如果你既人生好似打機一樣……: 4.8, 曾幾何時diablo3會出只係一個hardcore gamer之間既笑話
因為今日係最後一日考試，所以我約埋其他人一齊hea多陣先番屋企。
毒撚方佢決定唔出現，因為佢要繼續刷副本。
好消息唔止得一個，連平時要早番屋企既桑妮，都會join埋我地。
我地係一樓既平台集合，然後就出發去附近既商場隨意行下。
呀飯全程捉實桑妮雞啄唔斷，令到我無乜機會埋桑妮身增加好感度，所以唯有同水牛吹兩嘴。
「考完試喇喎，幾時落網吧打番鋪機咁？」
「隨時奉陪。」雖然水牛成績同運動都好好，但係佢唔係猩猩果種睇唔起我地毒撚既人，其中最大既原因當然係因為佢自己都打機。
「Diable 3終於出喇。」
「呀波，有樣野我唔知要點同你講。」水牛一貫好認真既語氣。
「做兄弟既有乜咪照直講囉，借錢另計！」雖然我咁講，但係家境好過我既水牛應該唔會同我借錢。
「你要小心啲，你好似已經得罪D班果八隻金剛。」佢講出黎之後我立即疾一疾，然後搖搖頭。
「我都估到，頭先我口語考試果陣同組既有猩猩，佢一路都針住我，我完全唔知乜野事。」
「你同呀飯係唔係做左啲乜野令人誤會既野？」
估唔到隻猩猩真係四肢發達頭腦簡單，睇黎佢當左我係情敵。
「傳聞黎架姐，你唔係信下話？」對住咁緊張呀飯既水牛，我第一時間要澄清，不過佢一定信我。
「我信唔信唔係問題，問題係果八隻金剛信唔信。」
的確。
「我唔知佢地會做啲乜，但係佢地都唔係乜野善男信女，你真係要小心啲先好。」
「你唔洗擔心既，佢地講就兇狠姐，做就碌撚啦！」
「望就係咁望。」
雖然我咁講，但係其實我自己都好擔心。
就算我有咁既能力，果八隻金剛如果想郁我的話我都一定比人打到入廠。
好彩之後就係農歷新年假，希望番到黎件事可以沖淡。
今日係年假前最後一日上課日，係正常既時間表。
雖然係咁，但係都無乜教書，今日主要係啲老師講下我地大概考成點同埋比下功課咁。
但以上既統統唔係重點，而係學校裡面傳得越黎越勁既流言。
「波仔你條契弟，上次問你係唔係溝左呀飯你話無，依家全校都傳緊喇，唔到你唔認！」
「我屌！」岩岩小完便拉緊拉鏈既我聽完嚇一嚇，然後唔小心一拉夾住啲皮，男人最痛算這種！
「做兄弟既你都厄，搞錯呀！我平時都待你不薄丫！」
我忍痛將條拉勾扯番出黎然後再拉番好，然後再答：「其他人信果啲白癡流言都算，你都信埋一份既？」
講起上黎，連毒撚方都收到風，睇黎真係傳得好衡下。
「我點會唔信大佬波丫，但係呀飯最緊對你咁親熱，覺得你兩個有野都好正常呀？」
的確，呀飯最近係異常地同我親近，究竟發生乜事？
「總之我同佢無野啦屌！」依個問題，有需要正視。
當我洗完手之後想番番去班房，正好見到呀飯。
「你兩個又係廁所搞乜呀？」呀飯依然好似無乜野咁，唔通佢未知？
「你跟我過黎。」我行過去一手捉住呀飯，唔理周圍其他同學既目光。
我將佢帶左去無乜人既一角到。
「想做乜呀你？帶到你咁少人既地方。」呀飯既態度比較收歛，睇黎佢都意識到個嚴重性。
「你知唔知出面啲人傳緊我同你有野？」
「咁你頭先仲咁對我？」
「我帶你黎係為左解釋清楚，想希望你保持距離。」
可能各位覺得打蛇應該要隨棍上，趁依個機會嗒左呀飯，但係我唔想咁做。
「點解？你唔係第一日識我，我既性格係點你都好清楚。」
「我知，但係人言可偎。」
呀飯失笑一聲，然後話：「之前就傳我同水牛，依家就傳我同你，真係乜都比佢地講晒。」
我好明白佢心情，圍繞住佢既流言蜚語根本無停過。
「我知道你既苦處，但係都希望你可以配合下，避一避風頭。」
「避？我地學打功夫有一句叫做『永遠唔好用背脊對住敵人』。以我既性格你估我會驚？」
呀飯既同性人緣其實一直都唔係幾好，我見同佢熟既女同學都係得Mandy同桑妮，我完全唔敢想像之前水牛搞既活動有咁多女仔出席，呀飯究竟係點過。
「我知你唔驚，但係我驚呀……」
「男人老狗你驚乜？驚比人打？」睇黎佢都知道猩猩果單野。
「會考就到，多一事不如少一事？」平時青春可人既呀飯原來都有野蠻既一面。
「我同水牛傳左咁耐都無問題啦。」
「點同呀，你唔好咁自私好唔好？」
「自……自私？」呀飯望住我，兩隻眼已經紅晒，眼淚已經係眼角準備就緒，隨時缺堤。
「我唔係怪責你，就當我係青頭仔淆底好唔好？我只係想你理下我感受姐……」
「咁邊個理我感受？」呀飯既眼淚已經開始湧出黎，然後就走左去。
我唔知自己應唔應該追，但係依一刻我雙腳好似扎左根係地下咁樣，想郁都郁唔到。
各位，原來再靚既女仔都真係會柯屎。
我從來無諗過，自己會見到眼飯表現出咁既一面。
前排facebook見到一句非常之岩用 － 「流淚並唔係軟弱，而係因為堅強得太耐。」
我企左係原地，諗極都唔明，諗爆頭都唔明。
呀飯依種性格咁樂天既女仔，究竟收埋左啲乜？
就好似你唔明白點解好好地一個USER NAME，要係中間加個句號一樣，我能力以外既野都係小諗為妙。
我帶住沉重既腳步去番課室全班都望住我議論紛紛，發現呀飯個位已經空左，睇黎佢連堂都唔上早退左。
水牛係呀方隔離，睇黎呀方同佢講左頭先發生既事，而水牛見到我，即刻帶左我出班房。
「究竟發生乜事？」
唔知由幾時開始，我既周圍既事物都變到好複雜。
「你之前提過我條猩猩已經望實我，於事我咪搵呀飯想同佢講清楚囉，然後佢就咁喇……」
「屌！」好罕有咁聽到水牛講粗口，然後佢又走左去，連書包都無拎到。
桑妮頭先幫完老師手拎野，依家番到黎，見到咁既情景，佢都走過黎關心下。
知不過我已經好煩，於事求其敷衍左佢幾句就算數，跟住落黎既堂我都無心機上。
做毒撚自自在在番學訓教放學打機其實好開心，我妄想改變搞到依家咁，係唔係我自己拎黎賤？