誰能逼我將就: Ch.97

「阿權，你嚟咗呀？」權叔人已經站在面前，阿爸就算再錯愕，也總要做得體面一點。

「係呀，我見搵你唔到，咪上嚟搵你囉。上到嚟月蓉就話我知，你電話壞咗喇。」權叔親切的迎上。我看見阿爸尷尬的收起平素幫助行動的登山棒，然後整個人明顯地聳起，做出一個抖擻的樣子。

「阿爸，今日對腳又痛呀？今朝係咪行山行得太耐，所以又整傷舊患呀？」我立即上前，避免阿爸自己獨個面對這種氣氛。

但阿爸好像不太喜歡。

我上前參扶他時，他故意挪開我的手。果然說：「我冇事，唔使扶。」





阿媽向我打了個眼色，我立即把兩手收回。

阿爸坐到沙發一端，表情還是沒有太寬容。權叔在阿爸身旁一直的說，阿爸也是仍舊有一句沒一句的說著。我跟阿媽在這一個小時內，在家裡東翻西倒的找些幹活，盡量不想阿爸知道我們正在注視他。

但無論我們有多不在意，權叔有多熱情，阿爸還是愈來愈沉默。我有一種不安的預感，因為阿爸這段時間的情緒都很明顯，開心就是說話，不開心就一句不說。

我一直的等待著，直到權叔說：「咁好啦，我都走先喇。阿信你個電話整好就打返俾我，葉導搵我飲茶，你都一齊去。」

「好呀，再約。」





「好，走先再見。」

「走喇權叔？」

「係呀，月蓉我走先喇。」

「唔食餐飯呀權哥？」

「唔喇，約咗個仔食，下次先。」





「好，阿純你陪權返落樓下。」

「嗯。」

我跟權叔來到樓下，快要走到車站時，權叔突然跟我說：

「純仔，阿信應該有多少心事，得閒同阿爸傾多啲偈。」

「知道喇權叔。」

「好啦，咁我自己坐車得喇，你都返去啦。」

「哦，再見權叔。」

權叔轉身離去，我看著他這個陌生的背影，心裡卻像有千言萬語。





「權叔。」我嘴巴比思想還要快，還未想到有什麼話說，便已叫停了權叔。

「點呀，純仔？」權叔回頭，和藹可親的說。

「阿爸以前係點架？」

權叔聽到我這個問題，低頭像是思考了一會。

「佢以前好勤力，好鐘意片場。佢同我講，片場有好多事都可以重頭嚟過，佈景可以搭過；拍得唔好嘅鏡頭可以再拍，唔夠光嘅地方，加多支燈就得。

不過今日我見返佢，我都好詫異。我完全搵唔到，以前同我一齊喺片場出生入死嘅戴韋信。佢……宜家就好似冇咗活力咁，你係佢個仔，你記得好好地照顧阿爸。」

「我知道喇，多謝你權叔。」





「再見。」

那一晚回家，阿爸沒有吃晚飯，我跟阿媽憂心得要死，但是不能戳破什麼，只可以空著急。

果然，三天後，阿爸不見了。