有一晚一個來電: 邁向戀愛的仲夏(下)
阿力：樂哥，我背脊濕晒，可唔可以幫我抹呀。
我見阿力玩野，即刻搵紙巾掟佢．．．
ａｍｙ突然話：係喎！阿紫，你就黎生日啦喎，
仲咁岩係正假期添．．．
對唔住呀，都冇咩生日禮第準備比你。
阿力：係咩？阿紫就黎生日啦咩？
阿紫：係呀，過多兩日就係．．
唔緊要啦，我有冇禮物都冇所謂呀，
橫掂都已經有人同我慶祝啦。
我知阿紫指緊我，所以果刻我同佢都有眼神交流，
大家都不自覺咁笑左出黎。
ａｍｙ：下次一定補返！
阿紫：嘻，多謝你呀。
見食到咁上下，我就同阿紫去沙灘果邊行下．．．．．．．．．
去到沙灘，我地都，沿左個海邊，慢慢咁行。
一路行，一路聽ｄ海浪聲，因為有陽光既情況底下，
海水都反白成耀眼既銀白色．．．一男一女行．．真係好浪漫
我：其實呢度都幾舒服啊可。
阿紫微笑對住我：係呀，好耐都冇黎呢ｄ地方啦。如果可以留耐ｄ就好。
我：你鍾意既，我地搵日再黎過囉。
阿紫：邊個話會同你黎姐，傻佬。
我地一路行既時候，旁邊都有兩個小朋友好天真咁，係度追逐，係度嬉戲。
我同阿紫都不其然咁比佢地既笑容所吸引住．．．．
阿紫笑笑口咁同我講：好得意啊可，佢地。
我：哈哈，係呀，細個真係好呢，一ｄ煩惱都冇。
（望住ｄ細路玩，心情都不自覺咁開心起黎）
阿紫：係呢，阿樂，你有心理準備講你爸爸ｄ野未？
我見阿紫咁問，果一刻，我對住個海邊，唔知點解好心擴神怡。
我都唔怕對阿紫打開心扉：我地一路行一路講啦。
阿紫見我咁講，就笑住咁點點頭。
（我亦唔怕對各位巴打打開心扉，大家係高登相識都係一種緣份，
更何況我已經睇開左好多）
我：其實，我自細屋企就冇咩錢，好多時都靠老豆搵錢過活。
媽咪搵錢唔多。不過，我老豆就成日打我媽咪，有次仲
搞到報埋警，收警告信。我同我老豆既關係開始疏離，
最過份既係，有一日佢從此走左之後就一直冇返過黎，
親戚話佢係內地已經有第二個女人同埋仔，我媽知道
咁就好傷心好難過，但佢地積極做野搵錢，供我學費，
供屋企每一樣費用，我真係唔抵得佢咁辛苦．．．．．
阿紫聽到我講左咁多，突然從後攬住我．．．．．．
我當時呆左．．．真係唔識反應．．．．
我：阿紫．．．．．．．．．
阿紫：對唔住呀阿樂，我唔應該成日提住，迫你講．．．
見你既生活係咁．．．我真係好難過．．．．．．
我：唔緊要．．．而家你咁關心我．．．咩都抵返晒．．．
阿紫聽到我咁講，即刻笑返，雙手從後面攬住我移到去搭住我個膊頭，
一路推我行一路講：傻佬，我都返返去囉。
我：好呀．．
係返去既途中，我見到有個貝殼幾靚，我就執起佢．．．
我：阿紫．．送比你呀，我覺得幾靚呀．．
阿紫：嘻，多謝你呀阿樂！
我回頭望返我同阿紫既腳印，我同佢既距離，真係愈黎愈近．．
就係因為呢日，可能因為係海邊既緣故，
我都阿紫更進一步咁打開左心扉．．．
係呢個時候．．．我亦都清楚知道．．．．
該係時候表白啦．．．．一於就係阿紫生日果日啦．．．．
燒完烤之後，返到家就當然要快ｄ沖涼啦，隻腳咁多沙。
沖完涼之後，其實都諗住訓架啦，但係臨訓前阿紫打左個電話黎．．．
我：阿紫？咁夜仲打黎既？
阿紫：係呀，係咪阻住你呀．．．．唔好意思呀
我：哦，唔係，本身諗住去訓姐。不過你都一場打黎，我地傾陣先啦。
阿紫：嘻，好呀。無呀，其實我只係想打黎多謝你。
我：多謝我？多謝我咩？
阿紫：你今日送左個好靚既貝殼比我呀麻。
我：哈哈，駛咩客氣姐，又唔駛用錢買既。
阿紫：唔係架，對我黎講意義好大架。
我已經洗乾整左，而家放左係我張書台度lu。
我：咁就當回禮啦，你之前送左條手繩比我，我而家送個貝殼比你，
當你掛住我既時候，你望下佢，就會見到我架啦。
阿紫：車，傻佬，邊個話我會掛住你。
我：最衰個貝殼唔可以有錄音功能，如果唔係你拎黎放係耳邊，就可以聽到我把聲啦。
（如果可以錄音，我會想同你講：我真係好鍾意你）
阿紫：不過我最想多謝既係，你會願意講你爹地既野比我知。
我知要你講真係要付出好多勇氣，我都好高興你會信任我。
我：可能因為個時環境適合，timing適合掛，唔知點解，我只係想講你知。
阿紫：嘻，係咩，咁我對你黎講咪算係好重要既人囉？
我好坦白咁講：係。
阿紫聽到我咁講，冇比到反應我，應該係太過驚訝我會咁直接吧。
我：我地後日約１２點好唔好？
阿紫：好呀，我地順便可以食埋中午喎。
我：哈，冇問題。
同阿紫傾完之後，我就去訓。
第二日，我都花左ｄ時間去買果份禮物，走左幾間鋪頭。
可能因為d貨源唔係好充足掛．．
買到既時候，我都好開心。（其實又唔係太難搵）
阿紫，希望你真係會鍾意我份禮物。
買完之後，我就買埋花紙返屋企包。
返到屋企，我就問我老母：媽，你識唔識包禮物？
老母：唔係呀麻，阿仔，你咁大個人都仲唔識包禮物？
我：係呀，咁你識唔識呀？
老母：我都唔識喎。（車，你咪又係一樣）
佢繼續問：送比邊個架？
我：朋友咋麻。
我媽又對我笑笑口：係果個女仔咋掛，朋友朋友講到咁好聽喎。
我係你阿媽點會唔知你做緊咩呀！
我：知你又問！
咁我唔同你講啦，我自己包算。
因為第一次自己包禮物，差唔多成大張花紙比我用到盡咁濟，
包左一次唔掂，又拆開佢再包過，包左幾次，終於有一次係靚ｄ。
我心諗：唔，咁應該包得ok啦掛。
就係咁，個晚我係床上面，因為太緊張，個心一直保持住一個好興奮既狀態，
唔係訓得太好，因為，我聽日，就要表白了．．．．．．
第二日，我就同阿紫約好左十二點係尖沙咀地鐵站度等。
我一去到，Hi！尖沙咀咁向左走向右走多人既原來。
咁我就等左一陣，心諗：阿紫今日竟然會遲到，平時都好準時架架喎．．．
十分鐘過後，終於見到阿紫啦，我見到佢時都呆左一呆。
今日佢同平時有ｄ唔同，著左條黑色既連身裙（去到膝頭對上少少），
記得應該係有少少花邊既．．．（第一次見佢咁著，令佢變得有點成熟）
阿紫：唔好意思呀，遲左添，做咩呆左阿傻佬。
我：下，冇呀．．．
你今日著得．．好靚呀。（講完之後我仲係比阿紫吸引住）
阿紫：哈，係咩，快ｄ行啦，傻佬。（阿紫講完之後就拉住我隻手）
我：我唔係好熟尖沙咀架，有咩好行架呢度？（其實唔係唔熟，係未黎過）
阿紫：我地行下海港城先啦，順便睇下食咩呀麻。
（因為我都知道尖沙咀食野唔平，好彩我都帶足錢出黎）
我：呢個商場真係好大喎，仲好似好高級添。
阿紫：哈哈，係咩，你第一次黎？
我：係呀，平時都唔會自己一個黎啦。
阿紫：不如，我地食呢一間西餐廳好唔好？
我答應左，之後我地就入去啦。
我地叫完餐之後，阿紫同我講。
阿紫：你知唔知道，你係第一個男仔，單獨同我慶祝生日架？
我聽到呢度，即刻唔知點反應，我：下．．係咩．．．
我都係第一次同女仔慶祝生日。
阿紫聽到我咁講，就微笑住咁望住我個袋，問：袋入面係咪禮物黎架？
（阿紫想搶左去）
但我及時阻止住，我：哈，唔得咁茅架，一陣食完飯先比你好唔好？
阿紫：嘻，咁神秘，咩黎架？
我：唔話你知，你自己慢慢估啦。
ｄ野食黎啦，我地快ｄ食啦！
我見阿紫都係飲凍擰茶，但而家只係黎左一杯，
我就主動拎個一杯埋黎，我拮完檸檬之後，就比佢飲先。
我：拿，幫你拮好架啦，你飲先啦，我等下一杯。
阿紫：唔該你呀呀樂，我屋企人都冇你咁細心呀。（講完之後就好甜咁望住杯野）
阿紫：阿樂你都飲呀啦。
我：係咪架，一陣你又話我做咩用同一支飲管。
阿紫：哈，傻佬，唔會啦，果次同你玩下咋麻。
於是，我地就好開心咁一路食野，一路講笑，
原來，我同阿紫單獨兩個人既時候，係咁幸福同開心．．．
我地食完之後，我話：不如行下海邊囉，我好想睇維港好耐啦。
阿紫又一路推住我膊頭，一路講：咁快ｄ行啦
其實我記得果時行海旁已經開始西斜，
陽光比較冇咁刺熱。
我一路行，一路個心跳得好快好快，
我冷靜頭腦，先送左份禮物先。
我：原來呢度都幾舒服，其實我都幾鍾意望海。
阿紫：你鍾意既話，可以多ｄ黎呢度架麻。
我：阿紫，（我將手上既袋遞比佢）
送比你嫁，生日快樂呀！
阿紫收到之後，好開心咁講：嘻，多謝你阿阿樂，
可唔可以而家拆出黎睇架？
我：咁樣我會好難為情架喎。
（送得唔岩咪好尷尬？）
阿紫：哈，唔得喎，我生日我話事。
咁我拆架啦！（阿紫好鬼馬咁望住我）
我：好啦好啦，真係怕左你。
阿紫一拎出黎時，睇左一睇，
即刻笑左出聲：哈哈，阿樂，你係咪第一次包禮物比人架，
包得好核突呀。
聽到阿紫咁講，我：唔好笑我啦，我真係第一次包架，我已經包左幾次，
今次算係最好架啦
阿紫：哈哈，傻佬真係傻佬。
然後，阿紫輕輕拆開個花紙（我個心就一路講：希望你會鍾意啦真係．．．．）
佢見到之後，呆左一呆，
然後望住我．．．．．．．
我見佢咁既反應，我：阿紫，係唔係唔岩你呀份禮物．．．．．
阿紫：唔係呀．．．．
你點知我想要呢份禮物架？
（其實我係諗禮物既時候，都諗左好耐，
巴打記得既話，應該知道我買過隻westlife既cd返屋企，
播到mylove既時候，佢都話好好聽，其實佢前後講左好幾次）
所以話，送禮物真係要投其所好，揀到一份岩架禮物係在乎你對一個人有幾細心．．．．
我：我之前見你話好好聽，我咪諗住索性買埋隻碟送比你囉。
咁你日後就可以慢慢聽啦，同埋佢有好多首都好好聽架。
阿紫：阿樂．．．．
你真係好細心呀．．．我真係唔知講咩好．．．
但係我真係好開心好開心．．．．原來你一直都對我既野咁上心架．．
同咁留意我．．．呢份禮物我真係好鍾意好鍾意呀．．．．（佢真係開心到講唔到野個隻）
阿紫個樣真係好似有點感動，我見應該係時候．．．
我深深吸一口氣，心諗：加油啦阿樂！我實在好想同阿紫發展呀，快ｄ開口講啦！！
我：阿紫．．．．
阿紫：
我：我．．．其實我對你咁上心．．
係因為．．我真係好鍾意你呀．．．．
我真係唔相信自己．．．我居然．．．向住一個女仔．．．向住阿紫表白．．．
第一次表白．．．原來．．係需要咁大勇氣．．．
阿紫聽到我咁講，佢都好驚訝．．．唔識比反應我．．．．
我見佢望住我定左，而我都望住佢定左．．．
阿紫猶豫左好一陣，
終於開口：阿樂．．．
對唔住呀．．．
我見佢同我道歉，我個心即刻好似裂開左咁
我：做咩．．．
做咩．．．同我講對唔住．．．（我開始不斷比藉口自己）
阿紫：我知你對我好好，好細心同好體貼．．．
但係．．．
我聽到咁，我其實都大概知咩事．．．
我果一刻真係好想喊，同時開始有ｄ激動．．．
我個心，好似比好多玻璃碎片拮住咁．．
原來．．我表白．．真係做錯左嗎．．．
我開始有ｄ後悔．．．開始有ｄ嬲自己．．
好地地做咩去表白．．而家搞成咁．．．
我地仲點樣維持一個好朋友既關係．．
個刻我真係好亂．．
我：我．．．（我開始有點頂唔順，想流出眼淚，我及時用手抹一抹）
我諗我都明既．．．
阿紫你咁靚．．又點會鍾意我呢種人．．
大把人好過我．．．
阿紫聽到我咁講，佢都好傷心：阿樂．．其實，並唔係你所諗咁架．．
我：你唔駛同我講好聽既說話啦，
再好聽都改變唔倒呢一切架啦．．
點都好啦．．
祝你生日快樂．．我．．我見到你咁鍾意呢份禮物
我已經好心足架啦．．．
阿紫其實佢已經喊緊，冇出聲應我．．．
可能佢覺得傷害左我．．所以會喊．．
我就同佢講：你唔好喊啦，你而家仲要同你屋企人食飯慶祝架．．
快ｄ行啦．．．我諗我都係時候走啦，
你玩得開心ｄ啦．．．
然後，我就轉身離開．．．．
我轉身走果時，阿紫捉住我隻手．．
但我冇拎返轉．．
阿紫：阿樂．．你可唔可以比ｄ時間我考慮？
係果刻，我只係當阿紫呢句係一ｄ安慰我既說話，
只係一個下台階，等大家既關係無咁僵，等大家仲可以做好朋友．．
但係．．阿紫．．．對唔住．．係呢一刻我真係辦唔到．．
我冇應佢．．．無回頭望佢．．．
我一個人．．漸漸沿海旁．．離開阿紫．．．
今日實在有太多第一次發生．．．．
第一次去尖沙咀，第一次行海旁，第一次同女仔慶祝生日，
第一次買禮物比女仔，第一次表白．．．同第一次．．比人拒絕．．．
第一次比人拒絕既感覺，真係好難受，仲要係對住我
第一次真真正正會想去了解，會肯去花時間，花心機，花心思落佢度既女仔－阿紫。
因為果一剎那我真係接受唔到，簡直係剎那間天堂與地獄般既落差，
即使阿紫當時拉住我講，佢會考慮下，我都已經冇晒心機再聽，轉身就離開。
我沿海旁星光大道一路行，每一下步伐，都意味住我離開得阿紫愈黎愈遠，
每一下步伐，都令我地既關係顯得愈黎愈疏離，
每一下步伐，都好似雙腳被鎖上鐵鍊般，舉步為艱。
我冇回頭望過一眼，因為我怕我會唔捨得。
我冇回頭望過一眼，因為我怕阿紫會見到我喊緊。
我冇回頭望過一眼，因為我怕，阿紫已經離開左。
我冇即時想走，個刻我只係想係海邊隨意行下，
反正無論去邊度，都已經無晒意義。
眼見海旁一對對情侶，果刻心裡真係有點諷刺。
我唔係應該同阿紫一路拖住手，一路行海邊架咩？
點解，而家會得返我自己一個．．．．．．．．
我停低落黎，望望維港夜色．．．．
只得一個人在看，什麼東方之珠都變得黯然失色。
望住如此繁榮既夜景，但我個心，卻如此地失落。
行行下，望到一個攤子，專係幫遊客影相。
我睇睇陳列出黎既每張相，不是情侶倩影就是家庭合照，
邊會有人好似我咁，得一個人孤伶伶．．．．．
屬於那個影相攤子的老伯伯，都係獨個兒咁，等人幫襯。
那一刻，我又只好無奈地繼續行．．
我同時係度諗，我同阿紫．．應該唔會點再有朋友做啦．．
而家都搞成咁．．估唔到．．上天比我美好，比我開心
既日子，只係咁短暫。快樂過後，無限期既痛苦又開始來襲。
我，以後返學既日子點過．．．
我，究竟仲有冇動力返學．．．
同埋我，仲點有心情面對阿紫．．．
我見行到冇野好行，就回返頭，畢竟回頭路先識得答車返屋企。
因為咁，我又再經過那個影相攤子，今次有情侶幫襯，
影相的那位伯伯露出左笑容，幫那對戀人留下回憶．．．．
我行過既時候．．閃光燈正好閃著．．．．．
但那張照片．．．唔係屬於我同阿紫．．．而係人地．．．
果一刻，我只好在腦海中．．自己幫自己同阿紫，幻想一幅．．
可能永遠都唔會有既一張合照．．．．
不經不覺，我回到頭先阿紫同我講野既位置．．．
我停左係度．．．
阿紫．．．佢已經離開左．．
身影消失了，氣味消失了．．我亦都再觸摸唔到，感受唔到。
我係果度，不其然咁留低左一陣．．．
然後．．．就自己離開尖沙咀．．．．
在去程既時候，地鐵站點與點之間既距離，我都覺得好快，
可能係因為我實在太雀躍想見阿紫，心情愉快既時候，
時間如沙般流走得我想捉也捉不住，抱也來不及抱得緊。
但係，回程時，自己一個，加上難受而沉鬱既心情，
每一個地鐵站既距離，都好似拉長左好多咁，
心情唔好既時候，時間慢得你想快也快不了，慢得令你痛苦，令你受折磨。
時間這東西，點解好似有生命咁，點解咁鍾意作弄人？
我帶住沉重既軀殼返屋企，一入到屋，就二話不說入浴室沖涼。
一開水，花灑既水漸漸咁拍打住我既臉頰，
我合埋眼，阿紫既每一句說話，又再浮現出黎。
我亦開始失控咁喊，同時花灑既水好似係度安慰緊我咁，
不斷將我既眼淚，從面上帶走，帶到地下，帶到出水位，
經水管流入大海．．．．
果一刻，其實我都已經分唔出我流緊既係眼淚定係花灑水．．．
就係咁，我成個人就定左係度．．．
完全沒有意欲去做任何梳洗既動作．．．
我老母見我沖咁耐，就拍一拍門：阿仔，做咩沖咁耐呀！唔好晒水啦。
於是，我就索性關左個花灑，抹好身，穿好衣服，吹好頭，
就返返上床訓覺．．．
復活節．．．我仲可以點過，我又應該點過．．．
復活節，係紀念耶穌死後，三日復活既節日．．．
而家我個心死左，我究竟需要幾多日．．．先可以活過來？
我雖然訓左係床上面，但個身體，唔知點解，
仲係沉甸甸咁。
真係好累好累，原來唔開心，都會好似做完一場運動咁，
身心俱疲，有時，甚至比起實質做運動還來得累，
我冇再等阿紫電話，因為我覺得佢未必會再搵我，
所以，我就不經不覺咁．．．訓著左。
沒想到，可能太攰既關係，一訓就訓到大天光。
醒了，睜一睜開眼睛，那種感覺就像是失憶後突然找回記憶那樣子，
我一起身，個腦唔知點解，只係得阿紫，因為佢尋晚冇打過比我，
等我打過去話下佢先得！！
誰知道，我落床後，記憶先慢慢係腦海入面滲出黎：
尋晚．．．我同阿紫．．．已經分開左．．．．
呢個時候，我終於清醒。
一大朝早既清晨，就已經比唔開心既情感所侵佔。
個刻，腦筋好似比人打左支麻醉針一樣，
令到個人遲緩得很，令到個人已經咩都唔想再諗，唔想再理。
就係咁，我連落床既意欲都冇埋，繼續訓係床度，
不斷諗返我同阿紫以前既甜蜜回憶。
同時，我打開日記，由開學開始果頁，一直重溫至臨表白前一日既心情。
一路睇到我同阿紫既關係愈黎愈靠近果時，我都不禁苦苦地，甜笑起黎。
每一頁，我都看得很仔細，就好似我唔想咁快睇到尾聲咁。
睇到最後一頁，臨表白前一晚既心情，我個心依然猶有餘悸．．．
再翻去下一頁時，已經係空白．．．
空白既一頁，就好似係度諷刺緊，我尋晚表白結果一樣，
換黎既，只係一片空白既回憶，失去紀錄的需要。
我睇住呢一頁，我個心不停咁忐忑著．．．
我想，我已經再沒勇氣，或者沒有需要，再動筆寫呢一頁既日記，
甚或至乎再寫了．．．．．
一諗到呢度，我眼淚再次流起黎．．．
一滴一滴咁，滴落去那空白的一頁，
這亦成為我表白那一天，最深情，而最令人不起眼的一頁，表白紀錄．．．．
喊完之後，我又累得訓著左。
我仲記得我媽叫我食午飯，但我淡淡講左句冇胃口，就連飯都冇食。
時間，難過得很，整日訓係床上既感覺，
就好似食完藥咁，整個人都變得渾渾噩噩，好似連身體都唔係自己咁，
直到夜晚．．．．．．．．．．．
夜晚，我終於連自己都頂唔順係床上面既活動範圍。
我終於落床，同時亦準備去食飯。
呢個時候，老母問我：阿仔，做咩尋晚返完黎之後，
今日就成日係張床度，連午飯都唔食呀？
我實在冇辦法同佢坦白，我：可能尋晚去得太夜，
個人太攰，搞到今日冇胃口掛。
老母繼續問：咁你有冇見唔舒服呀？
我搖搖頭，為左唔想令我老母太過擔心，我就開始食晚飯。
因為成日冇食過野，點都有ｄ胃口食，如果再次連胃口都冇，
我諗我實會比我老母一直問落去。
食完飯，沖完涼後，我就好似失去左靈魂咁，
坐係梳化到，睇住無線做果ｄ，無無聊聊既節目。
我真係一ｄ想睇既意欲都冇，但我實在唔想再攤係床度。
果一刻我先明白，原來短短失去左阿紫一日，
我已經深深睇會到，原來阿紫佢係我心入面既角色同地位，
比我想像中重要好多。
冇左佢，我連我想做ｄ咩都唔知。
睇睇下電視，屋企有電話打黎。
我懶得去聽了已經。
我老母見我冇聽，就走過去接。
佢話：阿仔，搵你架喎！
我抱住冇期望既心態去聽，
聽到把聲之後，倒比我帶來一點新鮮感。
我：喂．．．
??：你係阿樂？
我聽佢呢把聲，我諗左好一陣，都搞唔清楚邊個黎，
因為真係好陌生，點解會有個陌生人識我？
我：係，唔好意思你係邊個？
??：我係阿欣呀！
我果刻既思緒真係再次糊塗起黎，邊個阿欣呀！
我：對唔住，我真係冇印象．．．．
阿欣：唉，話你人蠢冇藥醫就真係人蠢冇藥醫。
我係幫你補習數學果個女仔呀！死蠢！！
比佢一咁講，頂！唔怪知咁惡．．．．．
咪住．．佢點解．．．
我：喂！你點解會有我屋企電話？
阿欣：misschan第一日通知我要幫你補時，
佢已經私底下比左你既屋企電話我啦。
佢話如果你偷走既話，都可以聯絡到你屋企人，話比你媽咪知喎。
（misschan你做到咁絕．．．．．）
我：下．．．．．（聽到佢咁講，我都唔識再反應）
阿欣：下咩呀？你唔係白痴到以為我特登問人拎你電話，
而家打黎同你傾計吹水呀？？
我：唔係．．．點敢呢．．你惡成咁都唔方同你吹到水啦．．
阿欣：咁串呀靚仔！我惡又駛你管！
唉，我真係冇心情再鬥咀，我：咁你打黎做咩呀？
阿欣：我打黎係提你，記住放完假返黎果日係星期四黎，
放學記得要留底補數呀！！麻煩鬼！！
估唔到，佢都有好心既一面，會提我補課．．．
我：得啦得啦．．我唔會唔補既，
唔驚你話比我阿媽知咩．．．．
阿欣：你識趣就得啦，咁唔講啦．．．．．
我：Er...咪住．．（果一刻我唔知點解會講左呢句，可能係我想有人可以傾訴．．
不過，我同佢又唔熟，佢又咁惡，傾咩鬼呢．．）
阿欣：咩事呀？
我：都係冇野啦．．．
阿欣：妖，玩野呀！晒我時間，係咁啦！
佢收左線後，我係度諗：點解係佢打黎，唔係阿紫呢．．．．．
冇左阿紫既復活節假，我有嘗試打過比阿力，
但冇人聽。可能佢返左大陸掛真係，之前聽佢講以為講笑。
所以，假期打後果幾日，都冇咩特別野發生。
但有一晚，又係有電話搵我，唔記得左邊日了，日記冇寫低。
點解我會記得？因為係阿紫打黎。
我：喂．．．
阿紫：．．．．（佢冇出聲）
我：喂，搵邊位？
阿紫：阿樂．．．
我聽到阿紫呢把聲，即刻個心都跳埋出黎咁濟。
係就係好開心，好驚訝，但同時．．亦都好唔開心．．
心諗：佢仲搵我做咩呢．．
我：做咩．．（我反應都開始冷淡）
阿紫：做咩你．．．呢幾日都冇搵我既．．
（唉，你咪又係一樣．．）
我：因為．．我真係好唔開心．．
阿紫：對唔住呀阿樂，我知你真係好唔開心．．．
真係對唔住呀．．
我：算啦．．感情呢ｄ野冇得好講．．
係唔鍾意就唔鍾意．．
咁你打黎搵我係咪有咩緊要事？
阿紫：唔係．．．（我聽得出阿紫同時都好唔開心）
我打黎．．係提你食藥架，
平時我都係呢個時間打黎提你架麻，你唔記得啦咩？
（我當然記得，但而家性質都好似唔同左．．．）
我：記得，我一陣會食架啦，你放心啦．．．
阿紫：阿樂，你可唔可以．．
我：有野咪直接講，唔駛吞吞吐吐喎。
阿紫：阿樂，你可唔可以比少少時間我考慮．．
我：點解要考慮？（唔通佢連自己都唔清楚對我既感情係點架咩）
阿紫：我唔方便講呀．．我只係想要多點時間．．．
我：是但啦．．即使最後你既決定係點，我都唔會怪你．．
（果刻既我，依然冇抱任何期望）
阿紫：多謝你阿呀樂（佢終於開心返ｄ）．．
希望我地係呢段期間，都可以好好相處啦。
我：嗯．．．（講就易姐，做起上黎．．．．）
就係因為阿紫呢個電話，我連自己都分唔清楚，
到底我同阿紫既關係係點，只係覺得愈黎愈模糊，
我唔係已經比人拒絕左架啦咩？點解，而家又好似仲有少少希望咁．．
我真係寧願斬釘截鐵一點．．．．
復活節假期好不容易過去，因為表白失敗，心情仍然未能平復。
返學第一日，我集隊果時見到阿紫。
阿紫依然用甜美既微笑對住我，就好似咩事都冇發生過一樣。
係佢睇得開，定係我睇唔開？
但我唔忍心，亦都唔想比阿紫覺得我仲係好唔開心。
於是，我都盡量唔比阿紫感受到，其實我仲好介意。
Ｌｕｎｃｈ既時候．．．
Ａｍｙ：阿樂，你復活節過成點呀？
我：下．．ar.．．不過不失啦．．
Ａｍｙ：係咩？冇同阿紫出去咩？（佢細細聲同我講）
比佢咁講一講，我真係唔知點解釋好，惟有避重就輕。
我：有呀，出左去尖沙咀，食個飯，送左份生日禮物比佢咁囉。
Ａｍｙ聽到，即刻話：wow,好sweet喎！
然後佢即刻拍拍阿紫背脊，同佢講：阿紫，你就好啦，有人主動送生日禮物比你。
阿紫回頭笑笑口咁講：係呀，份禮物我仲好鍾意添。
然後阿紫既眼神就望實左我，我亦都望住左佢。
一同阿紫有眼神接觸底下，果日既回憶又浮現係我眼前。
我究竟做咩野．．唔係話唔再諗架咩．．
我即刻轉轉話題：咁你呢，ａｍｙ，復活節又做左ｄ咩黎呀？
Ａｍｙ：冇呀，同屋企人行下街咁囉。
我：都好呀，當做下運動！
阿紫：阿樂，你今日係咪要去補數學？
我：係呀，做咩？
阿紫：冇呀．．
咁你要好好加油啦，我會一直支持你架。
（我睇得出，阿紫仲係好在意我同關心我。
唔知點解，雖然表面上睇阿紫好似冇咩野，
但我感受得到，佢真係好柔弱，好需要人保護咁）
我：我會架啦。
如是者，放學之後，我又要去我最唔想去既地方．．．．．
放學之後，我又好準時咁到左果間指定既課室。
我一打開門，頂！例牌遲到佢又。
咁我惟有拎住數學書出黎咪住先，一陣費事佢係度嘈我唔做野。
睇左大約５分鐘倒，佢終於入黎啦。
我：成日遲到架你！
阿欣：咩姐！行落黎都要時間啦下話！
係咪等下都唔得呀。（果然幾時都咁火爆）
我：唔係．．費事晒你時間姐！
阿欣：再嘈我特登遲放你呀拿！拿拿林開始啦！
我：唉，其實你咁惡，點會有男仔可以同你傾到計呢．．
阿欣：車！關你鬼事咩我有冇男仔！
咩呀，想溝我咁話啦喎？
我：你地女仔係咪個個女仔都有妄想症．．（amy又係，阿紫又係，你又係）
我係唔會鍾意惡女人架囉。
阿欣：惡咪惡囉！我大把市場添呀！
快ｄ開始啦，唔好嘈嘈閉啦！（好似係你自己係度嘈先喎）
我：哦．．（我翻去今日老師教到個頁）
今日教師教到．．．
阿欣：哎，咪住！！
我：咩呀？欣姐。
阿欣：頂！你咪咁叫我啦，叫到老晒！！
係我教你新野之前，我同你做個小測先。
我見佢咁講，心諗：唉HiHi啦真係．．．
我：咩小測呀．．．
阿欣：梗係測返最基本既多項式先啦，
復活節假完左之後睇你仲記唔記得我講既野。
我果刻好老實講：唔記得，咁可唔可以索性唔測？
阿欣：想死呀你！同我講價！？
叫你測就測啦！我比５分鐘時間你溫。
我：下．．五分鐘點夠呀？
阿欣：唉，１０分鐘啦！正死蠢黎，溫果少少野都要咁多時間！
咁係我溫書既期間，佢都拎ｄ功課黎做。
我見到中三個字，所以問佢．．
我：阿欣，你讀緊中三？
阿欣：邊個比你咁叫我！！
搞錯呀，睇人私隱都有既你！！
我：有幾私隱．．．係你自己拎野出黎做先既．．
阿欣：唔準再睇呀，眼都插盲你（都睇完你中幾啦，仲有咩好睇）
快ｄ溫！！！