如果你既人生好似打機一樣……: 5.1, 比人「接放學」唔一定係好事
我係接近無心情既心情之下食完LUNCH，最後一堂係係全校最高果層上既bio。
水牛同呀飯都唔係到，呀方條戇尻仔佢無問到乜野，睇黎我依家個樣真係好衰。
「劉驚波！」
「係！」魂遊太虛緊既我終於番番黎。
「我叫左你幾次喇，你發夠夢未？罰你陣間留係到陪科長執下個預備室！」
「哦……係……」隱約見到遠處既桑妮好擔心緊望住我。
放學之後，所有同學連呀sir都走晒，而我留左係到執房，房入面仲有桑妮。
桑妮佢就係bio既科長，我唔明白點解咁搵笨既職位佢都肯做。
「你做乜？介唔介意話比我知？」
「對唔住，我都好想搵個人傾訴，但係我依家既心情唔係三言兩語就解釋到。」
「呀飯係我上到黎中學既最好朋友，而你又同我由細識到大，我真係好擔心。」
「對唔住……」
我倆於房中無言，只係各自各繼續執拾。
到執完果陣學校已經無晒人，我拎左部電話出黎睇睇，原來都五點幾。
「你今日唔洗早番屋企既？」我好好奇平時要早歸既桑妮點解仲會留係到。
「因為屋企人出左埠，所以咪無人管我囉。」佢微笑。
好甜既微笑，雖然頭先係房入面做既野對我黎講係苦力，但係對佢黎講，應該係難能可貴既青春。
部電話盞燈閃下閃下，睇黎就快無電，於事我打開部電話睇下剩番幾多格。
同時間留意到呀方條毒撚寄左短訊比我，又想叫我打邊個副本呀？
「D班果八隻金剛等緊你放學，你自己執生！」
而落緊樓梯既我同桑妮，亦都聽到腳步聲，聽得出好多人，同依家學校無晒人既情境格格不入。
「桑妮，跟我行依面！」
我諗都唔諗就拖住桑妮隻手，奔往另一條樓梯。
聽到我同桑妮既腳步聲傳到去佢地到，於事佢地即刻加速大叫：「劉驚波你咪走！」
當我落左一層既時侯，下面亦都有人追緊上黎，前無去路後有追兵，我就唯有轉左去四樓既走廊，入去課室入面。
哩係枱底遲早比佢地搵到，而眼前哩到既野，就只有一個大型既儲物櫃。
依個儲物櫃好空，只有最頂果到有一層放下書咁。
我諗都唔諗就拖左桑妮入去，然後關埋個櫃。
「嘎……嘎……」
係咁細既櫃入面，要兩個人都企得舒舒服服係無可能，我地之間既距離得好小，小到我聽到佢既心跳聲。
我意識到一直桑妮隻手，依家安全我即刻好急就放開左。
「對唔住，累埋你……」
「唔緊要……佢地做乜會搵你？」
「我好難解釋……殊……」
我係櫃果條喇果到，望到果八條友就係出面。
「我見佢跑左黎依層，仲有條女。」
「總之同我捉住佢，條女都唔好放過！我要知道同我廖智星爭女既後果！」
睇黎要桑妮自己走係無可能，今次真係大撚獲！
「劉驚波！你實走唔甩架，我睇你哩到幾耐！火機你同我去守住門口，其餘人同我搜！」
發狂既猩猩非常之暴噪，而其中一隻金剛已經入左黎我地身處既班房。
佢搜得好仔細，如果我地真係哩埋係枱底就算，依家實比人扔左落山。
隻金剛開始懷疑我地身處既儲物櫃，並且想打開。
我當然唔會就咁算數，我係入面用力咁捉住道門，唔比佢打開。
眼前亦都出現左久違既遊戲界面，我要一路用力，谷住條氣力bar。
果然係金剛，如果我只係果條無能力既毒撚，我一早已經比佢收左皮，依家我都頂得兩下。
「呀星，依道門打唔開。」
「你平時咁細力架咩？等我黎！」
「嘎嘎……」因為用到能力，再加上係櫃入面空氣不足，我已經有小小氣喘，但係仲忍住無發出太大既聲音。
猩猩既強大力量我好清楚，所以我跟住落黎就要沉著應戰，我緊閉雙眼，集中精神係腦海將條氣力BAR谷住。
堅持左一陣之後，佢終於停低左。
「真係打唔開喎，唔通卡實左？」猩猩隔離既果隻金剛問，猩猩睇黎唔想放過依個櫃，於事大力一踢！
桑妮似乎受刺激，發出小小驚嚇聲，但係佢之後立即用手掩住個口，好努力咁忍住。
「屌！」佢好大力咁踢多左一下，於事就走番去課室出面。
「女廁無人，男廁都無。」「其他班房都搜過晒喇，無料到。」
「佢地一定仲係間學校入面既，我地分頭搜！」
當我確定無晒人之後，即刻撲左出櫃外面大字型咁撻左係到。
「嘎……嘎……」頭先既角力為我個肺都帶來一定負擔，依家一定要抖番順條氣先，唔係陣間真係要開打果陣真係打碌撚。
「你無野嘛？」
「我無事……不過如果有人工呼吸我諗我會好啲囉……」我為左唔令桑妮擔心，所以講左啲好輕佻既說話。
佢好怕醜咁擰埋塊面，我都不禁洩笑左一聲。
「依家咁既情況，啲老師應該走晒，得番小小校工；校工都幫唔到啲乜，咁既情況剩係可以打電話求救……」
我拎部電話出黎，頭先仲閃閃下既燈已經熄左，即係無晒電。
「桑妮，用你部電話得唔得？」
「我……我父母比部電話我都只係方便佢地聯絡我，所以佢地出埠果陣都拎走埋我部電話……」
嘩！依家廿一世紀都仲有咁嚴既父母，你估民國時期呀？
簡單啲黎講，我地只可以靠自己。
此時對話框出現：
《任務：逃離校園
帶同張桑妮同時離開校園。》