有一晚一個來電: 初戀下的天空(上)
10分鐘過後，溫習時間已經完畢。
阿欣：喂！阿樂！唔好偷雞喎！
十分鐘過左去好耐啦！快ｄ收埋本書佢！！
我：下，唔好啦，比我睇多陣啦！
阿欣：睇你個死人頭呀！快ｄ！！
我：知啦知啦．．．．
之後，阿欣就即刻搵張紙，即興咁出左幾題比我．．
我心諗：頂！我仲以為佢出書ｄ題目添，搞到我
睇熟晒點做．．．
阿欣：拿！出完啦！快ｄ做，我比１０分鐘你！
做晒呢三題佢。
我：下．．我驚唔夠呀．．
阿欣：咩唔夠呀？嫌出得太少呀？再加多五條比你囉咁！
我：唔係唔係，我係指時間唔夠．．．．
阿欣：冇呀！１０分鐘就１０分鐘！做唔晒你就知死！而家開始計緊架啦！
（佢真係好狗，開始計時都唔同人講聲先）
咁我都唔同佢講咁多，拿拿林做啦．．
頂，ｄ題目咁鬼難既！
我死死氣做完三題，跟住戰戰兢兢咁遞比佢．．
佢一手接過，然後就即刻開始改。
阿欣：阿樂！你究竟有冇溫書架係復活節．．．
雖然你識得調過去除啦而家，
但有ｄ可以約簡你又冇約，有ｄ可以抽出黎你又唔抽！
你係咪當我講既野耳邊風先！
我見狀不妙，拿拿聲講：對唔住呀，我已經盡左力啦．．
復活節我冇溫過書呀，因為過得好唔開心．．．
阿欣聽我咁講，佢話：中一仔會有咩唔開心呀？
你昆我唔識野呀？
藉口佬！
個刻，我冇出聲，反正都唔知講咩好，我又冇理由講我ｄ野出黎．．
阿欣見我咁，佢話：唉，怕左你啦怕左你啦！
死老豆咁既樣！
今次就算啦，下次再咁差我話比你阿媽知架啦！
好彩都冇事，我總算開心返一點，佢都叫識見人於微呀。
阿欣：快打開本書講我知教到邊！
我：哦，教到．．．．
（講緊既途中，我因為口渴，所以拎左盒頭先未入黎補課前，
係小食部買既朱古力奶，諗住飲．．）
點知．．．阿欣：再死你呀！係課室飲野！
（然後佢一手搶左去．．．．）
我：我好口渴呀．．．
阿欣望望我盒野，話：仲細咩你，中一仲飲奶！
冇呀！沒收呀！
然後佢就拆開支飲管，拮左黎飲．．
我：搞錯呀！搶人地支野飲！
阿欣：係咪當請我都唔得先，我免費教你數學都算唔話得啦！
有ｄ人想我教我都唔肯呀！你識咩呀！飲你果少少野就嘈嘈嘈！
你要飲呀，比返你囉！
我：你都飲過啦．．．唔要啦！
阿欣：車，懶純情咁！拿拿聲啦！
因為頭先小測用左ｄ時間，溫多40分鐘到就落堂。
阿欣：好啦！今日到呢度！
其實一開頭我都冇點仔細留意阿欣，
我見做完野有時間就望望佢．．
我：你唔熱架咩？大拿拿夏天仲著住件冷衫．．
阿欣：呀！你個人真係八掛架喎！
我著唔著冷衫駛問過你咩！咸濕佬！．．
（果刻我真係唔明點解著冷衫，雖然後期我明白女仔係拎黎遮身材）
我：痴線架你都！又無啦啦話人！
唔同你講啦，我走啦！
阿欣：走啦，咸濕佬！下星期見！
然後，我就落返去，經小食部走出校門，
我行緊既時候．．．有人從後拍我膊頭．．．．．
補完左數學之後，當我想走出校門時，有人從後拍拍我膊頭。
我望向後面，原來係阿紫黎．．．．
估唔到佢咁耐仲未走。
我見佢仲係度，就話：咦？阿紫，仲未走既你？
阿紫：係呀．．．Um...
其實我特登等你架．．（阿紫又開始吞吞吐吐）
但你比我想像中遲左，我幾驚以為你已經走左啦．．
我：唔好意思呀，我頭先因為有個小測，所以教野果度
可能就唔到時間，所以先遲左走。
下次你要搵我預先同我講咪得囉，唔駛等得咁辛苦呀麻。
阿紫：冇所謂啦，反正我有時間．．
我：係呢，咁你搵我咩事？
阿紫：Er...你聽日放左學有冇時間？
我：聽日．．．冇問題呀，
做咩？
阿紫：冇，我想約一約你咋麻．．
我：約我去邊？
阿紫：聽日你就知架啦，咁我走先啦，
約實架啦！拜拜！
估唔到，佢等我個幾鐘頭，就係為左講呢番說話，
想問我聽日有冇約，然後就走左．．
其實有咩打比我講咪得囉．．．
不過，我諗諗下，阿紫咁做都唔係冇原因既，
畢竟佢可能覺得而家我地既關係仲有點尷尬，
當面講好ｄ掛。
當時我心入面真係好想同阿紫講：阿紫，你究竟係度諗緊咩野？
望住阿紫走出校門，我真係有股衝動想拉住佢，唔想佢走，
當面問佢：你究竟考慮成點．．．．
但我真係冇呢個勇氣，同時我又唔想迫佢，
費事嚇親阿紫，令到大家既關係惡化落去。
我呆左咁企係度諗野，腳步原來仲未郁過。
正當我想走之際，見到有個熟悉既身影係後樓梯落黎．．．．
當我望清楚d之後，我更加想走，於是就加快腳步當睇唔到佢，
點知．．．．
阿欣：喂！阿樂！
作死你呀！做咩見到我就急急腳咁走呀？
而家我好失禮你咩？
我：下，唔係呀．．．
我冇見到你呀，咁岩走之麻。（屌！呢個時候梗係兜得就兜啦）
阿欣：扮晒野咁，一睇就知你講大話啦！
大話都唔識講又要學人講，懶叻咁！
我：你自己一個走既？
阿欣：係呀！你知唔知點解呀？
我：點解呀，欣姐。
阿欣：頂！都叫你唔好咁叫我！（跟手一下拍左落黎）
我得返一個人走都係因為你咋！（同時瞪一瞪對大眼望實我）
我：下，因為我？你唔好屈得就屈喎！
阿欣：如果唔係你個蠢人要我幫你補習，
我就唔駛咁晏走啦！仲好意思話我屈你！
我：咁都係一日半日姐！
阿欣：一日半日唔當係呀！？
你都走架啦下話，拿拿聲行啦！仲企係度做咩！
貪學校香咩！（好似係你叫停左我同我吹水先架喎）
我：哦．．．．
當我地走出校門時，我心入面不斷詛咒佢：行上邊啦，我唔想同你同路呀！
點知．．．．頂！原來佢都係行落去！
我：唉．．
阿欣：唉咩呀！？
我：原來你都係行下邊架？
阿欣：擺明啦！係咪唔得呀？
哦！我知啦！頭先你唉左聲，好明顯你係以為我行上面架啦！
（頂，咁你都知我諗咩．．．）
我：下，我冇呀．．
阿欣：車！既然你唔想我同你一齊行，咪早響囉！
我而家就行快ｄ！拜拜啦！
（就係咁，阿欣就急步行快左．．．
我見佢咁，反而仲好，唔駛比佢一路煩到我去答車）
佢行快左好幾步之後，轉身望住我。
阿欣：我真係未見過人好似你咁cheap架喎！
估唔到你真係會唔理一個靚女！
我聽到佢咁講，即刻話：你都痴線既！
邊度有靚女呀？我睇唔到喎！
跟住佢就等我行到佢度，佢先繼續行。
我：你唔係話走架咩？
阿欣：我諗過啦！唔想咁便宜你！
既然你唔想同我行，我就偏偏要呀！吹咩！
於是，我地就一路行，一路傾計。
我：唉，好心你平時唔好咁惡啦！
你咁樣做人都唔開心啦！成日得罪人。
阿欣：車！關你鬼事咩！
女仔就唔惡得呀？
我：咁抵你一世冇男仔鍾意！
阿欣：邊個話冇呀！不知幾多呀，係我唔受咋麻！
我：係呀係呀係呀．．．．
阿欣：死靚仔，敷衍我呀！
未見過ｄform1仔好似你咁架！
我：彼此彼此啦！
阿欣：車！唔講啦，我行果邊呀！
我：好啦，下次記得準時呀！！成日遲到！
佢回頭對住我做左個鬼臉，之後就走左．．．
雖然佢人就係惡ｄ，但係佢本質應該唔壞既．．．
究竟．．聽日阿紫想約我去邊呢．．．
由於無咩特別事發生，所以情節只好直接跳到放學．．．
因為係星期五既關係，好多同學一放學就即刻急急腳走左，
學校亦顯得比較冷清，操場上已經冇晒平日放學所充斥住既喧鬧聲。
阿力走過黎問一問我：阿樂，而家有咩做呀？有同學想話去網吧打機喎？
你去唔去？
我搖搖頭：唔啦，今日有約，下次先啦！
阿力又問：邊個約你咁爽呀？
我向阿力打左個眼色，而佢都知道我講邊個：咁好啦阿樂，今次放過你先啦！
我走先啦，拜拜！
同阿力道別後，我亦都開始執拾書包。
我執緊書包既同時，阿紫亦都回頭望一望我。
阿紫：阿樂，你會唔會好嬲我？
我：嬲你咩野．．？
阿紫：嬲我當日拒絕左你．．．．（阿紫愈講愈細聲）
我：嬲就冇咩．．．
不過．．我真係好唔開心．．
我繼續好老實咁講：阿紫，你係我第一個鍾意既女仔．．
我果刻真係好想同你一齊，先向你表白．．．
點知．．．
阿紫聽完我咁講，面紅紅咁細聲講：快ｄ執野啦傻佬。
執完野後，我同阿紫亦雙雙，步出校園。
我：係呢，我地要去邊？
阿紫：阿樂，仲記唔記得我地情人節去左邊？
（因為行斜路既關係，行前左我少少既阿紫，回頭望住我講）
我微一微笑：點會唔記得呢，公園呀麻。
阿紫：咁我地去囉。
行左好一陣，去到公園時，感覺上．．同上次情人節我同阿紫既情景差唔多。
同樣地有公公婆婆坐係度休憩，
同樣地有耀眼而渾黃既夕陽，
同樣地去返上次一齊坐既石凳，
同樣地有阿紫，陪住我。
果時既感覺，真係幾特別，
感覺上，就好似時間回溯一樣，
我地坐底左之後，
阿紫拉開拉鏈，係袋度拎左樣野出黎。
我仔細睇左一睇，原來係我送比佢既westlifeCD黎。
我問：做咩帶返返黎既？
阿紫：因為，我真係好鍾意聽呢隻碟。
我笑笑口：最緊要你鍾意就得啦。
阿紫：不如我地而家聽囉。
我：下，我冇帶Discman喎。
阿紫會心微一微笑：我有呀麻。
於是，阿紫就拎部Discman出黎，放左隻cd入去。
我地，一個人耳邊，用一個耳塞。
果刻，我同阿紫既距離好似又靠近返少少．．
阿紫佢，仲係有一種熟悉既體香（唔好話我變態）
阿紫將歌轉到果首．．
冇錯，就係我同阿紫都好鍾意聽既一首：Mylove
我地聽果時，大家都冇出聲，
靜靜咁享受呢首歌既旋律，
靜靜咁享受呢首歌既歌詞，
靜靜咁享受呢首歌對我地既意義。
歌曲播緊既同時，
我亦都好自然咁諗返起，
我地相識以黎果半年多既日子，
真係好開心．．．．
所以話，回憶永遠都係看似美好，
起碼你可以去選擇只係回憶甜蜜既片段。
但係，這種回憶，亦只是僅僅一首歌既時間。
即使我充滿幾多幻想都好，
歌一播完，我又要回到現實，
無論幾咁感觸都好，我都要面對返。
係呢個時候，阿紫亦出返聲。
阿紫：阿樂，之前我係咪話要考慮一下既．．
我已經．．考慮得好清楚．．．
突如其來既一切，令我再次無所適從，
我唔想第一次表白就比人拒絕兩次．．．．
我果刻個心雖然真係好緊張．．
但係我都盡量以平常心面對，
唔期望太多，因為，我覺得自己根本冇機會。
究竟．．呢隻cd，佢係會物歸原主，定係自己保留返？
我果刻完全唔敢直視阿紫。
因為我實在冇勇氣去望住佢雙眼，
聽佢講佢既答案。
於是，我一直dup低頭望住盒cd，同時捉得更緊。
阿紫：阿樂．．．
我鍾意你．．．
講完之後，阿紫就挨住左我膊頭。
我聽到阿紫既答案之後，心臟就好似有十萬分之一毫秒停頓左咁，
我意識過來時，完完全全地，唔識反應．．．
阿紫，頭先係咪講鍾意我？？
果一刻．．我再想確認一次．．．
因為我真係怕我聽錯．．
我：阿紫．．你頭先．．．講咩話？
阿紫：咁衰架你．．
我話．．我鍾意你。
我：咁即係．．
咁即係．．我地可以一齊？
阿紫面紅紅咁點點頭。
直至呢一剎那，我個心先完完全全咁放下，
我簡直感動到不得了，估唔到阿紫會接受我．．
不過，我仲有一個疑問．．
我：阿紫，咁點解你生日果日會拒絕我？
呢條問題好似刺中左阿紫要害咁，
佢停頓左一陣，先答我。
阿紫：其實，我屋企人係反對我而家拍拖。
萬一比佢地知道．．．
就可能會搞到唔開心收場．．
我：點解要反對既？因為要好好讀書？
阿紫：唔係．．．
係因為．．．
我：係因為咩？？
阿紫：係因為屋企人唔會接受佢地認為唔適合既男仔．．．．
（阿紫講到呢度，好明顯語氣低沉左好多，
我果刻完全未意識到阿紫呢番說話，未意識到阿紫係用左
幾大勇氣去考慮同我一齊）
我果刻，仲好天真咁話：哈哈，話唔定到時相處落，
佢地會覺得我好呢？
阿紫對住我呢番說話，不禁苦苦地微笑．．
因為，佢自己知道，佢地父母，並唔係想要呢ｄ．．
我見阿紫咁，我就話：咁我地唔好比佢地知咪得囉。
咩事情都解決啦！
阿紫好開心咁，點點頭，然後繼續挨落我個膊頭，
佢，漸漸咁，將身體既重量，都卸晒落我膊頭身上．．
阿紫，要你作呢個決定，應該好辛苦吧．．．
於是，我就同阿紫講：不如再聽多次，然後就走囉。
阿紫：好呀。
就係咁，今日雖然同情人節果日好想似，
阿紫佢，又係好似當日咁，挨住係我膊頭。
但惟一唔同既係，我地既身分，終於由好朋友，變成了情侶。
我同阿紫各自走左之後，
我個心依然仲係好興奮，頭先就好似發左場夢咁。
當然，我同阿紫既愛情，都係好似發左場夢咁，始終會有醒過來既一日。
呢一日，我果時真係唔知係幾時．．．
但係，我同阿紫都好開心咁過住每一天。
我慢慢咁行路返屋企，我已經忍唔住，
開始憧憬住，我同阿紫既愛情究竟係點。
愛情，又係ｄ咩野．．．
係中一完全未接觸過既我，
完全唔知道，我地身為情侶之後，
有ｄ咩可以做，同應該要做ｄ咩。
每第一次做既時候，心入面都會有果種
驚心動魄，驚濤駭浪既心情同心跳。
這，正正是人們所謂既「青澀之愛」。
遺憾既係，人愈大，呢份感覺就愈流失得快。
返到家之後，食完飯無耐，
阿紫就打黎。
阿紫：傻佬，做緊咩呀？
我：冇呀，岩岩食完飯咋，你呢？
阿紫：我都係呀。
阿樂．．
我：做咩？
阿紫：能夠識到你真係好．．．
我：哈哈，傻瓜黎。
大家都係咁需要大家架啦，
我地以後只要能好好相處，我就滿足架啦。
阿紫：嘻嘻，放心啦阿樂，我會好好珍惜你架！
係喎，你就黎生日啦喎。
我：係呀，咁你想送咩禮物比我同埋點同我慶祝呀？
阿紫：邊個話會送禮物比你姐，
而家有我咪已經係最好既禮物囉！
我：咁矛既你，
不過呢份禮物，真係我咁多年以黎最開心。
阿紫繼續話：咁你要好好睇實啦，
如果唔係飛走左就冇架啦。
我：我會好好捉實你，唔比你走架。
阿紫：阿樂你既生日，只係我地兩個慶祝好嗎？
我：點解唔叫埋阿力ａｍｙ佢地既，多ｄ人唔係開心ｄ咩？
阿紫：咁我地而家已經係情侶呀麻，
我想過ｄ二人世界呀。
（哦，原來阿紫係想多ｄ時間大家獨處）
我：好啦好啦，破例比次機會你啦。
阿紫：車！應該係掉返轉先岩呀！
我：咁我差唔多沖涼啦，阿媽催我．．
阿紫：好啦，咁快去ｄ沖啦，我唔阻你啦。
我：好啦，早抖．．．
阿紫：咪住！你差ｄ野未講喎．．
我：差ｄ咩？
阿紫：唔知呢．．（阿紫講得好含蓄）
我真係唔知．．但係我果刻憑真心咁講：阿紫，我真係好鍾意你。
阿紫甜甜咁講：哈哈，好骨痺呀。
好啦，快ｄ沖啦。
我：唔，拜拜！
我同阿紫相戀既七百三十天，就由聽日開始。
星期五過後既果個週末，我都未咁快同阿紫過二人世界住。
因為．．．．．．．．．．．仲有好多功課要做
不過來日方長，太急進反而唔好麻。
而家我同阿紫既關係都改變左，令到我對返學更加有衝勁！
星期一返到學校既時候，因為太熱，
我就諗住就去小食部買盒凍朱古力奶飲，（就黎糖尿病）
點知．．．．心諗：唉．．唔係呀麻．．．
阿欣：喂！阿樂！今次又扮見唔到我啦！
我：下，唔係呀，我睇緊有咩好食咋麻．．．
（唉，晨中流流就咁黑仔）
我同個小食部老闆講：唔該要盒凍朱古力奶呀。
阿欣又搭嘴：又飲奶！？
中一啦你都，仲未戒奶咩！
我：阿姐，我飲咩又關你事既。
阿欣：哎呀！識得反駁啦而家！
我：都係跟得你多姐！
果刻，阿欣即刻拎住包彩虹糖，同個老闆講：入佢數呀唔該！
然後就走左去。
我反應都反應唔切，冇理由佢拎走左我又唔比錢架，
惟有死死氣就範。頂！次次見到佢都冇好野架！
然後我諗諗下都真係唔忿氣，
次次比佢咁恰法都唔撚係路，
於是就追出去。
我：喂！野食你就食左啦，快ｄ比返錢！
阿欣：阿樂，你唔係一包彩虹糖都同我計呀麻。（佢裝出一副扮可憐既樣子）
我：好人好姐我就無所謂既，
但你平時對我咁惡，我唔想請喎！
上次你飲左我盒奶我都未計呀！
阿欣：車！我有話比返你架，係你自己死蠢唔要咋麻！
我：真係未見過人好似你咁無賴架喎！
你唔係話好多男仔追架咩，你叫佢地請你咪得囉！
阿欣：我唔鍾意呀！佢地請我就要受架啦！
係呢個時候，我亦見到阿紫返黎．．．．．．．
見到阿紫可愛既樣，我啖氣都即刻消晒。
同時我都費事同佢嘈．．．
我：唉，算啦！費事同你糾纏啦，拜拜。
然後我就行上前去阿紫度。
阿欣：喂．．．（可能佢覺得我無啦啦走左好無癮同好突然，
所以想叫停我問我咩事，但我都懶理）
我去左阿紫度之後。
我：阿紫，咁早返既。
阿紫細細聲係我耳邊講：掛住你咪早ｄ返黎見你囉傻佬。
我：哈哈，咁岩既，我又係咁諗喎！掛到訓唔著就早返左黎啦。
阿紫：係咩（阿紫用好懷疑既眼神望住我）
頭先我見到你同個女仔好似幾好傾咁喎，
邊個黎架？（語氣帶點醋意）
我：唔係囉！一ｄ都唔好傾呀！
佢就係幫我補數學果個姐姐囉，
佢好惡架！同你比差好遠！
阿紫：下，真係睇唔出喎，
佢個樣幾靚，好難同惡拉上關係．．
我：你有所不知啦，佢個樣同佢性格係唔對稱架．．．
阿紫：哈哈，傻佬黎既，
我地快ｄ去集隊啦！
我：咪住，阿紫，我買左盒朱古力奶比你飲呀（因為比阿欣搞到我冇晒心情飲，惟有比阿紫）
你行路返學都熱架啦，請你飲啦！
阿紫：多謝你呀阿樂，抵錫。
集完隊之後，就係兩堂連堂數學。
MissChan：好啦，今日我會教完呢個chapter既書。
然後會係星期四上數學堂時測驗，大家有個心理準備，
好好用呢幾日既時間溫書啦，知麻！
我心諗：唉，唔係呀．．．星期四測，咁我咪冇機會叫阿欣教埋先測！？
比misschan知道我數學成績仲係咁差實死架喎........
果一刻我真係唔知點算...
Misschan：特別係你呀阿樂！你知架啦，我會好好觀察住你ｄ成績架。
（唉，miss咁樣擺明迫我測好d姐...)
見仲有兩日時間，我打算聽日搵阿紫陪我係圖書館溫書，
我諗有兩個人一齊溫，應該會好過得我自己一個掛．．．．
由細到大我都唔知點解數學觸覺一直都好差，
可能老師教我既數學方法唔岩適合我掛，
MissChan講完話要小測後，我當晚都有拎本書黎睇下，
但發覺．．．．．自己睇真係點睇都唔撚明，
又唔知點做。心諗：唉！惟有聽日同阿紫去圖書館先算．．．
翌日朝早，我返到課室，趁見到有時間既時候，
我問：阿紫，你今日放學得唔得閒？
阿紫：得呀，做咩呀？
我：冇呀，見就黎要數學小測，
我想同你放左學一齊係圖書館溫書咋麻．．．
有你陪住應該會有動力ｄ．．
阿紫：嘻，係咩？見你咁需要我，我就成全你啦！
不過可能溫一個鐘倒就要走啦喎。
我：嗯，冇問題。
食飯既時候，阿紫就例牌將個飯盒拎過黎向住我一齊食。
Amy：阿樂，你就黎生日，阿紫有冇話想同你點過呀？
我：唔知喎，你問阿紫啦．．．
阿紫見我拋個波比佢，就話：未諗到架，
睇佢乖唔乖先囉，
聽話咪同佢慶祝。
Amy：哈哈，真係唔話你地兩個似情侶都唔得。
成日係度唱雙簧。
我同阿紫見到Amy咁講，大家都笑左一笑，
心裡面都有個答案：其實我地已經係情侶啦。
不過，大家都唔想將件事咁揚，
所以只好保密先．．．
阿紫：Amy呀，你可唔可以遲ｄ陪我一齊揀禮物
比阿樂呀？有你一齊幫下眼都好呀麻。
見阿紫咁講，我：哈哈，阿紫，你會唔會搵錯人呀，
Amy既眼光邊度可信架．．
Amy：行開啦你！我ｄ品味不知幾好呀，
有我幫眼你執度啦！
阿紫，你出去時就約我啦，我幾時都得既。
我：咁Amy你順便買多份當係你自己送比我架啦！
Amy：發夢啦你！
食完飯後，我照舊拎藥出黎食．．
當我想拆開藥包時，
阿紫話：哎，阿樂！等我幫你呀。
於是，阿紫就一包一包咁，一路望住藥包上個label，
一路跟住咁拎相應份量既藥出黎．．
我咁大個人，都未比女仔接觸過我ｄ藥．．．
阿紫拎完ｄ藥之後，就放係紙巾上面，等ｄ藥唔好掂到台面整污糟．．．
Amy見到咁：阿樂，你駛唔駛等阿紫餵埋呀．．
阿紫見Amy咁講，即刻係用手拎左一粒藥丸，放響我個咀面前．．．
對住我講：呀．．．．．（示意叫我張開口）
我見咁樣，實在太難為情，於是我就拎返阿紫手上粒藥丸自己食返．．
畢竟如果真係做既話，實在會有太多人望．．．
食完藥後，好快就過埋lunch後果幾堂，到放學了．．．
放學後，我地執好書包，就同阿紫一齊去圖書館。
果時我冇咩睇書既習慣，所以中一真係極少數入圖書館，
估唔到，我都會為左數學，認認真真咁溫一次書。
我阿紫揀好位坐低左之後，就開始溫書啦。
不過，溫書進度依然係非常緩慢，
因為我真係唔識點做．．於是，
我：阿紫，你識唔識做呢條呀？
阿紫見我問書ｄ題目，自己就做下．．．
雖然係慢左ｄ，但阿紫最終都做到個答案。
我見阿紫做到，即刻細細聲講：阿紫，你好叻呀，
快ｄ教我點做啦。
然後，阿紫亦都細細聲咁教我，畢竟係圖書館，
講野太大聲會比人趕走．．．
如是者，果短短一個鐘頭，
我就不斷咁，問阿紫，呢條點做，果條點做。
雖然佢唔係條條都識，但都好盡力咁教我。
阿紫見我又問數，就細細力"dook"左我個頭一下，
同我講：傻佬，你上堂究竟有冇聽書架。
面對住阿紫呢個提問，我真係唔知點答好。
溫溫下書既途中，我有時都會好自然比阿紫分左心，
好唔集中咁．．．間唔中要望一望佢先肯專心返ｄ溫書。
阿紫見我咁唔專心，都會"dook"下我個頭。
（所以話，我真係唔明，點解人地去自修室溫書會帶埋
自己條女去溫，咁點樣集中精神溫書？一陣你又搞下佢，佢又搞下你咁）
以前溫書，我覺得係一種相當乏味既過程。
而家，有阿紫陪住，連枯燥既事情都會變得生動起黎。
所以，時間亦過得相當之快。
轉眼間，一個鐘頭過左去，阿紫都要走。
而我就同佢講：阿紫，我仲想溫多陣，你返屋企先啦好嗎？
阿紫：好啦，咁我走先啦。（跟手摸左我個頭幾下就走）
不過，得返我自己一個溫時，就變得苦惱起黎．．
岩岩阿紫教完我既題目，我做第二ｄ時又唔識做啦．．
唉！我心諗咁唔係辦法，我實在好驚呢科炒，
於是我做左一個舉動。
我落左去教員室，睇下misschan係唔係度，
好彩！佢仲末走．．
於是我就叫misschan出黎。
MissChan：咦，阿樂，仲未走既你？
我：係呀，我係圖書館溫數學咋麻。
MissChan見我呢個舉動，都讚一讚我：阿樂，你真係好勤力喎，
咁令我更加期待你既成績啦。
我見MissChan咁講，我心入面仲驚，因為我真係唔識．．
我：MissChan，我想問阿欣係讀咩班架？
MissChan：做咩咁問？
我：冇呀，我見星期四就測驗，我想聽日去搵一搵佢，
順便叫佢教一教我咋麻。
MissChan見我係有原因先問，都好樂意答我：佢係讀3X班既。
MissChan繼續話：係呢，比阿欣補左幾個星期，
你覺得佢教成點呀？
我果刻除左覺得佢惡之外，真係唔知佢教成點．．
咁我無理由係Miss前咁講，
於是我就話：都可以呀，起碼佢教完我都叫識做既。
MissChan：咁就好啦，咁我就放心比佢繼續教你。
（一聽到咁，我即刻意識到我頭先講錯野．．
我真係唔想繼續比佢教．．）
我：咁我要補到幾時架？
MissChan：唔知架，睇下成績點先算啦。
有個人免費幫你補下習唔好咩？
我：唔係．．．（其實又唔係話真係唔好，
只係如果佢可以溫柔少少同正常少少就Perfect)
MissChan：雖然佢係有點惡，我亦都可以理解佢點解會咁，
但係佢本質唔壞架，放心啦阿樂。
比MissChan咁講一講，我真係唔明．．
惡都會有原因？
於是，我搵完MissChan都執書包返屋企，
問左阿欣係咩班之後，
聽日放學我就即刻去搵佢。
今日係圖書館溫左咁耐書，成個人都好攰。
因為不斷係度做數，可能用腦諗野諗得太多，
搞到個人有點頭暈。雖然係咁，但我夜晚都照平常咁搵一搵阿紫先訓。
我：阿紫，你數學溫成點呀？
阿紫：嗯．．一般啦，
有ｄ題目諗極都諗唔倒答案。
我：對唔住呀，我數學咁差，
一ｄ都幫唔到手，反而仲要你教返我添。
阿紫：傻啦，阿樂。
你成績犀利過我好多架，
每個人梗有強項同弱項架啦。
我知道你數學一定可以有進步架。
我：今日有你陪我溫書就好ｄ囉，
平時得我自己溫真係完全溫唔入腦呀。
阿紫：係咩，點解我感覺到有人成日好唔專心咁望住我既？
（阿紫語氣亦變得鬼馬起黎）
我：哈哈，一定唔會係我，
肯定係其他男仔見你太可愛先係咁望你。
阿紫：嘻嘻，傻佬，咁你就有得我比人望啦喎。
我：呀，係呀，我今日去搵左misschan。
我諗住聽日去搵阿欣請教下佢數學，
我唔想一陣出黎成績差又比miss話呀．．．
阿紫：阿欣？？
我：佢就係幫我補數果位惡女仔囉。
阿紫：哦，咁阿樂你要加油啦，
如果你測得好既話，我係生日比份獎勵你啦。
我：咁點先算好先？
阿紫：嗯．．．８０分以上啦。
我猶一猶豫．．８０分．．我究竟得唔得呢．．
唔理咁多啦，為左阿紫，我一定要測好ｄ！！
因為我怕放學先黎搵佢，佢已經走左。
於是，我就走出班房，上兩層樓去中三果層啦。
平時我無啦啦都唔會走上去，今次第一次上難免會有點緊張，
畢竟係我身邊上上落落既同學都唔係同級，而係大過我既人，
有ｄ人既眼神都帶點奇異既目光望住我，實在有點唔自然。
我走到屬於阿欣既班房，我望一望入面睇下見唔見到阿欣既身影。
而班房都有唔少人望住我，咁我有求於人，惟有頂硬上問啦：
我：唔該阿欣係唔係度？（我好大聲咁講）
果時全部人既活動都停止左，（我係咪太大聲）
跟住就有個人行出黎啦，
係阿欣黎。
阿欣見到我好驚訝咁同我講：作死你呀，咁大聲！
仲以為邊個叫我！估唔到係你！
點呀，搵我咩事呀！！
我：Er...你..今日得唔得閒呀？
阿欣：做咩呀？想約我呀？
我full-booking啦喎！
我：唔係呀，因為我聽日數學小測，
所以我想搵你今日放學幫我補數呀．．．
阿欣：哦！原來係有目的先黎搵我既．．
唔怪得你會上黎啦．．車！咁市儈架你．．
我：唔該你幫下我啦，我今次測得唔好會死架．．
阿欣：點解我要幫你先？我有咩得著？（頂，你都係咁市儈姐）
我：我請左你飲左盒奶同埋彩虹糖囉．．．
阿欣：車！得過少少野就想我幫，
好難呀！幫你都得，但你遲ｄ要還個人情比我！
我：咩人情呀？
阿欣：未諗到喎！諗到先話你知啦！
我：頂，是但啦！咁你放左學落黎我班房門口等好嗎？
阿欣：得啦！煩人！（然後佢就走返入去）
唉，鬼叫我數學差咩．．
而家搵佢幫手又要爭佢一個人情．．
不過都係拎到阿紫份獎勵最緊要
於是，放左學，我就拿拿聲執書包。
出班房門口等阿欣，點知．．．．．佢又遲到。
頂，今次又係要我等，我已經遲落堂架啦！！
等左無耐，終於見到佢。
我：喂！你ｄ惡習真係唔改架喎！
成日都遲到，好心你做人守時少少得唔得？
阿欣：車！你個人都幾奇怪架喎，
而家唔知邊個有求於我呢？要佢等下都好應該姐。
我：唔好講咁多啦，我地去邊度溫呀？
阿欣諗左一諗，講：出去溫啦！
我：下，要行咁遠？出去邊呀．．．
阿欣：叫你出就出啦，仲係度嫌三嫌四！
再嘈我就唔同你溫架啦！
頂！我一定要忍！
我：唔好唔好，欣姐你話點就點。
阿欣笑笑口講：算你啦，行啦！（真係當正自己係女皇咁，下下要人就佢）
我地一路行，一路講。
我：咁我地去邊好呀？
阿欣：求其啦，是但一間m記咪得！
雖然係嘈ｄ，但冇計啦，
總好過一陣佢發老脾唔幫我補就仆街啦。
我突然醒起一個靈感，就即刻同阿欣講。
我：喂！頭先你係咪話未諗到個人情點還既．．
阿欣：係呀，咁又點？