有一晚一個來電: 愛與痛的邊緣(下)
阿紫：阿樂，你隻手好凍下喎。
然後，阿紫就用雙手，幫我捽一捽隻手，
但我可以暖一點。
我：嗯，我唔係好夠血係咁架啦，
我唔凍喎阿紫。
阿紫：係姐，但我都唔忍心見到你隻手咁凍呀麻。
阿紫又用手，掂住我個心，
同佢講：你呀你呀，乖乖地，
即刻泵多ｄ血比阿樂，唔好等佢凍親知唔知呀？
因為阿紫每次呢個舉動，
我都會心跳加速．．．．
所以就好似，連我個心，都聽阿紫使喚緊一樣。
阿紫：阿樂你唔夠血，
醫生有冇話點算。
我：冇呀，叫我食多ｄ利口樂囉。
阿紫知我既含意係ｄ咩，
所以就話：咦～！阿樂，認真啦．．．（佢又面紅紅）
我：哈哈，阿紫你諗左去邊呢．．
黑加倫子可以補血呀麻。
阿紫即刻眼仔碌碌：係架！
咁要食多ｄ啦。
我：好呀，
麻煩要經你個咀仔比我先有效架喎。
阿紫：咦～唔理你啦。
阿紫見溜到有點攰，
就走返出去，坐一陣。
我：阿紫你係咪有ｄ攰？
阿紫：係呀，唔知係咪對鞋太窄，
所以溜起上黎唔係太舒服。
我：咁駛唔駛換過對？
阿紫：唔駛咁麻煩啦，傻佬。
我抖一陣冇野架啦。
我就同阿紫，抖一陣，吹一陣水。
一個月冇見既阿紫，
其實，外貌上並無咩轉變，
但阿紫，就話我高左。
我同佢講係因為發過燒既關係所以先高，
佢就大笑起黎。
我，好耐冇見過阿紫笑得咁開心既樣，
以前就日日見住，
而家，即使佢每一個微細既表情，
我都會記住，牢牢咁鎖係我腦海入面。
因為我知道．．一個月後，我既記憶先可以再更新得到。
抖左陣後，
我同阿紫就繼續，手拖手，慢慢去溜冰。
有時我會望返身後，
我地兩個既溜冰鞋在冰面上滑過既軌跡，
那些軌跡，就好似編織同訴說緊，
我同阿紫所走過既愛情道路，
有曲，有直，有連續一條，亦有斷斷續續。
幾個鐘頭既時間，
好快咁過去．．．．
完左之後，
我地見有時間，亦都去左掃街．．．
即係食串燒呀，牛雜果ｄ鋪頭呢．．．
我同佢，一人一啖咁，
買左唔同既野餵大家食，
呢份感覺，
我真係想好好咁保留。
我：阿紫，你對我既感覺，有冇淡到？
阿紫：傻佬，梗係冇啦，
唔好多心啦知麻。
我真係希望，現實永永遠遠會如此。
今日，係我開學以黎過得最開心，最有安全感既一日。
我唔知道下個月會唔會有機會見到阿紫，
但我知道，我仲有意志，仲有氣力會等落去。
完左之後，我就答返地鐵走。
而阿紫，就等返佢媽咪黎接佢．．．
阿紫，我地．．十月再見吧。
九月份既持續不習慣，延續到十月份。
冇錯，十月份開頭既日子既感覺當然冇咁差，
因為月尾先見完阿紫黎。
可惜一到中段日子，時間亦漸漸轉慢起黎，日子漸漸過得痛苦起黎。
有好多人或者會想知道，究竟，阿紫唔同得我出去果ｄ周末係度做緊咩。
其實，我同大家既心態都一樣，我都好想知佢做緊ｄ咩。
問過佢之後，發覺佢好多時都唔會乖乖地係屋企，
好多時都陪佢媽咪出下去，行街，買衫，食野呀果ｄ。
而我就．．．係屋企，無無聊聊咁，做功課，上下網，
逼於無奈咁，將個期望，延遲到下一個禮拜六，希望到時可以出去，
日復日的期待，周末復周末的期待。
有時候呢種心態，呢種心情，
仲難受過異地戀。
點解？
因為異地戀，其實你起碼自己心知道，除左假日對方會返返黎之外，
期間一定係冇得見面，你亦都有晒心理準備，唔會期望太多。
但我同阿紫，正正係因為分隔得唔遠，
搞到我認為見面係好閒既事。
我滿心期待星期六可以一齊出去，但到當日先知道，出唔到。
我既期待又一一破滅，
而我又再滿心期待去等下一個星期，
點知，可能又破滅。
幾次幾次之後，先可能會成功．．．．．
無錯，我每日返學依然有amy，阿力，阿薇陪住我，
同佢地傾計的確有講有笑。
但係，笑過，說過，我又剩返什麼？
咪又係一堆堆無人清理得到既空虛與失落，
這個堆填區，在我心底既某一處角落，
漸漸，漸漸堆積起來，
或許只有人一個月才會清理一次，
甚至沒有．．．．．．
不知道，它會不會飽和呢．．．．
十月份，沒有阿紫，沒有甚麼特別，
學校生活回到正正常常的水平，
沒有高，沒有低，
就像一張空白紙張一樣，
沒有值得紀錄的需要，
我亦沒有經常找阿欣的必要，
所以時間會直接轉到，
我和阿紫十月份的見面日子．．．
但見面之前，倒有點學校點滴想紀錄一下．．．
因為九月份既家政堂，
個老師都係講解下書既知識多，
講緊一ｄ縫針技巧呀果ｄ，
點用衣車等等等等．．．．．
悶到仆街。
因為黎緊既家政，老師話要整一個cushion。
我一聽到都覺得幾過癮，
雖然男人老狗整cushion好on9，
但係有時on9下反而會多點樂趣。
十月份，終於可以比我地動工。
MissLee：拿，而家有好多唔同既cushion顏色既棉布，
你地自己出黎揀啦！
屌，老師未講完，d同學就即刻
意識到出去揀，就一堆同學跑撚晒出去。
我心諗：你老味駛唔駛跑得咁快呀，
平時上中史堂又係訓撚晒覺咁（當然我都有）
而家就鬼打都冇咁精神。
果一刻，我依然處之泰然，泰山不動，泰然自若．．
屌咁多人都走去迫，真係痴撚線，
我就一心等佢地爭飽佢先啦！
我見到都差唔多，我就行出去．．．．
屌．．．．．．．．啦媽呀！
得返隻灰色．．．．
喂！屌，我已經夠灰架啦，見唔到阿紫十幾廿日，
屌老味仲要咁應景得返隻灰色比我揀．．．．．
MissLee都笑住話：阿樂，灰色都唔錯呀，
你要好好發揮呀！！
屌，灰色發條毛咩，真係似發毛啦隻色，
我真係好想求其就咁塞晒ｄ棉花入去就咁
交功課就算．．．
但係，我個心又過意唔去．．
因為我諗住．．整完之後，送比阿紫既．．．．．
拎完塊灰布之後，
就要開始用剪刀，
剪成你想要既形狀先，
然後老師就規定我地用針線
縫起個邊邊位．．
自從中一果次木工唔撚掂之後．．
估唔到連家政縫針都係一樣，搞唔撚掂，
我成個家政，學得最掂既野．．
就係穿針線．．．
穿完針線之後．．我就咩都唔識做啦．．．
縫果時ｄ針位又唔係好一致，
有時唔小心又會拮撚到手指．．．
連最後尾縫完點樣打結都唔識．．
總之ｄ針線搞撚到我頭都大埋．．
我見amy縫得咁快，
果一刻．．我第一次，係第一次，
對amy令眼相看（因為佢實在冇咩野值得我令眼相看）
我：喂，amy，
估唔到你縫針咁鬼勁喎！
又熟手，又快。
Amy：梗係啦，平時有縫開野呀麻！
我：哦．．唔怪我啦！原來食過下夜粥既．．
下次我ｄ底衫褲有咩穿燶都可以搵你幫我補喎．．．
Amy：你死啦去．．係都搵你阿媽幫啦！
唔想見到你d底衫褲囉．．．
做咩呀？終於發掘到我既好處啦咩（Amy好得戚咁講）
我：哈哈．．識你咁耐真係終於比我發現到你一個好處啦．．
喂喂，襯老師而家冇望住，幫我縫幾獲先啦！
Amy：頂你成日搵我笨就有你份！！
我：呢ｄ唔係搵你笨，
我係想比多ｄ機會你，將你既內在美多多表現出黎姐，
咁咪多ｄ人見到你既好處囉．．．
然後amy就幫我縫左幾獲，睇佢又真係好快手．．
完全係媽咪級既手勢
我：amy，你真係拍得住我阿媽啦！
唔該晒你呀．．
後期既家政堂，成日都會用到衣車去車ｄ圖案，
果時ｄ功課都係我一手一腳整．．．
因為阿紫終於teddybear，
所以我就車左個圖案比佢．．．．
我記得既係，車拉鏈果個位．．
我又"cake"左住，唔知點車好．．．
我：喂喂，amy，我唔識車拉鏈呀．．．
Amy：頂．．你咁煩架真係．．
咩都唔識架喎！
我：我唔係想你幫我，放心放心，
你教我車就得啦！
萬一校褲拉鏈爆左都可以自己車返呀麻！
咁咪唔駛麻煩老母囉．．．
Amy：哈哈，你成日爆呔架咩？
我：唔係，
我冇阿力咁勁，哈哈！！
車好條拉鏈後，基本上個cushion都完成．．．
一個月一個月咁過去，
一個月一個月咁見面。
黎到十月尾，足足一個月，
我地見，第二次面。
兩個月先見兩次．．．．
這是何等既代價．．．
班上面最唔熟既人，我都可以日日撞口撞面，
但同自己最鍾意既人，就幾乎一個月先一次。
這真是來得諷刺。
有時我都會向阿紫抱怨幾句，
阿紫亦會不厭其煩地，安慰我，幫我打打強心針。
有時候，我甚至發現，
阿紫仲習慣過我．．．．．
起碼好少聽佢同我講，話見唔到我好唔慣，好想日日見果ｄ。
佢，反而唔係咁雀躍（相比之下）。
其實見佢果陣，每次都係星期六黎。
十月都唔例外，但果日撞正三十一日，萬聖節。
我同阿紫，就打算再次回味下，
兩個人拖下手仔，行下街既情侶滋味。
一直以黎，每日每日同阿紫傾電話當中，
都好少聽阿紫主動提佢學校ｄ野．．
今日出去，亦都唔例外。
我：阿紫，做咩你咁少提你學校ｄ野既，
平時我發生ｄ咩都會同你講．．．
阿紫：其實又冇咩特別，所以咪唔打算講Lo。
大家學校唔同麻，有時好難表達發生既野，
你又唔熟悉我班ｄ同學。
咁又係，至少阿紫都係我學校讀過一年，
我講比佢知道，佢都易明ｄ．．反而我就．．．．
我：咁唔緊要啦，
今日萬聖節喎，
你睇下商場入面都佈置晒裝飾啦。
阿紫：嘻，係喎，
我都好少撞正萬聖節果日出街架。
我：點解呀？驚鬼呀？
阿紫：有你係度陪住我，點會驚呢。
所以今日咪同你出去囉。
我：真係唔驚？
阿紫：嗯嗯．．
我：咁不如我地去睇鬼片囉．．
（呼應萬聖節通常都有鬼片係果段期間上映）
我見阿紫反應有點卻步，
我就話：拿，你一陣驚果時，
緊緊咁攬住我，咪唔驚囉。
阿紫：嘻，好啦，
一次咁多架咋。
然後，我地就去買飛睇鬼片了．．．．
第一次係戲院睇鬼片，
本身我個人唔係太驚呢ｄ，
但我知道阿紫好驚，所以我先特登帶佢入黎睇。
自從細個果時睇左次午夜胸圍，
比貞子個樣嚇到我三日唔敢沖涼之後，
我就再冇點睇過鬼片。
再次同阿紫睇，
唔知感受又會如何呢。
因為係星期六既關係，
戲院其實都幾爆，
眼見情侶入黎睇既居多，
可能佢地都係想體會下節日氣氛吧。
套戲未正式播時，
阿紫已經話：死啦阿樂，
會唔會好恐怖架．．
我見阿紫個樣有點擔心，
唔通真係未出發先興奮！
我安慰佢：唔駛驚架喎（我捉緊佢隻手）
最多你驚果時，我幫你遮住隻鬼啦，
咁好唔好？
阿紫笑住咁話：哈哈，你點遮住姐？
我：唔知架，一陣咪知囉。
我繼續講：阿紫，我想食粒利口樂補下血呀。
阿紫怕怕醜醜咁講：呢度好多人喎，阿樂。
我：而家都熄左燈麻，
你怕醜？係怕醜就認左佢啦！
我知道，阿紫係好受激將法呢一套。
阿紫：車，我先唔驚呀。
然後，阿紫就拎左一粒放入口，
跟住同佢錫錫，過左比我。
阿紫好擔心咁問：阿樂你怕唔怕架睇鬼片，
食左藥啦？
我：見到你咁可愛既樣，
咩都唔怕啦，放心啦阿紫。
其實，套鬼片都幾恐怖，
我有幾下亦比ｄ音樂嚇親．．
阿紫每次一感覺到隻鬼將會出現既時候，
就會緊緊咁cool實我隻手．
同埋用手遮住自己對眼。
我見佢咁，我亦都會緊緊捉實佢對手。
有時就會錫返佢面豬一啖，
等佢分下心，冇咁驚。
睇完戲之後，
我地就繼續行下商場。
其實唔好話睇戲冇咩值得回憶，
每睇一套體材唔同既戲，
都已經係回憶既一部份黎。
有笑，有淚，有驚嚇，有科幻，有啟發人心．．．
每次同阿紫睇完之後，
我都會同佢，
一路拖手仔，一路行，一路講返戲入面既情節，
好似將部戲，再從頭睇返一次咁。
注重情侶生活每一個細節，
先可以將愛情繼續保鮮．．．
至少，我係果時係咁諗。
我見有玩具反斗城，咁大個仔都未入過去，
就提議下．．．
我：阿紫阿紫，
不如去玩具反斗城行下囉。
其實唔好話玩具反斗城低ｂ同無聊，
情侶去行下都係一個非常唔錯既選擇。
因為萬聖節既關係，
反斗城入面，都佈置左好多好應節既裝飾，
並且放晒各式各樣既萬聖節道具係入面。
我地一路拖住手慢慢咁行，
一路睇住都好開心，兩個人，
就好似一對大細路咁。
我見有ｄ道具都好正。
我就拎左個女巫帽比阿紫戴。
我：哈，阿紫，
你戴左之後都幾襯喎。
配埋呢支惡魔叉就岩晒啦。
阿紫：嘻，阿樂，
呢副彊屍面具都岩你喎。
於是我就戴左上去，
扮嚇佢啦，
我：阿紫，我要吸你ｄ血啦！
阿紫：咦～唔制呀！！
哈，阿紫見到我咁就一路走，
一路唔比我捉佢，
兩個人都笑得好開心。
我除低左個面具，
捉到佢之後，就再緊緊拖住手。
我：唔吸你血啦，
行啦。
同佢行到一ｄ兒童玩具既地方，
我見到個釣魚機，（拎個磁石魚鉤釣果種呢）
就好大反應話：喂，阿紫，
呢部釣魚機我細個都玩過呀，
哈哈，真係好懷念呀。
阿紫：嘻，我都有玩過呀，
果時仲玩得好叻添。
我：不如而家試下玩囉！
阿紫：哈哈，駛驚你呀。
於是，我同阿紫就比賽邊個釣得多，
點知．．．．
阿紫：好野好野，我多過你，哈哈！！
我：車，都係好彩咋麻。
阿紫：哦～哦～，有人輸左唔認。（阿紫一路講一路摵我個面）
我：哈，我都已經輸左個心比你啦，
呢ｄ唔爭在啦。
阿紫聽到我咁講，即係話：嘻，你真係肉麻呀，
唔理你啦。
然後自己行左去，
阿紫佢，成日都係咁單純，咁怕醜。
行到去ｂｂ玩具果度，
我：哇，原來而家bb都可以有咁多玩具可以玩架啦，
真係幸福呀，我細個果時好少玩具咋。
你細個果時玩咩多呀，阿紫？
阿紫：我呀，都係玩下ｄ公仔呀，熊仔多囉，你呢？
我：我細個成日玩泥膠同煮飯仔架。
阿紫：哈哈，阿樂你咁得意既，
煮飯仔唔係女仔玩架咩？
我：哈，果時我見ｄ煮飯玩具咁靚，
咪成日忍唔住走玩囉。
唔知第時我地個bb有d咩玩呢可？（果時好純真咁問左出黎）
阿紫聽到，又面紅紅話：鬼同你生bb呀。
唔知點解，聽到阿紫呢句，
真係好甜蜜。
好似大家彷彿已經到左談婚論嫁時果種耍花槍既地步。
如果而家，你係我既未婚妻就好，
可惜．．timing唔岩。
行完玩具反斗城，
天色開始暗，
阿紫，就好似灰姑娘咁，
每次見面都要夜晚七點倒走。
但，至少灰姑娘，也能夠到十二點麻．．．．．
雖然我唔想開口問阿紫，
但我又怕阿紫其實係等緊我，唔好意思開口同我講。
我：阿紫．．
你．．．係咪差唔多要走？
阿紫：嗯，行埋ＣＤ鋪囉不如。
我見可以再見多一陣，
我當然點點頭應承．．．．
入到ｃｄ鋪，我地亦討論左好多，
關於電影既野．．．
大家都各自問大家，
呢隻碟睇過未，果隻碟睇過未，
然後推介比大家睇。
我：阿紫呀，你有冇話鍾意咩歌手架？
阿紫諗左一諗，甜甜咁望住我，
然後回應我：嘻，咪westlife囉。
我聽到之後，都望住佢微微笑。
因為，大家都知道，westlife對我地既意義，
對我地既重要性，係僅僅屬於我同阿紫之間既秘密。
阿紫搵下搵下，
同我講：咦！？估唔到呢度都有得買你送比我果隻碟喎。
我：哈，呢間咁大間，
點會搵唔到呢。
阿紫你除左mylove之外，
有冇話特別鍾意邊首？
阿紫：uptowngirl。
我：你都鍾意快歌架咩？
阿紫：係呀，呢首歌好有活力麻。
其實．．往後我聽返uptowngirl，
有時ｄ歌詞都幾match。
阿紫繼續話：阿樂，只要係你既，
我全部都好鍾意。
係呢，你又鍾意咩歌手呀？
我：其實都冇架，
近期台灣既周杰倫都唔錯喎，
好鍾意佢首星晴。
（而家聽返都係咁正）
阿紫：係呀，等我又聽下先遲ｄ。
我：我買左呀，我遲ｄ拎比你聽呀。
阿紫：嘻，好呀好呀！
完左CD鋪之後，
我同阿紫，亦再度返返去自己既世界。
第二次見佢果一刻，
其實我感受到大家既愛，
都仲係冇咩點變住，
阿紫只係習慣左，或者睇開左大家唔能夠每日相見既現實。
阿紫，依然係昔日既阿紫。
不過．．．
十一月，估唔到係一個惡夢既來襲．．．．．
十一月，是個惡夢。
惡夢既前夕，都係平靜。
十一月頭以黎，無阿紫陪住都好地地，
因為我知道都未必咁快有得見。
直至月中，有一晚．．
阿紫打黎。
阿紫：阿樂．．
我有樣野想講你知呀．．
我：好呀，講啦咩事呀？
阿紫：但你應承我唔好唔開心先啦．．．
咁即係意味住聽左會唔開心啦．．．
不過果時，我見係阿紫，惟有默默咁接受住先啦。
我：嗯，你講啦，我應承你啦！
阿紫：真既！？
阿樂．．對唔住呀．．．
我問過屋企人．．．
今個月可唔可以出去，佢地唔比呀．．
因為出左考試時間表．．
話考完試先比我出，要專心溫書喎。
我聽到呢個消息果一刻，
即刻晴天霹靂咁．．．．．
我冇聽錯吧！！
考完試先出！？咁咪即係到聖誕！！？
兩個月冇得見！！！？．．．
我果一剎那．．成個人沉晒
阿紫見我粒聲都冇出：阿樂．．阿樂，
我已經盡左力架啦，
對唔住呀！
我繼續唔出聲，
一直以黎，拍拖唔可以比阿紫屋企人知不特止，
一個月見一次都已經好少好少，
我地已經少左比一般正常情侶所擁有既野，
亦都係最緊要既野 － 自由同時間。
佢地屋企人唔比阿紫自由不得止，
而家仲．．．兩個月先見到面？
話就話考試要溫書姐！
一日都唔比出？僅僅一日都唔可以？
這根本是軟禁！！
我唔出聲，唔係因為我唔開心，
我唔出聲，係因為我覺得，真係好嬲好嬲！！
阿紫：阿樂．．
你應一應我好唔好．．．
我實在再掩飾唔倒我心中既不忿．．．
點解要咁對我地！！
我：阿紫．．．
你唔駛再講啦！
但你屋企人咁做會唔會太過份呀！
已經一個月先一次，
而家要我等兩個月．．到到聖誕先有機會見！
你地有冇諗過我既感受呀！
阿紫：阿樂．．
你唔好嬲．．住啦．
你唔好咁惡啦．．．（阿紫有點吞吞吐吐）
我：你明唔明我地見面既時間已經好少好少啦！
點解仲要咁做．．唔通遲ｄ佢地一句話個個月都唔比，
你就三個月都唔出呀？
阿紫冇出聲．．．．
我：答我啦阿紫！
你可唔可以當係為左我地爭取下呀，
自己可唔可以做返一次主意啊！！？
阿紫：對唔住呀．．
我真係做唔到．．．
果一刻，我個心真係痛得好緊要，
我明白，我明白係我自私，
我應該理解阿紫既立場。
但我嬲既唔係主要係阿紫，
我嬲既係佢屋企人，
呢ｄ咁無理又頑固既決定！
我亦都為阿紫，呢一份柔弱，
優柔寡斷既性格，感到失望。
點解，點解阿紫就唔可以為我付出多一點，
係咪佢唔夠愛我？係咪佢對我已經開始淡？
試問邊一個男朋友唔會對自己愛既人有私心？
我已經一路容忍落去，
估唔到佢屋企人做得更甚！
阿紫果一番說話，
已經令到我既怒火，變成失望．．．
睇黎，我再係點講，都改變唔到事實．．．
我：我唔想再講．．．
我真係冇心情．．
阿紫：阿樂，
我都知道咁樣係辛苦左你架啦．．
你唔好唔開心啦．．．
我地好好咁一齊開心過聖誕啦好冇？
聖誕．．．．咁遙遠既事．．
我真係一ｄ都唔想去諗．．．
一陣到聖誕果時，又唔知會唔會有咩變數．．．
我：嗯．．到時先算啦．．．
我訓啦．．拜拜
呢一次，係我真真正正，
第一次同阿紫嘈交。
我明白情侶之間，
嘈交係理所當然既事．．．
但呢場交，就好似嘈完之後，
都唔會有結果，
都唔會解決倒。
因為呢次，我心入面，多了一道疤痕，
一道很深的疤痕。
果一刻，我真係好唔鍾意，
阿紫既屋企人．．．．．．．．．．．．
我直覺覺得，佢地可能開始稍稍懷疑到阿紫係咪拍緊拖。
就係因為十一月中，阿紫父母呢個決定，
令到我霎時間既憤怒，打從心底入面爆發出黎。
我第一次，同阿紫嘈交，
我亦都係第一次，向女仔發脾氣。
收左線之後，諗返阿紫果時既無助，同埋佢想喊想喊既語氣，
實在令我好難堪，因為我根本唔想發佢脾氣，
哪怕是一次半次都唔想。
但係，有邊個係愛情入面，未試過任性呢。
我會咁大反應，都係因為我太愛阿紫，
都係因為我心急想一直保持住大家既關係，
唔想我地既愛，有任何一分一秒，受到歲月既洗禮，
而褪色，變暗。
說到底，我會有呢種反應，係因為我真係好怕，
好怕大家既感覺已經無聲無色咁，漸漸流失緊，
但係大家冇為意到。
我只係純粹想，保護大家既關係，
我只係純粹想，做阿紫既守護者。
事後果晚，我寄左一個短訊比阿紫，
同佢道歉，同佢講我心入面諗咩。
我冇直接打比佢，係因為我怕我又再控制唔倒自己。
阿紫亦都好理解我點解會咁，原諒左我。
我有問過佢，你覺得我任性嗎？
佢回答我，一點也不。佢知道，我係愛她心切先咁。
十一月中，入秋。
秋天既涼意好似在數落我荒蕪既內心，
每日返學放學，心入面總是欠缺左ｄ咩咁。
兩個月啦，阿紫轉左校都兩個月，
唔通，我仲未習慣嗎？
我每日都數數手指，睇下同阿紫仲有幾多日先相見，
一日既過去，實在不容易呀。
每個月每個月，我都生活係愛與痛既邊緣。
每個月只係可以有一次，僅僅一次既機會，
去實實在在地，感受到阿紫既愛。
但就有廿幾三十日，活在痛苦既斷層。
愛與痛不斷的交替，
實在令人，又愛又恨。
十二月，寒意明顯強烈，
踏入考試月份，我亦要開始溫書。
由開學到十二月，我都冇咩幾何搵過阿欣教數，
因為我唔想阻住佢讀書。
有時我同佢，亦只係係學校，寒暄幾句。
我諗住積埋積埋，係一日裡面一次過問晒佢。
所以，我趁十二月頭冇咁趕時，就打電話邀約佢。
我：阿欣，可唔可以麻煩你一次，
搵日教我數呀。我積埋左諗住一次過問你，
費事晒你咁多時間麻。
阿欣：好呀冇問題！不過放學既時間我唔係咁得閒喎，
今個星期六教你好唔好？
我又打左個突：Er…唔係又去你屋企呀？
阿欣：而家去我屋企好失禮你咩！
有好多人想去都去唔到添呀！仲嫌三嫌四！
我：唔係．．．之不過．．（我都未講完，阿欣就接住）
阿欣：之不過一男一女係屋企好似唔係幾好呀麻！
知你實講呢句啦！長氣樂！！
我：嗯，你知就好啦！
一陣比你隔離屋人見到，話比你屋企人知就唔好啦！
阿欣：超！而家咩年代呀！
況且我光明正大，驚咩比人講呀！
除非．．．．
我：除非咩呀！？
阿欣：除非有人對我有非份之想啦！！
我：你鄰居對你有？
咁你就要小心ｄ啦！！
阿欣：妖！唔係佢地呀！
我：哦，原來你係話緊我，
你收皮啦！我對你有非份之想晨中落左手啦！
駛等而家！？ 你都ｏｎ居居既！！
阿欣：你就ｏｎ居呀！費事同你嘈！！
見你唔鍾意係屋企，咁星期六約你去ｍ記溫啦麻鬼煩！
我：好啦．．朝早十一點見。
但係，星期五晚果時，
我發覺自己有ｄ沾寒沾凍，
同埋喉嚨硬係有點唔舒服。
我拿拿林著多件衫，因為天氣真係凍左好多。
我就問我老母：媽，有冇必理痛呀！？
媽：做咩呀阿樂你，唔舒服呀？
我：唔係，見喉嚨有少少唔舒服姐。
我媽搵一搵櫃筒，話：冇喎，得返銀翹咋，食住佢頂檔先啦！
你聽日自己起身之後落街再買啦！
我心諗，雖然銀翹ｄ藥效出晒名弱雞！強國貨真係冇好！
但係我都照食住先啦，唔係點。
果晚訓覺，
其實我都唔係點訓得到，
因為即使我蓋到實一實張披，
我硬係覺得有點寒意係身體入面四處流動咁。
我心諗：屌！唔係咁撚邪呀，咁撚寒既！
到到星期六朝早，
我起身果下先意識到，自己仲係好凍，
身體有ｄ冷汗，頭好痛，喉嚨亦痛得好似撕裂一樣，好乾涸。
我望望個鐘，早上九點．．．．．
我視線仲係朦朦朧朧，
我摸一摸自己額頭，
是發燒嗎．．．．．
心諗：唉，仆街啦真係！老母又返左工．．
想叫佢買藥都唔得添！！
我諗住打電話比我老母，
通知佢我病左．．．．．．．
但我聽到把聲過下，好似又唔係我老母把聲黎．．．
我再聽真ｄ，原來打錯左比阿紫．．．
阿紫：阿樂．．你做咩咁早打黎既．．
又唔出聲添喎．． （好似仲未訓醒）
我：咦！？阿紫．．？
對唔住呀．．我打錯電話．．
原本應該打比我阿媽既．．
阿紫笑一笑：哈．．
咩你咁失暈架，咁都打錯得既傻佬。
我：嗯．．我發燒喉嚨痛呀．．神志可能有ｄ唔清醒
阿紫：下，咁點算呀．．
你媽咪呢？
我：返左工呀，所以我先想打電話通知一聲佢姐．．
阿紫有點擔心：阿樂，咁你去唔去倒睇醫生呀．．
我：我諗應該冇咩問題既．．
樓下都有診所．．我一陣會去架啦．．
你唔駛擔心我．．
阿紫：最衰我唔係你身邊啦，如果唔係可以睇住你麻．．
你唔好講咁多啦，快ｄ去睇左醫生先啦．．．
我：嗯．．．．
一陣再覆你啦咁．．
我同阿紫講完之後，我就再諗住打返比我老母，
點知．．．原來佢熄左手提。
然後我因為太攰，就再朦朧咁，訓著左．．．．
隔左好一陣，有人打電話黎，
我再次被電話聲嘈起．．．．．．
我：喂．．． （屌你邊撚個又嘈醒我）
阿欣：喂！死人樂！！
聽你把死人聲就知你未起身啦！！
我等左你半個鐘啦係m記！！
點知你而家仲係屋企未死出黎！！
（阿欣果時既語氣真係好勞嘈）
我比阿欣嘈一嘈，先醒起原來我仲未睇醫生，
唔怪得之愈黎愈辛苦，連講野既氣力都好似冇咩咁。
雖然係咁，
但我都盡力同阿欣講：對唔住呀．．
我今日應該出唔到黎．．
我發燒而家要睇醫生呀．．
阿欣睇完我話發燒，即刻好大反應：阿樂你發燒呀？
唔好講咁多啦，快ｄ叫你
屋企人陪你睇醫生啦．．
我：冇呀．．得我自己咋．．
我應該落到樓既．．（不過我個頭真係好撚痛）
阿欣：你得唔得架！你唔通知你媽咪？
我：佢冇開手提．．．
阿欣：唉，咪啦咪啦！一陣你落街暈低就麻煩啦！！
你屋企住邊呀，我過黎陪你睇啦！！
我：唔駛啦．．我自己一個得啦．．
阿欣：叫你講就講啦！你睇你連講野既氣力都冇！
住邊頭呀？ （屌叫人講仲要咁惡死）
然後．．我就講左個地址．．比阿欣知．．
阿欣知道左之後，就話：哦，都好近姐，我知邊度呀！
阿樂你等一等我，我好快過黎。
唉，沒想到，我病都需要倚賴人去照顧。
屋企人唔係度既情況下，我連去睇醫生既力氣都冇，
但係，黎陪我睇既，估唔到會係阿欣，而唔係阿紫．．．
麻煩倒人地專登過黎，我真係有點過意不去．．
畢竟今日約佢問數學已經叫麻煩倒人麻．．．
由細到大，我都好怕發燒果種感覺，
成日都會令你好唔舒服，忽冷忽熱，又唔知道幾時
先會，完全退得晒ｄ燒．．．．．
隔左半小時多點之後，屋企既門鈴，忽然間響起．．．