異塵餘生香港2277: 54 自己的秘密

流主在其他人的協助下，終於成功回憶起自己的記憶。可是．．．他的身份卻竟然是．．．
 
 
尚嘆道：「唉．．．入左嚟黃金力量差唔多成年，但係都仲係刮唔到啲咩真係重要嘅資料．．．都唔知點同上面交代．．．」
 
「有咩咪報咩囉。」流主更換了上衣，看看牆上的掛鐘說：「你都快啲啦，再唔行就遲到啦。」
 
 
他們離開房間，沿著一條明亮整潔的長廊來到一個滿大的會議室。會議室的中央是一張灰白色、U字形的長桌，而桌子後的牆上則掛著一個巨大屏幕。
 




流主他們進入會議室後便隨便找個位置坐下來。而會議室內其他的座位和空間也很快被一個個同樣繫著黃金色絲帶的人填滿，寧靜的會議室一下子變得非常熱鬧。
 
 
然後，一個載著眼鏡的老年男人走到屏幕前，放聲說：「大家靜一靜，會議要開始啦。」
 
 
果然，眾人也頓時閉起嘴巴，肅然認真起來。
 
 
「聽日就係包圍政總示威嘅第一日，大家記得一定要依照原定計劃，盡量牽制示威者嘅行動，同時將行動嘅時間拉長。」眼鏡老人說




 
其中一個黃金力量的成員問：「我想確認一下，幾時先會行動升級？」
 
眼鏡老人說：「我地會觀察住整個行動嘅情況，適當時候自然會通知各位。其他時候無論發生咩事，都要盡力控制示威者，唔可以比佢地做出任何衝擊行動。」
 
另一個成員問：「但係照以往經驗，班解放軍同埋政府請嘅流氓都一定會借機襲擊我地．．．就算係咁都唔升級？」
 
眼鏡老人有點不耐煩：「咁你可以企後啲，叫其他示威者行最前擋架嘛。總之無指示，絕對唔可以升級。我地今次示威嘅目的係分散政府注意，記住，犧牲小我完成大我。」
 
流主不悅地悄悄跟尚說：「．．．根本就係犧牲市民嚟達到佢地自己嘅陰謀。」




 
尚點頭說：「我地一定要設法查到佢地究竟打算用示威嚟掩飾啲咩嘢．．．等政府可以有所提防。」
 
眼鏡老人說：「咁聽日大家一定要緊守崗位，祝大家一切順利。散會。」
 
 
會議結束，眾人紛紛魚貫離開。
 
 
不過此時，眼鏡老人卻叫住了流主他們：「流主、流尚，你地過一過嚟。」
 
「有咩事呀金先生？」流尚問
 
「你地兩兄弟都已經加入左我地黃金力量一段時間，我亦都留意到你地兩個都資質聰敏，一個能文，一個能武。」金先生笑說
 




流主摸摸頭笑說：「唔敢當．．．」
 
「我希望可以更加好好發揮你地嘅所長．．．聽日嘅示威行動你唔使參與，我有更重要嘅任務比你地。」金先生說
 
 
流主和流尚不禁互相對望了一下，大感喜出望外。
 
然後，他們便跟著金先生離開會議室，乘搭升降機來到黃金力量的地下基地。穿過了裝置有自動炮台的大堂和數條走廊，他們走到一道金屬大門前。
 
金先生在大門旁邊的電子鎖上輸入密碼，大門隨即徐徐打開。意想不到，門的後面原來是一個實驗室，而且更擺放了不少高科技的儀器。但是最吸引亦最使流主和流尚大感驚訝的，並不是這些不知名儀器，而是擠滿了實驗室的各種軍火武器！實彈武器、能量武器、大型武器，應有盡有．．．流主此刻才深知自己一直都小看了黃金力量極力隱藏的軍事力量．．．
 
 
金先生察覺到流主和流尚那驚訝表情，不禁笑說：「哈哈．．．你地無諗過我地有咁多軍火呢？」
 
流尚忍不住問：「啲軍火．．．係點樣運入嚟架？？」




 
「哈哈，其實唔難。啲武器全部都係送到嚟先組裝，所以好容易就可以掩人耳目，而且唔好唔記得我地基地係喺貨櫃碼頭，要走私同偷運軍火，有邊度好得過依度？你說對不對？」金先生笑說
 
流主汗顏問：「但係．．．咁樣係犯法個喎．．．」
 
「哼．．．」金先生竊笑：「唔諗住犯法，你點樣反抗政府？」
 
流尚看著工作中的科學家，問：「咁金先生帶我地嚟，係想我地做啲咩？」
 
金先生凝重起來：「我有兩個好重要嘅任務，想你地參與。」金先生對著流尚續說：「嚟自美國Vault-Tec嘅物資聽日就會抵達，當中有一啲非常之重要嘅高科技儀器，我想你去幫手。」
 
流尚有點驚訝：「美國Vault-Tec！？」
 
金先生點一點頭：「嗯，其他嘅嘢之後再交代。」他續對流主說：「而流主，我想你加入我地嘅秘密行動小隊。」
 




流主按捺著自己興奮的心情問：「秘密行動小隊！？．．．一直都無聽過有個咁嘅小隊嘅？」
 
「依啲係我地嘅內部成員先知嘅嘢，事實上，我地如果唔係人手唔夠得緊要，都唔會冒險比你地入嚟組織內部。所以．．．希望你地唔好令我失望，香港甚至全地球嘅未來，可能就係掌握喺我地手上。」金先生滿腔真誠說
 
「啊．．．．．．嗯。」然而，流主還未知道事實的嚴重性
 
 
流主和流尚遵從金先生的指示，加入了黃金力量的內部組織。可是本以為因此可以更接近黃金力量底蘊的他們，卻相反發現了政府背後的一些秘密．．．
 
 
正在小隊會議室討論任務的流主大吃一驚：「病毒！？」
 
秘密行動小隊領隊的中年男人說：「無錯，我地嘅偵察隊員喺新界北影到解放軍運送左一批外形好先進嘅貨櫃入一間工廠，而嗰啲貨櫃已經比我地嘅科學家證實左係專為運送病毒同毒氣依類有害嘅化學物質而設。」
 
其中一個隊員問：「咁究竟係咩病毒？」




 
領隊說：「依樣就係我想你地小隊去查嘅嘢，示威行動已經成功拖延左幾日，襯宜家行動如火如荼，係潛入嘅最好機會。」
 
 
另一邊廂，流尚終於得知，原來由美國Vault-Tec送來的是數十台嗶嗶小子、一台不知道有何目的的雪藏裝置，還有一個據說蘊藏著足以建造一座城市所需的基本資源，名為伊甸園創造器的白色金屬公事包。
 
 
「其實．．．個雪藏裝置有咩用呢？」流尚問另一個同樣在埋頭苦幹地組裝著雪藏裝置的科學家
 
科學家看了流尚一眼，說：「．．．你都入左嚟咁耐，應該都唔怕話你知嘅。其實依個雪藏裝置係一個．．．以防不測嘅後備計劃。」
 
流尚疑問：「後備計劃？咩意思？」
 
科學家說：「阿拉斯加嘅戰役你應該知道啦？比中國解放軍佔領左嘅安克拉治前線比美國攞返之後，有消息傳美國已經有發射核彈嘅準備。」
 
流尚大感震驚：「你話發射核彈！？．．．謠言嚟嘅啫下話？我地黃金力量同美國同一陣線個喎．．．如果佢地向中國發射核彈．．．香港都．．．」
 
科學家嘆息：「唉．．．邊有咩同唔同一陣線．．．我地只係有共同敵人先至互相利用。至於核彈係咪謠言．．．我地就係為左試探真偽，先向美國要求解救方法，點知佢地就送左部Vault-Tec秘密研究嘅雪藏裝置同埋伊甸園創造器過嚟．．．．．．咁你話個消息係真定假？」