誰能逼我將就: Ch.77

「阿媽。」我走上前，在阿媽跟子俊叔叔之前出現。

阿媽看見我的第一眼，表情又急又怪；她有點狼狽的愣住，直到懂得回過神來向我說：

「點解你會嚟？」

「我見好耐冇同妳食飯，所以咪…嚟搵妳。」我靦腆回答同時，也留意著旁邊的子俊叔叔。

「子俊，呢個我細仔，哲純。」阿媽向子俊叔叔介紹我後，又看著我說：「純，呢個係我同阿爸嘅舊朋友，叫子俊叔叔。」





「子俊叔叔。」

「咁大個仔喇。」子俊叔叔拍拍我的手臂，禮貌地向我打招呼。

「阿媽，妳今晚同唔同我食飯，我問下大哥佢有冇時間。」

「唔使，你大哥唔得閒，我搵過佢。」阿媽突然帶點憤怒的說，我閉嘴，可能她還是生我的氣，只是礙於外人在場不好發作。

「月蓉，咁妳同個仔食飯啦，我再俾電話妳。」





「嗯，咁你自己都保重。」我看見阿媽拉拉子俊叔叔的手，態度有點親近。我的腦海中閃過幾個百可能性，阿媽已經五十多歲了，不會現在才搞婚外情吧？

我跟阿媽看著子俊叔叔離開，目送他的背影一直遠去。

「阿媽，對唔住。」子俊叔叔走後，我也沒有浪費時間，此行的目的我很清楚。跟阿媽的關係一直都很好，一句道歉對我來說是很簡單的事情。

「係咪英琦叫你嚟？」阿媽果然是個有閱歷的人，才一下子就把盲點都突破了。

「佢打電話俾我，話妳同阿爸鬧交。」





我以為阿媽會教訓我，甚至是罵我，但她沒有。她走到旁邊的一張長椅，像無力的坐下。

「純，你阿爸嘅問題，愈來愈嚴重。」阿媽主動向我說出，她煩惱的原因。

「佢最近點？」

「頭先位子俊叔叔，就係我以前男朋友，你都應該聽過公公講佢嘅事。」

「我知道，我認得之前張相個樣。」

「子俊叔叔返咗香港，佢搵我有小小事，我唔你阿爸誤會，所以冇同佢講。點知早幾日，我約咗子俊飲茶，俾你阿爸撞到。」阿媽說到這，好像有點難言之隱。

這事令我覺得難過，也讓我想起當日我看見李英琦跟其他男人外出的事。無論是什麼原因，男人在不知情的情況下看到這種情況，也會很不好受。

「阿爸鬧得好勁？」





「冇，只不過佢燒咗好多相，同埋我地以前嘅信。」

原來那天我在家裡看見阿爸燒信件，是源於阿媽的這件事。阿爸生活中本來就已經把六親差不多斷掉，阿媽就是他最親近的人。現在發生這件事，阿爸的情況會壞到什麼程度？

「咁佢有冇返屋企訓？」

「好少，佢故意避開我，但我唔知點樣同佢解釋。」

「阿媽，點解妳唔同大哥講？」

阿媽聽到我這問題，遲疑了幾秒後說：「你大哥同你阿爸一向都感情唔算太好，就算俾你大哥知都冇用。你都唔好同大哥講，免得佢又擔心我，你個衰仔呢幾個月冇陪我，都係你大哥陪我咋。」

「知喇，我唔同大哥講。」





「我會自己同阿爸傾，你唔使搵阿爸講呀知嘛？」

「我就算搵阿爸，阿爸都唔一定同我傾。不過阿媽，頭先你話有嘢要同阿爸解釋，係解釋乜嘢事？」

「子俊叔叔因為有病，所以我嗰日先同佢聚舊。」

「係咩病？」

「癌症，末期癌症。」阿媽看著我說。