如果你既人生好似打機一樣……: 7.5, 食雞脾的機會不是屬於我的
「哦。」女俠接左之後無幾耐就收線，走左入廚飯，拎左碗筷出黎拎，放係無人坐既主席位上面。
睇黎要打大佬了。
「你地老豆番到喇。」
中國南怡聽到之後即刻有反應，本身坐到勁hea既鎮南依一刻都變得正襟危座，作為客人既我都不禁緊張起黎。
如果陣間有個黃日華帶住隻神鵰以郭靖既裝束行入黎我都唔會意外。
女俠打開門，一名中年男子由門外行入黎。
呀叔佢粗眉大眼，唔似鄭少秋有小小娘娘腔，總而言之，就係飽歷蒼桑甚具威嚴同霸氣既呀叔。
「老豆。」「爸爸。」
中國南以老豆相稱，只有呀飯係例外。
「食飯。」呀叔用混厚而低沉既聲音回應，然後佢留意到我既存在。
《攻擊力下降》
我唔知自己既攻擊力下降到乜野地步，但係只要我仲有一刻理性，我就唔會嘗試對在場任何人作出攻擊。
因為我知道咁只係螳臂擋車。
「世伯你好！」我即刻以一個乖乖仔既語氣去同佢打招呼，廢事佢睇我唔順眼一掌打死我。
「你係……」我唔係賊黎！唔好打死我！
「爸爸，佢係我朋友！」呀飯係枱底踢我一下，而我即刻企起身。
「我叫劉驚波！係令媛既同學，亦都係貴夫人既門生，幸會！」
我用左非常突兀既方式介紹自己，旁邊見到既鎮南都忍唔住洩笑。
世伯即刻用眼尾望一望鎮南，而鎮南即刻扮無野繼續食飯。
「哦，原來係咁。」佢拍拍我肩頭，好溫暖既一掌，唔通係佢一百萬份之一威力既shinning finger？依個係警告黎？
「歡迎黎到寒舍，唔洗咁拘謹。」世伯雖然咁講，但係我完全唔敢放鬆。
我依家就好似去左越南咁，亂行一步都會踩地雷，斷左啲手手腳腳咁。
「坐低食飯啦，當自己屋企。」「係！」我好緊張咁坐番低，然後食飯。
由世伯坐低一刻開始，鴉雀無聲。就算鎮國同鎮南已經食完，佢地都坐左係到。
好嚴既家教！完全睇唔出呀飯係咁既環境下長大！
過多一陣，所有人都食完飯，女俠亦都拎左啲水果出黎。
而氣氛開始放鬆。
「係呢，呀波，你住邊架？」鎮南發問。
點解依條問題……咁似……
女俠搣左半舊橙放係我面前，好溫柔咁叫我食。
仆街，眼前既情節點會咁似公屋潮文？
遊戲畫面出現，鎮南著住三國無雙入面趙雲既裝束，大喝一聲：「殺！」
「我住係附近既屋邨…」睇黎女俠好快就會唔舒服番房。
而遊戲入面既我就好似武藤遊戲咁，回應一聲：「閃！」
三國殺！？
然後到鎮國既回合，佢講左句：「姐係屋邨仔啦……」
著住張飛咁既鎮國，大喝一聲：「殺！」
我回答唔到，只可以目送眼前既長矛貫穿自己既身體！
「嗚哇！」
咁我就比人扣左一滴血……
「邊個嫁著你實一世捱窮……」鎮國既攻勢未完結，繼續攻擊。
張飛大喝：「誰敢與我大戰三百個回合？我殺！」
此時，百丈蛇矛再次貫穿我既身體。
「嗚呀－－－－－－－」你地識唔識玩架，第一回合就打到主公仆街，係人都知你係反賊啦！
「鎮國，你唔可以咁講，我地夠係住屋邨啦。」係旁邊既鎮中即刻幫口。
遊戲畫面中既佢好似華陀咁，丟左舊桃落我到，我食完之後舒暢無比，心情亦都好啲。
「呀哥，佢係我朋友黎，你可唔可以尊重小小？」
呀飯係遊戲中，大喝一聲殺，而矛頭指向張飛！
張飛殺完之後無乜手牌，根本閃都閃唔到，佢被武器刺中後後退兩步，用怨恨既眼神望住呀飯。
「雖然我係屋邨仔，但係我既志向唔係僅僅限於屋邨入面。」
遊戲中既我即刻再食多舊桃補血，頭先鎮國對我既傷害已經完全消減左。
女俠仲係到切緊橙，無出到聲。
「後生仔有志氣！敢問令尊做盛行？」世伯用沉厚既聲音問道。
遊戲入面既佢殺一聲就拎住武器衝埋黎，而我即時跳開，回敬一聲「閃！」
「佢地都係幫地產霸權做野……」雖然遊戲中既我毫無損傷，但係我覺得依個答案麻麻地。
「唔緊要，唔緊要！最緊要係有志向！你地邊個好似人地咁有志向？」
係萬箭齊發！世伯竟然開aoe？
「我都係覺得入左大學先算。」鎮南回答。
趙雲高呼一聲閃！然後用長矛將所有箭擊落。
「………」鎮國沒有回應。
遊戲中既張飛被幾支箭射中，口中吐出鮮血，佢已經第二次受到傷害！
「我？我無咁祟高既志向，剩係幫手養家既重擔已經夠煩。」
華陀打出一張閃，代表鎮中既籍口被接納。
「我……仲未有咩志向。」
呀飯回答唔到，佢都比萬箭齊發擊中。
「雖然我已經有目標，但係仲未有具體既計劃……」
我都算係勉強閃開左。
「………」伯母繼續切橙無講到任何野。
世伯再次開聲：「呀飯，女大當嫁，你女仔唔洗諗咁多志向，總之嫁個跟得過既男人就得。」
遊戲中既世伯用桃幫呀飯補血，呀飯既血量已經補滿。
睇黎世伯既思想都幾傳統。
世伯埋伏一張陷阱卡，結束依個回合。
趙雲：「哼，輪到我抽卡喇！」
「係呢，就黎會考喇喎，你準備成點？」鎮南問。
趙雲好似三國無雙任何一條trailer咁，一個人衝入人群之中，可以係瀑布同牆上面行路。咁違反物理既野一睇就知鎮南唔係讀理科既人。
但係點都好，趙雲已經係我面前準備起手就殺，而代表我既角色即刻橫架武器檔住，然後一野推番佢走。
「無呀，得閒同朋友去溫下書咁囉，係呢，你會考幾分？」反擊！
「我得廿九分咋，無辦法，物理失手。」
個樣生得咁霸氣，而且又有廿九分，莫非係巴打黎既？
趙雲輕易地受身著地，輕輕一揮手中既長槍，毫無壓力地避開依一招。
係喎！唔記得左佢閃同殺可以調轉用添！
二哥鎮國拎起個碗起身話：「我都係時侯準備番工。」
「唔。」世伯低聲地唔左一聲，以示予許。
張飛已經落荒而逃！
我即刻鬆一口氣，除左世伯之外，我下意識覺得佢係全場最有威脅既人。
我都奇怪點解佢地依一家家教咁嚴，竟然會容許有人訓到四點幾都未起身，原來係番夜班既。
「係喎，你有無乜野志願咁？」鎮中發問。
我唔明白，我又唔係同你個妹拍拖，點解要問長問短先？