（適量甜）是咁的，我竟然響公園執到本Sex note: 99

我手都震曬咁擰起部電話。屌，唔會比阿叔一語成讖下話，咁我呢世咪要柯分叉尿？
 
「聽電話啦。」 MK琳fing左幾下個膠袋提我。
 
我：「喔…」
 
我gum落個綠制，講：「喂。」
 
嘉欣：「浩仔？你翻到屋企未？」
 


我：「就到，宜家同王雅琳響樓下。」
 
嘉欣：「快d上黎啦，我整左蛋糕呀！」
 
我：「下，really？」
 
嘉欣：「嗯，雅琳生日點可以無蛋糕架。」
 
我：「OK，咁我地上黎先。」
 


嘉欣：「記得唔好同雅琳講，我想比個surprise佢。」
 
我：「嗯。」
 
我cut線，MK琳一臉好奇咁望住我問：「邊個打黎？」
 
我：「無，嘉欣上左屋企姐。」
 
佢若有所思咁點點頭，眼神複雜咁望住袋啤酒，有d無奈得黎又帶點可惜，我都唔知點形容好。
 


跟住，我慢慢行翻入大堂，直到搭完lift都無講過半句野。
 
去到屋企門口，我敲幾下門，裡面無反應。
 
我同MK琳對視左一眼，然後我慢慢推開度門….
 
成個廳漆黑一片，一d聲都無。
 
其實我已經知道咩事，但MK琳仲係懵盛盛咁望黎望去，搵緊其他人既身影。
 
突然間，屋裡既燈光亮起。
 
嘉欣響房入面捧住個蛋糕，慢慢行出黎，上面插住幾支蠟燭。
 
Happy Birthday to you


Happy Birthday to you
Happy Birthday to 雅琳
Happy Birthday to you！
 
嘉欣笑住咁唱起生日歌，阿妹響後面象徵式咁拍手，目無表情咁hea唱。
 
我慢半拍咁放低袋啤酒，再跟住一齊唱。
 
MK琳眼定定咁望住個蛋糕，好似想講野，但又講唔出聲。
 
唱完歌之後，嘉欣將個蛋糕放響檯面，然後笑住咁行到MK琳面前。
 
嘉欣：「雅琳，祝你生日快樂。」
 
MK琳紅都面曬咁dup低頭答：「多謝…」


 
嘉欣：「哈哈，唔洗。你係浩仔表妹，但又同我地同年，所以我插左16支蠟燭，希望岩數啦。」
 
MK琳低頭沉默左幾秒，然後拖起嘉欣隻手答：「哈哈，都係嘉欣你醒，唔似個矮仔。」
 
屌，咁都要踩我一腳。
 
我：「講咁多野，食左蛋糕先啦！」
 
等陣，莉莉絲呢？我望下周圍，搜尋金髮美女既身影，然後無意中瞄到阿妹間房個衣櫃微微咁震左兩下。
 
阿妹食左幾塊就話飽，拎住半塊蛋糕一早翻左房入面，淨翻我，嘉欣同MK琳三個響廳。
 
老老實實，其實我就最唔鍾意呢種三人行既局面，大家可以想像下我既位置有幾尷尬…
 


同嘉欣親熱又怕得失MK琳，同MK琳打情罵俏又怕得失耶穌。
 
所以當佢地響度吹水既時候，我大部分時間都保持沉默，有野問我就回兩句，無野就收爹等佢地慢慢吹。
 
MK琳勾住嘉欣手臂問：「你唔係話要補習咩，點解無啦啦會上黎幫我慶祝？」
 
嘉欣笑住答：「哈哈，我呃你地咋嘛。其實我係一早就翻左屋企整蛋糕，想比個surprise你呀嘛。你鐘唔鐘意？」
 
「多謝嘉欣，我超超超超超鍾意！」 MK琳笑笑口咁挨落嘉欣膊頭。
 
女人呢種生物就係咁奇怪，一個蛋糕已經可以將兩個人既距離拉近。
 
當我發緊夢既時候，嘉欣突然用食指點下我個鼻，然後又嬲又笑咁望住我。
 
嘉欣：「你隻大頭蝦，連表妹生日都唔記得買蛋糕。」


 
我：「車，我先係先知亞伯拉漢再世，一早就估到你會整架啦。」
 
嘉欣：「哈哈，係亞伯拉罕呀！仲搏嘴。」
 
我：「事但啦，兩個親戚黎既，差唔多姐。」
 
我地食完蛋糕，一齊執乾淨d紙碟交叉之後，MK琳話咁開心一定要啤啤佢。
 
「老娘今日好開心，我地飲！」下一秒，佢已經舉起罐啤酒狂隊。
 
我細細聲響嘉欣耳邊講：「你好似未飲過酒架wo….得唔得架？」
 
「唔緊要啦…我諗飲少少無問題既。」嘉欣試左細細啖已經澀到瞇起對眼。
 
一邊吹水，一邊飲，我地用左成晚總算清左打啤酒。
 
戰績如下：
 
我:4.5支
 
MK琳:7支
 
嘉欣：0.5支
 
無錯，因為嘉欣唔識飲走，所以飲左半支已經攤左響我大脾。第一次飲算係OK架啦。
 
至於MK琳就更加唔洗講，發酒瘟真係基本，又唱你把我灌醉，又跳gangnam style，顛顛下仲差d嘔…
 
好彩我夠醒目，一早推左佢入廁所，任佢嘔到飽，唔洗好似上次咁嘔落我到。
 
我就比較有酒品，但四罐真係有d多，搞到我都有少少wing wing地。
 
之後，我將嘉欣同MK琳搬上床，然後自己翻廳熄燈訓。
 
五秒之後，我先發覺自己on9左…
 
 
仆你個街，呢個唔係起雙飛既好機會咩，你仲同我做君子？


ps.話說聽日就一百集。從來無諗過寫到呢度都仲有人睇，多謝各位讀者既支持:)