（適量甜）是咁的，我竟然響公園執到本Sex note: 98

聽聞女人既第六感好靈，其實男人都唔差，起碼我中左一次咁多。
 
無錯，因為載住我地既司機就係上次個比我既condom阿叔。
 
「咁岩啊哥仔，今日幫個老死接更都比我撞到你。」阿叔望住倒後鏡，笑笑口咁講。
 
「係lo..」唉，我都唔知算好彩定唔好彩。
 
阿叔：「同女朋友仔去迪士尼呀？」
 


我同MK琳不約而同咁拍左下sofa，一齊講。
 
「佢唔係我女朋友！」「我條仔撚有咁矮呀！」
 
「唉，你兩個…」阿叔笑左笑，然後繼續專心搾車。
 
如果自修室故入面個阿叔係瘋癲得黎又帶幾分cutie，咁呢個阿叔比我既感覺就好似愛肌堅入面個的士鬍鬚佬…
 
佢突然剎車，轉個靚彎，差d鏟上行人路，好彩最後兜得切…
 


阿叔：「sor，香港腳發作…」
 
MK琳定一定驚，忍唔住爆左句：「屌，用愛肌堅啦！」
 
呢個時候，我無意中發現車頭鏡吊住左一隻fing下fing下既唐老鴨同佢條女（唔記咩名）。
 
我：「乜你鍾意唐老鴨架？」
 
阿叔：「係呀，鴨呢個種生物係好值得人讚頌，所以我留左兩隻黎做吉祥物。」
 


我：「喔…你隻唐老母幾趣緻呀。」
 
MK琳一掌車落我個頭鬧：「個隻叫daisy呀！你就唐老母！」
 
阿叔：「哎呀，乜原來佢都有名架。」

過左差唔多成個鐘，架車終於駛到我個區。
 
MK琳同佢傾得好投契，話題大概圍繞住一堆我完全未聽過既迪士尼卡通人物，印象中除左鄧梓峰，同森巴之外其他我一個都唔識。
 
終於，架車行到我屋企附近既街口位。
 
MK琳：「文叔，前面seven停車呀。」
 
無錯，我早過MK琳識阿叔，但佢竟然比我快一步知道阿叔個名，你可以想像到佢地到底有幾好傾。


 
文叔：「無問題。」
 
我問MK琳：「點解唔翻屋企呢？」
 
佢答：「屌，老娘都未盡興，梗係要買打酒翻去啤啤佢啦！」
 
講得出呢句，佢一定唔知自己醉左之後有幾恐怖…
 
架車停定之後，佢一個人入左seven買野，淨翻我同阿叔響架車到。
 
宜家明明得我地兩個大男人，但係竟然有種說不出的尷尬。
 
文叔先開口：「唉，後生仔，貪玩係正常既…」
 


「哈哈…係呀係呀。」sor，我真係唔知點回應…
 
文叔：「但佢係好女仔黎架，你要好好珍惜人先得架。」
 
我：「我有呀。」
 
文叔忽然大聲講：「你有？有就唔會一腳踏兩船啦！」
 
我嚇左一跳，成個人挨曬落後座。呢條友究竟咩來頭啊…
 
我：「咁你都知？」
 
文叔：「我唔知架，9 up都up中wo，哈哈。」
 
我即刻鬆左口氣，原來係亂9up當秘笈，我幾驚佢個次天眼通，見到莉莉絲啊..


 
「早響啦，嚇死我咩..」 我抹左額汗。
 
文叔一面認真咁講：「咪話阿叔唔提你呀，一腳踏兩船會一世柯分叉尿。」
 
我：「有無咁誇張呀…」
 
文叔：「唔信啊，睇下點。」
 
呢個時候，MK琳捧住打啤酒入黎，文叔即刻望翻前面。
 
佢將打啤酒放到我手上，問：「矮仔，你焗完桑拿？做咩出曬汗既？」
 
我：「無，無野。」
 


MK琳：「神神秘秘咁，開車啦文叔。」
 
「好。」文叔又沉重咁響倒後鏡到望左我一眼，先慢慢開車。
 
唔驚唔覺，架車終於去到我屋企樓下，我地同文叔講左聲再見就落車上樓。
 
臨走前，佢同上次一樣，不知不覺咁響找錢比我既時候塞多個condom入我手。
 
MK琳揮手講：「byebye，文叔，下次見。」
 
「好既。」文叔答完MK琳，然後同我講：「你記得帶…」
 
「記得記得…」我響佢未講前stop左佢，如果比MK琳聽到都唔知點解釋。
 
跟住，我地一人執住一邊膠袋，慢慢行翻屋企…
 
呢個時候，電話突然響起，我擰起手一睇。
 
竟然係嘉欣打黎？