誰能逼我將就: Ch.98

「純呀，你阿爸唔見咗。佢尋日朝早出咗去之後，就冇再返嚟喇。」因為阿媽的這個來電，我用盡生平最快的速度，趕回屯門老家。

「我返咗去兩日，點解會咁嘅媽？」這兩天有點忙，所以我回到陳七家那邊過夜。想不到，最不想發生的事就出現了。

「我都唔知，佢執咗幾件衫，仲有櫃入面拎咗萬幾蚊走。」

「拎錢同衫…護照同回鄉卡呢？」

阿媽聽到我這個問題，立馬就跑到睡房去檢查。





「喺度…佢冇拎到。」

「阿爸唔係離開香港，佢只係離開屋企…早幾日仲好正常，到底阿爸發生咩事？」

「阿純，你覺唔覺得阿權嚟我地屋企嗰日開始，你阿爸就開始變返古怪？」

「我知，權叔喺樓下坐車時，仲同我講咗一啲事。」

我把權叔跟我說的話，完完整整的跟阿媽說一遍。





「我都覺得佢有古怪喇…嗚…」阿媽慌了，這次我也覺得有點害怕。前幾次阿爸還有點預兆可以看得到，但這一次的無聲無息，來得有點恐怖。

不過在阿媽面前，我還是要保持鎮定。

「阿媽，其實都只係一日半。我宜家落新蒲崗睇睇阿爸有冇去嗰邊，妳等我電話。」

「好，咁妳快啲去。」

我急步的走出大門，阿媽又突然把我叫停。





「阿純。」

「點呀阿媽？」

「唔好俾你大哥知，屋企已經好亂。」阿媽含著淚跟我說。

「阿媽放心，我大個仔。所有事等我解決，我幫妳搵阿爸返嚟。」

我跳上的士，四十五分鐘後來到了新蒲崗。我走回阿爸當日霸佔的那個位置，之前屬於阿爸的東西已經不見了。我看著旁邊的幾位露宿者，硬著頭皮的問：

「請問之前瞓喺度嗰位叔叔，有冇返嚟呀？」

我不敢跟他們說那個是我爸爸，因為很丟臉。我身為他的兒子，最後竟任由他流落到街上。

那幾個露宿者看了我一眼，卻沒有搭理我。我也沒有強逼他們，因為他們不見得會為我帶來什麼線索。





我失望的走到一旁，苦想著有什麼辦法可以找到阿爸。我漫無目的地拿著手機，不斷重覆撥打阿爸的電話，但換來都是同一句說話。

「你所打嘅電話已經關機，請你遲啲再打過……」

還有一個星期不夠，我便要代表香港隊出賽。我身上還有兩張當日的入場票，是我為阿爸阿媽準備的。

其實阿爸已經不是第一次離家，情理上我們還沒到需要很緊張的時間；但不知道為什麼，這一次的感覺特別心寒。

我想到阿爸過往的事，我模擬著那種感受，我知道不是我能夠承受的。

我呆坐了兩個小時，最後還是想不到方法；時間還沒到四十八小時，我不能報警。

最後，阿媽忍不住又來電。





「純，你搵唔搵到阿爸呀？」

「我搵唔到，阿媽。」

「我地係咪唔報得警住？」

「係，未夠時間。」

電話入面又是一片沉寂，直到阿媽突然吐出一句：

「純，你覺得子俊同你阿爸單獨見面嗰十五分鐘，會唔會就係令你阿爸又離開屋企嘅原因？」