誰能逼我將就: Ch.76

「做咩事？」

「做咩事？佢地鬧交鬧到世伯冇返屋企幾日呀你知唔知呀？」

「大哥冇同我講嘅？」

「唔好再問呢啲廢話好唔好，伯母今日搵過我，同我講唔開心，同世伯嘅問題唔知點處理。世伯退休之後嘅問題你都知，點解你仲可以走咗去咁耐？」

面對李英琦的責罵，我的確是責無旁貸。





「我打算等佢地下咗啖氣先，最近球會比較忙。」我也不知道自己在解釋什麼，反正就是想模糊過去。

「幾個月喇，你冇見佢地點知佢地啖氣下咗未？唔好咁多廢話，聽日去搵伯母啦。」

李英琦掛了線，我拿著電話在車站前愣住。

三個月沒有見面，我有幻想過李英琦找我是出於其他原因。這不代表我還愛她，只是八年感情遺下來的，總應該可以更多東西吧。

原來，我們已經真正的不相往來。





回家後，我跟墨說出了李英琦找我的原因。

「咁你聽日記得要去睇伯母，要唔要我陪你？」墨建議，但爸媽本來就不喜歡我跟她一起，我可以怎樣處理？

「都係唔好喇，伯母未必想見到我。」墨續說。

「我自己去得喇，聽晚同妳食飯好唔好？」

「好呀，我聽日都要開個會，最近好多因為退休而出現嘅家庭個案。我都要諗下點搞多啲活動，去幫佢地解決唔識面對嘅難題，都應該會好忙。」





「咁早啲休息。」

「好，再見。」

掛線後，我拿著電話發呆。跟墨的對話看似正常，但總覺得氣氛不同了。我腦內不時想起唐爾棋的說話，我跟墨之間，到底隔著了多少東西？

「點呀，見家長見成點呀？」陳七在房間內走出來，這幾個月的生活下來，他成為了我的好伙伴。

「幾好呀。」

「講個好消息你知，聽完唔使請我食飯。」

「做咩呀你轉會去巴塞呀？」我調侃他，他佯裝要踢我。

「我去港隊練波，偉豪話Kim sir問佢，覺得你打中場打成點。下輪世界盃外圍賽對馬爾代夫，可能會選你入去試下。」





「真係架？」聽到這消息，我開心得整個人跳起。

「我呃你做咩？」

「嘩，好勁呀，好似細個聽到麥馬拿文同科拿入國家隊咁。」

「我聽偉豪講咋，唔知係唔係真架。」

「當住係先啦，開心下都好。」

這一晚的心情是複雜的，短短時間之內，我嚐到了生活上的甜酸苦辣。但我最憂心的，還是阿媽的情況。

第二天，我早上的操練非常用功，內心一想到陳七跟我說的話，我就幻想金判坤那個有品味的韓國大叔會在附近偷看我的實力。





完成操練之後，我來到阿媽的中醫館。我在大門前虛擬了數篇我應該對她說的事，還有那個最真誠的道歉。

終於，我等到阿媽下班，我看著她推開大門準備離開。正當我準備上前時，一位大叔緊隨著阿媽的身後。

我認得他，是照片中那位歐子俊叔叔。