阿紫佢，聽緊我既心跳。
阿紫：你個心真係跳得好快喎．．．
我：嗯，可能因為太緊張吧。
阿紫用手掂住我個心，同佢講：你要乖乖地，唔好成日痛呀知麻。
如果唔係阿樂就要成日食藥架啦。
我個心果時比阿紫咁講一講，甜得好緊要。
甚至已經甜到我，忘記左我原本有既病。
眼前咁小鳥依人既阿紫，我真係無法抗拒。
我地間時候都差唔多，蛋糕應該雪好了吧。
阿紫：出去睇下整成點囉。
我：好呀．．
然後我地就出一出去廚房，
阿紫係雪櫃入面，拎返個芝士蛋糕出黎。
拎出黎既時候，已經聞到陣陣既藍莓芝士香味。
芳香而濃郁。
我：阿紫，我食一小塊得架啦，
留返ｄ比你屋企人同埋傭人食呀麻。
阿紫：傻瓜，你諗左人地先都有既，
蛋糕我整比你食架麻，你梗係最大份架啦。
我：我都想屋企人試試你既手勢呀麻。
阿紫一路切，一路同我講：係”我地”既手勢。
我微微笑住咁望住阿紫切蛋糕比我，
如果我將來既老婆，
都可以好似阿紫咁，弄得一手巧手既甜品，
一定好幸福。
阿紫，我地初戀，可唔可以到永永遠遠？
妳，會是我的初戀情人，兼未來妻子嗎？
阿紫切完之後，就拎去梳化，
我同佢一齊食。
大家坐低左之後，
我：阿紫，我餵你啦。
阿紫：唔好唔好，等我餵你。
我：又好。
阿紫叫我張口咀，諗住餵我，
但送到埋黎我個口時，我想食果陣，
佢又縮手，跟住我又再向前想食返，佢又再縮手。
我：阿紫，你又咁頑皮啦．．
信唔信我．．．（然後我即刻扮野做左一個想去吱佢既姿勢）
阿紫：哈哈，okok。
唔玩，唔玩。
我食左一啖之後，嗯，真係好好食。
唔會太甜太膩。每一下嘴嚼都是幸福的味道同愛情既甜蜜。
我：阿紫，ｄ份量真係岩岩好呀，
又唔會過甜，你真係叻架姐。
阿紫：嘻，鍾意食就食多ｄ啦。
我：咦！？點解好似唔見你工人咁既？
阿紫望望鐘數，然後話：佢呢個鐘數應該已經去左買送啦。
一來一回要晒ｄ時間。
我：咁我係咪即刻差唔多走？
阿紫點點頭，話：都差唔多架啦，
點呀傻佬，係咪唔捨得我呢？
我：哈，點會捨得喎。
捨得就唔會係我黎啦。
飲左幾啖水之後，阿紫拎左盒利口樂出黎．．
（之前我有留個伏筆，話利口樂都係我一個甜蜜回憶，有特別意義，
而家係時候應筆啦）
話：阿樂，你食唔食呀？
我：阿紫，你真係好鍾意食利口樂隻黑加倫子味喎。
阿紫：哈哈，係呀，我長期都有一盒係身。
我同阿紫，都各食左一粒。
我望住落地玻璃前既日落海景．．．
都不禁話：阿紫，睇住日落真係好靚．．．
如果我每日都可以睇住咁既景色就真係好。
阿紫：傻佬，以後一有機會我就比你上黎咪得囉。
係果一刻，係咁美麗既日落景色薰陶底下，
我地又再，情不自禁咁，輕吻起黎。
我地因為食住左粒糖，所以錫起黎果時，
都有淡淡既黑加倫子味。我果一刻突然有個念頭．．
純粹係出於百厭。
我係錫緊果時，輕輕咁伸左條利入去阿紫個咀度，
想係佢度拎佢果粒利口樂黎我度．．．
阿紫見我做左咁既舉動，即刻面紅得好緊要好緊要，
話：阿樂．．．你．．你咁衰既，
拎左人地食咁粒糖都有．．．（阿紫好怕醜，愈講愈細聲）
我：你要呀，比返你囉。
然後，阿紫就主動錫返過黎，
伸利．．拎返我果粒。
真係好甜蜜，果種感覺比起起初錫果種，
仲黎得刺激．．．
果時，我仲未知道．．呢ｄ叫濕吻，
我只係純粹貪玩．．．．
但係而家諗返起利口樂，
我就會自自然然想起，我同阿紫第一次既濕吻方式，
原來係源自於佢。所以，利口樂一直都對我有一種特別既意義，
屬於我同阿紫既獨特回憶。
因為唔覺唔覺濕吻左既關係，大家果時面都好紅，
大家都唔知講咩好。
我：阿紫，我都係時候走啦．．
阿紫依然好怕醜咁講：我送你啦。
落到去，我就再截架的士去返頭先巴士總站度，
臨走前，我同阿紫講：阿紫，多謝你呀，
我今日真係過得好開心。
阿紫：嘻，我都係呀，遲ｄ再見啦。
答車既途中，我都不時回味返，我同阿紫今日所做過既事，
好多好多的第一次，好多好多的甜蜜，
彷彿已經忘記左，當初黎既時候，我為咩野而失去左安全感，
我為咩野而感到恐懼。
阿紫，我愛你。
踏入八月中，暑假只係剩返半個月。
亦都意味住，半個月後，阿紫就會離開呢間學校。
我有問過阿紫，搵到學校未。
阿紫同我講返，佢話屋企人幫佢搞緊，叫佢唔駛擔心，
但就未決定倒係邊間住。
其實我當時真係好有私心，如果阿紫搵唔到學校．．．
咁佢就唔駛轉校啦，我地就可以朝見口晚見面。
不過，命運既安排，我始終無力去改變ｄ咩野。
或許命運就是要我低頭，或許，命運就早認定我唔係阿紫既什麼白馬王子。
月中有一日，有人打電話比我，我望望家中電話來電。
原來係阿欣打黎，自海洋公園以後，我都冇咩同佢傾過電話，甚至見過面添。
一打電話黎，我就比阿欣話．．．．．
我：喂！搵邊位？
阿欣：喂，阿樂！
死人頭而家有異性冇人性啦！
又話做咩交心朋友，又話補返食飯，
我唔搵你就真係一ｄ回音都冇，算點先！！？（我未試過一接起個電話就遇到個怨婦）
我：哈哈，唔好意思呀，阿欣。
我冇忘記要補請你食飯，我又唔會走既，
即使你開學都可以見到我架姐，駛咩驚呢？
阿欣：我點知呀！
你知ｄ人好鍾意賴脹架啦！
我：我知道你打黎搵我唔係想講呢ｄ既，
點呀！有屁快放！
阿欣：超，懶醒咁！
冇呀，我諗住搵你一齊去買書咋麻，（我咪又係估中）
就黎開學啦喎，仲唔快ｄ死去買書呀！
一陣比人買晒你冇書用就死得啦！
我：係喎，好彩你提一提我，
差ｄ醒唔起要自己去買書架添！
阿欣：梗係啦，你估你仲係小學呀死低ｂ仔！
九成你成日走去拍拖，連就黎返學都唔知啦！
我：我有你提住咪得囉，唔怕喎。
阿欣：提提提提你條命呀，我地可以搵埋阿紫一齊買喎。
其實阿欣，佢根本唔知道阿紫要轉校，
佢咁樣講一講，我完全唔識點樣同阿欣講先好。
我就話：唔駛預佢啦．．．
阿欣：點解呀？
我：呢ｄ野，我地出到黎先再講啦不如．．．．
阿欣：哦哦．．．
我：哦你個頭咩！咁約幾時呀．．．
阿欣：聽日啦，快快手手搞掂佢呀麻．．．
我：好啦，咁聽日係地鐵站等啦．．．
現實還現實，我始終要兼顧返學業，
因為暑假都就黎完，我就好好再用呢半個月時間，
比自己有多一點心理準備吧。
買書果日，我就照原定係旺角地鐵站等佢。
夏天不愧係夏天，真係熱到hihi。
我係書局出口果度等佢，唔知係咪因為暑假既關係，
旺角人流真係多撚到呢，所以期後我一直好憎去旺角。
又迫，又熱．．．．．
等左十分鐘，心諗：屌佢！又遲到！！
因為人好多，我就更加要落足眼力去睇下阿欣到未，
睇睇下，咦！終於見到佢啦。
我：好彩我見到你，
如果唔係你盲中中又唔知行去邊架啦。
阿欣：咩姐！而家我又唔係好矮，點會見唔到呀！
（阿欣佢今日著左黑色有點紮身既短袖衫，加一條類似牛仔熱褲）
我：哎呀你遲到仲要咁惡死！好心你改下啦！
你既打扮就咁女仔，但你性格就咁男仔，
你令我有時真係有ｄ精神分裂呀，
聽你把聲就男仔，睇你個樣就女仔。
阿欣：我把聲邊似男仔（雖然真係唔似，仲幾好聽）
就算似都唔關你事啦！行啦！！嘈嘈嘈！
我：唔好行住先啦，去七仔買支野飲先啦好唔好，
今日好鬼熱呀！！
阿欣：抵你死啦咁熱仲著牛仔長褲。
我：你唔係！！
一陣入到去你唔好買野飲！咁巴閉呀拿！
阿欣係果一刻又向我伸一伸利，
有時覺得佢都幾鬼馬。
我地入左七仔之後…
我：呢ｄ先係人去既地方架麻，有冷氣嘆，
你睇下出面曬到似咩樣。
阿欣：超！驚咩姐你又唔係白底！
我：白底！？？
阿欣：我指你個膚色呀，你諗左去邊呀咸濕佬！！
我：你唔諗埋一邊又點知我係咪諗埋一邊？
阿欣：哎呀，仲串串共呀！快ｄ買啦，
你再唔行我一腳踢落去你度架啦！！
我：唔好唔好．．．我行，我行。
行到去凍櫃，我就買左支雀檸飲。
點知．．我見阿欣有所動作．．．．
我：哈哈，唔係話唔買野飲架咩？
阿欣：車，我冇講過喎！
我：做咩跟我買埋同一支！？
阿欣：你理得我姐！我咁岩鍾意飲唔得架！
咩都要管架你！
阿欣買完之後，佢就自己走左去收銀處比錢，
咁我就跟上去，同佢講：欣姐，唔駛咁燥既，
我請你飲啦，咁夠心涼啦掛。
阿欣笑住咁講：學精左喎，叻仔！！升中二果然唔同ｄ呀！
我：你識咩呀，呢ｄ叫好男不如女鬥，費事有人話我冇風度。
買完之後，我地就一齊走過去書局買書啦。
行到書局門口，已經有一大班人係度聚集住。
我：嘩，咁鬼多人既．．．
阿欣：梗係啦，都月中啦，仲唔買等幾時買呀！
你估得我地呢間中學係呢度買書咩！
我：得啦得啦知你醒啦！
如是，我地排左一陣隊，
就拎張書單出黎，叫果個職員幫我執書。
我：唉，買書真係好貴．．．
雖然一年一次姐．．．
阿欣：咁都無法架，除非你唔讀．．
我：邊有可能呀，唔好傻啦！
阿欣：阿樂，聽講你ｄ成績唔錯架喎。
我：聽邊個講呀你又．．．
阿欣：ｍｉｓｓｃｈａｎ囉．．．
我：（misschan你真係好關照我)
我都係撞彩架姐，我想拎好ｄ成績比媽咪睇呀麻。
阿欣：阿樂，估唔到你咁孝順仔喎。
我：盡自己本份姐，冇話咩孝唔孝順既，
遲ｄ我都要養返佢架啦，而家唔讀好ｄ書等幾時。
阿欣：嘻，我欣賞你。
我面一面紅：車，駛鬼你欣賞！
正當我想飲野果陣，阿欣就好大力咁拍我，
搞到我差ｄ噴出黎。
阿欣：鬼叫你頭先講錯野呀！
我：你好彩，如果唔係我實噴晒落你塊面。
阿欣：你試下！（阿欣少可咁嘟起個咀講呢句）
然後，我見個職員都執齊書，
我地就分別去比左錢先。
估唔到一次過拎ｄ書都幾重．．
我：喂，你重唔重呀？駛唔駛我幫手？
阿欣：得架啦，你顧掂自己先啦！！
我見阿欣行果時個姿勢都比書既重量墜低晒，
我實在唔忍心要一個女仔咁．．．
唉，當我唔好彩啦真係！
我：拎黎啦，麻鬼煩！
一陣你因為咁傷左就麻煩啦！（然後我就幫埋佢拎）
阿欣有點面紅咁，聲量開始細過正常講野：唔該你，阿樂．．
估唔到你都會為我擔心．．
我：點解唔會呀！（一直朋友關心下好正常姐）
阿欣：係呢，你又話同我講阿紫今日點解唔黎既．．
我：呢度咁嘈，我想要個靜靜地既地方講呀
同埋又拎住咁重既野，點講呀．．
阿欣：一係拎去我屋企擺抵晒ｄ野先再講啦，
橫掂你都要幫我拎到返屋企．．．
我：邊個話會幫你拎到返屋企．．（雖然盡人使都會咁做．．）
阿欣：你唔係忍心我一個柔弱女仔拎住咁大袋書呀．．
（阿欣果時又扮一副可憐既樣）
我：得啦得啦怕左你，唔好再整呢個樣出黎，ｏｋ？
阿欣：嘻，ｏｋ！
因為有阿欣陪住，所以可以答鐵去佢度都唔會蕩失路。
拎到去佢屋企之後，大家放低晒ｄ書。
果一刻我覺得，雖然大家話晒係朋友，但畢竟，呢個
都係一個女仔既屋企，而我同佢又唔係男女朋友關係，
冇咩必要既話，我都唔想孤男寡女咁係埋一間屋。（你地話我傻又好咩又好啦）
我：阿欣，不如我地落去留下公園講好唔好？
阿欣聽到之後，點點頭，就同我一齊落返樓下公園度坐。
係果一刻，其實我既心情都有點沉重。
因為我冇盤算過，究竟點樣講比阿欣聽好。
但我心入面，的而且確，係一直有為阿紫轉校既事擔憂。
七月份果時我就話可以無憂無慮咁，將所有事都置諸腦後，
等遲ｄ先黎擔心。
誰不知，我同阿紫一齊既時間，真係好似眨下眼咁快。
快到連我想再為大家締造多一點回憶，多一點僅僅是屬於我們既回憶，
都咁困難。
半個月咋！得返半個月咋！你叫我點接受呢個殘酷既現實！？
有邊個可以幫我呀！！
我：阿欣，以下落黎既野，我只係同過你一個人講．．
亦都希望你可以幫我保守呢個秘密．．
阿欣見我咁認真，佢亦唔敢再講笑。
阿欣：好好好，冇問題．．．我唔會同其他人講既，
阿樂你放心啦。
我深呼一口氣，話：阿欣，其實．．．
阿紫佢已經搬左屋．．
阿欣：哈，仲以為ｄ咩添，
搬左屋咋，咁好小事姐。
我繼續講：佢要轉校啦，佢唔會再係度讀啦！
我講完呢句之後，阿欣靜左落黎．．．
佢靜靜咁望住我．．
阿欣：你．．你講咩話．．
阿紫佢．．唔會再係我地學校讀．．？
我：佢已經搬左去新界，
屋企人已經幫佢搵緊學校，佢唔會再係度讀架啦！
（我愈講，個心就愈唔安落，個心就愈拿住拿住！）
阿欣開解我：阿樂，你唔好咁唔開心住啦．．
即使你地分開左唔係同一間學校讀，
都可以係周末見面架姐。
我果一刻拎一拎頭：我唔覺得可以成日同倒佢見啦．．．
阿欣：點解．．．．．？
我：阿紫，係身處係一個比較有錢既家庭．．
佢屋企人根本唔鍾意，甚至唔比佢而家有同男仔來往．．．
你覺得佢可以個個禮拜都同佢屋企人講話要出去，
而唔比屋企人懷疑甚至發覺佢係拍緊拖架咩？
阿欣比我咁講一講．．又冇再出到聲，因為佢知道，佢根本幫唔倒我ｄ咩。
阿欣：阿樂．．．
咁即係話．．佢屋企人一直唔知道你地既關係．．？
佢要出街既話，都要同佢地講大話．．？
我：嗯．．．．．
阿欣：咁．．你地就打算一直瞞落去．．．．？
我：咁唔係可以點？
阿欣：你唔會覺得好辛苦咩．．？
雖然我知道將會係好辛苦，由我見到佢媽咪果一刻，我已經意識到。
但為左我同阿紫可以一直好好愛落去，我幾辛苦，我都願意。
我：再點辛苦，我都冇咩所謂．．．
（然後我ｄｕｐ低左頭，我發覺淚水開始有點按奈不住）
阿欣見我咁，佢用手，答一答住我膊頭。
阿欣：阿樂，
你唔好咁唔開心啦，
你唔好唔記得．．．
你仲有我呀麻．．．
仲有阿力，同ａｍｙ陪住你過日子呢．．
阿欣佢，係果一刻，用咁溫柔既語氣，用咁溫柔既聲線去安慰我。
其實，我真係好感動，彷彿好似可以係佢身上，重獲返勇氣．．
係果時，阿欣向我提議左一樣野．．．
阿欣：阿樂，不如我地去打波囉。
我：打咩波無啦啦？
阿欣：我知道你乒乓波勁，
我地一齊去打啦！我呢度附近有運動場呀，
可以即刻去book麻！
我：你識打咩？
阿欣：唔識架，你可以教我架麻！
行啦行啦！當發洩下都好呀麻！
咁又係既，成日積埋積埋ｄ唔開心，屈係個心度真係好唔舒服。
倒不如做下運動發洩下好過．．．
於是我就比阿欣拉左我去book場打乒乓波。
因為乒乓波台都唔係咩大熱既運動，
所以好多時即刻去都已經有場．．．
阿欣：我地打幾耐好呀？
我：唔知呀，你話事啦！
阿欣：咁打兩個鐘啦，
今次我請你打！當係幫你抒發下你ｄ悶氣好冇？
我：咁好死既你今日，又開解我又請我打波。
我真係有ｄ受寵若驚喎！
你係咪high大左？
阿欣：拿，識串咀就即係冇事啦。
我就同職員講：借多兩塊拍同兩個波呀唔該。
拎完拍之後，阿欣就係後面推住我，一路講：行快ｄ啦！！
（果一刻佢呢個舉動，令我諗起阿紫．．．）
我：得啦得啦！輸唔切咁！
去到乒乓波台，我就同佢講。
我：你開波先啦！
阿欣：哦。
然後阿欣就開波，佢一拋起個波就拍過黎，
個波雖然掂到我張台，但掂唔到佢自己張台呢．．．
我：哈哈，你真係一ｄ都唔識架喎。
阿欣：係呀．．
我睇電視ｄ人都係拋起個波開，我咪學佢地囉。
我：唉，真係怕左你，
等我教你ｄ基本野先啦。
然後，我就行埋去阿欣度，
簡單講下ｄ乒乓波規則比佢聽。
我：你岩岩學，開滴滴仔先啦。（然後我就示範比佢睇）
阿欣：哈，咁好簡單姐，咁呀麻！（佢做一次）
我：岩啦岩啦，記住要掂到自己台。
如果想個波快ｄ，就開低ｄ啦，好似咁。
阿欣：咦！係喎。
得啦，我已經滿師啦，你可以返返過去受死。
我：好囉咁。
然後，我就同佢玩左幾手，
發現阿欣佢要節奏慢一ｄ先可以同我對打得耐少少，
如果唔係就好易出界。同埋，佢只係打直線．．．．
我見佢係咁打直線，我就打個斜線陰佢。
結果．．．
阿欣：阿樂你咁奸既．．．
咁陰人都有！！
我：我比你學野咋！！
其實．．阿欣上手都幾快，雖然係節奏慢左ｄ，
但起碼都可以打倒好多板。
有一下．．我比佢陰左．．
阿欣：哈哈，你今次仲唔自食其果！
終於贏返你一次啦！
我見佢咁得戚，我就落旋陰佢，
佢見到個波落台果下突然之間轉左方向彈走左．．
佢覺得好神奇。
阿欣：咦！阿樂，
點解個波會彈走左既．．
我：因為我落左旋呀麻。
阿欣：快ｄ教我快ｄ教我！！
於是，我又行埋去佢度，
示範一次比佢睇。
不過，佢學我咁做之後，個冇咩效果咁。
我見佢個樣好失望，我就稍稍係佢後面，
捉住佢隻手，教佢開一次。
我：拿，你塊板面要盡量斜斜地，同幅度大ｄ，
等個波可以同塊板面摩擦多一ｄ，先會旋架麻，see?
阿欣冇出聲，咁我再放開佢隻手望望佢啦！
呀，點知佢又面紅紅。
我：你無啦啦又紅咩鬼姐！
阿欣：關你咩事姐，我覺得熱唔得架！（然後佢就搵個波掉我）
我：哎呀，教你打波仲咁對我，好囉唔打啦。
阿欣：喂呀！咪咁小器啦你！快ｄ打返啦！
就係咁，兩個鐘頭就好快過去．．．
果然，做完運動出一身汗後．．
成個人都舒服好多。
我：阿欣，今日真係多得你我先可以舒服一ｄ。
阿欣：唔駛客氣．．
我都唔想成日見到你果個死樣！
打完波之後，我就上返阿欣屋企，拎返我袋書，
然後就同佢講拜拜。
我：阿欣，我走啦，多謝你今日請我打波。
阿欣：我地．．返學再見啦！
我：嗯．．好呀！拜拜。
所以，經過果次之後，有時我有咩唔開心，
除左阿紫之外，第二個就係搵阿欣．．
阿欣亦不經不覺，默默咁做左我個聆聽者。
剩返個十數天既日子，
我同阿紫，都出過三次街。
都係睇下戲，食下飯，行下街果ｄ。
雖然話就話日日都放假，
但出街既次數始終唔可以太過頻密，
費事有ｄ咩惹人懷疑就唔好啦．．．
有一次食晚飯既時候，
我問阿紫：阿紫，果次你媽咪見過我之後，有冇講ｄ咩？
阿紫：冇呀，咪話教完我之後ｄ暑假作業識唔識做呀咁囉。
放心啦阿樂，你冇任何負面既評價比你喎。
我：咁我地成日出街，你屋企人冇問過咩？
阿紫：都有呀，我咪話同中學ｄ朋友出街囉，
因為我同講就黎轉校，想再聯誼多ｄ咁。
我：阿紫，對唔住呀真係，
成日要你講大話，咁樣會唔會辛苦左你？
阿紫：傻佬，點會辛苦我喎。
好小事咋麻。
我：咁．．．我地以後．．
周末果時仲可唔可以見面．．？
阿紫：阿樂，我呢一刻真係答唔倒你．．
因為我唔想你抱完期望之後失望呀。
但我應承你我會盡量架啦．．
我聽到阿紫咁講，雖然我明白會難為左佢，
但果一刻我更加難掩飾自己既悲傷同落寞。
阿紫見我沉默不語，就話：傻佬，唔駛擔心喎，
你知道我會一直鍾意著你咪得囉。
阿紫咁講，我亦對佢強顏歡笑起黎。
其實我唔係信唔過阿紫，
只係，我覺得，
有時變數實在太多，太大．．．
並唔係話單單咁，單憑一把口講：我會一直鍾意著你，咁就得。
當然，果時既我，邊諗到咁深入，邊可能會洞悉倒呢一ｄ。
果一刻，我真係完完全全信任晒阿紫既說話。
臨近返學既前幾晚，
阿紫打電話比我，同我講．．．
阿紫：阿樂，我屋企人已經幫我搵到學校讀啦．．
剎那間，突然聽到阿紫呢一番說話，
心入面既傷口，又再滲出血起黎，傷口好似再漸漸增大一樣．．．
睇黎，阿紫真係要非走不可，
命運，原來真係要咁樣安排。
我既一雙手，根本唔可以掌握著阿紫既命運，
咁更加唔可以掌握住，我同阿紫既愛情。
我雖然係心如刀割，但都裝作開懷咁，
同阿紫講：係．．係咩．．
咁咪好囉，真係恭喜晒你呀．．
男女校嗎．．？
阿紫：嗯．．
我：校服阿，書阿果ｄ都準備好？
阿紫：準備好晒啦．．
我：你插班入去．．
難免有ｄ難適應架啦，
有咩唔妥記住搵老師呀知麻？
阿紫：知啦傻佬。
我：咁你識點樣去學校未呀？
阿紫：媽咪會車我返去。
我：哦．．．咁ok啦。
阿紫：阿樂，你做咩呀？
今日怪怪地咁既．．
我：冇呀，你唔駛擔心我架啦．．
去到果度更加要比心機讀呀知麻？
阿紫：知道，
我會好好掛住你架，
你都要呀知麻。
我：嗯．．我知架啦．．
呢一晚，係我同阿紫，暑假入面既最後一個電話。
開學之後既日子將會係點，我真係唔清楚．．
我亦唔想刻意去諗，去煩。
我望住手上既手繩，就更加令我有更想去見阿紫既衝動。
果一刻我亦都安慰自己，
雖然阿紫每日陪唔倒我，但我有呢條手繩，就已經代表住，
阿紫時時刻刻都會係我身邊。
以前既日子，
從我訓覺到第二朝早返學，只需要相隔九個鐘頭，我就見到阿紫。
黎緊開學，
從我訓覺到第二日，我需要隔十八個鐘頭，先會聽到阿紫係電話把聲。
足足．．．一倍．．．．但卻只能透過電話溝通
雖然我唔想接受．．
但我仍然需要面對，
中二開學既到來。
[暑假後記]
果日暑假去完阿紫屋企之後，第二日，
阿紫打電話黎。
阿紫：阿樂呀，我問過屋企人啦，
我知道有咩巴士可以近我果度落車啦，
下次你黎既時候咪唔駛再答的士咁晒錢囉。
我：真既？？咁係咩巴士呀？
阿紫：ｘｘｘ
我：哦，呢部巴士．．．
但係佢係我屋企附近冇站喎．．
阿紫：係呀．．．（佢有點失望）
對唔住呀阿樂，我以為可以幫到你添．．．
我：唔係架阿紫，你幫到好多架啦，
果架車雖然唔係我屋企附近，
但其實我只要答一程短程車，就可以去度，
總好過黎到之後再答的士咁晒錢呀麻。
阿紫：嘻，係就好啦。
阿樂，其實我有時真係好奇怪，
我發覺我見完你之後，
會特別掛住你。
我：哈，可能見面時間過得太快，
大家都唔夠喉掛。
阿紫，其實我有點估唔到，
你會比想像中痴身就真。
阿紫：阿樂．．．
你係咪覺得我痴身唔好呀．．
我：唔係唔係．．
點會唔好呢，我想你痴多ｄ都黎唔切啦。
阿紫：係呀．．阿樂．．（阿紫又再怕怕醜醜）
原來，我地已經．．已經濕吻過啦．．．
我：濕吻？咩係濕吻．．．
有分架咩？
阿紫：呢，咪即係你拎左我粒．．
我粒利口樂果次囉．．（阿紫愈講愈細聲）
果一刻我先至恍然大悟，
原來單係接吻都有分種類．．．．
我即刻話：唔好意思呀阿紫．．．
我都知我無啦啦咁．．．
好似唔係幾好．．．
阿紫：唔係，我冇想話你既意思呀阿樂，
不過我覺得果時既感覺真係好特別，
我都唔識形容．．．
我：既然咁特別，以後就要試多ｄ啦。
阿紫：咦～阿樂你好衰架．．．
我：唔衰又點會sweet呢。（唔好承機入我位，我對”衰”呢個定義只係局限於kiss)
阿紫：咦～唔理你啦，
我出去啦，傻佬樂，你自己慢慢同個公仔kiss啦。
就係咁，我同阿紫往後既接吻方式，
好多時都會互相交替住，一時就蜻蜓點水，一時就．．．．
諗下諗下，其實，情侶間既接吻方式，都是一種非常重要的情趣吧。