如果你既人生好似打機一樣……: 8.1, 過年既時侯，利是入面放朱古力金幣既人正仆街

我懷住小小失落既心情番屋企。
打開道門，發現開左燈，即係我老母已經番左黎。
 
「咦？你去左邊到玩呀？」
「去左朋友屋企食飯姐……」
 
我放低野，然後即刻打開電腦。
 
「又去呀方屋企玩？」
「係呀係呀……」我求其答佢，只要佢認為我係去左呀方屋企的話，咁佢就唔會問太多。




但如果比佢知道我去左個女同學屋企的話，咁我就有排煩。
 
桌面出現，我即刻打開瀏覽器、msn同埋online game。
一登入左msn，水牛即刻搵我。
 
「今日目標達成？」
「無呀，剩係得一個。」
 
「繼續努力。」
 




如果比水牛知道我上左呀飯屋企，唔知佢會有咩反應。
不過諗深一層，都係唔比佢知好過。
 
而係online game入面，所有團員都係到好興奮咁傾計聽日既野。
我地非常罕有地無開副本，反而係主城某一角企晒係到，簡稱曬馬。
 
咁樣同聊天室有乜分別？的確無，當一隻game玩到咁上下既時侯，去到最後真正支持住你玩落去既，其實係人際關係。
 
「聽日十一點，屯門西鐵站等。」
講依句話既係團長鱷魚。




 
我地團大部份人都住新界，所以好自然地，集合地點都揀左係新界。
 
「正，我行幾步路就到。」團員－追風。近戰DPS，打副本無乜用，但係用黎打工會戰殺人老母一流。
因此你都會估到佢既性格都係比較好勇鬥狠既一類。
 
「希望我唔會遲到啦＞＜」蜜糖，已介紹過。團醫，與毒撚方曖昧中，預測關係將於明天結束。
「係喎，唔記得你住柴灣架添＞３＜」夜鶯，即毒撚方。
 
見到一堆表情橫飛，我不自覺咁握實在個拳頭。
 
「Ok.」一名一直係團裡面有出現但係唔多出聲既刺客，文雀。佢無存在感既性格同佢做既職業配起上黎簡直係一絕。
 
然後有幾條友打左一大行睇到都覺得辛苦既字，錯別字又多，又一九九九，但係內容其實簡簡單單既「收到」，你知唔知你既中文老師全部都係到喊緊？
 




大致上最有存在感既人都出晒聲，人數過多我不能盡錄。
 
今晚，所有深夜團既團員都早訓左，平時同完太陽伯伯講早晨先訓既佢地，竟然仲早過我訓。
既然係咁，我都無理由捱夜，於事十一點零鐘就訓左。
 
到左第二朝，九點零鐘我就起左身，而呀媽就已經出左門口去左番工。
我去檢查下佢有無留低到零用錢，全無發現。
 
今次仆街鳥？唔通有街無錢去？
依個新年我完全無去拜過年，所以完全無利是。
 
咦等等，唔係喎！我有兩封！
我係床頭櫃到拎左兩封利是出黎，依兩封利是係三十晚去水牛屋企果陣佢比我既。
 
佢屋企咁疊水，應該唔會咁鬆手掛？起碼都有兩百蚊？




我打開封利是，對話框出現。
 
《獲得港幣０元》
………………………………
 
WTF？咁佢究竟放左啲乜野落去？唔通係報紙！？
 
我摸下個利是封，喂屌你硬既？但係就算係放左個一蚊銀係到，都無理由顯示為零。
我凳下個利是，跌左幾個銀仔出黎。
 
金幣。每封有一個，合計兩個。
 
「水牛，你知唔知你父母封左乜野做利是？」我收到啲咁撚貴重既野，即刻打去問水牛，睇下有無搞錯啲乜。
「一安士金幣？」水牛聽起上黎唔係好驚訝。
 




「乜你屋企咁奇怪既，有錢唔封封金幣，陣間我以為係金幣朱古力吞左咪仆街？」
「我父母剩係會封港幣比唔熟既人，佢知你係我兄弟應該唔會待薄你。」
 
咁又點先？我可唔可以刮小小落黎當錢用？
同埋最重要　－　究竟依家值幾多錢。
 
「你應該收到合計兩安士，最近金價升勢不斷，依家係一千一安士左右。」
「即係等於二千蚊？咁點解佢唔直接封金牛？」
多舊魚！我依家要錢呀！
 
「金價係用美金計架。」
「即係……」
「乘7.8啦你自己。跟住落黎仲有得升呀，你好好地收埋啦。」
 
…………………




 
我手上面依兩粒騎呢野，值成萬幾蚊？