異塵餘生香港2277: 56 罪人

核彈已經發射，世界末日也迫在眉睫．．．
 
流主和流尚因為逃避解放軍和黃金力量的追殺，只有不斷向基地的內部逃命。終於，他們來到了雪藏裝置室，也是基地的盡頭．．．但偏偏卻在這裡遇上了金先生、獲選者、左先生和數個解放軍士兵．．．
 
 
「金先生．．．市長．．．」流主和流尚一時間不知如何反應
 
「你兩個叛徒．．．」金先生咬牙切齒地瞪著流主和流尚
 
「哼，比金先生你搶左我句對白。」左先生冷冷地看著流主和流尚




 
自知九死一生的金先生舉著雷射手槍說：「我唔會比你地阻止我地嘅計劃架！」他說著，獲選者也舉起衝鋒槍
 
左先生笑說：「就憑你兩個？」他身旁的士兵也隨即舉槍
 
金先生冒汗說：「為左香港嘅未來．．．唔得都要得！」
 
左先生說：「你嘅計劃，流尚已經話晒我知。將獲選者雪藏，200年後解封，再用伊甸園創造器重建香港．．．依個係一個好好嘅計劃，真心嘅，我非常支持。」
 
金先生說：「咁你仲搞咁多嘢做咩？你到底想點？」




 
「哈哈哈．．．」左先生大笑：「我只係想比一個小小嘅提議，你成個「雪藏計劃」都好好，唯獨有一個地方我想改改佢，就係獲選者依個角色．．．由我嚟做。」
 
金先生反應激動：「荒謬！！」
 
左先生平心靜氣微笑說：「你放心，到時解封，我一定會重建香港，我可以承諾。」
 
金先生怒喝：「你唔係重建香港，你只係重建你自己嘅皇國！唔使問都知，你肯定連共產黨都呃埋啦！」
 
左先生收起了笑容說：「係又點？宜家係邊個向我地射核彈呀？咪就係你地幫緊嘅美國囉。香港滅亡，中國滅亡，甚至世界滅亡，真正嘅元兇就係你地黃金力量！所以唔好假惺惺重建香港啦，你地一樣只係想建立你地自己嘅黃金力量皇國！」




 
金先生說：「起碼我地有真正嘅民主！！」
 
「真正嘅民主？你地黃金力量為左達到政治目的，出賣過幾多無辜市民？推佢地上前比鎮壓部隊打，甚至唔比佢地還手，一有咩政治上嘅負面消息，就同佢地班無辜市民劃清界線，由得佢地自生自滅！你地嘅民主，根本就只有你地嘅信徒先會擁有！」左先生嘲諷說
 
「咁你地呢？你地政府打住關注民生嘅旗號迫害市民，以廉潔守法之名貪污犯法！用盡手段榨乾市民嘅血汗，然後自己就坐享其成！你地共產黨所謂嘅共產，只係共有人民嘅財產！」金先生反駁
 
 
就在他們互相指責之時，基地外突然傳來「隆隆」巨響，整個基地也隨之劇烈搖晃，眾人一時間都失去平衡跌在地上！接著基地隨著一陣鏗鏘的金屬屈曲聲向一邊傾側，房間的牆壁也開始破裂，海水「嘩啦嘩啦」地湧進來，緊急警告燈也在此時和警鐘一同起動。
 
 
「．．．時候到啦！」左先生拔出配槍打算攻擊
 
就在千鈞一髮之時，流尚卻比左先生更快，一槍擊中了左先生持槍的手！
 




金先生大感意外：「你．．．」
 
「唔好講咁多啦！保護獲選者先啦！」流尚繼續向左先生和他的士兵開火，流主也立即加入戰團
 
「二五仔！！」左先生大怒，士兵們也開火還擊
 
 
眾人立即躲到掩護物後面小心反擊，由於基地仍然不時左右搖晃，加上獲選者有嗶嗶小子的協助，有驚無險總算成功把士兵們收拾。
 
流尚走到受傷坐在地上的左先生前，用槍指著他．．．
 
 
「哼．．．流尚，你以為你殺左我就係保護香港、保護世界咩？」左先生笑說
 
流尚沒有回答。




 
「你同流主都係政府嘅間諜，如果政府有罪、共產黨有罪，你兩兄弟都無可能置身事外。」左先生說
 
流尚仍然沉默。
 
「你覺得共產黨唔人道，所以轉向幫黃金力量、幫美國？我話你知，美國其實同我地都一樣！我地有核彈，佢地都有，我地嘅F.E.V.亦係佢地開發架咋！」左先生說
 
流尚依然一語不發。
 
「你真係以為幫黃金力量實行雪藏計劃，香港就有救呀？你真係以為黃金力量係好人，係真心為香港爭取民主呀？．．．流尚、流主，我話你地知，咩人都好．．．搞得政治嘅，一定唔會係好人。」左先生盯著流尚和流主說
 
「．．．多謝你提醒。」流尚說罷，便向左先生的頭顱開了數槍，了結了他的生命
 
金先生慢慢走向流尚說：「．．．最後你地都作出左正確嘅決定。」
 




 
豈料，流尚突然舉槍向獲選者開槍！由於此舉太過突然，即使獲選者配戴了嗶嗶小子也來不及回避，就這樣被打穿了頭顱！金先生也被眼前的突發變化嚇了一跳，在他回神反應過來之時，流尚也已經送他子彈了．．．
 
 
「尚！！你做咩呀！？」流主大感不惑
 
「．．．無時間解釋啦，你幫我檢查下雪藏裝置仲可唔可以正常運作。」流尚說著，便拿了一些衣服和一台全新的嗶嗶小子收進雪藏裝置的暗格
 
「．．．仲可以正常運作。」流主檢查著說
 
「入面呢？有無咩損毀？」流尚走到控制雪藏裝置的電腦前
 
流主走進狹窄的雪藏裝置裡查看：「．．．無穿無爛．．．尚，你到底想點呀．．．」
 
 




就在此時，雪藏裝置的門突然關上，把流主困住了！！
 
 
「做咩．．．？尚！做咩會咁嘅！？」流主大驚
 
流尚慢慢走到雪藏裝置前：「主．．．對唔住．．．」
 
「尚！！尚！！」流主猛力拍打裝置在門上的小圓窗
 
「主．．．我得你一個細佬．．．我無辦法唔咁做．．．．．．其實市長講得啱，我地兩兄弟真係難辭其咎．．．即使我地只係比人利用．．．」
 
「尚！！開門呀！！！」
 
「唔好憎恨任何人．．．更加唔好憎恨自己．．．．．．一定要重建香港．．．彌補我地犯左嘅錯．．．代替獲選者執行任務．．．執行屬於香港人嘅任務．．．」
 
「尚！！尚呀．．．！！」
 
「你係香港最後嘅希望．．．未來．．．．．．靠你啦．．．」
 
 
雪藏裝置的小圓窗慢慢關上，帶著一身罪孽的流尚也慢慢被海水吞噬．．．整個香港，也在一下子被人類咎由自取的無情戰火摧毀．．．．．．