《相交的平行線》: 第十五話
「愛是一種甜蜜的痛苦，真誠的愛情永不是走一條平坦的道路。」──莎士比亞
「哈哈，白痴，佢搶唔走嫁。有嘅只係你自己放棄。」
「係咩？咁我唔駛做咁多野啦。」
「下，你做左啲咩呀？」 妳驚訝的看著我。
「傻啦，我講笑咋。」
「唔好笑囉，我警告你呀，唔好做埋啲無謂野呀，俾多啲信心啦。」
「係係。我知啦我知啦，公主大人。」
「知就好啦，同埋之後放學唔駛等我啦，我應該都會好夜。」
「只係番學第二日咋喎。」
「唔係呀，我要同老師傾卸任嘅野呀，9月中之前要搞掂呀。」
「好犀利呀。」我抑揚頓挫般道。
「你都得嫁，你懶咋嘛。」
「傻啦，我邊會咁有心機做呀。」
「好啦好啦。」
「我放學應該會去搵肥仔睇吓佢點，冇哂聲氣，有啲擔心。」我說。
「咁有咩消息就whatsapp我啦，唔好太掛住我。」妳笑道。
「嘻嘻，有啲難喎。」
說真的，我們整個暑假都是形影不離，令到現在一點小事情，就好像變得有點「妳有妳嘅生活，我繼續我嘅忙碌」的感覺……。興許是習慣了吧，又或者是你的關係，令我沒有一刻不掛念著，不想起妳。每遇到一件事，就彷彿妳在我身邊問著「點解嘅」，「我想知呀」……。倘若怠惰是我的代名詞，那麼妳便會是好奇，而妳的好奇，令我每更也思念著妳。
「喂，去搵肥仔囉。」 高佬說。
「嗯，好，等我一陣，執埋啲野先。」
「駛唔駛等埋淇淇？」
「唔駛啦，佢好忙呀，佢仲要搞童軍聯合中秋晚會既野。呀喬呢？」
「佢要練長跑呀，要準備學屆 。」
「咁快？你呢，唔駛練波咩？」
「邊有咁快，10月先開始。佢田徑要練多啲。因為同區間學校太勁啦。」
「哦，行得。」
此時，有個熟悉，又十分了解的陌生人意氣風發的走過來。我立刻叮囑高佬冷靜，生怕他會壞了大事。其實，真沒想到他會主動前來。看來，即將來臨的童軍聯合中秋晚會就是他所籌備我倆撕殺的舞台。
「Hello, 你就係呀單啦？」
「Hi，willy。」
「聽講你係宿營上面大放異彩喎，可惜我去唔到啦，如果唔係就好玩啦。」
「可惜，不過你出年仲有機會嘅。」
「都係，相信你都知我地童軍同女童軍有joint event呀可，有冇興趣幫手呀？」
「童軍人才多的是，多我一個唔多，少我一個唔少啦。」
「唔可以咁講，聽你係宿營嘅野，我諗你會幫到我地手。玩遊戲咁叻，搞遊戲一定冇問題啦。」
「我明白，但我對童軍帽冇興趣喎，因為我唔鍾意隻顏色。」
「我又唔係叫你入童軍，幫幫手姐。」他那時有點怒氣的說。
「你搵呀汰啦，佢俾我更加能夠幫到你啦。」
「Okay，我會再搵佢，你都考慮下。」
「睇下點，再見啦。」
「Bye，good luck with that.」他轉身時，流露出一點得手的笑容就走了。
我立刻whatsapp呀汰告知事情。
「喂，做咩拒絕佢呢？你可以睇實佢同同淇淇一齊嘛。」
「傻啦，冇用嫁，佢係成個event嘅主席，所有野由佢分配，我去到只會被當眾受辱。」
「估唔到你會諗咁多喎。」
「我都唔想，之不過我更加唔想冇左佢。」
「救命呀，好肉麻呀，你真係變左好多。」
「變到點呀？」
「冇咁懶。」
「嘻。」
之後，我們打電話給肥仔，一直無人接聽，所以我們只好四處去找他了。
「我地係邊搵先？」
「上去屋企摷佢先啦。」
如是者，我們到了他家門口，我們不斷的按門鈴，等了一分鐘，還是沒有人應門。
「唔掂喎，冇人喎。」高佬說。
「咁呀，佢應該唔會去左網吧啦，冇理由打機唔叫埋我地嫁嘛，而J me今日又冇番，會唔會咁巧合係同一時間冇返，定係佢地約埋左一齊唔番呀？」
「有可能，咁點呀？」
「係好大可能，肥仔唔番學可以做咩姐，一係打波，一係打機。咁打波一定搵埋你，而家又唔係屋企，我諗都係佢地約埋左一齊唔番。」
「咁點搵呀。」
「冇呀，但如果約埋一齊就姐係佢成功左啦，都冇咩好擔心。」
「咁走啦，食下午茶，我肚餓啦。」
「嗯，好。」
所以，我們離開了肥仔家，便前往地鐵站旁邊的商場找餐廳。我看了看手錶，大約六時，我發了訊息給妳，妳說妳尚在校園，我說不如回校接公主，雖然妳說過不用，但我還是放心不下。還是找找妳好了。
我跟高佬回到學校，他就立即去了田徑場找呀喬，而我在操場坐著。看到幽靜的課室，吵鬧的操場，彷彿就像是暑假般，令我不禁回想了暑假的校園，初遇妳的一天。不過分隔數個小時，我是否已經懷念你了……
「呆哂咁，掛住人呀？」 呀喬問。
「咁快嘅你地？」
「我去到個時佢啱啱走得嘛。」
「淇淇未走得呀？」 呀喬問。
「應該未啦。」
「我留左個訊息俾佢。」
「咁我地等下啦。」高佬說。
等了一會，我們便看到妳步向我們，但同時，willy也在妳身旁。那時，一陣醋意從心中散發，我在妒忌？我在呷醋？同時我也在想，他會怎樣做呢？
「點解你地friend番嫁？」呀喬一面驚訝的問。
「咁我地lunch break個陣傾過，佢都明以前自己有幾衰，同我講以前同我拍拖個時一腳搭兩船，所以道左個歉，而家只係想盡力咁搞好個中秋晚會囉，唔好諗咁多野。咁我地又一齊做野喎，我都係啱啱係教員室門口撞到佢咋。咪傾左幾句囉。」
「而家劇情發生得真係快。」呀喬道。
「咩劇情呀，你真係當劇集咁睇嫁喎。」
「梗係啦，直頭風峰路轉過啲劇集呀，寫都寫唔切呀。」
「你冇呷醋呀嘛。」 妳跟我說。
「有呀。」 我還是照直答。
「嘻嘻，俾你緊張下我都好呀。」
「我不太喜歡佢。」
「唉唷，唔好再呷醋啦。」
「以後盡量同佢少啲接觸可以嗎？」
「好好，我少接觸佢，唔好再嬲啦。笑番啦。」
我苦笑了下作回應。
「我地要再諗下有咩計劃。」 我俏俏的跟高佬說
「點解呢，之前我俾你個啲一腳踏幾船嘅相冇用咩。」
「冇，因為佢知道我擁有佢以前的資訊。所以在淇淇面前先破後立。令我地本身嘅相冇用。而佢揀呢個時候去坦白，是因為時間都過左一個月，加上淇淇蜜運緊多數唔介意過去。時間掌握得好好。」
「咁點呀？」
「冇呀，再諗計啦。」
但當我們一行人走到地鐵站旁的時候，赫然的看向地鐵站出口方向，只見肥仔跟J me手牽著手，兩人都戴著米奇老鼠頭飾一同步出地鐵站。於是，我們便尾隨他們，發現他們打算去餐廳準備吃晚餐時，我們四人便上前「搭枱」了。
「你兩個好呀，唔番學一齊去迪迪尼。」妳搶先說道。
他們對於我們的突然出現而不知所以。
「點…點解你地會係度嫁？」肥仔嚇的口吃發作了。
「哦，姐係而家呢到只係俾啲有異性冇人性嘅人嚟嫁啦，我地唔出現得嫁？」 高佬不屑的道。
「唔係，只係冇諗過咁快俾你地見到姐。」
「若要人不知，除非己莫為。」 我道。
「係係，我知我衰啦。」
「等我地仲咁擔心你兩個添。」呀喬加入俾點壓力。
「好啦好啦，係我錯，呢餐我嘅好未？」
「哈哈，好野，肥仔萬歲。」
看到他們的模樣，我不禁想起剛與妳拍拖的時候。我突然聲稱妳是我女朋友，嚇得妳不知所措，但驚惶中卻帶點會心微笑，這正是幸福的表現。他們現在正正跟妳之前的樣子如出一辙。雖然willy的出現令我有點擔憂，憂心我會失去妳。但也許妳說得對，我也要給點信心。因為愛是一種甜蜜的痛苦，真誠的愛情永不是一條平坦的道路。
但沒想到的，我所擔心的正逐漸變成事實。