如果你既人生好似打機一樣……: 7.2, 上朋友屋企就好似打副本一樣咁驚險

係我KO左條女之後無耐，其餘幾個學員就陸續咁入左黎。
而啲男同學就即刻走去撩頭先果隻女鬼傾計，睇黎係想溝佢。
 
我只可以祝佢地好運，希望唔好比隻女鬼嚇死。
雖然我無實際証據去証明，但係我認為零入面見到既果隻女鬼係可以代表到個女仔最真實既一面。
 
然後無耐，女俠就入左黎。
今堂主要係教點樣用力，一輪練習之後我地就落堂。
 
「好，今日就練到依到為止，各位番去記住要繼續練扎馬。」




我一輪收拾之後行出排舞室，忽然由背部感受到重量，我想回頭望，但係左頰傳來既冰凍感令到我肩頭一縮，即刻向前踏出一步再調轉頭。
 
「哈哈哈。」呀飯發出一貫既小惡魔笑聲，右手渣住一支凍水。
「你又玩我……」我用手背輕撫自己既左頰，抹去殘留既水珠。
 
「唔好嬲，支水請你飲。」
你覺得我咁就會放過你？受死啦呀飯！
 
我緊盯著佢，遊戲畫面下一刻出現。
 




四周畫面漆黑一片，唔同頭先兩次，依到無雜音，非常之安靜。
而慢慢傳入耳中既，係好細聲既飲泣聲，如果唔係依到咁靜，根本唔會留意。
 
我向四周觀察，到底係邊到傳出黎架呢？
於伸手不見五指既黑暗中去尋找一隻厲鬼，其實真係幾恐怖。
 
但係我都好想知道呀飯到底有咩秘密，依個好奇心將我既恐懼全部洗走。
啜泣聲越黎越大，我黎到鳥居下面，就係柱後面，一個少女屈膝坐左係到，雙手放係膝頭上面，然後將個頭埋入去中間。
 
我即刻舉起相機，準備觀察隻女鬼既反應。




隻女鬼留意到我既存在，亦都望住我，佢美麗既臉容唔似頭先個女學員咁慢慢變醜。
 
女人既眼淚真係威力驚人，我竟然有啲憐憫。
但係我唔會放過依個完成任務既機會，係個相機就快LOAD完既時侯，我想按下快門。
 
同一刻，女鬼將開佢既小唇，細聲道：
「點解會係你……」
 
下一秒，眼前既女鬼消失，本身漆黑一片既四周亦漸漸被光明驅走。
 
「嘎………」
返回現實之中，我望住呀飯，而呀飯亦都望住我。
 
「波仔你做乜呆左？係唔係又用我黎滿足你既性幻想？」說畢之後呀飯嘻嘻地笑。
而我，完全唔明白頭先係遊戲入面見到既野，到底係代表啲乜。




 
「女，你又咁早黎到？」
「媽咪！」呀飯即刻撲左過去女俠果到。
 
佢依家表現出黎既性格，同我頭先見到既完全係兩個世界。
 
「呀波，賞唔賞面黎寒舍食餐便飯？」
「下……」咁刺激？
 
「係囉，反正我地屋企咁多人，加多雙筷都唔係爭好遠姐。」
「咁呀……」但係無啦啦上人屋企食飯，唔會好怪咩？
 
「一於咁話，當係報答你平時咁照顧個衰女。」
「你唔洗考慮咁多喎，食餐飯咋，唔好諗左去第二到！」
 




佢地都講到咁，我再say no就顯得好pussy，於事就應承左。
 
我跟住佢地買餸，佢兩個係到討論緊例如邊棵蔥靚啲之類既啲話題，總而言之佢地所做所講既野我完全睇唔明，聽唔明。
 
一路跟住係後面既我四圍望，睇下有無少女可以比我用黎解任務。
但係睇晒成個街市，除左呀飯之外真係搵個嫩口既都無。
 
「估唔到你都會幫屋企手煮飯喎。」
「梗係啦，你估好似你班男仔咁剩係識食？」佢講緊既應該係佢屋企果三個呀哥。
 
「咁你大個出黎做廚都唔會乞食啦。」我求其講左句。
「你知唔知煮一餐要幾大功夫，我先唔會為左果兩個錢咁辛苦自己；除非食果個係值得我咁辛苦對佢好啦，否則比幾多錢都請唔到本大小姐做廚師。」我估唔到呀飯會講啲咁有少女情懷既說話。
 
我唔好意思要人地請我食飯，所以我主動要求幫佢地拎野。
我拎住啲野係後面聽佢地兩母女係到傾緊飲食經，食開營多既我無乜研究，所以得個聽字。




 
「係呢，波仔你平時屋企食乜？」呀飯忽然回頭問我。
「通常都係我媽子煮，但係平時得自己一個果陣通常都係煮下即食麵咁囉……」
 
「嘩，好唔健康呀，依啲野食得多對你身體唔好架！」
「求其啦，男人老狗食得飽就得。」對毒撚黎講，食野最緊要係簡單、快，同埋影響個keyboard.
 
傾下傾下，我地入左某個屋邨，就快去到呀飯屋企喇，唔知會係點架呢？