《相交的平行線》: 第六話
“When you have eliminated the impossible, whatever remains, however improbable, must be the truth?”──The Sign of the Four
我和淇淇就一同回到大房間加入其他人今晚的話動。
「今晚我地就玩結尾故啦，而我只係會講出個故事嘅結局，大家可以問我任何closed-ended嘅問題，而我只會搭係、唔係同冇關係，你地就由零碎嘅線索推敲翻成個故事出黎。」呀泰說道。
「咁可以問幾多題呀？」肥仔問道。
「直到你地有人推敲到成個故事為止。」
「咁其實唔難。」Blue抬了抬眉，輕描淡寫的道。
「咁就期待大家嘅表現啦。」
「咁我開題啦，故事嘅結局係死者裸體死左。兇手係殺害完死者之後，去左佢屋企。大家可以開始問問題啦。」呀達沒有再賣關子，直接開始了遊戲。
「死者係咪係屋企被殺害呀？」我搶先問道。
「唔係。」呀達輕輕搖了搖頭，微笑著看向眾人。
「點呀福爾摩斯，有頭緒啦？」耳邊一陣騷麻，傳來妳的耳語。
「你問咩先，關於你嘅願望定遊戲先？」
「我知你想要貼士，但我係唔會俾你嫁。」妳得意的道。
「咁遊戲呢就有啲頭緒，但仲eliminate緊其他可能性。」仿佛知道你想要的答案，我故意避而不談。
「兇手係咪有預謀嘅？」綠組的一個男生問道。
「係。」
「兇手係咪去死者屋企搵嘢？」J me想了很久終於問出第一個問道。
「唔係。」
「兇手同死者互相認識？」我問。
「好問題，唔係。」呀達眼前一亮。
「哈，有趣。咁兇手係殺手？」我開始確認心中所想了。
「唔係。」
「兇手係連環殺手？」
「唔係。」
「有趣有趣。」我不禁為這個故事讚嘆道。
「點解有趣呀？」妳問道。
「因為兇手有預謀咁殺一個唔識嘅人。一個人之所以會殺另一個人，係為左得到某啲野，而個樣野可以係錢，可以係快感，可以係為左其他人嘅生命。所有嘅原因都係為左reward，而呢個就係所謂嘅動機。係人與人嘅相處嘅過程會增加得到嘅可能性，但如果只係兩個互相不相識嘅話，咁就只係剩低錢啦。」我答道。
「咁所以你問係咪連環殺手，從而減低左可能性，咁我明啦。」妳恍然大悟說著。
這刻妳埋首苦惱，不斷地思考兇手的動機。看見妳這樣，反而令我越來越想知道妳所許下的願望，想知道妳想得到的是什麼。因為一個人會許願跟殺人一樣，只是動機驅使罷了；不同的是，前者靠神，後者靠己。這樣看來，兇手還比較獨立。
說穿了，離不開貪婪二字。正因為貪婪，被神趕出伊甸園；正因為貪婪，地球被破壞；正因為貪婪，出現戰爭。而亦正因為貪婪，推進了人類文明，科技的發展，超脫了自然界的汰弱留強，創造出屬於人的法則，繼續成長，進化。多麼諷刺的一件事。
「你做咩呆左咁，係咪諗到啲咩呀？」妳一語將我拉回這個世界。
「唔係呀，放空姐。」
「留心啲啦，啱啱呀泰話兇手唔係去死者屋企搵野呀。」
「當然啦，死者又唔係係屋企死，又點會係去死者屋……咪住！」我突然驚覺。
一個兇手點解會去一個死者嘅屋企唔走，而增加自己的指向性呢？
「兇手係自己入屋嘅？」我問道
「不是，睇黎你有突破啦喎。」呀達喜道。
「係死者嘅屋企人開門嘅？」
「是。」
「係伴侶？」
「不是。」
「係父母？」
「是。」
「嘻，我估到啦。」
原來真實是這樣。
「咁係咩呀？」淇淇問我。
「唔話你知，除非你俾貼士我啦。」我借機要脅道。
「車，好叻咩，我自己夠會諗到。」淇淇佯裝怒道
「真係唔要？」
「我係唔會俾你咁易諗到嫁！哼！俾貼士你咪等於話你知。」淇淇臉上泛起一抹紅暈。
「多謝妳嘅貼士喎，你呢句野幫我解答左好多疑問。」我笑道。
「哼！衰人，唔理你呀。哼！」淇淇慌張的表情，似是真怒了。
「喂，你激嬲左人啦。真係呀，就算你識答咁多問題，你始終都係唔明女仔嘅心意嘅。」高佬拉左我埋一邊話。
「敢問師父如何是好？」面對這個情況，我確實沒轍了，只好虛心求教。
高佬向我一番細語，語畢。「師父當真？」我的臉禁不著一紅，疑惑的道。
「好啦，唔好嬲啦，我最多講哂我知嘅野俾你聽啦。」
「哼！」淇淇依舊背向著我。
我向高佬投以求救的眼神。他的口形大概是說「哼，姐係好呀」。
「下！好一個翻譯機。」我一臉驚訝的想著。
「呀淇淇女神呀，我知我衰，我知我賤，但係咁喎，你唔理我嘅話，悶死你呀。」說完之後，我點了一點妳的鼻。
「你幾時學得咁口花嫁。」淇淇轉身疑惑道。
「啱啱囉。」我指指遠方的高佬。
「哼！」淇淇又丟下一句。
「你到底得唔得嫁……」我再向高佬投以絕望的眼神，高佬做手勢示意我繼續。
「噢，咁其實呢，諗一諗點解兇手要去死者屋企留低證據啦，原因就係因為同佢嘅動機有關。試問一個陌生人點解會去你屋企呢，如果唔係偷情，就應該會係同職業有關，有幾可會有陌生人去你屋企呀？而開門嘅並唔係伴侶，咁兇手就一定係職業需要先至去。」我解釋道。
「兇手係唔係警察？」淇淇聽完我解釋之後問呀達。
「唔係。」
「唔係呀，衰人，你錯左呀。」妳的粉拳不放過任何機會向我身上招呼著。
「咁你試下問動機同職業有冇關係。」
「兇手嘅職業同動機有關？」
「係。」
「兇手為左係職業上得到方便而殺人。」
「係。」
「咁係咩職業呀衰人？」人字落下的同時，我的右手失去知覺了。
「嘶…銷…售員。」
「點解呢？」
「因為呢個世界除左銷售員，警察同調查人員會三唔識七咁走上人地屋企之外，就真係冇了。」
「咁你又知唔係調查人員？」
「調查啲咩要殺人呀？」我反問
「咁賣啲咩要殺人呀？」妳再反問
「可能為左佣金，賣啲咩就視乎個屍體點樣。」
「屍體死時的狀況同動機有關係？」我問。
「係。」
「屍體係咪完整？」
「係。」
「死者係被姦殺？」肥仔問。
「唔係。」
「死者被劫殺？」肥仔再問。
「唔係。」
「死者被謀殺之後，被搶去所有野所以衣衫不整？」我問。
「係。」
我係到諗，假如兇手搶唒死者嘅野之後，但係佢唔用鑰匙開門，反而去禁鐘。好明顯係想sell野，但係人岩岩死，又冇唒啲野，咁冇理由sell野嫁……
「點解呢……點解呢？」我碎碎唸著。
「點呀？福爾摩斯都解決唔到嘅問題呀？」淇淇笑道。
「係呀。任我再高智商，看透世事，始終都會有事係睇唔透嫁。」我捋了捋那不存在的鬍鬚。
「而家就係度扮謙虛呀？」
「嘻嘻，本身都好謙虛嫁我。」
「你呢句已經反證左你啦。白痴。」
當你說我白痴的時候，我真係覺得你好可愛。輕輕而又清脆的聲音，帶著嬌柔的語調。看著妳的臉，完全被你吸引著。入伍表還有麼？
「你成日都呆左嘅？唔會係變成沉睡嘅小五郎下嘛？」妳笑說著。
「哈，當然唔係啦，我諗謎底已經解開啦。」我裝作柯南的招牌動作。
「係咩呀係咩呀？」妳驚奇的向我問。
「我諗我陣間先再揭開迷底啦，你再諗下啦。我去整個杯麵先，幫妳整埋好無？」
「好呀，唔該。」
「咦，唔估啦？你好似有好多線索嫁？」當我走出去時呀泰問我。
「唔係呀，我諗我已估到啦，但係肚餓想食野先姐。」
「哈哈，你想等佢地玩多陣？」
「都可以咁講嘅。」
「咁好啦。」
於是乎，我整完杯麵之後，番去大房之前，望著岩岩係你我之上嘅星空，總覺得似幻又似真。我同你，係兩個世界嘅人，我鐘意靜，你一大班人。妳同我，如果我唔同高佬黎宿營既話，或者永遠都唔會相遇，就好似平行線咁。唔知係上天開嘅玩笑定係命運嘅注定，令我地籍著一個個嘅球體不斷咁靠近。
在房門前，我看到妳在緊張的講電話，面上那表露出來的怒意，究竟是什麼東西令妳如此氣憤，當妳發現我的身影時，那點怒意被你巧妙地壓制了起來，向我笑了笑。我還是先進去等妳好了。
「冇事嘛？」我問著剛進來的淇淇。
「會有咩事喎，白痴嘅福爾摩斯。」妳的語氣好像不如平常的輕鬆。
但我又能怎樣？不宣也許是當下最好的選擇。
「冇事就最好啦。」勉強的笑了笑。
「你諗得太多啦，唔係每件事都有兇手嫁嘛。」妳敲一敲我的頭。
「都係嘅。」我摸著剛剛被妳敲的地方，有點痛。
但我總覺得有大事發生了在妳身上，儘管妳壓抑了怒氣，之不過那傷感的情緒卻散溢出來。這是錯覺……我希望是我的錯覺。
罷了，不想了。