如果你既人生好似打機一樣……: 7.4, 然而，終極大佬並未登場

依家做緊寵物小精靈，啲劇情十年如一日估都估撚到。
就係火箭兵團比人擊飛之後，女俠又係廚房行出黎。
 
「要你一個係到睇電視真係失禮……呀怡，你陪下你朋友丫嘛！」
「哦～」呀飯行番出黎。
 
「係到都無野做，不如落去行下？」呀飯問。
「哦。」
 
落到樓下，我地漫無目的咁行，呀飯亦都無出到聲。




咁落去只會越黎越尷尬，唔係辦法，於事我率先發問。
 
「你同你呀哥關係唔好？」
呀飯搖搖頭。
 
佢無開口答我，於事我假設佢唔想傾依個話題而唔問。
又行多一陣，我地係個公園坐低，係我細個果陣有好多細路既公園，依家已經無人會黎。
 
唔知幾時開始，公園已經唔係細路既至愛，個個手上面都有部遊戲機。
打機雖然係好好玩，但係係公園到玩捉依因既童年回憶，係依一代已經唔會再有，真係好可惜。




 
回想我細個果陣，都成日出黎玩，而且仲有小小領袖天份。
但係我上到中學就迷上打機，之後就每況越下。
 
直到今個月，我先開始有番打機以外既活動。
講起活動，我呀飯：「你新年做過乜？」
 
「都係周圍拜年咁囉……」
「有無約過同學去邊到玩咁呀？」睇黎依個話題傾到下。
 




「剩係同桑妮出過街一次咋……」
原來呀飯有搵過張同學。
 
我冷笑一聲，為左唔比自己胡思亂想，我即刻再次發問。
「你無約水牛咩？」
「下……」呀飯忽然眼閃縮，續道：「無呀，佢無約過我。」
 
琴日我去打羽毛球果陣已經覺得奇怪，點解水牛會無約到呀飯？
會唔會係發生左啲乜野我唔知？
 
「你同水牛嗌交？」我直接問。
「下？無呀！」佢聽到我咁問即刻好緊張咁回應。
 
滓滓教過我，女人話無野通常都係有啲野。
 




「有咩講比我聽下，話晒你同水牛都係我朋友。」
「你放心，我有需要我實會搵你。」睇黎呀飯都唔係好想講。
 
依一刻，我開始感受到我係零入面見到既呀飯究竟係乜野。
呀飯實在太完美，就算我目前對佢無愛意，客觀黎講都係。
 
但係佢樂天既外表底下，似乎又好似收埋左啲野。
再加埋放年假前佢無啦啦喊果單野，我更加肯定。
 
我地入左屋邨商場行左陣，然後望下鐘發現原來已經六點幾，就番左去。
 
上番去呀飯屋企，女俠已經差唔多煮好。
「番黎喇。」呀飯開門時道。
 
「你呀哥已經番晒黎，就快開飯，你兩個去洗手等食。」




「哦～」呀飯除左鞋之後就行左去廁所洗手。
 
「到你洗喇。」我仲以為呀飯會將未乾既水fing落我到，以佢既小學雞性格似係會咁。
「嗯。」
 
你洗手果陣通常都唔會望住自己既手，你視線會放係邊呢？
係屋企你可能會觀察下自己俊俏既外表，但係黎到咁新奇既地方，你就會四圍觀察。
 
牆上面有兩個架，一個藍色，一個粉紅色。
藍色果個放滿晒啲男性用品，例如髯刨，洗面膏，仲有牙刷之類。
而粉紅色果個相對就無咁滿，但係都放左唔小野。
 
睇黎呀飯屋企將男同女都分得幾開。
 
「中國男兒，出黎食飯！」女俠拎住煲湯由廚房行出黎。




聽到中國男兒依四個字，我即刻比女俠既霸氣嚇到縮陽咁滯。
 
佢就好似汪明荃係萬水千山總是情飾演既角色一樣英姿凜凜。
可惜，佢後面果句唔係「站起來」，而係「出黎食飯」，所以霸氣度即刻減左一半。
 
三道門應聲打開，走出三名青年，我望向佢地，心諗：唔洗咁型下話？
佢地三個無特登chok樣，亦都無好似拍mv咁忽然吹起一陣怪風顯得佢地特別飄逸。
 
佢地既霸氣係好自然咁散發出黎。
 
如果我係街上面撞到佢三個，我會即刻避開，但係依家我避無可避。
《攻擊力下降》
《攻擊力下降》
《攻擊力下降》
 




相反係廳果面行緊黎既呀飯就毫無霸氣。
 
「各位食飯。」眾人埋位之後齊聲道，我依個外人見到覺得好奇怪。
係屋企，我完全無乜餐桌禮儀，因為我既餐桌就係電腦桌，而各位都好清楚，係電腦桌面前係無禮儀可言。
 
只有係電腦桌面前，你先可以屌一個三唔識七既人個老母；
只有係電腦桌面前，你先可以嫌anglelababy唔靚, Janice man唔靚；
只有係電腦桌面前，你先夠膽屌尻香港特區政府；
只有係電腦桌面前，你先可以鬧尻地產霸權；
只有係電腦桌面前，你先敢發洩自己既不滿。
 
細心一諗，原來一離開左電腦桌，我係咁一無是處。
「咦？」呀飯其中一個呀哥出聲。
 
「呀怡幅相做乜拆左落黎？」佢既身型最高，而且神態比較大方，無呀國咁兇狠。
「鎮中，如果你老豆係到的話，你估佢會點？」女俠回應。
 
「食不言寢不語。」嘩屌，講下野都唔比？佢地老豆到底會係乜野人？
連三個仔都咁有霸氣，佢地老豆一定係一個有霸王色霸氣既人！
 
「不過，既然老豆都未番就唔怕啦！係喎，你係呀怡既……咳咳……朋友？」
鎮中問。
 
「係……我同時係伯母既學生……」我拎住個飯碗，好有禮貌而且好CHOK咁扮NICE.
「哦，咁一定係我呀媽迫左你上黎食飯啦，佢係咁好客架喇，如有得罪，還望見諒。」屌你，點解你廿幾歲人講野都要文皺皺先？我係唔係番左民國時代？
 
「唔記得自我介紹添，我叫范鎮中，係呀怡既大佬。」
「幸會幸會！」為左迎合個氣氛，我當左去左華山論劍咁，見人就幸會久仰。
 
「我旁邊既叫范鎮國，家中派行第二。」
「你好你好！」我向佢點頭，但剩係睥左我一眼之後就繼續食飯。
就算只係一眼，比佢睥完我食欲都即刻減少。
 
「鎮國，唔可以咁無禮貌，人地係客黎。」女俠見狀即刻一圓場。
「唔緊要啦……」我唔敢話緊要，我怕佢會即刻撲過黎咬尻我。
 
「坐最埋邊果個係三弟，范鎮南。」
「Hello.」佢善意地揮手道。
 
依個愛國家庭竟然有人會用英文打招呼！等我都show下英文先！
「麗屎吐滅持 you.」
 
「萬水千山縱橫，豈懼風急雨翻？」
「喂？」女俠即時拎起電話。