《相交的平行線》: 第十六話
「世界上有什麼不會失去的東西嗎？我相信有，你也最好相信。」──一九七三的彈珠玩具
「其實你地點解變左咁嘅？」 淇淇問。
「嘻嘻，咁就要由你地走左之後開始啦。」 J me說道。
「係你地走左之後，我聽你地講我去同J me講送佢番屋企，開頭佢話唔駛，咁我就堅持左一陣，佢終於就範。」肥仔解釋說。
「哈哈，醒目，都話男人要厚面皮嫁啦。」 高佬說。
「係啦係啦，你最醒，俾人講埋好唔好？」 呀喬說。
「係係，跟著同我行行下，我地肚餓，所以就去左食飯。」肥仔續道。
「超，擺明又係自己肚餓。」 我說。
「冇力點溝女呀，大哥。食完飯之後，我們就去左附近嘅海旁傾心事。我地傾番由宿營開始，傾番呢一個月嘅點點滴滴，我地並唔係無心意，而只係差一個契機。一個開始嘅契機。」 肥仔說。
「而係呢個時候我講講下喊左出嚟，因為一直有個人對自己好嘅感覺真係好好。講真，我當時真係好怕，怕日後佢唔會再對我咁好，所以我係K房拒絕左佢。點知係海旁嘅時候，佢見我喊哂咁，突然係後面環抱著我，我覺得好安心。有時候，女仔需要嘅，並唔係花言巧語，亦都唔係驚喜，只係有個人係後面緊緊咁攬住自己。」 J me感觸的說。
此時肥仔在她身旁安慰著她。看到就個情況，我突然想起我們的開始。我們也是在海旁，互相敞開心窗，將彼此放進去。
「之後你地就約今日去迪迪尼而唔番學？」 我問。
「嗯，冇錯，可以咁講。」
「你知唔知我地周圍搵你呀，你個死肥仔，講聲駛死咩。」高佬說。
「係，係我錯。而家無事咪得囉。」
飯後，我們各自散去。我便送淇淇回家。
「真估唔到肥仔佢得左。」 我說著
「都估到嫁啦。我之前同J me 傾過。J me係個啲好需要人關心嘅人。而肥仔成個月都粘住佢。久而久之，感情就有啦。」
「係喎，華生，跟得我多，聰明左喎。」
「我先唔係華生囉，如果你係福爾摩斯嘅嘅話，我寧願做Irene Adler，起碼你呢個福爾摩斯唔會對我失去興趣先啦。」
「Oh, woman of mysterious. 雖然係對手，但想法差唔多嘅人。但我並唔覺得咁樣會好，想法太相似嘅人係會容易得到共嗚，但亦會因為一啲小事而分手囉。」
「估唔到你咁諗。但其實你知唔知有好多人話我地嘅性格好唔似呀。」
「啱啱知。」
「雖然都過左兩日啦，但我地仍係佢地嘅話題。」
「放心啦，香港人好快會唔記得嫁啦。」
「唔係呢個問題呀，而係佢地不斷對你評頭品足咁，我會……」
「我明啦，但我唔介意喎，你都知死懶鬼一向都懶得理佢地啦。」
「雖然姐……」
「總之你當咩都聽唔到，專心搞好你個event 仲好啦。」
「嗯。我仲有樣野想知。」
「咩呢？」
「你今日叫我同willy少啲接觸，係講真嫁？」
「嗯，我講真嫁。」
「你真係咁介意？」
「因為我真係唔太鍾諗佢，做咩咁問？」
「冇，問下姐，唔好呷醋啦，佢搶唔走我嫁。」
「係係。」
「我到啦，聽日我會早啲番去，唔駛等我啦。」
「嗯好啦，你知係邊搵我啦。」
「聽日見。」
接著數天如常的回到學校，如常的坐在位上，如常的經歷非常沈悶的試題，妳如常的忙著忙著，一切也像如常一樣。沒想到，所有平靜的如常，只是暴風雨的前夕所醞釀的假象。好不容易的來到星期五，來到了周未，我知道只消過了下周一，妳便忙完妳的事。但沒想到，我對妳的思念，一天比一天的多，導致今天並沒有什麼心情，繼續如常。我煩惱著……
「喂，呀單。」高佬說。
「點呀？」
「做咩發哂呆咁？」
「冇，諗緊野姐。」
「又思春？」
「嘻，可以話係又可以話唔係。」
「仲諗緊呀汰同你講嘅野呀？。」
「嗯。」
「咪咁啦，淇淇係做野姐，佢地點會噠番著先得嫁。」
「如果唔係，佢點會呢幾日面都唔見一面先得嫁。」
「你諗得太多啦，你都知淇淇做野幾博嫁啦，佢攰姐。」 高佬試圖找著籍口的安慰我。
「我知你想安慰我，但我知道發生咩事。」
「當局者迷呀，你會唔會同佢傾下會好啲。」
「嗯，我有打算。」
「咁咪掂囉，咁你有冇打算同我講呀汰話左啲咩你知姐？」
「唉，好啦，同你講啦，八掛。但係我冇諗住講兩次，放學叫埋呀喬啦。」
「Okay.」
飯後，如常的流連在圖書館內。但今天，我卻異常分心，許是思念你，許是煩惱著。手上的書翻來翻去，我卻只是凝視著圖書館的大門，盼望著妳的身影，盼望著妳的掛念。可笑的是，世界卻總是事與願違。我獨個兒的坐在圖書館內，縱使舒適，但不能阻止我去想妳。
洪亮的上課鐘聲響起，劃破了圖書館的寧靜，更劃破了我的盼望。
我心裡也許走失了寧靜，我想逃避一切，想一去了之，想出去走走，尋找自己的樂園。但，離開真的能找到嗎。罷了，不想再想，我很累。
「喂，呀喬話等多佢一陣。」高佬說。
「好。」
我們坐在窗旁。無聊的我等著呀喬的來臨。窗外的樹葉並未泛黃，夏天還在。樹下的學生背著校門遠去。此刻，一股怒意在心頭湧上。那時，我並未跟高佬多說，只是走出了班房並向著校門方向。
「喂，你去邊呀？」
走到校門前，遙望著妳行走的方向。可惜妳們已經失去了蹤影。
「搵咩呀你。」
「冇，我見到淇淇同willy一齊走左姐。」
「下？你肯定冇睇錯？」
「應該冇啦。」 我已經冷靜了，妳們應該只是去買晚會用的用具，我並沒多心，只是有點介懷。
其後人齊了，我便把呀汰跟我說的，告訴高佬他們倆。
「呀汰同我講，係開會嘅第一日，willy已經盡力咁親近淇淇。包括將工作分配俾其他人，而佢自己就同淇淇兩個負責所有出街買嘢嘅工作， 等佢地有更多獨處嘅時間。起初淇淇都只係有少少唔好意思，但係係星期四放學之後，呀汰攪掂自己個part，翻屋企個陣，佢看到淇淇跟willy好親密咁係餐廳入面行出黎，然後送左淇淇返屋企。」
「Wow. 你講真嫁？」 呀喬首先的開口。
「嗯，應該冇錯啦。」
「咁你有冇問過佢呀。」
「其實我呢幾日都見唔到佢，佢每晚都同我講會早啲翻學校，晏啲走，唔駛等佢。」
「whatsapp 呢？」
「冇問。」
「做咩唔問呀？」
「er…我都唔知。」
「咁你而家係度做咩呀，唔去搵佢問清楚？」
「佢應該同左willy出左去，我見佢地冇揹袋，應該會返嚟。」
「咁我地係度等佢啦。」
「唔好啦，我等得啦，你地走先啦。」
「okay，有咩打俾我地，我地會即刻出嚟。」 高佬說。
「嗯。」
「咁你諗住點做，對質？」
「冇咁嚴重嘅我諗，只係想傾下姐。」
「最好啦，唔好衝動呀。」 呀喬臨走時再三叮觸我。
「佢應該唔會嘅，如果佢衝動嘅話就唔會搞到咁啦。」
「咁又係。」
他們走了之後，我坐在學校的有蓋操場，看著室外的籃球場。那夜沒有中午的熱，涼了點，但又不凍。望著星月楚楚，夜濃風輕的夜景，我不禁想起第一天宿營過的夜，看過的每一顆星宿，陪同妳走過的夜行路，說過的每一句名言，談過的每一本書。我不想面對，我想離開，但我更不想失去妳。