如果你既人生好似打機一樣……: 7.6, 查人家宅之前首先要搞清楚對方同自己個女既關係

本身幫我補血既華陀竟然笑裡藏刀，殺我一個措手不及，唔通佢係內奸？
 
「我……未諗到……」
呀－－－－我即時受到傷害。
 
呀飯見佢屋企人係咁問，都做唔到啲乜，於事佢無出到聲，然後就輪到我。
 
「係呢，你係做邊行？」我想殺番轉頭。
「我係消防員黎，雖然有時會好辛苦，但係搵番黎既都係乾淨既錢，而且又夠養到家。」華陀輕描淡寫咁就避開左。
 




佢體型咁建碩，會做消防員我毫不意外。另外係旁邊既世伯一路聽一路點點頭。
得到個咁完滿既答案，我都唔再問。
 
女俠放低把生果刀。
「你同呀怡識左幾耐？」
 
嘩屌，原來女俠都係反賊！
唔止咁簡單，遊戲畫面上既女俠顯示為呂蒙！佢原來之前兩個回合都係到儲緊氣！
依家咁多手牌睇黎準備一次過爆晒喇！
 




「呃……好似係中一。」
我估唔到女俠原來一直都伏左我咁耐！
 
「下年你諗住點，升學？定係做野？」
「都係睇會考有幾多分先再作決定。」其實我諗都無諗過，但係咁答一定比人屌到飛起。
 
「升到的話去邊到升？做野的話做乜野？你無考慮過？」女俠越問越急。
「呃……」
 
遊戲中既我被呂蒙一步步咁進迫，依家既我已經係牆邊避無可避！




 
「媽咪！」呀飯終於開聲。
「等我問埋先。」
 
「你未來有咩打算？幾時先財政獨立？幾時儲錢買樓咁？」女俠一路落黎建立既形象係依一刻全部破滅。
呂蒙用手上既諸葛連弩續箭續箭咁射我！
 
「老婆。」世伯將一隻手放左係女俠手背上。
世伯及時用酒救左我一命。
 
「我地范家，得一粒女。」我知，但係同我好似唔係好關事喎？
「以前我地想湊夠一個好字，但點知連續生三個都係仔。」世伯企起身，係掛住畫果塊牆前面望住啲畫。
 
「最後終於追到個女，我真係好開心。」
「爸！」呀飯依一刻一定覺得好羞恥，父母竟然係個三唔識七既同學面前講咁多家事。




 
「我地兩個都好鍚佢，甚至多過佢三個呀哥。」為人父母竟然係兩個仔面前講啲咁Hurt既野？而且兩個仔無反應？
 
「所以希望你明白點解我地咁緊張佢。」世伯拍拍我肩頭。
依番話唔係應該同我講架喎？我知道自己咩新鮮蘿蔔皮，襯你地個女唔起。
 
「爸，我地無拍拖呀！」呀飯終於忍唔住爆出依句。
世伯同女俠即時互望。
 
「哈哈，原來如此原來如此，老婆執野。」
 
係遊戲入面代表世伯既角色即時翻開蓋伏既陷阱卡！
大海嘯　－　此局強制打和！
 
三國殺有得埋卡已經夠九唔搭八，依家開出黎既仲係召喚王卡？




在場所有姓范既人依一刻都應該覺得自己柒到仆街。
 
我自動請纓話幫手執野，但係女俠笑住話唔洗，叫我坐係到睇電視就得。
佢地全部人係到執野而我就睇電視，我覺得好唔舒服，但係佢地話唔洗我又無理由夾埋黎。
 
人多好辦事，三兩下佢地就執晒，然後就係東張西望個女主持講到「大美人李嘉欣」既時侯，伯母就話：「原來都咁夜，你要番去未？」
 
依句只係用比較禮貌既方法叫我走。
「係喎，咁我唔打搞你地喇！」我都唔會磨爛蓆。
 
「嗯，下次再黎玩過丫，呀怡送客。」
「哦……」呀飯由頭先開始個表情就好似sad左。
 
無論點都好，依一刻呀飯已經同我落左樓下，一路慢慢咁行著。
 




「頭先好對唔住，我屋企人係咁問你野……」呀飯用一個好shame既語氣同我講野，依一刻真係要錄低，因為無幾可你會再聽到。
 
「唔緊要，我都奇怪點解佢地會問長問短，原來係佢地誤會左。」經此一役，我發誓係買到樓之前我唔會結婚。
 
「最衰都係我，我唔應該厄佢地。」WTF？原來唔係誤會，而係誤導？
你厄還厄，點解要揀我先？
 
「點解要厄你屋企人？」
「佢地比好大壓力我要我搵男朋友。」
 
SHOCK
一般人唔係反對求學時期拍拖架咩？點解佢屋企會咁反常？係唔係睇金鏞睇到癲左？
但係依啲係家事，所以我好識趣地無再問。
 
「點都好，多謝你嘗面上黎食飯。」呀飯竟然咁有禮貌，我好唔慣！就好似lady gaga忽然間著到四四正正，張如城唔唱愛國既歌曲一樣！




「傻啦，應該係我多謝你地就真，番去同伯母講佢煮野好好食。」依句係真心，雖然唔似水牛屋企咁有咁多山珍海味，但係都不失為一餐非常好既住家飯。
 
呀飯企左係班馬線前面話：「咁，番學見啦！」
「嗯，星期一見。」說畢之後，我就背住呀飯，慢慢地行過依條馬路。
 
如果我依一刻回頭的話，呀飯應該係目送住我，我總係咁覺得。
我過完之後回頭一望，不見呀飯既身影，佢早已離去。
 
睇秒速五公分果陣出現既果一種莫名奇妙失落感，此刻重現。
雖然我好清楚自己對呀飯並無愛意，但總係好失落。