如果你既人生好似打機一樣……: 8.2, 與現實接軌既虛擬世界

各位，一個人再有錢，如果佢用唔到的話，錢就只係一個數字。
依家既我就正處於依個情況。
 
我拎住萬幾蚊，但係實際用到既錢唔過一百，我唔知點算。
 
於事我即刻打比毒撚方：「喂，借錢比我得唔得？」
「你新年無逗到利是咩？咁快用晒？」
 
「唔好講咁多，你唔借我出唔到黎。」
「哦，好啦好啦……」我用到依招，呀方應該唔會見死不救。




 
「陣間樓下等得唔得？」反正我地兩個都去，所以我決定約埋佢一齊出門口。
「下？我出左去喎。」
 
WTF？依家仲係九點幾佢就出左門口？
 
「你去左邊？你唔去陣間個網聚咩？」
「去呀！總之你自己去集合，到左果陣我再比錢你啦！」
 
有古怪！




 
呀方好快就CUT左我線，估唔到平時比我CUT開線既佢都有報仇既依一日！
算，今日佢係我財主，我就比面佢！
 
係屋企等到十點左右果陣，我就帶住身上僅餘既港紙，向屯門西鐵站出發。
順帶一提，我身既既錢只夠去果程，唔夠番黎果程，所以如果有乜冬瓜豆腐，我係需要行番屋企。
 
我好期待，陣間到底會係點架呢？
 
平時係遊戲入面指揮全團，威風十足既鱷魚唔知有無呀飯三個呀哥咁有霸氣？




串柒柒既追風又會唔會係出到黎一句都唔講既小學雞呢？
 
更加重要既係，我好想知道毒撚方有無誤溝恐龍！
 
神秘既網路世界，即將與現實世界接軌了，就在屯門西鐵站！
 
離開車廂，望望手錶，原來已經十一點十二分。
「Pokemon! 日夜鍛練去取勝!」我無理會到旁人既目光而接過電話。
 
「波仔，爭你咋，你係邊？」完全估唔到我係最遲果個。
「就到，依家落緊黎。」
 
「快手啦，七仔等。」
「邊間七仔呀屌！」毒撚方犯左個錯誤。係香港，尤其係港鐵站入面，話七仔等係唔可靠，因為一個站分分鐘可以有十間八間。
 




「○盛香果面呀！」
「早講啦妖！」屯門西鐵站我黎過幾次，所以都知到依到有間專賣牛肉乾同肉鬆既鋪頭，次次去坐輕鐵果陣都會比佢既香氣吸引住。
 
我離開扶手電梯，丘番條褲，扯直件衫再深呼吸一啖，務求比所有網友有最佳既First image.
終於黎到幻想既終端！
 
我離遠望一望盛○香果面既方向，有一群人，但係我見唔到有著緊初音衫而類似呀方既物體，所以直接跳過。再望望另一面，有一男一女係到傾住計等，我地咁多人，唔會出到黎得三個人下話？
 
「Pokemon！」
「屌！你洗唔洗咁急？」距離我上一次收佢線只隔左分零鐘。
 
「我見到你喇！」
「下？我見你唔到既？」
 
「依家呢？」頭先好大群果班人之中有人舉高隻手係咁揮，應該係毒撚方。




我收埋電話行埋去，我離遠望一望，見唔到毒撚方。
 
雖然毒撚方行得比較矮，但無理由矮到完全見唔到？
「波仔！」
 
人群入面有人叫我，但係我完全唔想行埋去。
「波仔！你去邊呀？」
 
唔對路！
「波仔，過黎啦！」
 
唔得，要走，要快啲走！
我即刻調頭想入番閘，但係八達通入面已經無晒錢！
 
仆街！唔記得左我身上無cash添！




忽然，我左手被捉住，我只好回頭面對我唔願意接受既事實。
 
「我越叫你越走既？」
「你係邊個？」
 
「你好幽默喇，快啲過黎啦。」我被人拖番去人群之中。
「hi.」「你好。」其中有幾個人主動向我打招呼，於事我都點頭回應。
 
我以為今次網聚會有好多仔（因為我地隻game好多人妖玩），原來都唔係太差。
「同大家介紹，我地團既首席dps，驚波。」呀方向大家介紹。
 
唔係，我唔承認眼前依個人係呀方，我識既呀方唔係咁。
 
「你好，我係軒仔！」有人率先想同我握手。
「邊個軒仔？」




 
「零O軒轅O零呀」
「哦！幸會！」0o軒轅o0，唔好問點解佢要加o同埋0去個名到，因為愛因斯坦都答你唔到。
 
佢係我地團既副團長，睇佢個款似係大學生，雖然唔係靚仔，仲有小小暗瘡，但都叫五官端正。
配埋u記格仔衫，經典既學院feel。
 
好彩我無著格仔衫，唔係實撞到仆街。
眼見依到至少有三個人著緊格仔衫。
 
其中不包括毒撚方。
 
「哦，請問邊位係鱷魚大佬？」本身我以為軒仔係，因為佢係團入面個外表比較大個既人。
「我係。」我回頭一望。
 
「……………………」
unbelieverpool.
 
鱷魚佢係隻game入面其中一個傳奇人物，佢率領住我地，成為遊戲入面數一數二既團。
係好多論壇，亦都有佢發佈既教學，唔係小學雞寫到九唔搭八既文筆，而係以全書面語完成，好有書卷氣色既教學。
 
我心目中既鱷魚大佬，係最佳既領袖。
但係我眼前出現既係，低我一個頭，衣著上亦都非常幼齒既中學雞。
 
我可唔可以洗左自己既記憶？你叫我以後點聽佢支笛？
 
企係鱷魚旁邊既，係一個高高地又長頭髮既女性。
佢無參加到討論，只依住牆睇手上面既書。
「你係邊個？蜜糖？」
「文雀。」
 
終於有一個人佢既性格係同佢平時既形象match到！就除左一樣野。
佢個角色係男性，而我地一直都以為佢係男性！
 
又驚又喜。
 
「文雀呀，你做乜唔同我地傾計呀？」一名外表睇起上黎十分mk既人發言，佢個陰遮住左半邊頭，我好擔心佢過馬路果陣會睇唔到紅綠燈。
 
「大把機會。」文雀冷冷的回應。
「追風，你由佢啦。」鱷魚道，平時既佢甚具說服力，但係從今以後，佢既說服力有所動搖。
 
原來隻mk就係追風，平時係遊戲入面佢同文雀都無乜兩句，反而就群埋晒班囡囡到（例如蜜糖），睇黎佢都係一隻厹。
 
「咁係另一面戴住耳機玩緊psp果幾個人係？」
「佢地好似係畸安四人祖；唯、澪、紬、律，佢係驚波。」軒仔回答。
果四隻小學雞望左我一眼之後，繼續玩番自己部psp。
 
順帶一提，佢四個就係整喊左中文老師果班小學雞。
平時咁多聲氣，出到黎一句都唔講？
 
「咁係佢地隔離睇緊佢打機果個呢？」
「哦，佢唔係我地團員黎，佢係四人組自己既同學。」wtf？網聚你帶啲三唔識七既人出黎？
 
「咁蜜糖呢？」
「係後面同呀夜咬緊耳仔果個咪係囉。」
 
…………………………
 
我回望，一個打扮非常陽光既青年同另一個睇起上黎好斯文既女仔細聲講大聲笑。
無可能！