弗羅里達: 第三場 ( 客廳 ) 3.2

(文媽和細文入)
 
細文: Sam哥。
 
Samuel: 文媽。
 
細文: 我入房換衫先。
 
文媽: 你地又嘈交呀? 今次又為左d乜呀?
 




Samuel: 你問佢啦!
 
(Samuel 離開)
 
文媽: 今次又為乜呀?
 
Ivy: 佢話我俾壓力佢，又話要諗下仲愛唔愛我。
 
文媽: 點解佢會咁講架?
 




Ivy: 因為部智能手機……。
 
文媽: 呢d高科技嘢我唔識架喎。
 
Ivy: 咁……
 
文媽: 不如我同你講番d識架啦。兩個人一齊係唔應該有壓力，點解佢會話你俾壓力佢呀?
 
Ivy: 我只不過係將佢講過d嘢記錄落黎之嘛。
 




文媽: 真係咁簡單?
 
Ivy: 仲有send返俾佢，作個證據。
 
文媽: 咩嘢證據?
 
Ivy: 佢唔即時否定我個記錄，咪承認佢講過，等佢要兌現，無得抵賴。
 
文媽: 哈哈，原來係咁。你講到好似入賬咁嘅。我都明白男人好多時講過唔算數，但如果佢真係唔算數咁又點呢? 你攞左你d證據出黎又點呢? 你話捉姦就要證據啫。其實，一個男人愛你嘅話，佢就會自動將佢講過嘅嘢兌現。就算佢唔記得左，當你提佢嘅時候，只要佢願意，佢都會兌現。
      你咁樣記低哂落黎，佢地會覺得你唔信佢，佢地會覺得自己好無臉架。
 
Ivy: 真嘅?
 
文媽: 當然喇。
 




Ivy: 不過……
 
文媽: 不過咩呀? 我問你一句，你係咪好愛佢?
 
Ivy: 係，但我唔知佢仲愛唔愛我，佢頭先話要諗下先。
 
文媽: 傻女黎嘅，佢話諗下先咪即係仲愛你囉，如果唔愛，一早就講左唔愛喇。
 
Ivy: Um…..
 
文媽: 記住，兩個人相處最緊要係互相信任，互相遷就。如果你唔信佢，佢真係講個事實俾你聽都無用啦，因為你就只係唔信。兩個人一齊唔係你就下我，我就下你，各有各堅持自己嘅立場，都係唔會長久。但係「遷就」都要係出於真心，如果唔係，一遇到事就搵番之前條剌出黎翻舊賬都係無意思。
 
Ivy: 搵番d舊嘢出黎講果個係佢。原來佢一直不滿我同d餸影相。
 
文媽: 同d餸影相? 影黎做乜?




 
Ivy: 用手機放上網俾朋友睇囉。
 
文媽: 點解要俾朋友睇呀?
 
Ivy: 咁朋友咪知我食緊乜囉。
 
文媽: 朋友知你食緊乜咁又點?
 
Ivy: Err…..
 
文媽: 人地話科技令人做少左野，得閒左。我就話剛剛相反，令人忙左就真。以前d人行街都不知幾輕鬆。宜家! 你睇下個個係條街度都低哂頭望住部智能手機，幾咁忙，真係唔知佢地忙d乜。有d連過馬路都低哂頭咁望住，我見到佢地都「牙煙」。所以呢，我唔俾我d仔女用智能手機架。
     有時有d嘢，無必要嘅咪做少d囉。或者，Samuel 就係唔想你咁忙呢。
 
Ivy: 咁又真係好似出左部智能手機之後，俾少左時間佢嘅。




 
文媽: 喇~ 你都話啦，佢搵番d舊嘢黎講，都唔開心。大家一有事就應該攞出黎講，千褀唔好積埋積埋。
 
Ivy: 咁佢積埋唔講，我都控制唔到架喎。
 
文媽: 男人係鐘意將d嘢收收埋埋嘅。你試下同佢溝通多d，佢講出對你嘅不滿時，你就唔好發脾氣先，慢慢傾，咁佢漸漸就應該會做到架啦。
 
Ivy: 宜家做乜好似全部都要我先? 男人就全無問題。
 
文媽: 你信唔信文媽先?
 
Ivy: 緊係信啦，唔信都唔會次次聽你咁耐。
 
文媽: 我以過來人嘅身份同你講，男人呢，其實就好似個大細路咁。我地女人有母愛嘛，照顧一下佢地。但大前題係佢唔過份，唔出軌。
 




Ivy: 我開始有少少明啦。
 
文媽: 講樣嘢你知，其實Samuel 真係好愛你架。
 
Ivy: 你點知?
 
文媽: 你知啦，佢成日同大文講心事架嘛，有次大文同我講，Samuel靜雞雞儲緊錢，想買隻結婚介指俾你。
 
Ivy: 真嘅?
 
文媽: 文媽呃你有得分咩?
 
Ivy: 不過宜家咁，點算?
 
文媽: 去搵佢囉，你知佢一嬲就去左邊度嫁。
 
Ivy: 去左樓下個公園坐。
 
文媽: 記得平心靜氣咁同佢傾，一人讓一步喇。
 
Ivy: 明白喇，文媽。多謝你!