誰能逼我將就: Ch.96

「呢個係細仔呀？係咪踢波嗰個呀？」權叔向阿媽笑著問。

「係呀，啱啱好命學人入咗香港隊囉，哈哈。」傳統的父母稱讚自己的兒女時，總是那麼突兀。

「阿媽，咩叫學人入香港隊？哈哈。」我調侃阿媽，權叔在旁邊也大笑著。

「權叔，好耐冇見呀。」我主動的向權叔揮手。

「冇見好多年喇真係，你就叻仔啦。」





「唔係呀，都唔知有冇得出場啦。」

「都係吖，代表成個香港喎，七百萬人揀二十幾個喎，好架勢喇。」

「多謝權叔，權叔你今日又會上嚟嘅？約咗阿爸呀？」

「我就係搵唔到你阿爸，打極電話俾佢都飛線；啱先你媽咪先話俾我知，原來你阿爸個電話壞咗。」阿媽跟我打個眼色，暗示我要小心說話。

「係呀，叫佢換電話又話唔好。」





「你阿爸一向都慳啦，以前開工飯盒有多佢就一定食多個，話食埋夜晚嗰餐，慳返幾廿蚊喎。」

「阿爸冇講過呀哈哈，我問佢燈光師要做咩佢都唔話我知。」

阿媽端上熱茶來，我跟權叔在沙發上暢快的聊到他跟阿爸以前的事。

「你問你阿爸呢啲佢未必知，佢唔係做燈光師呢邊工作。」

權叔說到這一句，令我有點意外。「燈光師這邊的工作」大概有多少個意思？





「不過佢夠勤力，所以成個劇組啲人都好鐘意佢。

等等先呀，我有電話。」權叔拿著電話走到一旁。

「喂，點呀葉導，啱啱橫店返香港呀？套影搞宣傳未？聽講你下一套拍黃渤喎，女一有未呀？嘩，呢個近況幾好喎，要唔要千二萬？人仔呀，都抵俾啦。」

我聽著權叔跟朋友的電話溝通，慢慢意識到一個分別。

我從來沒有聽過阿爸，在家中會接到這一類，跟電影界別的高層人士電話。大多數的，都是一些留下開工時間就掛線的流水式來電。

權叔一開口的閱歷，也是我從來沒有在阿爸身上感受過的一種氣場。那種無法比較的感覺，令我有點不安。

為什麼都是同一種行業的職業，會有那麼大的落差？是性格使然？但如果到了這個層次的話，怎樣內斂也會感受得到吧。

「唔好意思，講到邊呀？係喎阿信退休之後隻腳點呀？」權叔繼續的問，然後我決定去求証一件事。





「佢唔錯呀，係隻腳麻煩少少，做唔返燈光師囉。」我故意的說，在觀察權叔的表情。

「阿信個位唔係燈光師，佢做唔慣呀。」

「唔係燈光師？咁阿爸係做咩呀？」

「電工囉。」

「電工？電工即係做咩？」

「咁咪即係我設計啲燈點出，阿信咪幫我搬下燈轉下位囉。」

「電工…？」是什麼一回事？





「係呀，搬搬抬抬好辛苦，有時你阿爸仲會兼職做埋場記，垃圾都要倒埋，好勤力呀佢。」

權叔嘴裡像是稱讚的說話，聽在我跟阿媽耳中卻有點難受。阿爸從來都把自己在片場的位置，說得很被尊重，不是權叔說的這一回事。

「我之前移民，搵咗另一個燈光師同佢夾。不過佢返咗兩日工，就嫌人地太新唔夠料。冇幾耐，就同我講要退休算數。」

權叔淡然的幾句，我卻覺得有如晴天霹靂。我一直以為阿爸賴以光榮的一個地方，原來都是阿爸自己的一個幻境。

我終於明白，阿爸為什麼不帶我到片場的原因。這時我想起一件往事，某一年暑假阿爸帶我到他隔壁片場當暑期工，也不肯讓我到他那邊幫手。阿爸一直不想知道，他真正的工作是什麼。

職業無分貴賤，但沒有父親願意，讓兒子看到他兼職場務去倒垃圾吧。那些跟天皇巨星的合照，根本就是阿爸的麻醉藥；來麻醉因為子俊叔叔和外公帶給他的自卑生活，又或者是大哥跟他一生一世的矛盾關係。

這時，大門傳來聲音。門打開，是阿爸回來。

「阿信，終於見到你喇。」權叔熱情的一個問好，換來阿爸一個愕然的表情。從這個表情，跟阿爸沒有接權叔電話的事裡面來看，我幾乎肯定阿爸不太想看見權叔在這個時期出現在我們的身邊。





因為，這會令阿爸更加自卑。