有一晚一個來電: 初戀下的天空(下)
我：我諗到啦！拿，你今日幫我補左，
聽日星期四咪唔駛幫我補囉，咁就唔會晒你時間啦！係咪？
阿欣聽完，即刻好大力咁拍我背脊：你就想呀！發夢都冇咁早！
聽日照補呀！
我：下．．點解呀．．
唔係呢，我真係唔想晒你時間，你話你大把人約架麻．．
阿欣：冇啦，我推晒佢地，得返你一個咋！
你試下唔補阿拿，我即刻話比miss知。
我：咁鬼狗既你！
阿欣：係呀！吹咩！慘得過有人受呀！
（見到佢個得戚樣真係好想大巴大巴咁升佢）
如是者，我地終於到左m記。
到左m記，好彩，都唔係好多人姐。
我地就求其霸左個位。
坐底左之後，點知有人行埋黎．．．
睇一睇佢校徽，係我地學校既．．
路人甲：咦！我冇睇錯呀！
你竟然會同個o靚仔一齊去m記?
阿欣：關你鬼事咩！彈開啦！
而家我去邊又要你管！
你係我邊位呀！（火爆到極點）
我見到阿欣咁既語氣同佢對答，我當堂嚇窒左，完全唔識反應。
果個人應該係佢同班同學吧，我以為阿紫對我既語氣已經係惡。
估唔到佢對佢識既人仲更加惡死添！我都係唔好咁快同佢混咁熟，
一陣佢都係咁對我就真係蓋世寶屌老母啦！
路人甲：抵你咁既性格無人鍾意架！
o靚仔你要小心ｄ佢呀！（唔駛你講我都會啦，我有眼睇）
然後佢就走左．．．
我見情況咁僵，我真係聲都唔敢聲．．．
阿欣：喂！（好大聲咁對我講）
我嚇窒左．．．我：係．．．．（即刻死狗mode)
阿欣：又話溫書，唔拿拿聲拎出黎點溫呀！
我：係係係，唔好意思，我即刻拎出黎．．
阿欣：爽手啦！慢吞吞咁！（語氣仲係好唔友善）
我心諗：咁唔係辦法架喎，佢咁樣點教我野呀．．
一陣教教下我唔識做，佢咁惡當眾鬧我咪好瘀皮．．．
我見阿欣咁既情緒同心情，實在覺得佢冇辦法可以好好教我，
於是，為左我數學成績著想，我把心一橫。
我：阿欣，我出一出去先。
阿欣聽到，即刻屌老母咁講：頂！咩你咁多野搞架！
可唔可以坐定定咁溫書呀！
去邊呀你！？
我：去廁所呀。
阿欣：快去啦！麻鬼煩！（好彩佢冇追斬我既衝動）
果左一陣，返返去。
阿欣：搞咩呀，去廁所去咁耐！
跟住佢再望望我手上拎住既野，
繼續話：哦！你條友仔原來走出去買野食！
我真係唔識死架喎！（我見佢真係嬲嬲地）
我：阿欣，你唔駛勞氣住，
呢杯朱古力新地唔係比我食架，係比你架。
佢聽到我咁講，即刻碌大隻眼望住我，完全唔識比反應。
但我佢見面上好似冇繃得咁緊，心入面都鬆一口氣。
阿欣：咁好死會買新地比我！？
都唔方好啦！講啦！仲有咩要求呀！？（送野比你食仲咁不屑）
我：冇，我見你頭先咁火爆，
咪諗住買杯雪糕比你下左啖氣先囉。
我要求好簡單架咋，希望你可以專心咁教我數。
我講完之後，阿欣竟然會笑．．．．
其實我見佢幾次面，都係見佢笑過兩次．．．（第一次係我叫佢”姐姐”果次）
我：係囉，笑多ｄ咪幾好。
阿欣見我咁講，即刻嚴肅起黎：關你咩事姐我笑唔笑！
係咪溫書呀，快手啦。（雖然仲係咁惡，但始終回復正常水平）
呢一刻，我個心都定ｄ，起碼我既決定冇錯呀。
一路補，一路聽阿欣教，
其實佢教我既方法入耳好多，適合我好多。
可能因為佢以前數學都差過掛，大家有種共鳴係度。
我開始，發掘到佢呢方面既優點．．．
佢一路教我既期間，一路食雪糕，
講真，好似一般女仔食雪糕既姿態咁，斯斯文文。
呢個女仔，外表係堅強型，骨子裡倒有點女性基因麻，
如果佢冇胸既話我實以為佢只係長頭髮既男仔。
一杯雪糕，就已經可以融化倒佢外表剛勁既脾氣。
佢見我望住佢，阿欣就話：做咩呀？想食呀？拿！（然後筆左一啖遞埋黎）
我即刻個身向後左，話：唔駛啦，你慢慢食啦！（惹人誤會就唔係太好）
過左一個半鐘頭，終於補完。
我：多謝你呀，阿欣。
我聽日會好好比心機。
阿欣：你拎唔到九成你死比我睇呀話你聽，
枉你晒左我咁多時間。
九成！？我聽到都吞一吞口水：盡量啦。
我：頭先果個應該係你同學吧，點解你對每個人都咁惡既？
咁點識朋友？
阿欣：問問問，問咁多做咩姐！
我唔需要同佢地做朋友喎！
我：咁多ｄ朋友開心ｄ麻。
阿欣：多朋友就開心架啦咩？你而家覺得我好唔開心咩？
冇野啦下話，我走架啦！
我見佢唔係好願意討論，我都無謂再問。
佢講完就自己一個走先，而我溫多陣，亦都離開。
到星期四測驗時，我個心情真係非常緊張，
但我已經盡左力去溫，做卷既時候我都嘗試咁，
冷靜地去諗返阿欣教我既方法去做，思路會清晰一點，
雖然條條都叫寫到野，但我自問對自己既答案真係一ｄ信心都冇，
我成日都大意計錯數果ｄ。
做完卷之後，心情都鬆一口氣。
果個時候，misschan話：我會盡量係今晚改好，聽日星期五派比你地。
我心諗，屌！咁撚快知。
完堂後，阿紫向我提議左一樣野：傻佬呀，你正日果日生日呢，
唔係星期六日黎架喎。
我：係呀，做咩呀？
阿紫：冇呀，不如我地揀星期六慶祝呀，
咁放假我地咪可以一齊慶祝耐ｄ囉，
但就唔係正日．．．所以唔知你介唔介意．．
我好快咁應承：好呀，正唔正日都無所謂啦，
最緊要係你陪我慶祝咋麻。
阿紫：咁不如我地去睇場戲囉。
我：（屌，你地咪又再笑鳩我）睇戲？好喎，我未入過戲院。（自己打返出黎都覺得好笑）
阿紫：嘻，咁岩啦，你既第一次咁就比左我啦。
我：哈，拎去啦，我比幾多次你都得。
我繼續問：咁睇咩戲好呀？
阿紫：一係到時去到再決定啦！
我；又好！一於咁話啦！
星期六，將會係我同阿紫，第一次情侶既約會，兼第一次比女朋友慶祝生日。
果刻既我，係度諗，唔知道大家身份都轉變左既情況下，會唔會有多ｄ新鮮感呢？
放學後，我又如常落去補習數學。
今日測完已經好攰，放學後又補！屌我真係好撚眼訓。
入到去，仍然冇人。
空等左五分鐘，十分鐘．．．．．
依然冇人黎，心諗：之前佢唔會遲到得咁離譜架喎，搞咩鳩呀
如是者，我又再等到十分鐘．．．．
都係冇人，咁我諗住上佢班房睇下啦．．．
點知上到去，班房都已經冇咩人．．．
頂！佢唔係唔記得今日補課，走撚左去呀！
搞到我係度呆等左咁耐，真係狗得佢呀！
唉，算撚數！唔補仲好添，可以返去訓覺。
於是我一返到去，就撻上床訓，
訓得好地地，十點鐘倒，突然間，有電話響，
嘈撚醒左我。
我拎起電話：邊ｑ個呀？．．．．．．
最憎人係我熟睡既時間打電話黎煩鳩我架啦，
我一手拎起個電話：喂！搵邊ｑ個呀？
阿欣：作死你呀，咁惡．．．（係阿欣把聲，但聽起黎柔弱左好多，完全唔惡，
同佢平時比簡直天壤之別）
我：哦！你仲好意思打黎，你知唔知我今日等左你幾耐呀！
你唔黎早ｄ同我講呀麻！
阿欣：唔係呀，你聽我講先啦（把聲有點沙）
我今日冇返學呀，喉嚨唔係好舒服。
我聽到之後，都明白到佢返唔到黎都唔想既，
於是，我就話：唔緊要啦，你病都唔想架麻！
不過你而家把聲都幾溫柔好聽呀，我寧願你日日病啦！
阿欣：食屎啦你阿樂！咁詛咒我！
仲嫌我唔夠辛苦呀。（病既時候，即使連鬧人既說話都變得好溫柔）
我：你鬧少ｄ人，積返ｄ口德，病就自然好架啦！
既然你唔舒服，尋日又食雪糕！？
阿欣：咁都買左返黎啦，唔通晒左咩！
（佢把聲真係好沙，同埋咳左好多下）
唉，都係我唔好，冇留意佢唔舒服（咁佢當時真係好生猛呀麻，戰鬥格咁）
仲叫佢係咁講野教我數，我自問都好唔安樂。
我：咁你早ｄ抖啦，準時食藥啦，同埋唔好再鬧我啦。
阿欣：病左仲咁笑我，返到學校你就知死，係咁啦！
莫名奇妙，又要打比人又要收人線！
好快就到星期五數學堂派卷，
misschan跟住個名一張張咁派到每個同學既台上，
佢每派一張，我個心就愈緊張．．．
頂！點解咁耐都未到我架！快撚ｄ啦！
眼見miss一張一張咁，派到底．．．．．
屌！冇派到我手上既！？唔通唔撚見左？
然後佢就返返埋個教師台度，拎起一份試卷，
好嚴肅叫我個名：阿樂！！你出一出黎！！！
misschan返到教師台前，拎起一份試卷，
嚴肅咁叫我個名：阿樂！你出一出黎！
我見misschan把聲咁凝重，
深知道呢獲又奶撻啦，
唉，我老母知道一定會鬧死我。
我慢慢咁行出去，唔想咁快接受現實。
出到去，我望都唔敢望misschan，驚比佢鬧。
misschan：阿樂．．．．
佢望一望份試卷，繼續話：今次進步左喎。
平時你測驗d分數都係五字頭，
今次．．．
佢講完之後就遞份卷比我啦。
我見到份卷，78.5分。
其實我已經好開心，因為真係進步左好多好多。
misschan：阿樂，我見到有你進步，我都好開心，
因為我相信你花左唔少時間溫，
比心機呀阿樂，知麻？
我對住老師笑一笑，點點頭，然後就返埋位。
埋位果時，阿紫面上一副擔心既表情，
同時間扁扁咀，同我講：阿樂，你．．．
係咪測得好差呀．．
miss出去同你講咩？
我知道佢咁為我成績擔心，我就話：唔係啦，
我今次進步左呀，
你睇下（我就將份卷比佢睇）
阿紫見到即刻讚我：嘻，阿樂，你好叻仔呀！（同時間捉住我隻手）
阿紫隻手，無論任何時候，都好溫暖，
佢觸碰到我個一刻，個份暖意就好似會由我隻手，
慢慢咁流竄到我心坎入面一樣。
不過，我：但係我既分數，
始終都係冇八成以上．．．．
阿紫見我咁講，就話：傻佬，仲有大把機會呀麻。
唔駛咁心急喎。（阿紫既心情同說話，
永遠都係咁似水柔情，
雖然係冇咩起伏，但就充滿親和力）
果時，我都用返隻手搭住阿紫隻手，
同佢講：嗯，我會比心機架。
唔知道，我雙手既體溫，又會唔會傳到阿紫既心入面呢？
星期六慶祝我生日當日，阿紫約左我兩點。
我好準時咁，兩點到左我地指定既大型商場等。
去到果時，已經見到一個熟識既背影－阿紫
我見阿紫背住我，我就慢慢咁行埋去，唔想比佢發覺。
行到接近佢背面時，我用手，掂一掂佢右邊膊頭，
然後我即刻行去佢左面（係架啦，中一係咁貪玩）
阿紫佢，真係好純情咁，望左去右邊。
我心諗：傻瓜黎架真係。
然後佢見冇野就望返過黎，見到我。
佢意識到我整估佢，佢就用手一路拍住我手臂（仲記唔記得我之前講過阿紫呢個動作？）
，一路笑住講：阿樂，你咁衰架，整估人。
我：冇呀，見有個傻瓜咁早到，又背住我，
咁咪整估下你，等你唔好咁悶囉。
我望望阿紫，佢．．．
放左條辮落黎，好靚．．．（自此之後，我鍾意佢唔紮辮果時既樣，
感覺真係好唔同）
因為夏天，阿紫著左條膝頭對上多幾分既短裙（當然冇可能好似而家咁短啦，唔同年代）
我：阿紫，其實你．．．．．．（對腳都幾得，屌！我唔係想講呢ｄ）
其實你唔紮辮都幾好睇架喎。
阿紫：你鍾意呀，阿樂？
我：係呀。
阿紫：嘻，我偏偏唔比呀，下次紮返lu。
等你心思思。
我：哈，你試下呀拿！
咁我地快ｄ行啦，抓緊時候買飛呀麻。
於是，我地就同行去戲院，
步行緊既期間，我一路都好想有拖住阿紫既衝動，
但我真係唔夠膽，同埋好緊張，手心一直出汗（雖然平時都係咁出架啦）
我又費事阿紫介意．．．．．
我地去到戲院，睇下有咩好睇，
我地一路望左一陣，
估唔到，我地異口同聲咁：不如睇呢套囉。（一套西片黎，名就唔公開啦）
阿紫見我同佢心靈相通，就好開心咁笑住話：咁去買飛囉。
雖然，我未拍過拖，但我都知道，呢d野最好係男仔比錢既。
我買飛果時，就諗住拎埋阿紫果份既錢出黎，
點知．．阿紫：傻佬，AA咪得囉，
唔好晒錢比埋我個份啦。
我果刻雖然唔明咩係AA呢個term，但我get到係分開比。
講真，我果時既零用真係唔得，見阿紫咁體貼，我真係好開心。
（情侶間我好多時都係ａａ，真係想請先會請，直至而家都係，
冇必要將呢ｄ野當成義務吧，有時都會比女友請下，開心咪得囉
有時太公式化反而唔好）
買左位之後，我地見有時間，
我：不如去超市買下零食一陣睇戲食囉。
阿紫：好呀，行啦。
去到就近一間超市，
我同阿紫就開始慢慢行，睇下有咩好食啦。
平時，我自己落超市既時候，
都會直踩去零食掃薯片就算，
連行都冇興趣行，快快手買完野就返屋企果隻。
但係，當阿紫同我一齊既時候，
唔知點解，就好想，同佢慢慢咁行，
慢慢咁享受我同佢既每分每秒，畢竟，
每一段愛情既開始，都意味住，愛情期限亦開始倒數著。
我地，好仔細咁，睇下周邊既野，
無論用唔用得著又好，我地都會討論一番咁，
當時既感覺，我地就好似老公婆，去討論今晚煮咩送一樣。
去到零食區既時候，
我：你鍾意食咩薯片架？我可以就你架喎。
阿紫：冇所謂呀，我鍾意食熱浪多ｄ。
我：咦？你都鍾意食辣架。
我又係喎！（即刻揀返一包）
阿紫：係呀，係咪好奇怪，其實我都幾食得辣。
我：咁岩晒我口味啦！
我就拎個籃，裝住ｄ薯片，
我見阿紫雙手都拎住左個紙袋，我費事再叫佢拎任何野啦。
兜下兜下，阿紫話：我想買利口樂食呀（估唔到，利口樂，會係以後變成一個
好重要既一樣野，大家留意哦）
我：你鍾意食利口樂架咩？
阿紫：係呀！黑加倫子味。（呢隻味，我到而家都非常懷念，原因以後再講吧）
阿紫拎左一盒之後，用手遞一遞比我，
果時既我，接觸到阿紫隻手，
果時，我實在唔想放開，我就輕輕咁，捉實左佢，
然後又捉實，變成拖住。
我好緊張，心跳得好快，又唔知阿紫會唔會介意．．．
阿紫見我拖住佢，即刻面紅紅咁：傻佬，你咁茅架，
咁樣借ｄ意拖住人既。
我：我而家唔拖住你，我驚以後都冇機會呀麻。
阿紫聽我咁講，就更加拖得我更緊，
然後用另一隻手"喬"住我，挨埋黎．．．．
阿紫：咁樣夠實未呀？
阿紫第一次同我咁近距離接觸，
我真係有點招架不住，
但果一刻既心靈衝擊真係好大。
我輕輕咁，搣一搣阿紫個面：夠實啦，傻瓜。
然後，我地買完野，就開始去睇戲啦。
我地買完野食，就拖住咁，行返去戲院。
可能因為我太緊張，手心出好多汗，
有時我都唔好意思再拖，於是我縮一縮手。
阿紫留意到，問我：做咩縮手既？
我：我好多手汗呀麻，驚整濕你。
阿紫聽完我咁講，佢主動拖返我，
同我講：傻佬，我唔介意架，下次唔駛咁做啦知嗎？
再係咁以後唔比你拖架。
我：知道。
我地入戲院，就好快咁坐低左，
於是我地都拎返ｄ野飲同零食出黎，
預備一陣睇戲果時食。
拎完之後，我隻手，
再次形影不離咁，拖住阿紫。
然後，我地就一路食野，一路專心睇戲啦。
睇睇下戲途中，我以識到阿紫成日想縮埋個身咁，
可能佢覺得凍，畢竟戲院既冷氣開得好大。
佢又著埋裙，一定係有點頂唔順。
我就係個袋度拎件外套出黎（原本係帶比自己著既，估唔到有用途）
細細聲同阿紫講：阿紫，你係咪覺得凍呀。
有見外套呀，你披住先啦。（然後，我就幫阿紫披住）
阿紫：唔該你呀，阿樂，
你凍唔凍呀，不如一齊蓋住呀？
我：唔凍呀，你著住得啦。
於是，阿紫就”喬”住我隻手，將個身挨埋黎，
伏左係我膊頭度睇戲。
阿紫：咁樣大家咪暖ｄ囉。（阿紫，真係好溫柔，仲溫柔過我老母）
每次佢貼近埋黎果時，佢身體微微既香味都會變得有點濃郁，令你察覺到佢既存在。
咁親密既動作我真係頭一次遇上，
佢咁樣會唔會搞到我唔專心睇戲架。
睇戲過後，我地就去左就近既一個餐廳食飯，
食飯既時候，我地都不忙講下電影既情節，
同時，又講下我地。
我：阿紫，多謝你今日陪我過生日呀，
只要有你係度，我就會覺得好幸福啦。
阿紫：只要你鍾意，我每年都會同你慶祝生日架。
果一刻，我真係好相信阿紫呢句說話．．．．．
跟住，阿紫就將佢手上既紙袋送比我。
阿紫：阿樂，你生日我冇咩實質既野可以送比你，
但我整左ｄ曲奇餅，諗住比你試試我既手勢架。
我：咁仲好啦，我最鍾意食野呀麻。
其實只要有你陪住我，年年唔駛送禮物都可以架。
阿紫笑住咁講：傻佬，希望岩你口味啦。
我打開個盒，已經傳黎好一陣陣牛油曲奇既香味，
仲鋪左一ｄ朱古力碎添，有一個，仲係哈哈笑個樣黎－＞
我好開心咁講：可唔可以試下架。
阿紫點點頭，然後我就拎左一塊黎試，
估唔到又幾好食喎！唔會太硬。
我：你第一次整架？
阿紫：係呀，好唔好食呀？
我猛力咁點點頭，搞到阿紫都笑住話：嘻，最緊要你鍾意，我就心滿意足啦。
自此之後，阿紫都好鍾意整甜品比我嘗試（一黎佢鍾意整），
而我就成為左佢既御用食家啦。
食完野之後，我同阿紫，又再拖住手行。
阿紫：我地行多一陣先走好嗎？反正仲有時間麻。
我：冇所謂呀，但唔好太夜喎，
怕你返屋企危險呀。
阿紫：唔怕呀，而家有你呀麻，
你會保護我架可。
傻瓜，如果我可以，我呢一世都想保護你，
但我，究竟有冇呢個機會呢。
我點點頭，雖然稍稍過左晚飯時間，
但商場依然好多人。係唔同既人來來往往之中，
我只係注視住阿紫一個，有時都會靜左落黎，
係度諗：呢種感覺，真係會永永遠遠屬於我既？
回想返阿紫應承我當日，佢所考慮既野，係佢多餘，定係我天真？
一想到呢度，我就再緊緊捉實阿紫隻手。
我：阿紫，無論點或者發生咩事，我都會一直係你身邊。
（果一剎那，我就衝口而出了）
阿紫見我突然講ｄ咁深清既說話，
就面紅耳熱咁講：傻佬，無啦啦會發生咩事姐。
係你個病唔準有事就真呀。
我：我地考完試，暑假既時候，
我會將全部時間都比晒你架。
阿紫：哈哈，邊個話要你全部時間架，
我想要私人空間喎。
我：冇喎。
（我即刻痴埋去阿紫個身度）拿，而家痴實左你啦，
你想fing都fing唔甩lu。
阿紫：哈哈，傻佬，你真係好搞笑呀。
（見阿紫笑得咁開心，我就放心啦）
阿紫繼續話：阿樂，我真係覺得你好叻呀，
咁短時間內數學竟然有進步。
我：阿紫，多得你咋其實。
阿紫：點會呢？
我：因為我係以你作為動力去溫書，
雖然最終都係冇八字頭以上，
拎唔到份獎勵．．．．．．．．．．
阿紫停左腳步，同我講：阿樂，你好想要份獎勵咩？
佢突然咁講，我有點錯愕：想呀．．．
阿紫繼續講：咁．．．阿樂
你合埋對眼呀．．．．．
雖然我唔知佢點解要咁講，
但既然阿紫講到，於是我就合埋眼啦。
佢，究竟想做咩呢？
我緊閉雙眼，耐心咁等佢，
不過，等左五秒（阿紫未有指示既仲）
十秒．．（開始有點奇怪，冇理由咁耐架喎）
十五秒．．．（頂唔順啦！！）
我自己都等到有點唔耐煩，
於是，我睜開對眼。
因為我有散光，所焦點需要一點時間，
先會變返清晰。
不過．．．我個心嚇左一嚇。
咦！點解阿紫唔見左人既！？唔係比人拐左去呀！
我好緊張咁頭望望，都冇人，
再轉身望向後面．．．．
終於見到阿紫了，原來佢行左去我後面，
再退後多幾步。我見佢笑住咁掩住個口，
我就知道，完來係咁整估我。
我行埋去：阿紫，咁衰架你
整估人。
阿紫：哈哈，鬼叫你頭先整估我，
而家還返比你。
我真係有點失望，可能係我對阿紫過份認真吧。
阿紫見到我有ｄ唔開心。
阿紫：傻佬，你唔開心呀？
我令令頭：冇呀，點會呢．．
我地繼續行啦．．．．
阿紫捉一捉我隻手，
然後佢即刻．．．．．．
係我臉頰度．．．．．．
錫左一啖。
我見到佢咁，即刻面紅耳熱，
同時又呆左咁企係度，
我個腦，係個一刻，就好似停止轉動左咁。
頭先係．．阿紫佢錫我嗎？
阿紫亦都面紅紅咁：傻佬，比左獎勵你啦。
見你今日哄得我咁開心，
阿樂你係抵錫既。
我好不容易回過神來，係大庭廣眾咁樣．．．．
塊面真係紅到冇得再紅．．．
阿紫見到我咁，就：哈哈，阿樂，
你已經紅到就黎爆血管啦。
我：因為．．．（有點口齒不清）
因為．．．我冇咩心理準備呀麻．．．
阿紫就拖一拖我隻手，話：行啦，傻佬。
雖然九點幾十點，但畢竟有點夜，
我就話：我送你返屋企阿。
阿紫：你送我去車站得啦，
送埋我返屋企太夜啦，
又晒多程車錢。
阿紫咁講，我就照佢意思去做啦。
去到巴士站，我地就企係度等車．．．
今日，係有史以來，最開心既一日生日，
原來，有女朋友陪住既生日，真係會比自己一個過，
比同朋友一齊過，來得有點不同。
阿紫錫係我臉頰上果一啖，
到到去車站果剎那，好似仲尚存一點餘溫咁，
久久不散，我實在捨不得將這小小的印記，給抹去。
我果刻，
見阿紫好似有點凍，因為夜晚都有點大風，
我就輕輕咁用雙手，拉阿紫雙手埋黎我身邊，
我好溫柔咁，將阿紫那嬌小既身軀攬住，
慢慢，攬得好緊，好緊。
阿紫亦都好配合咁，攬住左我。
我，可以永永遠遠都咁樣攬住阿紫，都有阿紫呢個依靠嗎？
阿紫見我攬得咁緊，
就同我講：傻佬，我就黎比你攬到窒息啦。
佢咁講，我就輕輕鬆開：阿紫，多謝你．．．．．．
（果種感覺，即使係而家既我，都難以言喻）
阿紫望一望我，再摸左我個頭幾下：我有車啦。
快點返屋企啦知麻？
我：嗯嗯。
小心ｄ呀！
就係咁，我就目送阿紫上車，
上到車後，我依然望住車廂既阿紫，
佢都知我望住佢，我就比左個”打電話比我”既手勢比佢。
佢微笑住咁點點頭，同我揮手道別。
雖然阿紫走左，但佢身體既餘溫，佢身體既香氣，
仍然殘留下我衣襟上，
這種溫度，這種香味，如果可以歷久不衰，久不褪色，
你話幾好．．．？
星期日，我同阿紫都留返係屋企做功課。
而我，當然係一路食住佢ｄ曲奇，一路做啦。
做功課既時候，回想返尋晚既吻，尋晚既擁抱，
我用手掂一掂面上阿紫錫既果個位置，
個心，跳得依然有點快。
果刻，我突然想落去文具店買ｄ野。
於是我就走左落街，
去到文具鋪，睇左一陣，買左我想買既野之後。
我經過藥房時，
突然間諗起，阿欣佢係電話曾經講過，
話佢喉嚨有點唔舒服。
我就走入藥房，諗住買盒喉糖比阿欣。
我會出於好心買比佢，係因為佢而家喉嚨痛，
我都應該負返少少責任，畢竟佢都好落力咁教我。
買完之後，我就上返屋企，做埋ｄ功課佢。
第二日返學時，我順便帶埋盒喉糖，
睇下有冇機會比阿欣。
返到學校之後，因為有點早，
要做風紀麻，
同時覺得佢未必咁快返到黎。
守到時間差唔多打鐘集隊，我見呢個時候
應該差唔多返了吧。於是我就特登走去操場，
我四周圍望望佢集隊既位置，真係見到佢。
佢自己一個咁企左係度，我就行埋去，
同阿欣講：阿欣．．．（眼見佢面色仲有點蒼白，應該未完全痊癒吧）
阿欣仲係用帶點沙聲既聲音同我講：咦！？阿樂係你呀．．
做咩？
我：Er....
冇呀，我見你仲係唔係咁舒服．．
我．．買左盒喉糖比你，
希望你把聲會好ｄ，同快ｄ好返。
阿欣病既狀態下，亦不忘同我講笑：你係想我快ｄ好返，
繼續教你數學咋掛。
我：唔係．．如果我知你唔舒服．．
我就唔會叫你果日仲教我數，仲請你食雪糕。
對唔住呀。
阿欣見我咁講，一路望住盒喉糖，面上終於掛左一點笑容．．
阿欣：阿樂．．．．．
我：
阿欣佢第一次，好由衷好正經咁同我講：多謝你。
見佢咁樣，我倒有點唔慣，我就話：快ｄ好啦，
如果唔係你就唔可以繼續鬧我架啦！
說畢，我就轉身走左啦。
小息既時候，我尋晚預備左樣野，
諗住今日比阿紫的。
巴打，上一篇文講到我落左文具鋪買野，
但我冇提買左ｄ咩，其實我係買黎預備一樣野比阿紫。
我行埋去阿紫度。
我：阿紫（我將手上既野交比佢）
阿紫：信黎？（阿紫拎上手望左兩望）
我：係呀，我覺得，我地既愛情生活入面，
需要有ｄ野作為紀錄，以後我地咪可以
儲埋一疊，慢慢咁回味下囉。
阿紫見我呢個提議，
佢就話：不如我地每個星期寫一封情信比大家交換，
將一個星期發生既野，特別既事情，都寫入去，
咁大家咪可以了解大家多ｄ囉。
見阿紫咁講，我都好開心，因為我原本既意願都係咁。
我就好快咁應承：好呀，第時我地儲起晒佢，
可以拎個箱入左佢添。
大家仲記唔記得，我話有兩樣野幫我去寫呢個故事？
一就係日記，第二，就係呢樣－情信。
每一段愛情，如果唔好好紀錄，將來想搵返果種感覺都好難，
果時，我邊買得起相機，手提電話邊好似而家咁方便，
拎起就影。所以，我地就用一個傳統既方法去紀錄。
到現在為止，我始終覺得，日記同書信係最好既紀錄方式。
我：不如落去行下囉。
阿紫：好呀。
我同阿紫就落一落去操場行．．．
我：阿紫，你ｄ曲奇好好食呀，
果日我一路做功課，一路食，好快就食晒啦。
阿紫：係呀，咁下次我整蛋糕比你食呀，好唔好呀？
我：好呀，咁咪好麻煩你？
阿紫：傻佬，我地可以一齊整架麻。
（情侶之間一齊整野食，真係好大樂趣）
講完之後，阿紫拎左盒睇戲果時買既利口樂出黎，
食左一粒。
阿紫：食唔食呀？
我點點頭，就從佢手上拎左一粒黎食。
點知．．．．．有個不速之客黎緊
見到amy走緊埋黎，原來佢都係落操場買野食，
唔怪得一小息就唔見左人。
Ａｍｙ：阿樂阿紫，你地落黎買野食呀。
阿紫：唔係呀，諗住落黎行下咋麻。
Ａｍｙ：哈！有冇咁痴纏呀你地，
成日糖痴豆咁。
我：點呀，Amy
係咪你而家既生活太ｄｒｙ，
所以唔抵得我先。
Ａｍｙ：痴線既你都，
唔抵得你咪即係等於侮辱左自己！
我先唔會呀！
阿紫：就黎期末考試啦，
Ａｍｙ你開始溫書未呀？
時間表都派左啦喎，六月中考。
Ａｍｙ：哈哈，阿紫，我呢ｄ邊會係
一ｄ未雨綢繆既人黎呀。
唔到考果日前一晚我都唔會既。
我：哈，說話又唔係咁講呀，
好心你明知自己蠢，就唔好咁懶呀麻。
Ａｍｙ：死阿樂你以為你成績叻好勁呀！
你數學咪又係輸比我！（佢係惟一得一科數學勁過我）
點呀！駛唔駛姐姐過返兩招比你呀！
我：唔駛啦，我有阿紫教我得啦！
阿紫：哈哈，我邊度得呀，
而家要你教返我就真。
係呢度出完之後，劇情會飛快少少，
愈近考試既時間，我同阿紫都唔會有ｄ咩
特別事發生，因為我地都講好左，讀書第一，
留返暑假既時間先慢慢再一齊享受我地既二人世界。
至於我同阿欣，大家都知道，
每個星期係見一次，所以，我地都係得返幾個星期
時間有見面既機會，其後就係考試同放暑假。
所以，係呢個星期四，
阿欣照如常幫我補課。
阿欣：阿樂，你數學進步左喎！
算你知機啦，
雖然之前份測驗岩唔到九成，
不過以你既智商，岩七成都好唔差架啦！
我：食啦你！我好比心機溫架！
頂！一好返就即刻串串共咁，
買喉糖比你都晒錢既。
阿欣變返正經咁講：阿樂，
其實我好多謝你盒喉糖。
佢拎一拎出黎，話：你睇下，我仲未食晒架。
我：咁你留返下次病慢慢食啦！
仲有唔好用呢ｄ語氣同我講野，
我好唔慣！
阿欣：多事啦你！我語氣邊有變到姐！
你係咪撞聾呀！！
不過，估唔到你條友仔，
傻頭傻腦咁，都幾細心架喎！
我：你咁係讚緊我？（屌！佢會讚我我要買六合彩啦真係要）
阿欣：超！讚你一句就鬆毛鬆翼，叻唔切咁。
收返啦而家！
我：話時話，
點解你成日都好似，自己一個咁？
阿欣：點解你咁八掛架煩人！
我：出於好心姐（講真，冇特別意思，我係鍾意關心人果類人黎）
阿欣：以後我地都唔會見面多幾多次架啦，
考試完都放暑假。我冇必要咩都同你講姐下話！
仲有呀！你唔駛旨意考試前搵我呀，
我自己都要溫書喎！
我：咁可以補多幾多次？
阿欣：唔知呀，我諗兩次倒啦！
做咩呀？唔捨得呀！
我：發夢啦你！
我睇下可以點係呢兩次見面用盡你咋！
阿欣：死ｃｈｅａｐ精！
未見過男仔好似你咁ｃｈｅａｐ架！
我：你都幾雙重標準架喎，
頭先讚我，而家又彈我！
你係咪更年期呀！
阿欣即刻拎本書打一打我：你就更年期呀死ｃｈｅａｐ精！
我走啦，係咁啦！
其實，我同阿欣既關係，就好似比較closed既朋友一樣。
我，之所以會對佢有點興趣，唔係因為我鍾意佢，
而係因為，我覺得，佢係呢間學校讀，係唔開心．．．
同我之前對呢間學校既感覺一樣，
但無奈我唔可以問到佢任何野，因為佢有時實在太封閉自己．．．．