如果你既人生好似打機一樣……: 7,1. 睇靚女既素顏可以係恐怖game

2點，我就快要出門口，毒撚方仲未on，佢琴晚究竟幾點先訓？
其他團友都開始浮水，一路都好興奮咁傾聽日既野。
 
例如邊到集合之類。
 
聽日會BBQ其實一早決定左，我都好同意。
係香港成班人一齊聚可以做既野非常有限，都係唱K，打機，BBQ，打邊爐又或者去下書展毒漫節咁。
 
行山？踩單車？唔好玩啦，我地成班打機既人邊有咁健康。
 




另外，我地會做既野唔係得BBQ一樣，黃子華講過，係香港黎講食飯唔係一種活動黎，出得黎就一定要直落。所以我估食完野之後會落網吧又或者唱K既可能性高達八成。
 
我就無乜所謂，反正後日星期日。
 
出門前一刻，毒撚方仲未浮水，我都無特登等佢就出門口。
 
出門口時，手機收到短訊，原來係水牛。
 
「呀波，考慮之後我認為你不無道理，女性敬畏自己總比欺負自己好。若你朝這方向前進，眼神交流必需練好。今日你要與女性有眼神接觸之餘，還要用眼神令到對方逃避你的視線。」
 




我岩岩先打完史萊姆，依家就要打魔龍？
 
除此之外，任務亦同時出現。
《任務：使三名少女逃避你的視線》
 
唔知點解，我總覺得今日既MISSION會FAIL收場。
 
自從上次玩駁水喉玩到咁FAIL之後，我依家每日番到屋企一得閒無野做都會上網搵相關既Flash Game玩下。
一般黎講，只要用出口駁番去入口，就好易駁得到；但問題係我望女果陣出既水係即時出禁制，根本唔容許我咁做。
 




Fine，睇下今日會點。
行去社區中心既途中，見到有個妹妹仔，等我即刻試下先！
 
當我地兩個視線接觸既一刻，遊戲視窗即刻有料到。
Mario，求下你上我身啦！
 
但係眼前出現既並唔係水管，而係一個鏡頭。
四周環境都變到漆黑一片，鏡頭既遠方有一個鳥居，鳥居下面有一團黑色既物體緩緩地行緊過黎……
 
傳入耳中既唔再係馬路傳來既氣車聲，而係一股充滿怨念既悽厲慘叫聲。
各位覺得上次望女變駁水管已經好九唔搭八既朋友，我劉驚波在此向你奉上終極無厘頭目及女鉅獻　－
 
 
零。
 




點解我望女會變左玩零？我從來都唔知道原來望女依種行為都係恐怖game。
 
如果無玩過依隻game既朋友，可以參考以下片段。
http://www.youtube.com/watch?v=CcMz7IqOh4Y
 
我強忍心中既恐懼，拎起相機瞄準眼前既厲鬼。
各位以為可以瞄完就算？傻啦，你係要望實隻鬼，等個相機load完先可以禁快門影低。即影即有係陳攝影大師既專利。
 
隻女鬼慢慢爬過黎，就好似貞子排出井咁。
但係唔同既係，貞子有一堆長頭髮遮住塊面，而眼前依隻女鬼既髮型係出街跌招牌都跌死幾個既平陰髮型。
 
佢既面容扭曲，雙口咬唇，就好似港女自拍果陣咁樣；而且面色極為蒼白，就好似自拍果陣打光打得太犀利搞到好唔真實咁……
 
簡單黎講，眼前既景像係邊個見到邊個都驚。
但好神奇既係　－　香港既女性覺得咁樣影相係靚。




 
雖然我覺得眼前既女仔好肉酸，但係為左任務，我都係要影。
佢好似恐怖GAME入面既怪物一樣，好似斷左隻腳咁，拐住拐住咁行過，而我既鏡頭一直對住佢。
 
佢舉起手攻擊喇，係時機！
 
我即時按下快門，由於眼前景像太過恐怖，我影果陣無直視到佢。
影完之後佢好似受到傷害咁後退一步，然後我睇下自己影成點。
 
只有四份一個頭入左鏡，仲要張開晒個口張牙舞爪咁，影得非常之差。
「哇－－－－－－－－－－－－－－－－－－－－－」
 
女鬼發出慘叫，我即刻肩頭一縮，腳步發麻。
「你影得咁撚柒，我屌你老母！我唔撚影喇屌你屌你屌你屌你！」
 




下一刻，女鬼消失，四周恢復正常。
我呆企係原地，心諗：港女發脾氣真係好無理取鬧，依家又唔係我想幫你影！
 
一路行到去社區中心都無再見到任何稱得上為少女既物體。
我直接行左上排舞室，已經有個別既同學係到等緊。
 
「Hi.」
「哈佬。」
 
等我試下個女同學先！
依個囡囡個樣真係飲得杯落，睇黎你都係走唔出我既快門。
 
遊戲畫面再次出現，今次出現既女鬼亦都相對地唔同左，係一隻幾索既女鬼。
我將個鏡頭對實佢，慢慢睇實佢個樣。
 




但係我留意到啲我唔係好想知道既野。
 
佢塊面上面開始有一層層既野跌落黎，佢越行過黎果陣就越驚訝！當黎到我面前果陣，隻眼竟然細左一個碼，而且個嘴仲要勁大勁厚，仲未講佢成面既粒粒！
 
我再次按下快門，將眼前既醜態影低。
 
「呀－－－－－－」
今次佢成個樣比我影到，但係已經唔係當初果隻索到爆既女鬼。
 
番到去現實，眼前果個「飲得杯落」既女仔已經迴避左眼神，好似好緊張咁扮望唔到我。
《任務：使三名少女迴避你的眼神 1/3》
 
眼前既女仔同頭先隻女鬼有幾分相似，再望下個女仔塊面上既一層層厚粉，終於明白到化妝品既威力有幾驚人。
原來，睇一個靚女既真面目都可以係一隻恐怖game。