有一晚一個來電: 為愛沉溺的七百三十天(上)
我同阿欣，不經不覺，見面既次數亦都愈黎愈少。
上次補課聽阿欣講，話佢考試都要溫書，可能佢唔會再幫我補。
又岩既，我都麻煩左佢咁耐，佢亦都好應該為自己既成績打算下，
而我又唔好意思打搞倒人，惟有係呢兩個星期，重溫幾多得幾多吧。
今日，阿欣依然好用心咁教我。
我亦好比心機，主動去學，去問。
我：阿欣，呢條數係咪咁做？
我唔知個答案岩唔岩。
阿欣：等我睇過！（然後佢自己做一次）
岩呀！答案冇錯呀。
我繼續問：咁呢條呢？我諗黎諗去都諗唔倒個思路應該係點。
阿欣：唔．．．睇睇先．．．
哦！拿你應該咁樣先！
然後再抽佢出黎．．．再調位！
咁先約到最簡既！
我好快咁吸收完之後，就再問，
點知．．．
阿欣：喂喂！阿樂！！
你駛唔駛咁捉緊時間問我數呀！！
原來你真係想用盡我既！
陰毒得你呀！
我：點陰毒都唔夠你陰毒啦！
我係見你話考試要溫書，
我費事再煩到你咋！！
一陣你考試成績差賴我咪ｐｋ！
阿欣聽完我咁講，又碌大左隻眼定左望住我。
佢成日咁既舉動，究竟係度諗緊咩！？
我：咩呀！而家特登show你對眼有幾大啦喎！
得啦得啦！我認我唔夠你大啦！
阿欣：你係唔想阻到我溫書，先想盡量係僅餘既時間學埋去？
我：係呀！講多次都嫌長氣啦！
拿拿林啦！！
阿欣：你條友仔，唔聲唔聲都幾識為下人著想！
我：咩唔聲唔聲，係不嬲都係！！
阿欣：超，真係嘔死呀！（佢即刻做左個扮嘔既姿勢）
牙擦擦咁！真係想升巴你！
我：好心你唔好咁暴力啦！
似返個女仔少少得唔得架！
阿欣：咩我好唔似女仔咩而家！！
邊忽唔似先！！
我：性格囉！！
阿欣：哼！性格呢ｄ我鍾意點咪點，
最緊要我覺得舒服咪得！！
我衝口而出咁講：咩你真係覺得舒服同開心咩？
你只不過掩飾緊咋掛。
阿欣聽到我咁講，佢呆左唔識再反應
之後佢細細聲講：今日補習時間過左好耐啦，我走先，
下次見。（佢好似真係唔開心同嬲嬲地）
阿欣佢搞咩，點解成日都要咁收埋自己．．．
好好地講比人聽唔得架咩！真係唔明佢份人咩構做。
返到家，我再溫多陣書，
就打比阿紫傾下計吹下水。
每晚呢個電話就成為我一日溫書既動力。
我：阿紫，你話我地考試完之後做咩好？
阿紫：阿樂，你仲識玩咩運動架？
我：唔．．羽毛球都還可以既，做咩？
阿紫：羽毛球我岩喎，不如考完試我地一齊打呀？
我：好喎，順便當做下運動呀麻。
你都要做下呀，唔係會肥架！
阿紫：咩姐！而家我好肥咩？
我：少少少少咁啦，
不過我鍾意呀！有少少肉攬落都舒服ｄ呀麻。
阿紫：唔比你攬喎，等我減完肥先啦！
我：唔好呀．．．
阿紫：哈哈，傻佬，你要考好ｄ呀，
如果唔係連暑假都冇得見呀知麻！
我：知道，我一定會快快考完試，
然後痴實你既。
阿紫：嘻，咁訓啦，早抖啦！
我：唔，咁一齊啦，早抖。
我同阿紫，就約好左考完試第一個節目
係去打羽毛球。而我同阿欣，就剩返一次見面時間。
最後一個星期既上學天，
過埋就要考末期試了。
估唔到，一年既中學學期過得咁快，
可能因為有朋友陪住，返學變得開心左，
又冇咩好擔心吧。
當然，最重要既係，有阿紫呢位女朋友，
不時同我締造甜蜜既回憶，
不時同我交換一下情信，
令大家更了解大家，更愛大家。
有一日，我同阿紫小息時繼續落去散下步。
阿紫忽然問我．．．．．．．．．
阿紫：阿樂呀，你知唔知咩叫”愛”呀？
我：”愛”？咁同”鍾意”有咩唔同呀？
阿紫：梗係有唔同啦，
愛係更深一層次ｄ既野黎架啦，
我睇書話（阿紫好鍾意睇有關於愛情既書，或者小說）
如果一個人係愛對方，會無私咁為另一半付出，
只要對方幸福，佢自己就會覺得幸福。
（阿紫呢一句，我永永遠遠，都記得。
因為我，曾經為佢咁樣做過．．．．．．）
果時，我仲係唔明，因為實在太深奧。
阿紫又問：阿樂，咁你係愛我，定係鍾意我呀？
我：我唔清楚係邊一樣呀，
但我會盡力令你過得幸福架。
阿紫聽完我講之後，好滿足咁甜甜地笑。
然後好溫柔咁講：阿樂，你對我真係好好。
如果可以一世都痴實你就好啦。
呢個”如果”，會永遠都只是屬於一個假定句嗎．．．
阿紫．．．我可以，一世都比到幸福你嗎？？．．．．．．
我可以．．．一世都見到你呢個幸福既笑容嗎？．．．．．
放完學，我見仲有少少時間先過去補課，
我就同阿力吹左陣水。
阿力：你就好啦！成個暑假有阿紫陪你！
我：咁你暑假有咩做呀？
阿力：我諗都係同ｄ朋友打波多架啦，
或者去下打機咁囉！
我：岩啦！你打波咁勁，唔好晒左佢呀麻！
入埋校隊，大把女你溝啦！
阿力：屌！講到咁撚遠，
得先算啦！！
喂！暑假唔好只係陪女先得架！
一齊出黎玩下呀麻！
我：當然得啦！
我地再約啦！
我差唔去補課。
上星期見激親阿欣，今日我都係唔問咁多啦
一陣佢發老脾我就真係仆街啦，數學收皮就唔好啦！
今次我一入到課室．．竟然．．．．．．．．．．．．
阿欣會早到過我．．．
阿欣拎一拎個頭望向我：搞錯呀阿樂！咁遲架！！！（遲左兩分鐘姐）
不過．．．佢今日．．．．有點唔同．．
我定左咁望住佢．．．．．
阿欣佢，今日戴左一副黑色幼框眼鏡．．．
令到佢個樣變得更加純，同有點乖乖女，
出黎既感覺同冇戴係好唔同。
（我都係戴眼鏡，但我永遠都做唔到呢個效果，唔知點解女仔先得）
果一刻，我可能比佢呢個look吸引住，
所以望到入左神都唔知。
阿欣：妖！阿樂你做咩仲on居居企係度呀！
明知自己遲到就唔好仲係成擔豬油膏咁啦！
動作快少少得唔得呀！！！！
我：係係係，唔好意思。（屌！我果時做咩鳩）
我拿拿林坐埋去，話：你今日戴左眼鏡喎。
阿欣：廢話！係度明故問！
做咩呀！而家唔戴得呀？
我：唔係．．．．
阿欣：我見ｄ散光有少少嚴重，咪戴一戴眼鏡想睇清楚ｄ囉！
同埋想認住你個衰樣呀！！
我：我都係散光喎！
阿欣：頂！唔好講埋ｄ無聊野啦！散光都好認叻既！
於是，我地就開始左做正經野先．．．．
做做下，佢突然話：阿樂，你ｄ數學，真係進步左喎！
而家冇以前咁on居啦d答案。
我：梗係啦！不過都係多得阿欣姐你既功勞姐！
阿欣：車！死察鞋仔！（明明自己聽完我咁講都笑一笑，擺明受啦，又死口唔認）
我：阿欣，上次對唔住，我唔應該話你．．
你好似嬲嬲地咁．．．
阿欣停左一陣，先再開聲：是但啦！我知你唔係有心！
我只係唔明你點解會咁想知姐！！
唔係八掛仲會係咩喎！
我：我唔係八掛．．
因為．．我直覺feel到你係呢度唔係太開心
其實我以前都係一樣．．．
阿欣聽到我咁講，即刻話：點解呀？
我：你話我知，我咪話你知囉！
阿欣：車！好似搞到我好想知咁！我先唔希罕呀！（隔左三秒後．．．）
快ｄ講啦！！（佢成日講說話都前言不對後語）
我望一望個鐘，話：頂！就黎冇時間啦！
遲ｄ講得唔得呀？講埋數先啦！！
阿欣：拿你話架！你唔講我頭都拎甩你！！
估唔到，千絲萬縷之間，竟然比我搵到一個機會
可以套到阿欣講佢既野．．．．．．有時呢ｄ真係人夾人，
佢本身真係好唔鍾意八掛或者懶關心佢既人，
但聽到我講話我都係唔開心，同佢一樣處境，
果一下，估唔到就係通往阿欣心扉既一道橋。
唉，真係唔撚係講笑。
個幾鐘頭係咁做數學，真係會令人頭暈眼花。
可能係因為用腦用得太盡。
到完左果一刻，真係鬆一口氣。
我：終於溫完啦！好野，
跟住就唔駛見到你啦！！
阿欣即刻打一打我隻手：頂你！你好唔想見到我咩！
哦！而家叻啦！打完齋唔要和尚啦！
忘恩負義死ｃｈｅａｐ精！！
我：又係你自己話考試唔好煩到你要溫書架麻，
咁唔通我仲要見住你咩！！
阿欣：超！你估我好想見到你呀又！
我：哎，既然大家都咁唔想就岩啦！
而家就各散東西啦，我都走了。
阿欣：喂！阿樂！
你仲有野未同我講喎。
我諗左一陣，我：哦！（差ｄ唔記得左）
你話唔開心果樣野呀，
不如我地係電話講啦，我真係好攰啦！
阿欣：做咩呀，想搵藉口拎我電話呀！？（完全冇咁既意思囉）
我：咁算啦，唔駛講慳返。
阿欣：你就想呀！橫掂我又冇蝕低！
記住啦！９ｘｘｘｘｘｘｘ
我：好啦，我夜ｄ搵你啦．．．
我繼續話：阿欣，好多謝你教左我咁多．．
我真係好感激。
阿欣聽完我咁講，竟然會面紅，佢應該唔係成日聽真心說話吧。
我：哈，你面紅呀！睇唔出你咁易面紅喎！（雖然我都係）
阿欣：死屎啦你！走啦！仲望望望！再望我插盲你呀啦！
其實我真係好唔鍾意考試，
每日要溫書既感覺真係好枯燥！
冇阿紫做緩衝既話，一定會好快放棄。
返到屋企，因為太攰．．．．
食完飯沖完涼就訓著左．．．．．唔記得搵阿欣講返件事．．．
於是，我第二日放學返到家，
就打電話比阿欣補返啦。
可能始終同佢唔係太熟，而且又係女仔，
打電話比佢時都顯得有點兒緊張。
阿欣：喂。
我：喂，唔該阿欣呀。
阿欣：我係呀，你係邊個？
我：我係阿樂呀！
阿欣：頂你阿樂！！又話尋日打黎，
搞到而家先搵我！！（又係咁火爆）
我：唔好意思呀，我尋日太攰訓著左呀！
今日補返都一樣姐！遲到好過冇到呀麻！
阿欣：超！做錯事仲藉口多多！
點呀。
於是，我就將初初係學校既野，點解會唔開心，
同埋屋企野，都講左比阿欣知。
我覺得佢係信得過既人，所以我對佢亦冇咩介懷。
佢聽完之後．．．．
阿欣：估唔到，你屋企既事情係咁不濟．．．
我：嗯．．（每次講完我都會心情有點低落）
阿欣可能知我唔係太開心，於是話：對唔住呀！仲要你提返起呢ｄ唔開心野。
（阿欣竟然會講對唔住）
我：算你有返ｄ良知，咁你呢！到你啦！
阿欣：車！點解要話你知呀！
你又唔係我邊個！
我：喂，講好左唔好咁茅架喎！
阿欣：講啦講啦煩人！
阿欣語氣變得凝重起黎：其實阿樂你講得岩．．．．
我係學校的確唔開心．．．
我：點解既？
阿欣：因為我既性格同其他人好唔同．．．
我唔鍾意造作．．講野又唔鍾意轉彎抹角．．
唔似得班入面ｄ八婆咁，講又一套，做又一套，
係人面前就扮ｆｄ底，係背後就講人事非！
我最憎就係呢ｄ人！
我：所以你．．就識唔到朋友？因為你呢個性格．．．
阿欣：係呀！佢地會搞ｄ小圈子排斥人。
我實在覺得太無聊，我都懶得理佢地。
至於屋企．．．．
我：屋企都有問題？
阿欣：嗯．．．
我老豆間唔中會打我媽咪，
所以我好憎男人．．．
男仔都冇個好架（我見佢咁斬釘截鐵既語氣．．我都有ｄ怯）
我：所以．．．你就成日都咁惡對人？
阿欣：係呀！我想好好保護自己呀麻！（佢語氣亦都低沉起黎）
（阿欣．．其實你咁樣．．咪仲顯得你內心愈脆弱．．．
諗諗下．．佢真係幾慘．．．）
我安慰阿欣話：其實呢，
你雖然惡ｄ，但你心地都好好既。
又幫得人，又有義氣，又爽直。
阿欣聽完我咁講，終於歡顏一點：哈，你咁係讚我啦喎！
定扮晒野想哄我咋！！
我：真心架。
阿欣：多謝你呀阿樂，
你係我第一個會講咁多自己心事既男仔．．．
講完出黎我個心真係舒服一ｄ。
我：咁咪好囉，笑多ｄ人都靚ｄ啦！！
阿欣：我不嬲都咁靚架啦，駛鬼要笑先靚呀！（屌！正一自大狂黎）
你以後有野唔明都可以打電話問我架喎，
雖然見唔到面。
我聽到佢咁講，當然狗衝咁應承啦！！
臨收線果一刻．．
阿欣：阿樂，我得閒可以打比你架可？？
我：是但啦，我full-booking架喎成日都。
阿欣：頂你食屎啦！學我呀！跟尾狗！
我：咁既語氣，你打黎我都唔聽啦！
阿欣：我理你呀！你唔好唔記得你仲差我一個人情呀！（頂！咸豐年既事啦）
我訓啦，係咁啦！
就係咁，我同阿欣就將大家埋藏係心底既野，
互相交換。係果一刻，我倒覺得，
我同阿欣可以發展成交心既朋友就好，
畢竟大家既處境有點相似，更容易令大家有一份共鳴係度。
交朋友好易，交一個願意交心既朋友，真係好難。
果次電話之後．．．．
就係一連一個星期既考試．．．
難就唔係話太難，
劇情上亦冇咩值得紀錄，
所以只好直接跳過。
但係，考完試之後．．．．．
我得知到一個．．相當之驚訝既消息。
考完試之後，身體就即刻如釋重負一樣，
終於，可以拋下那乏味既書本，知識，
去享受一個漫長既暑假啦。
考完試離開禮堂果時，我即刻行埋去搵阿紫。
我好開心咁話：阿紫，終於考完試啦！
我地可以成日見面，做大家想做既野啦。
係呢，我地約幾時打羽毛球好呀？
星期六日應該會多人book吧，
不如我地揀平日呀，好冇呀？
我一輪咀咁講，同時亦都留意到，阿紫好似心不在焉咁，
佢冇咩反應比到我，同佢平時活潑既性格表現大相逕庭。
我見佢好似冇留心聽我講野咁，於是：阿紫？你聽唔聽到我講咩架？
佢係呢一刻終於望住我，強顏歡笑起黎，話：嗯嗯，
平日呀麻，好呀，就平日啦。
（佢語氣低沉左好多，仲有不經意擺出一副若有所思既樣子）
我見佢有點唔妥，我就問：阿紫．．．你唔舒服嗎．．？
阿紫微微地拎一拎頭，話：嗯．．唔係呀．．
可能因為考完試有ｄ攰掛．．
正當我想問佢一唔一齊食飯之濟，阿紫就話：阿樂呀．．．
我有ｄ眼訓呀，
我想返屋企先啦，
遲ｄ再搵你啦。
阿紫同我講拜拜之後，佢就自己走左。
我從未見過阿紫而家咁既舉動，
我可以好肯定咁覺得，阿紫，並唔係單純攰咁簡單。
一定係發生左ｄ咩特別事，但佢冇同我講。
而阿紫呢個舉動，令我更加擔心．．．．
因為阿紫佢不嬲唔係ｄ咩收收埋埋既人，
今次佢連講都唔想講．．呢件事．．一定係非同小可．．．
唔知點解．．．我就係有呢種不祥既預感．．
希望係我多心吧．．．
到左夜晚，阿紫佢出奇地冇打比我，
平時佢都會係夜晚十點期間倒打一打黎（哈，我亦都係十點倒出文，是巧合吧）
，但今日，佢冇．．．．我愈諗，個心就愈唔舒服，
我就愈想知道，究竟發生左ｄ咩事。
我打電話比阿紫．．．
第一次冇人聽．．．我隔多十分鐘再打．．
今次通左。
阿紫：喂．．．（我一聽佢”喂”呢一下我已經知道佢喊緊）
我即刻問：阿紫，你．．喊緊嗎？
阿紫：嗯．．．（果一刻我真係好心痛，女仔眼淚既威力真係好大）
我：阿紫，我知你而家好唔開心。
你可唔可以老老實實話我知發生左ｄ咩事？
阿紫停左一陣，同我講：我真係唔知點講你知好呀，阿樂，
我講唔出口。
我：點解會講唔出口？關我事既？
阿紫：嗯．．我驚你會怪我呀．．．（佢講到呢ｄ，喊得犀利左，線聲亦變得模糊起黎）
我安慰佢話：我應承你，我絕對唔會怪你。
既然係關我事，我都應該有權利知道架麻，
乖啦阿紫，比我同你一齊承擔啦，好冇？（如果我可以係佢身邊，我一定會緊緊抱住佢）
阿紫見我咁講，應該有ｄ心軟：你真係唔會後悔？
我聽到阿紫咁講，我心都有ｄ怯．．．
但始終都要知架啦．．．我惟有堅強一點，畢竟我係男仔麻。
我：放心啦，阿紫
我唔會後悔．．你講啦。
阿紫一路喊住，一路同我講：阿樂．．．．
我．．．我要搬屋啦．．．
我要轉校啦．．．．
聽到佢咁講．．我個心簡直好似係比刀割開左一樣．．
阿紫．．佢話．．佢話要搬屋．．．．？？
果一刻，我都呆住了．．．
不過，我仲想問．．究竟係搬去國外定係點．．．
我膽戰心驚咁問：阿紫．．你係要去外國．．？（拜託唔好呀）
阿紫：唔係．．我只係搬去新界．．．
因為屋企人想搬一間再大ｄ既屋，同埋揀一間再好ｄ既中學．．
所以我就要迫住搬屋．．佢地已經決定左啦．．
我改變唔到任何事．．．
我個心都定ｄ：阿紫，只係搬去新界咋係麻．．
香港有幾大姐，搬遠ｄ都可以出黎見面架麻．．．
即使．．即使我地唔同學校．．．
我地最多咪一個星期見面一次囉，
唔緊要架喎．．．
阿紫見我咁講，就話：我唔想冇左你呀．．．．．．
我：傻瓜．．無啦啦點會冇左我呀．．．
唔好亂諗啦．．
拿你乖ｄ，我都知你攰架啦，你今晚好好休息啦，
我地仲有個漫長既暑假過架麻，係咪？
係果一刻，我仲係好天真咁以為．．．．
搬屋轉校，並唔係ｄ咩大件事，唔會影響到我同阿紫既感情．．
我仲以為．．每個星期可以見下面，感情都一直會維繫倒。
但係，就係因為呢個決定，呢個轉校，呢次搬屋，
我同阿紫既愛情出現了暗湧，已經開始咁，無聲無色地，
慢慢咁向我逼近，究竟黎到既時候，我仲招架唔招架得住？
阿紫同我既差距，屋企既高牆，再次狠狠地提高起黎．．．．．
其實，我並沒有想像中那麼堅強。
阿紫，畢竟是一個，思想簡單，
是一個，喜怒形於色的女孩子。
若然在愛情上，雙方都是那麼柔弱的話，怎麼能好好維繫呢？
只要阿紫有任何一刻落淚，或者是不開心，
我都會扮演一個堅強的角色，去安撫阿紫。
老實說，我根本沒有經驗，沒有精鍊的措辭去說服人，
畢竟自己還是一個中一生。
但我有的，是一顆，會對阿紫無私付出的心，
一顆，會對阿紫真誠以待的心，
這，就是真真正正的愛嗎？
我雖然在阿紫面前裝作堅強，
這亦是男朋友該負的責任，
男朋友，難道不是不應該讓自己心愛的人流淚嗎？
我只是做我該做的事，盡我的本份而已。
可是，安慰阿紫過後，
我的心，亂了，徹徹底底的凌亂不堪。
不停地忐忑著，就像想跳出來的樣子。
究竟怎麼了，就連我自己的一顆心，也想爭脫出來去找阿紫嗎？
我開始擔心，
擔心以後在學校，沒有阿紫的日子，
擔心以後在學校，失去了阿紫的身影，
失去了她的微笑，
失去了她的聲音。
我就是怕，連她的樣子，也會從我記憶中被披上薄紗，
一層一層的，漸漸變厚，最後，連回憶也模糊了。
我不斷安慰自己，說服自己，
告訴自己說：也不是什麼生離死別麻！
這麼擔心幹嘛？
我會害怕，不是因為我不信任阿紫。
我會害怕，不是因為擔心阿紫會對我漸漸變淡，
我會害怕，是因為，我怕我們的愛情，會漸漸變了質。
就像蘋果一樣，你一天不把它給切開，或許尚可以保留很多星期。
若然，你把它切開了，暴露於空氣中，蘋果中的鐵質會在空氣中快速氧化，
漸漸變了質，不能再保存多久。
現在，我的心，受外力，受一股強大，而無法控制的外力，
給切開了，我還能保存多久？
我思緒真的很紊亂，我實在很想找個人傾訴．．．．．．．
我還可以找誰．．．．．．
個一刻，我只係諗起阿欣。
因為除左佢之外，我就諗唔到一個信得過既人傾心事。
不過，我又唔太打算直接將我既愛情實況講佢知，
我只係想，搵個人傾訴下，令自己可以舒服ｄ。
我亦都無理由搵阿紫，畢竟大家都係當局者麻。
我拎返阿欣抄底既手提出黎望望，
然後就的起心肝打比佢。
接通既時候，都不禁寒暄幾句先。
阿欣：喂，搵邊位？
我：喂．．阿樂呀．．
阿欣：咦！？估唔到你都會主動搵我喎，
點呀！一定有數學問先打黎啦！！
我：唔係．．．只係想同你傾兩句姐．．（都放暑假啦，仲問咩鬼數學）
唔好意思，咁夜仲阻住你。
阿欣聽到話我搵佢傾計，就話：哈！你都會有想搵人傾計既時候架咩！？
做咩呀！你唔係寂寞難耐呀！！
我：你考試考成點呀？
阿欣：都ｏｋ啦，無你阻住晒我溫書既時間都多左好多！！
我：唔好意思．．之前晒左你咁多時間．．
阿欣留意到我語氣有ｄ唔妥，問：你做咩呀！？好似唔開心咁既！？
我：少少啦．．．
所以咪搵你．．．．
阿欣：哦！原來有人想訴苦！
講比我聽睇我幫唔幫到你？
我：咁順攤既你今次，唔會事後又話要爭你一個人情呀？
阿欣：我先冇你咁ｃｈｅａｐ呀！
講唔講架你！！成日婆婆媽媽咁！
我諗左一陣，用左一個非常婉轉既方法，
去表達自己想講既野。
我：阿欣，
如果有ｄ野對你好重要，
但你又控制唔倒幾時會失去，
你會點做？
阿欣：嘩，你講到好似好複雜咁既！！
收收埋埋咁！你冇食錯藥呀？
我：頂你！認真答啦！！
阿欣：冇呀！咁有時控制唔倒你都無法架啦，
咪見步行步囉，盡左力就得啦！
諗咁多咪盞自己唔開心，又影響其他人！！
做咩呀？有野對你好重要架咩？
比阿欣咁講一講，自己亦都有ｄ想通，
既然控制唔倒，倒不如做好自己吧，
第日唔好後悔都好呀麻。
我：冇呀．．問下姐都係．．
阿欣：超！神神秘秘咁！都唔方係見得光既野啦！
我：你就唔見得光呀！
無野啦，你去訓啦！我冇咩事啦！
阿欣：死呀樂！過橋抽板！！
下次你唔開心唔好搵我！！
我實唔會理你架！
我：多謝你啦阿欣，下次請你食野補數啦！
阿欣：拿你話架！
同阿欣傾完之後，我的確舒服左好多，
有阿欣呢個女仔係度，其實都不壞，
希望我可以同佢做到一對交心既知己吧！
漫長既暑假，正式開始。
經過昨晚我同阿欣傾過電話之後，
我亦好好調整左心情。
既然阿紫本身已經唔開心，我就唔可以同佢一樣，
我要盡量用愛情既甜蜜同溫馨，去將阿紫既傷口逐處逐處填補。
第二日，我打比阿紫。
我：阿紫呀，我地不如聽日去打羽毛球呀，好冇啊？
阿紫：嗯，好呀，我冇所謂呀。（阿紫既聲音，可以反映倒佢心情依然猶有餘悸）
無奈我唔係佢身邊，做唔到任何事
我要再努力一點，我：如果你唔好好調整心情，
你聽日一定輸比我架喎！
拿！我地輸賭啦不如，
如果你輸左，我就罰你一樣野，
我輸左，你就罰我一樣野，好唔好？
阿紫：咁罰咩先．．？
我：冇所謂呀，只要能力以內既，我都可以為你去做，只要你開心就得。
阿紫無出聲．．唔知佢諗咩呢？
我繼續講：拿！約實架啦，我一陣去ｂｏｏｋ場。
我地打兩個鐘好唔好？
兩個鐘夠晒機會比你反敗為勝啦！
阿紫：哈．．．（阿紫終於肯笑啦）
你又知我一定會輸先既，唔比係你架咩？
我：係咩，咁要睇過先知喎，
但你唔好以為你係女仔我就會留手呀，
我唔會架，為左我要win。
阿紫：咁衰架你阿樂，讓下女仔都唔得。
我：唔得喎！（我有非勝不可既理由！）
阿紫：阿樂．．．
我：
阿紫：真係好多謝你呀，
我知道你知我唔開心，
頭先係度好落力咁哄緊我，
我個心係感受得到架。
阿紫繼續講：其實最唔開心既人應該係你至岩，
因為影響得最大既係你．．．
對唔住呀．．阿樂，，，我已經盡左力．．
阿紫咁體諒我既心情，
即使前路有幾困難，我都唔再軟弱同害怕。
只要有阿紫陪住我就足夠。
我：我知呀，
只要我地活好每一天咪得囉。
拿，聽日見架啦，
唔好再唔開心啦，變苦瓜乾就唔靚架啦知麻。
因為打羽毛球，著長褲就唔係好方便打既。
咁我就是但粒件T-shirt加條波褲就算。
而阿紫，佢係當日就著左條短袖加條粉紅色既運動短褲，
耐唔耐晒下佢對白腳，真係人都醒神ｄ！
哼！不過我係唔會比佢呃到，
佢咁著，都係想色誘我姐，
等我打波果時分心，
然後輸波比佢。（你呃我唔到既，阿紫，我已經睇穿你啦！）
於是，我地就去左簽場啦。
咁我地當日都冇帶羽毛球拍，
要向場地果邊借。
搞掂晒ｄ野之後，我地就正式入去打啦。
打之前，我同阿紫講。
我：今日我唔會輸架，你做好心理準備啦阿紫！
阿紫：睇下點！
一開波，我地都熱下身先，未咁快正式計分住。
熱身既途中，順便摸熟下阿紫既波路。（唔知點解呢句打出黎有ｄ意淫既感覺）
估唔到，阿紫打羽毛球都有返兩下散手。
睇黎今次我唔可以輕敵啦！
熱身過後，比賽亦正式開始。
可能因為我太耐冇打，
一開波已經輸左幾球比阿紫啦．．
頂！點解會咁架！
阿紫即刻串我：睇黎有人要好好惡補下球技啦！
比賽繼續，不過．．．．
我發覺我自己既視線，不經意望住阿紫對腳，
頂！我竟然會分心！
無理由既，我意志不嬲都咁堅定。
係！我承應！我意志不嬲都好堅定．．．．．咁望住阿紫對腳
原來唔係阿紫既球技叻，而係佢既腳功勁。
在下實在佩服。
佩服還佩服，我又輸多幾球，
睇黎我要好好做下心理準備先得。
我：阿紫，我唔得啦（我唔可以再望住佢對腳啦）
中場休息唔該（先打左半粒鐘）
阿紫見我咁快就要休息，
可能以為我個病又發作。
於是佢好緊張咁行埋黎，
同我講：阿樂，你做咩呀？係咪見唔舒服呀？
我話：阿紫，你放心啦，
唔係咩體力既問題，
而係我而家精神力有點衰弱。
阿紫好大惑不解咁望住我：精神力？？？
我：阿紫，有時有ｄ野，
你係唔會明架啦．．．（然後我又繼續望住阿紫對腳）
阿紫：阿樂，如果你真係見唔舒服就唔好打啦
今日就當輸比我啦，嘻。
比佢咁講一講，我個人終於清醒返！
我點可以輸呢！唔得唔得！於是，我既鬥志又開始燃點起黎！
我：阿紫，我地繼續啦！
阿紫：你真係得？
我好堅定咁話：嗯！（然後一路望住阿紫對腳直止佢去返對面場）
我地繼續開始。
因為頭先比阿紫咁講一講，
頭腦算清醒返ｄ！
手感亦開始慢慢黎啦！
上手之後，嬴波亦多左，漸漸咁追返上阿紫。
我：阿紫，我ｄ手感返返黎啦，
你而家認輸都黎得切！
阿紫：哼！你就想呀！
打打下波，估唔到，阿紫出第二招！！
因為打左個幾鐘，大家都開始留汗，佢件衫亦開始透透地．．．
比賽繼續時，我亦開始留意住個波點走，但唔係羽毛球
望下望下，我下意識覺得自己會扯旗，
頂！點知真係扯左．．．
大佬，扯緊旗點跳起煞波呀！
於是，我又輸返幾鋪。
比賽分數爭奪亦愈黎愈激烈，
但無論如何我都要嬴架啦！
為左達成我既目的。
於是，我忘記阿紫胸前既一切，
專心去打波，終於．．．．．．
．．．．．．．．．．．．．．
我：yeah!!我嬴左啦！哈哈！
阿紫：哎呀，真係唔抵呀，爭少少咋．．
我：爭少少都係輸吧！
我見阿紫ｄ衫真係濕透，
一黎我驚佢蝕低（雖然已經蝕低左比我）
二黎我怕佢真係會著涼．．．
於是．．．．我就係袋度拎件外套出黎．．
我：阿紫，披住佢先啦，唔好冷親呀，知麻？
阿紫：唔該你呀阿樂．．
然後我就出去買野飲．．．我買左支水
比左阿紫飲先．．佢一路飲既時候，
我就用紙巾，輕輕咁幫佢抹汗。
阿紫就好似食左蜜糖般，同我講：阿樂，你今日咁細心既。
我：咁你係我女朋友黎架麻，細心ｄ唔好咩？
阿紫：咁我輸左．．
你要罰我咩呀？
果一刻，我就好情深咁，望住阿紫：阿紫．．．．
佢亦眼仔碌碌咁望實我．．．
然後我個頭就微微向前傾，青蜓點水咁，錫左阿紫額頭一啖。
然後就話：阿紫，我唔想你以後都唔開心呀，
無論以後有幾多野要面對，
我地都要互相信任先得呀，
我罰你，以後都要咁鍾意我，知麻？
阿紫聽到之後，即刻攬住我，同我講：嗯，我會架阿樂，
我一定會架。
今日，即使係簡簡單單既羽毛球，
我都覺得，只要我地可以互相愛惜大家，我已經覺得好幸福。
話就話暑假會花多點時間陪阿紫，同佢過二人世界，
但冇理由篇篇文都出我同佢架麻，咁樣睇落去都好快膩啦，岩唔岩先？
於是，暑假有一日，我老母突然同我講：
老母大人：喂，阿樂，唔好成日捕係個電腦面前啦，
有咩咁好睇姐！有金執咩真係！！（上網真係大把野睇）
我：做咩呀？又有野搵我做呀？
老母大人：阿樂，記唔記得你四月個時，
冇同我一齊去探阿外公呀！
我心諗：嘩，真係咩都瞞唔過我老母既記性。
佢對我仲上心過對自己。（不過咁又正常既）
我：係呀，咁你想點呢？
老母大人：你之前應承過我話暑假去架麻！
阿外公話想見你呀，我聽日放假呀，
咁趁聽日一齊再去啦！
我：好啦！（咁老母咁講，我唔好都唔得啦，一陣又比佢話就麻煩）
老母大人：咁我要買定ｄ手信先得啦又！
阿樂，做咩你呢排成日出去咁呀？成日有人約咩你？
我：係呀，你唔係想我成個暑假都屈係屋企呀。（我唔想又比人笑我未去過咩咩咩地方）
老母大人：唔係，我只係擔心你群埋ｄ咩人姐。
我：冇呀，咪黎黎去去都係同班同學，佢地都好乖架，
你放心啦．．．
老母大人：咁果個女仔呢？都有約你？
我咋傻：邊個女仔呀？
老母大人：咪之前家長日見到果個囉．．．
我：哦，阿紫呀．．
間唔中都有同佢出下去咁啦！（其實係成日）
老母大人：玩還玩呀，
記住要分配下時間做暑期作業呀知麻？
我：知啦知啦！
老母大人：咁我落街買野啦！
聽日下晝去外公度啦！
跟住，我就打電話比阿紫。
我：阿紫呀，我聽日要去外公度呀，
我唔同得你出去啦。
阿紫：哦，咁有佢啦，
我地約過第二日啦，
去外公度要緊呀麻。
我：阿紫，你真係善解人意架姐。
下次錫返你一啖補數。
阿紫：車，咁叫補數咩，
錫我咪即係我蝕低左，我先唔制呀。
我：哎呀，你唔制咁我錫其他人架啦！
阿紫：哼！錫啦錫啦！唔彩你啦死人頭！
我：唔好唔好，我講笑咋，
我只係錫你一個得未？
阿紫：算你啦，咁你聽日去完打比我啦。
我：好啦。
於是，我聽日就去外公度啦，
講起上黎都有好耐冇探過佢。
第二日下午，我就同老母去探外公。
其實，每次去探時，我老母都會買好多野去，
睇得出我媽媽，係好錫外公。
記得探外公果日好好陽光，應該係天公造美吧。
因為外公住得比較偏僻，落左車之後，仲有步行好一陣子先到。
陽光比較猛，我同我媽都行到身水身汗。
我唔想阿媽咁辛苦，
所以我：不如抖陣先啦，唔駛咁急，
大把時間呀麻。
我老母見我咁講，都停底落黎。
我就遞一遞支水比我媽。
我：熱呀，飲啖水啦。
老母：咁你呢？
我：得架啦，我仲有。
老母：唉，真係唔認老唔得！
想當年呢ｄ斜路真係濕濕碎。
而家，行幾步都開始喘氣，
你話以後上黎點算呀真係！
我：哈，放心啦，
如果以後你行唔到既，
我咩都咩你上去呀，咁得啦掛。
老母：哼，賣口乖，
聽住先啦！
我地抖左一陣，就繼續行上去。
沿途都不時欣賞下花草樹木，
享受一下，沒有都市般喧鬧既環境，
靜靜咁，聽下雀仔同昆蟲既叫聲，
感受一下，自然微風與身體既互動，
同細細地呼吸一下郊野既新鮮空氣。
無幾耐，我地終於上到去。
我媽就即刻拎ｄ鮮花呀，水果呀同ｄ燒肉出黎。
聽阿媽話，阿公最鍾意，就係食肥燒肉架啦，
當然唔少得米酒啦。
我媽擺好晒之後，就叫我同佢，雙手合十，
上前拜一拜阿公。
一路拜時，阿媽一路講：
爸，我同阿樂而家返黎探你啦，
我地準備左你最鍾意食既燒肉同米酒呀，
阿樂仔佢岩岩升中一，
今年既成績，老師話佢考得好唔錯，
爸你多ｄ保佑阿樂仔，
身體健康，
平平安安，
學業進步。
其實，每年探外公，
我媽都講差唔多既對白，
都係叫阿公多多保佑我。
我一直都知道，阿媽一直都好為我擔心同操勞。
山上既風較清勁，吹起上黎都比較舒服。
拜完阿公之後，我同我媽都係果度逗留左好一陣。
我係度諗：阿公佢，每日都住係果度，
冇人陪住，唔知會唔會悶，同感到寂寞呢。
我地先一年探果一兩次．．．
我諗緊野既途中，阿媽話：阿樂仔，
你要生性，好好讀書呀知麻，
成個家族都冇人升到大學，
阿仔我就旨意你架啦，
要好好睇睇比阿公知呀！
雖然老母而家講呢ｄ，我覺得好遙遠，
但畢竟，呢ｄ都係佢既心願。
我：知啦，我會好好努力讀書架啦！
阿媽：咁就乖啦，
唔好學你個冇用既老豆咁呀！
人又唔好，讀書又唔好！
第時讀書叻要好好對老婆呀知唔知呀！
阿媽講呢ｄ野，其實，即刻嘲諷緊佢自己，
揀左一個咁唔好，冇用，又不負責任既老豆。
聽到佢咁講，我都好心酸，無奈我太細，
真係咩都幫唔到手。
阿媽又話：我地雖然比上不足，但比下有餘，
阿媽死慳死低都會供你讀書架！
聽到呢到，其實我真係好感動，
做人媽媽既，永遠都係咁偉大，
果份情懷雖然我果陣仲未明白，
但係我都唔想辜負我媽既期望。
我亦知道，我媽已經將全部既感情，
都放晒落我度，所以我好明白，
所謂既愛，係母親都體驗倒既，係最明顯同最具代表性。
過多一陣，我同我媽亦都落返山。
阿公，我地下年再見吧。
探完外公，返到屋企，
感覺都舒服一點。（而家，人大左，反而冇細個果陣咁誠心，
即使以前係每年只探一兩次而已，
到而家有時一年都冇去探一次。
人愈大，就愈薄情，愈涼薄，無論對自己，親人，朋友，情人又好）
之後，我亦打比阿紫。
一聽電話，阿紫：阿樂，你返黎啦，
我好掛住你呀！
哈，估唔到，一接通電話，
就即刻黎個甜蜜轟炸，
好！我都唔可以蝕輸先得！！
我：阿紫，我都好掛住你呀，
唔只呀，我開始愈黎愈鍾意你，就黎鍾意都癲左啦！
阿紫：哈哈，係咪架，
但我唔鍾意癲佬架喎。
我：哈，咁你變埋癲婆咪得囉，大家就可以一對啦！
阿紫：嘻，無黎正經。
點呀你今日去探外公。
我：其實，我外公已經過左身架啦。
阿紫聽到，有點驚訝：阿樂，我以為你外公仲在生添．．．
因為之前都冇聽你提過．．．．．．
我：唔緊要，我地每年都會探佢一兩次既。
原本講好左四月清明果時探既，
不過我唔得，就改左係暑假。
見尋日有機會，就同阿媽去探一探啦。
阿紫：阿樂，你真係孝順呀。
今日咁曬，去果度咪好辛苦囉？
我：其實我就唔係太辛苦既，
係辛苦左我媽姐，佢要同我一齊去。
阿紫：又係既，你媽咪咁錫你，
有佢係度，你就可以感受下家既溫暖同幸福啦。
我：唔，仲有另一個重要既人，都令我好幸福同溫暖架。
阿紫：係邊個呀？
我：咪你囉，傻瓜。
阿紫：嘻，咁你要好好對我同你媽咪啦。
我：嗯，我會盡力去比幸福你，同我媽架！
我繼續話：阿紫，你幾時會搬屋呀？
阿紫：其實都裝修得七七八八架啦，
下星期應該會正式搬去。