有一晚一個來電: 邁向戀愛的仲夏(上)
陸運會過後既三月，其實都冇咩特別事情發生，我都係照樣好似平時返學咁，
同ａｍｙ阿力吹下水，同阿紫傾電話。雖然生活看似係平平無奇，但只要你知
道，你每日都會見到你鍾意既人，你每日都知道你鍾意既人等緊你電話，甚至，
你每日都知道你同你鍾意既人，個關係漸漸拉近，即使日日都上你最唔鍾意既堂，
你都一樣過得咁開心。
所以，既然三月係冇咩特別，咁就直接跳入四月。
有一晚既星期六，我同阿紫傾電話時，傾到一個對我黎講，比較敏感既話題。
阿紫：阿樂，我今日好開心呀，爹地媽咪今日帶左我去食自助餐呀。
我：係咩？你就好啦，我咁大個都未食過自助餐架，你係邊度食呀？
阿紫：其實我都唔係食左好多次咋麻（其實我唔信，我覺得係阿紫唔想我諗到佢咁有錢先咁講）
今次係ｘｘ酒店食（位於尖沙咀）。
我：嘩，係尖沙咀呀？咁咪好貴囉。咁ｄ野食實好好味頂啦！
阿紫：Um....又唔係好貴既，中挺啦！味道就真係好唔錯，勝在夠多花款呀麻，
岩晒我呢ｄ鍾意新鮮感既人啦。最緊要佢甜品都有好多可以揀同好靚呀。
我：哈哈，咁你一定食左好多甜品啦，你咁鍾意。小心ｄ添呀你，一陣食肥你冇人要。
阿紫：我冇人要咪你要我囉，我先唔驚呀！
其實，我而家都慣左阿紫呢ｄ曖昧式炸彈襲擊，但慣左還慣左，還是會面紅同心跳加速。
我：睇下點先啦，好似ａｍｙ咁就真係唔得掂啦！
阿紫：車，邊個話比你要（頭先你先岩岩講），你肯我都唔肯呀！
我：照咁睇落，你屋企人都好錫你喎。
阿紫：係呀，爸爸媽媽都好錫，所以我地關係好好。
咁你呢，阿樂，你同你屋企人關係好唔好架？
我：我同我媽咪關係好好，我自細媽咪已經好錫我，
係長氣ｄ，但都係因為想關心我姐．．
阿紫：咁都好呀。同你爹地呢？識你咁耐，你都好少好少提佢，
呀唔係，直情冇提過添。
比阿紫咁講一講，我既心情即刻開始沉重起黎。
呢樣野，其實正正係我既死穴。無論同朋友定女友一齊，
我都唔想討論我屋企野，因為我真係會好唔開心。
我好直接咁講：我老豆，我一直都當佢唔存在。（我語氣好冷淡）
阿紫：點解既．．．．．．
我：阿紫，我知道你係關心我先咁問，但係我真係唔想講。
我一向甚少提屋企野。
阿紫：阿樂，有咩唔開心我都可以幫你分擔架，唔怕講喎。
我：咁點解我一定要同你講先？
阿紫：因為．．因為（有點吞吐），我係你．．．．．．．．．
阿紫吞吞吐吐對住我，
講：因為．．因為．．我係你最好既女．．．．．仔朋友呀（女呢個字拉佢長得好緊要，日記我有記低，因為當時佢既語氣真係好搞笑）
我：哈哈，搞咩呀你！
都唔知你想講咩！
（語氣回復返沉重）我知你信得過，但我連朋友我都唔會點講，sorry呀。
阿紫：咁你住對邊個先肯講？你唔覺得咁樣屈住屈住好唔舒服架咩？
比阿紫咁講一講，我冇出到聲，但我承認，成日收收埋埋真係好
唔開心，但有時你知道就算搵人傾訴完都無補於事，咁仲傾黎做
咩？事實就係事實，點都改變唔到架啦！我老豆係咁仆街就係咁仆街！
阿紫見我唔出聲，繼續講：阿樂．．．．你做咩呀，唔好唔出聲啦。
我：其實我都唔知對住邊個先會講，我連對住朋友都唔會講，仲有邊個會講？
阿紫：咁女朋友呢？
阿紫突然間咁問，令我有ｄ摸不著頭腦，因為我自己都唔清楚，我又未試過。
我直接答佢：我唔知喎真係，我又未試過拍拖，我點知會唔會講？
之後，輪到阿紫冇出聲．．．．
我真係好後悔，早之唔入呢個話題，而家搞到個氣氛咁怪，
我只好快ｄ打完場轉話題好過。
我：唔好講呢ｄ住啦，即使講咩有ｄ事實都改變唔到。
於是，阿紫聽到我咁講，亦都好唔願意咁接受左．．
我見佢語氣有點失落，我就哄返佢。
我：阿紫，你唔好唔開心啦。
可能我未有心理準備架姐，我想講果時先講你知啦，好冇？
（而家惟有咁樣敷衍住阿紫先）
阿紫見我咁講，即刻好似小朋友有糖食咁，開心返：好啦，算你啦。
你話過架，唔好反口呀。
我：嗯嗯。（阿紫．．．佢份人就係咁，求知慾非常之強既一個女仔）
我：係呢，就黎復活節假期，不如約埋阿力ａｍｙ出一出去玩囉，唔駛咁悶呀麻。
阿紫：都好喎，橫掂都算放好多日假下，你有咩想做呀？
我諗左陣，講：不如，我地去燒烤囉！！！
阿紫：燒烤呀，都好喎，我都好耐冇去過啦！不過我要問准屋企人比唔比先喎。
我：冇問題，咁我後日返學同ａｍｙ阿力佢地講聲先啦。
阿紫：好啦。:
為左多ｄ同阿紫相處，今次係我第二次主動約阿紫。
回想返，其實當你鍾意一個人既時候，即使你性格幾被動（至少我係）
你都會為左佢而改變，變得主動好多，大膽好多，
當係為自己爭取機會又好，為左大家既關係又好，
有好多野，都可以為你鍾意既人去改變，而自己係唔會介意。
呢種魔力，我係個時先意識到原來係咁強大，
難怪人地話愛情係盲目。係就係事後會覺得好傻，但至少個時，我覺得值得。
同阿紫傾完電話之後，個晚，我亦有好好諗過，
其實阿紫絕對係信得過既人，講我屋企既事比佢聽，
其實都唔係問題，只係我個時太細個，難免處理呢ｄ事情
既時候，會成日受負面情緒影響，所以先唔想多講．．．．
各位巴打，有個齊全既家，無論有冇錢都好，已經比其他人好好多．．．．
後日返學既時候，我趁小息拉ａｍｙ同阿力埋黎。
我：喂！黎緊既復活節你地有咩做呀？
阿力：冇呀，我等緊人約呀都，你有好提議咩？
ＡＭＹ：做咩呀阿樂，想約我啊？唔好意思喎，我好多人約架喎。
我：係呀，ａｍｙ，咁真係可惜啦。
冇，我仲諗住約埋阿紫同你地去燒烤添，
原來ａｍｙ你已經大把人約，咁慳返啦，
阿力你同我地去得啦。
ａｍｙ見我咁講，即刻轉軚：去燒烤呀？好呀好呀，
我又去！
阿力：你唔係話有好多人約架咩？
ＡＭＹ死兜：車！呢ｄ野可以推架姐！
我：係咩？我唔想預你喎，你食咁鬼多野，拎炭都拎死我啦！
ＡＭＹ：妖，阿樂你死ｃｈｅａｐ精黎架！係要串串共咁！
食得最多唔係我囉，一定係阿力。
阿力：哈哈，最多我拎多ｄ野食囉，補返數。
我：你睇下啦，ａｍｙ，起碼阿力食野又會做野。
ａｍｙ見我咁講，又打鳩我。
我好醒目咁即刻避開。
我：ａｍｙ，你減下肥先啦，出手太慢打唔到我架。
ａｍｙ：頂你阿樂，你比我追到你就知味道，你唔好走呀！（一路講一路追住我）
我：痴線架你都，唔走就笨啦！
Ａｍｙ一路追住我，我就醒水咁走去阿紫身後面，
我：阿紫，你要救我呀！ａｍｙ追打我。
ａｍｙ：死ｃｈｅａｐ精黎架你，一個男仔要個女仔保護，仲要企係阿紫後面，
有種你就出黎！
我：我係唔出呀，你過黎囉。（我做左個鬼臉比ａｍｙ睇）
阿紫：哎呀！你地幾大呀，仲玩呢ｄ遊戲。
ａｍｙ：算數，我比面阿紫，唔同你計。
係呢，你係咪都去燒烤架阿紫？
阿紫：係呀，但係屋企人話唔準太夜返屋企喎。
我：得，冇問題！咁我地約定復活節假期去燒烤架啦！
ａｍｙ：仲有一個禮拜就放假啦，快ｄ黎啦，好耐冇燒烤啦。
呢個時候，鐘聲亦都響起，我地亦返埋位繼續上堂。
知道黎緊既假期有野做下唔駛係屋企悶，真係幾好，
起碼返學都有衝勁ｄ。不過，係諗緊燒烤食咩既同時，
我亦開始要為另一件事粗心．．．．．．．．．．．．．．
如果各位巴打有細心留意既，都知四月係阿紫既生日月份，
而阿紫既生日，正正係復活節假期間既其中一日。
一直以黎阿紫都對我咁好，我亦都好應該揀一份生日禮物送比佢。
送禮物真係一件好煩既事，又唔知揀得岩唔岩，送完又唔知鍾唔鍾意。
識左阿紫咁耐，我亦唔係太清楚阿紫既口味。
但如果而家先黎問佢鍾意ｄ咩，咁佢實知道我要送ｄ咩類型既生日禮物比佢，
變相咪冇晒驚喜？但唔問既話，我又唔知阿紫缺ｄ咩．．．．點算好．．．．
一年先得一次，點都要送份有意義少少既禮物，我自問冇咩錢，
真係唔想買咁貴。果一刻，我真係好無助，畢竟真係我人生第一次
送野比女仔，我唔想第一次就衰左。
因為諗得太入神，搞到我數學堂冇留心聽書，點知．．．
數學老師：阿樂，做咩係度發呆呀！
出黎黑版做呢條數比我睇！
比老師咁樣搞一搞，我真係比佢嚇親。
於是，老師就寫左條數比我做：
y(x-2)=x^2
數學老師：拿！呢條非常簡單，以y為主項。
我出去黑板睇睇呢條數，
心諗：屌！仆街啦．．．．．．．
咁撚難既？我點調位呀呢條數．．．
唉，早知頭先唔諗得咁入神啦。
既然唔識，我都求其寫左個答案比佢：
y=x^2-(x-2)
當我寫完之後，老師都Ｏ左咀。
數學老師：（語氣有少少嚴厲）阿樂，頭先先岩岩講完，
你究竟有冇聽書架。點會調過去減呢？乘法黎架喎！
比佢點完之後，我都係唔明。
數學老師：見你ｄ數學底子咁差，今日上堂又唔集中，
你返埋位企下先！
跟住佢仲補多句：阿樂！你ｌｕｎｃｈ之後落黎搵我！
我：（死死氣）哦．．．（唉，今次大撚獲啦．．．．）
於是，我就返埋位企，等lunch落去比miss照肺．．．．．．
希望唔好話比我老母知呀．．．．
食飯既時候，阿紫將個飯盒放係我張台上面，
我見佢咁，我就話：做咩？你想送多盒飯比我食？
阿紫：唔係，我拎轉過黎同你一齊食呀。
佢呢個舉動，實在令我有點錯愕，同難為情，畢竟成班同學係度．．．．
我：下．．．會唔會唔係咁好．．好多人望住架喎。
阿紫：怕咩。（阿紫輕輕一句，令我開始對佢既膽量改觀，究竟係佢大膽，定係我細膽？）
我記得，我果日係食荷葉飯既，阿紫就係食唔知咖哩牛腩定魚蛋之類既飯，
食左咁多年唔同既飯盒供應商，始終覺得中一時既陽光午餐最好食。
於是，我就同阿紫對住咁食飯。
ａｍｙ就答爹：你地駛唔駛咁煙韌呀
阿紫：哈，ａｍｙ，你誤會啦，我拎過黎係想方便傾下燒烤既野咋麻。
我地去邊度燒好呀？
ａｍｙ：不如石澳啦！
我：石澳？邊度黎？
ａｍｙ：妖，都唔知你係咪住係香港，成個大鄉里咁，石澳都唔知係邊！
我：咁真係唔知都冇法，我冇咩所謂，石澳就石澳啦！
阿紫：係呢，阿樂，頭先老師做咩話你發呆既？
我：冇呀，諗野諗得太入神之麻。
阿紫：諗咩呀？？
我：下，冇呀，唔係咩特別野。（唔通真係講你知送禮物比你咩！）
阿紫見我咁講，即刻用好懷疑既眼神望住我。
加上，對住阿紫咁近距離食野，真係好唔慣，有點唔自然。
阿紫：見你成日發呆，不如日後我就叫你阿呆啦！
ａｍｙ：哈哈，好呀！呢個名岩晒佢！
我：
阿紫：阿呆，（阿紫拮左舊薯仔我）幫我食ｄ啦，
我食唔晒咁多呀
阿紫：要唔要牛腩呀？
我：下．．好．．好呀。（我即刻變紅紅咁，話晒係班房，卻公然咁夾野食比我）
阿紫：
快ｄ食啦，食完你要落去搵miss呀。
我：係喎（唉，真係唔想搵，我最怕就係比miss照肺）
我拿拿林食完之後，掉左個飯盒。
我：咁我落去先啦，阿紫。
阿紫即刻好快咁講：咪住！你未食藥呀。
我：係喎係喎，哈哈．．．．．太心急添．．
阿紫即刻裝出一副沒好氣既樣。
阿紫：正一大頭蝦黎！
食完藥後，我就落去搵數學ｍｉｓｓ。
我敲敲教員室對門，講：唔該我想搵misschan呀！
miss係度，佢示意叫我係出面等。
無耐，miss出黎，
misschan：阿樂！
我：misschan..........
misschan：做咩頭先咁唔留心聽書呀。
我：下．．我諗野唔小心諗得太入神咋麻。
misschan冇好氣咁講：雖然你主科成績唔錯，
但你數學既底子真係幾差，
我想你花多ｄ心機係呢科上，唔好忽略佢。
中一既數已經咁，你點樣跟上去？
見佢咁話我，我其實都唔知點知好．．．．
我就話：misschan，我由細到大數學底子都比較差，
我真係唔知點樣做，我屋企又冇多餘錢請私人補習老師．．．．．
misschan：本來我諗住每個星期留你一日堂做數既．．．．
我聽到老師咁講，即刻好大反應：下．．．唔好留我堂呀！
misschan：阿樂！你聽埋我講先。
我：對唔住，misschan。
misschan：本來我諗住每個星期留你一日堂做數既，
當我又唔可以係你旁邊督促住你做，
而你本身底子又咁差，得你自己一個做一定冇咩效用。
你知唔知道，學校有個補習計劃架？
我：補助計劃？
misschan：即係搵ｄ比你大兩年以上既高form同學教你地。
聽完miss咁講，我都大概知佢講咩，小學都有（叫咩大哥哥大姐姐計劃之類）
我：咁即係我都要每個星期抽一日留堂做數？但就係比ｄ大過我既人教？
misschan：冇錯。我已經幫你搵好添架啦，佢都係我教開。
我：下．．．．．．．
misschan：下咩野
我：冇，咁逢星期幾呀？
misschan：逢星期四，四點至五點，ｘｘｘ室。
我：哦．．．．今個星期開始？
misschan：係呀！唔通下年呀？
咁你乖乖地聽話啦，我會觀察住你既數學成績架。
我：知道啦，misschan．．．
果時心諗：唉，估唔到臨放假前，都要搞ｄ咁既野．．．．．
我真係唔想補呀．．
鏡頭一轉，話咁快就到星期四，
放學既時候，我急急咁執書包。
阿紫：阿呆，做咩咁急咁既，你好趕咩？
我：係呀，我比misschan話我數學差，每個星期四都要留低
，比人教我數學喎。
阿紫：哈哈，咁你真係要比心機啦，我幫唔倒你ｄ咩，但我會精神上支持你既。
我：好啦，咁我走先啦。
於是我就去度指定既課室地點，一入去，
心諗：頂，冇人既？唔係得我一個留堂呀．．．．．．
咁都冇法，我惟有坐低等人黎。
等左十分鐘倒，終於有人入黎．．．．．
我見到佢，係女仔黎。
??：你就係阿樂？
我：．．．係。（我諗佢大概中三至四倒啦，身材中等，長頭髮紮辨，
樣子有點成熟，我記得係幾靚女，畢竟我果時係零機會接觸呢ｄ
大過我既同學）
我果時冇諗咩邪野，佢既樣就算有幾靚都好，都唔關我事，
我只係想快ｄ完快ｄ走！
??：讀中一架呵？（語氣有點冷淡，可能佢都覺得補習係麻煩同晒佢時間掛）
我點點頭，同時帶點緊張。
??；咁我地開始啦！
我：咪住先，我仲未知你叫咩名．．．
??：點解要話你知！（佢語氣有點不友善）
我：下．．哦．．咁．．開始啦（唉，今次大獲啦，我遇著個咁惡既女仔，
個樣點討好都冇用啦）
係果刻，我更加想走．．．．．
我多口一問：呢間房，點解得我一個咁既？唔係話係補習計劃黎架咩？
??：係，不過misschan專登book左一間課室比你，
佢話其他同學係比較差同唔守規矩，成日傾計，
你同佢地一齊既話會冇幫助。
問咁多做咩，快ｄ開始！
我：哦．．對唔住。
??：你而家數學教到邊呀？拎本書出黎啦，冇書點教！？
我：係，知道．．．
我地教到多項式，我唔識點樣調位，咩搵主項果ｄ，我覺得好難．．．
佢睇一睇之後，即刻話：下．．．呢ｄ好易咋喎，
你連呢ｄ基本野都唔識？
我：係呀．．．（識既話我就唔駛係度啦！）
??：虧你係最好果班！九成上堂唔留心聽書啦！
快ｄ啦，唔好晒時間！
於是，佢就由頭開始教我，有時教極我都唔識，佢自己都會好"炆"
??：有冇搞錯呀呀樂！講極你咁做都唔識既！
乘調過去變除呀！唔係加減呀！你試下再錯呀啦！我褲都除甩你呀話你聽！
（佢真係好惡死，我真係頂唔順．．．仲惡過ａｍｙ．．．）
我：可唔可以唔好咁惡．．．．
??：你估你係大少呀！快ｄ做，做唔識唔駛旨意走呀你！
終於，都做完數，佢見我算有少少進步，就放過我。
??：好啦，今日講到咁多，未見過ｄ人好似你咁鬼蠢。
我冇出聲，扁一扁咀：咁我走先啦，姐姐。
佢聽到我叫佢姐姐，即刻笑左出聲．．
??：我叫阿欣呀！
好啦！快ｄ走啦，唔想見到你。你再唔走我繼續同你補架啦！
聽完佢咁講，我就急急腳走左．．
唉．．．簡直係惡夢．．．擺明恰我係中一
我幾時先補完．．．．
星期四呢個惡夢過左之後，我諗諗下都係頂唔順，
於是我趁星期五，臨放復活節假前，我去搵搵misschan。
我依舊去教員室搵佢，出黎之後，
miss問：點呀，呀樂，搵我咩事？
我：（其實我都唔知點講，我果刻有點吞吐）．．Er...
misschan見我咁，就講：有咩唔怕直接講喎。
我：misschan，我覺得幫我補果個同學好惡呀，
我可唔可以換人呀？
misschan聽我咁講，笑左一笑：阿樂，我專登搵佢黎教你架。
我：點解要個咁惡架．．．．？
misschan：佢係惡左少少，但係佢以前都係好似你咁，
數學好差，成日唔合格添。但因為佢之後好努力，
成日主動做數同走黎問我，而家數學比以前好好多。
我會搵佢教你，係因為佢以前都好似你而家既處境咁，
我相信佢教你既時候應該會有多ｄ共鳴，ｄ方法應該都適合你一ｄ。
係果一刻，我真係唔覺果ｄ咩所謂既共鳴，我只係覺得佢惡．．．．
miss見我冇出聲，繼續咁講：阿樂，換人我就唔會咁快架啦。
你比佢教多一陣，睇下慣唔慣，
唔慣我先再比你換啦，好冇？
我：哦．．．咁好啦．．（果時實在冇選擇揀）
我返返上去，撞到阿紫，佢見我頭dupdup咁，
就問：阿樂，你做咩野？
我：冇呀，我補習果度想換人咋麻，不過misschan唔肯住喎。
阿紫：上左一堂咋喎，咁快想換？佢教得好差咩？
我：唔係，之不過佢好惡咋麻，同你比差好遠．．．．
阿紫：哈哈，你咁即係讚我啦喎。
我：咁我都係講事實，你好佢好多好多倍。
阿紫見我咁講，仲笑得開心ｄ添，
女仔真係鍾意比人讚。
上課鐘聲又再響起，我就同阿紫講：我地今晚先再傾聽日燒烤既野啦。
阿紫笑笑口咁話：好呀，我等你電話啦！
夜晚十點倒，我打比阿紫。
我：阿紫，你聽日最遲要幾點走呀？
阿紫：Um....我諗六點倒啦。
我：咁呀，咁我約你上晝十一點係筲箕灣地鐵站等啦，
我地集合左之後先去買野。
阿紫：好呀，冇問題。
我見仲有幾日就係阿紫既生日，
雖然我仲未諗到送咩禮物，但我想阿紫呢個生日同佢一齊過。
於是，我果刻鼓起最大勇氣。
我：阿紫，我知幾日後就係你生日，我想同你一齊過呀．．．
（我個心一路跳得好快，一路好急咁講）
講完果一刻，個心即刻舒服ｄ，同時又好緊張等緊阿紫既回答。
阿紫：哦，原來有人想同我慶祝生日。
我：係呀．．．你想唔想呀．．．．
阿紫：有冇生日禮物收架先？（佢專登玩野咁講，識落阿紫既人都知其實有冇佢都冇所謂）
我：有呀，你生日咁重要既日子點會冇呢？
阿紫：咁係咩黎架？
我：到時你咪知囉，咁你即係肯唔肯呢？
阿紫：我諗應該冇問題既，但我夜晚要同屋企人慶祝，所以只可以比到下晝既時間你咋。
我：我冇所謂呀．．．
阿紫：咁不如我地去尖沙咀啦，橫掂我夜晚都要係果度食飯慶祝。
我聽到阿紫咁講，我就答應左，其實我都未去過尖沙咀．．．．
我：好啦，咁聽日見啦。
收左線之後，我仲煩緊送咩．．．
當我諗下諗下既時候，我靈機一觸，諗到一樣佢應該會幾鍾意既禮物，
各位巴打你地又估唔估到送咩呢？
係燒烤果日，我諗朝早九點半倒既時候，
突然有人打去我屋企，
咁我心入面即刻屌晒老母啦，邊撚個仆街咁早打黎阻住我訓。
我聽電話：喂．．．
阿紫：阿樂．．．Um..你未起身呀．．．
我聽到阿紫把聲，成個人都醒晒，估唔到佢會打黎叫我起身。
我：下．．唔係呀．．
阿紫：仲係度扮野喎，聽你把聲就知啦。
快ｄ起身啦，又話約十一點。
（係．．．但係而家先九點半．．）
我：知啦，我而家就起身．．
原來有人叫起身既感覺都唔錯．．．特別係鍾意既人添．．
咁我就好準時十一點去到啦，費事要人等呀麻。
陸陸續續佢地三個都黎到，我地就去就近超市買野食。
入到超市，ａｍｙ即刻癲左咁狂掃野食，真係唔得佢死！
我：嘩ａｍｙ，你食唔食得晒架！
ａｍｙ：冇問題架啦，有阿力係度呀麻。
阿力：而家買左ｄ咩食呀？
阿紫：丸啦，腸仔，豬扒，雞翼，粟米，牛扒，雞扒，
茄子，青椒，魷魚．．．．（唔記得）
我：都差唔多啦．．好夠食啦已經
阿紫再話：呀，咪住，要包棉花糖呀（果然鍾意食甜食）
買完野食過後，我地就去買燒烤用具呀，炭呀，野飲果ｄ。
買完之後．．．．重到死．．．．．．．
我：頂你ａｍｙ，買咁鬼多野，又要我拎，重死人咩，
早之唔叫你黎呀真係
ａｍｙ：咩呀，大家都有份食架麻，最多我幫你拎ｄ啦。
講完之後，ａｍｙ就走埋黎，拎走左我最輕果袋（丸）．．．
我即刻諷刺話：真係好謝你呀ａｍｙ，我而家輕左好多．．．．．
阿紫見我咁重：阿樂，我幫你拎ｄ啦．．．．
我：好啦，比左袋魷魚佢．．．．
就係咁，我地就答巴士去石澳燒烤場．．．．．．．．
去到燒烤場．．．估唔到今日都幾多人燒烤．．．
咁又係既，復活節放假唔出奇．．．
石澳環境當時都算唔錯．．．
我地就即刻霸左個爐．．．
咁我同阿力就去透爐啦，而阿紫同ａｍｙ就去拆開ｄ野食先．．．
透好爐之後，我地都開始燒．．．．．．
咁通常一開波都燒腸仔先，快熟呀麻。
咁我地就各自拮左ｄ腸仔去燒。
燒燒下既時候，阿力問我：喂！阿樂，之前你做黑板條數唔識，
misschan話你d咩呀？
我：佢叫我每個星期四都要留低做數，仲整左件好惡既女仔教我添！
阿力：惡得過ａｍｙ？
我：就係惡得過先死．．．未見過有ｄ咁既人架！
我有咩得罪佢姐．．．
ａｍｙ：抵你死啦阿樂！而家有報應啦，成日話我惡．．．哈哈
你終於知道我對你其實都好善良呢，起碼而家有人惡過我啦！
我：你死開啦ａｍｙ，同你坐埋一齊真係冇好運行架。
前世同你撈亂骨頭咩！！
燒緊腸仔既途中，我掛住講野．．．唔記得轉下條腸．．．
我：頂！！燒焦左添．．．．你睇下？黑晒點食．．．
最鬼衰都係你個死人ａｍｙ！！！
阿紫：哈哈，阿樂，唔緊要啦，我燒比你食啦。
我見阿紫燒得幾靚，女仔控制火候係好ｄ！！
ａｍｙ：收啦阿樂你！自己技術差就差啦，又係度賴地硬。
我：你好好！！！
阿力：你兩個真係好鬼鍾意鬥咀，你話冇前世我打死都唔信。
ａｍｙ：鬼同佢有前世呀！我前世不知幾靚女．．．
我：你前世就係肥婆楊貴妃！！古代既基因一值留存都而家，都係咁肥！
ａｍｙ：哼！我忍你，我食完野你就知死阿樂！！！
阿紫：哈哈，拿阿樂！你條腸呀！拎個碗黎啦。
我：唔該你呀阿紫。
（腸仔味道食黎食去都係差唔多，但阿紫燒比我既，可能意義上唔同，
令你覺得味道都唔同ｄ，我諗有女朋友既巴打應該知我講咩）
當我食完之後，阿紫繼續話：阿樂，你有咩想食都可以同我講架喎。
我：下．．咁咪好麻煩你．．．我自己燒得架啦．．．
阿紫：唔緊要喎，都係一齊燒姐。（阿紫，你對我真係好好，呢ｄ女仔去邊度搵）
阿紫主動話：我燒ｄ丸比你食先啦。
阿力見咁樣，即刻話：樂哥，我又想食呀，可唔可以燒比我呀．．
我：燒ｄ帛金比你就得，你叫ａｍｙ啦．．．
ａｍｙ：我燒比你啦！橫掂我咁好人．．
天氣有點熱，我見阿紫燒到有ｄ流汗．．
我就拎張紙巾出黎，話：係咪燒得好辛苦呀，不如我自己黎返啦。
（我講完之後用紙巾輕輕係佢面上抹一抹）
阿紫見我咁，即刻面紅到冇出聲（佢竟然會難為情）
我：整親你？
阿紫甜甜的：唔係呀（佢dup低左個頭）