異塵餘生香港2277: 55 大戰

在回憶中，流主終於得知了自己以及流尚的身份。更慢慢接近大戰發生的時刻，還有政府隱藏著的秘密．．．
 
流主和流尚把有關美國已經準備發射核彈、雪藏裝置和伊甸園創造器的情報都一一向政府報告，但是卻沒有提及黃金力量發現解放軍運送病毒的事．．．因為他倆都心存一絲懷疑，認為有必要先調查清楚。
 
來到了目標工廠的流主，在嗶嗶小子的協助下，和小隊另外兩位成員成功地潛入到工廠的倉庫。
 
 
其中一個女隊員指著貨櫃說：「係嗰啲啦！」
 
流主他們小心翼翼地避開了守衛和機械人的耳目，走到其中一個貨櫃前。




 
另一個男隊員說：「我需要時間解開個電子鎖，你地保護我。」說著，他便聚精會神工作
 
「我始終諗唔明，政府要啲病毒嚟做咩．．．」流主疑惑說
 
女隊員笑說：「廢話，唔係用嚟對付美軍就係用嚟對付我地架啦！」
 
「但係用病毒武器咪會傷及無辜市民？唔合理．．．」流主不解說
 
「唔合理？依個共產黨政府幾時有合理過？你覺得佢地會在乎市民嘅生死咩？」女隊員有點憤怒說：「你知唔知88年前嘅6月4日發生左啲咩唔合理嘅事？？」




 
這時，男隊員搭話：「人地中國嘅嘢同我地香港無關，你只要知道我地嘅敵人共產黨係一班咩人就得。個鎖開左架啦，快快手拎啲樣本就即刻撤退。」
 
 
流主隨手拿走了數個小瓶子，然後便轉身離開。豈料，就在此時，背後突然傳來「颼」的一聲，男隊員的頭顱便隨即「撲通」掉在地上！流主和女隊員嚇得呆若木雞，看著男隊員的身體緩緩倒下，才發現一個穿著烏黑色緊身裝甲的人手執一把鋒利無比的長劍，不知何時走在他們身後！
 
女隊員瞠目結舌：「隱．．．隱形裝甲！」
 
「走呀！！」流主自然知道甚麼是隱形裝甲，更清楚知道被一個守衛發現，便等於被所有守衛發現
 




 
流主和女隊員馬上拼命逃跑，看著背後並沒有人追來，流主更倍覺害怕！隱形裝甲最可怕的地方並不完全是隱匿偷襲的能力，而是它能利用隱匿而讓敵人陷入杯弓蛇影、草木皆敵的巨大壓力之中！
 
在被不知道有多少個隱形裝甲守衛的追殺下，流主他們終究還是被其他守衛和機械人發現！
 
 
女隊員心知凶多吉少，毅然決定拔槍迎戰：「．．．我頂住，你走先！」
 
流主躊躇不決：「但係．．．點可以．．．」
 
女隊員用充滿期望和信任的眼神看著流主，說出了她生命裡最後的一句說話：「一定要拎到啲樣本返去，揭開政府嘅衰嘢，拯救香港！」
 
 
流主沒能回應，只有含淚轉身逃跑。他內心深處萬般掙扎糾纏，自己本是一名政府派來黃金力量的間諜，現在卻背負了「敵人」的捨命恩情和期望．．．還有那份最後的，諷刺地卻又是錯誤的信任．．．
 




僥倖活著回到黃金力量基地的流主，馬上把病毒交給科學家進行研究．．．
 
 
「流主，結果出左．．．」流尚忐忑不安說：「係一種叫做F.E.V. 嘅病毒．．．」
 
「F.E.V.？」流主一臉迷糊
 
「Forced Evolutionary Virus，強制進化病毒．．．係美國政府資助研究嘅病毒．．．依隻病毒唔係用嚟對付敵人，而係用嚟強化生物，製造生物武器．．．佢可以令生物肌肉急劇成長硬化，變成一隻無堅不摧嘅怪物．．．」流尚凝重地說
 
「但係．．．解放軍點解會有美國嘅病毒？」流主開始有不好的預感
 
「金先生話，美國已經承認係佢地研發F.E.V.，但係病毒點解會落入共產黨手中，就連佢地都唔知，仲話希望黃金力量可以幫佢地調查．．．」流尚說
 
流主拿出一個小型通訊器說：「．．．得一個方法可以查證真相．．．」
 




 
流主按下通訊器的按鈕，通訊器上的小屏幕便馬上出現一條綠色、呈波浪形、不斷浮動的線條。隨之，一把男人的聲音沙沙傳出．．．
 
 
「．．．流主，係咪有咩新消息？」聲音說
 
「市長，點解政府會有F.E.V.？」流主直接刺入問題核心
 
「．．．．．．我唔明你講咩，咩F.E.V.？」聲音說
 
「尋日我．．．黃金力量派左人去新界北嘅工廠件事，左先生你係市長無理由唔知。」流主說
 
「．．．你只要執行你作為間諜嘅任務就可以，其他嘅事你唔好理咁多。」聲音說
 
流主清楚左先生這樣的回應，明顯是心中有鬼，但流主又無可奈何。豈料，流尚卻突然說：「如果左先生係唔講嘅，我地都做唔落去。」




 
「．．．．．．你地咁樣問，即係已經知道F.E.V.係咩嘢嚟啦？．．．我長話短說。我地嘅F.E.V.係由美國度攞返嚟嘅F.E.V.樣本改良複製出嚟。」聲音說
 
流尚大感驚訝：「改良複製．．．？點解政府會攞到F.E.V. 樣本架？美國同我地應該係交戰狀態個喎！」
 
「依個世界上無嘢係錢買唔到。我地當然無可能向美國政府買，但係向幫美國政府生產依隻病毒嘅製造商買一個樣本，就完全唔係問題。再配合我地中國強大嘅複製技術，有咩係無可能？」聲音說
 
流主忍不住說：「用生化武器始終都唔人道．．．」
 
「人道？」聲音說：「開發F.E.V. 嘅係美國，唔係我地中國，唔人道嘅係佢地。我地只係以彼之道，還施彼身。佢地有強化戰士，我地都一定要有，仲要比佢地更強。」
 
「戰士？你地係打算將F.E.V.用喺人類身上！？」流尚十分愕然
 
聲音靜下了良久，說：「．．．我已經講得夠多，我唔理你地當自己係中國人定係香港人，總之你地嘅敵人係美國同黃金力量，唔好唔記得。仲有，我要提你地一件事，上次你地話美國已經有晒準備會發射核彈，我地中國都一樣。」
 




流尚十分激動：「你地咁做同美國有咩分別？？你地就係為左要嬴人地，不惜犧牲香港？？不惜拉全世界落水！？？」
 
然而這次，聲音靜了下來後，就沒有再說話了。
 
 
2077年10月23日。
 
 
黃金力量的基地一片混亂，主要原因當然是因為中美雙方都已經發射了核彈。即使雙方都表明是對方先攻擊，也已經無補於事。全香港以至全世界都出現了恐慌，人類和地球上所有的生命，都只能無能為力、無可奈何地等待被末日的烈火吞噬．．．
 
不過，除了核戰，黃金力量的基地亂成一片，還有另一些原因．．．
 
由於「雪藏計劃」的情報洩漏，解放軍突襲黃金力量基地，誓要奪得雪藏裝置和伊甸園創造器。同一時間，黃金力量也發現了兩名潛伏已久的政府間諜．．．
 
「一定要保護獲選者呀！！」黃金力量的成員奮力迎戰入侵的解放軍
 
戰鬥的聲音連綿不斷，傳透了整個地底基地。槍火的聲音、子彈撞擊的聲音、激光飛馳的聲音、以至人們怒吼和慘叫的聲音都混合在一起．．．相信在地球上，也只有人類會在世界末日的前一刻仍然自相殘殺。