弗羅里達: 第三場 ( 客廳 ) 3.1

第三場 ( 客廳 )
人物: Samuel, Ivy, 文媽, 細文, 阿堅, 程若真
 
Samuel: 你真係對住部手機仲多過對住我架喎。
 
Ivy: 但我鐘意攬住你多過攬住部手機喎。
 
Samuel: 真嘅? 咁你快d過黎攬下我先。
 
Ivy: 你等我寫埋先啦，好快。




 
Samuel: 你寫乜啫? 你唔攬我，咁我攬你架啦。
 
Ivy: 唔好啦，呢個廳黎架。
 
Samuel: 廳又點啫? 我屋企黎架嘛。
 
Ivy: 係你同好多個人嘅屋企呀。
 
(Samuel攞出手機。)




Samuel: 妳又whatsapp我?
 
Ivy: 做番d記錄之嘛。
 
Samuel: 我上次已經講明囉，我唔想收到呢d記錄，宜家做乜啫? 乜都要留個記錄。
 
Ivy: send whatsapp 都唔洗錢。
 
Samuel: 呢個唔係錢嘅問題，我次次講過d乜，你就係whatsapp度記低，事後你就搵番d記錄出黎話我講過唔算數。
 




Ivy: 你算數嘅話，怕乜我做記錄?
 
Samuel: 我同你係拍緊拖，唔係返緊工，你做乜攪到好似做會議記錄咁? 你知唔知我返工好辛苦，好大壓力架啦。地鐡就差唔多半年加一次，屋租仲離譜，係咁升，但人工呢? 人工就唔見佢升得咁多同咁快喎，如果唔係，我都唔洗係呢度同人一齊住。我同你一齊係想放鬆，唔係想緊張。
 
Ivy: 咩喎，咁你頭先應承人地下個月會同我去Disneyland，我咪寫底佢囉。
 
Samuel: 你寫低唔係問題，問題係你send俾我做乜?
 
Ivy: 證據囉，你未即時回覆話反對，咪代表你係講過囉。
 
Samuel: 俾你激死，我就係唔想咁，我同你拍緊拖，講乜證據啫!!!宜家要上庭呀? 要做呈堂證供呀? 仲有呀，我地講兩句，你又對住個手機寫寫寫，咁有乜意思啫?
 
Ivy: 咁你成日講過d野又唔算數，又話自己無講過，我先會咁做之嘛。
 
Samuel: 就算你寫左係whatsapp，但我唔認，咁又點呀? 你係咪同我分手呀?




 
Ivy: 分手?
 
Samuel: 係呀，分手呀。
 
Ivy: 你要同我分手? 我跟左你咁耐，又唔介意你窮，又唔介意你住埋d咁嘅地方。你居然話同我分手?
 
Samuel: 但我介意你用whatsapp。真係好煩。
 
Ivy: 當初又係你叫我用whatsapp嘅，你話好方面，好好用，又唔洗錢，上到網就可以係咁send msg俾你。你宜家話我用whatssapp好煩?
 
Samuel: 講正確d，唔係煩，係好大壓力。
 
Ivy: 最大嘅壓力，我都無俾過你。
 




Samuel: 係乜?
 
Ivy: 迫你結婚囉，我一直都無介意過你同唔同我結婚。我真係鐘意你，我唔洗你用一張婚書去證明。
 
Samuel: 你真係講得好聽，你估你迫到架咩? 你迫我咪同你分囉，不過係分手個分。
 
Ivy: 你!!!
 
Samuel: 你咩你?
 
Ivy: 你話過新科技可以拉近我地嘅距離，但原來係將我地個距離拉遠。
 
Samuel: 拉遠我地嘅係你嘅行為，個whatsapp本身無問題。我唔講whatsapp，我都可以講facebook，每次食飯前，你都要影張相upload，影乜叉啫? 好地地食餐飯唔得嘅，係要攪咁多嘢。黎一碟，你又影一碟。你知唔知人地肚餓架? 影都算喇，食食下又睇下個facebook，有人覆你張相，你又去覆。我都唔知你同緊facebook d 人食飯定同緊我食飯?
 
Ivy: 原來你對我有咁多不滿，你好嘢。




 
Samuel: 我唔係對你不滿，我係對你嘅行為不滿呀。
 
Ivy: 咁有乜分別?
 
Samuel: 分別就係，我無對你個樣不滿，我無對你個外表不滿，我只係對你做埋d嘢不滿。我地日常對話之嘛，你要乜乜叉都做記錄，做證據? 我地食碗十五蚊嘅雲吞麵之嘛，你要乜叉影相upload上facebook啫?
 
Ivy: 咁碗雲吞麵個賣相靚呀嘛。
 
Samuel: 你自從出左部智能手機，你就變哂。
 
Ivy: 咁個個女仔都係咁架啦。
 
Samuel: 個個都係咁唔代表你都要係咁，如果你同個個一樣，我鐘意個個喇，我洗乜鐘意你啫?
 




Ivy: 你現家個意思係你唔再鐘意我喇?
 
Samuel: 我無咁講過。
 
Ivy: 咁你仲鐘唔鐘意我呀?
 
Samuel: 呢個問題，我要冷靜去諗下。
 
Ivy: 下?!