如果你既人生好似打機一樣……: 4.2, 考試前15分鐘仲嬉戲緊既人同樣無資格擔心自己既成績
「咦？呀飯呢？」平時同水牛出相入對既呀飯唔係到。
「佢？我唔知佢喎。」水牛都唔知？唔通佢考試先黎缺席？
「洗唔洗打比佢睇下佢係邊？」
「佢咁大個人自己有分數，唔洗擔心佢。」
「哦。」連水牛都咁講，我就唔理。
為左逃避一眾女同學既目光，我同呀方係小食部買左支水之後，就上左去一樓既露天平堂，依到係考試前另一個中五生聚腳點。
中學生真係好得意，明明想溝或者比人溝，但係係性別上依然劃分得好清楚，男人埋女人堆會比人話狗公，女人埋男人堆又會比人話姣；除非你好似水牛咁屈機可以引到咁多狂蜂浪蝶成為男神之外，否則你形象一定會變差，因此我地好多時係學校依然係男一堆，女一堆咁樣活動。
地下小食部比女仔霸左，因此依到就變成男仔既據點。
就係角落頭，我既手下敗將，5D既八大金剛就坐左係到，佢地有啲係到渣住本書，但係亦都有四個係到鋤緊Dee。我唔知佢地係屈機到唔將考試放入眼內定係一早打定輸數，但無論佢考得好考得柒我都唔係小左舊肉。
「波仔！」有人篤我條腰，用屎忽諗都知。
「呀飯。」係呀飯，仲有坐係隔離既桑妮。依到咁多狗望住你好危險架，你地做乜野遮都唔擔把呀？
打完招呼之後，我地兩個都坐低左。
「琴晚好開心呀可？」呀飯甜絲絲咁同我講，唔知發生乜事既人一定會亂估！
更何況，如果真係好開心既就死得冤枉姐，你話，感覺可以隨時間而丟淡，我明呀，問題係我依家好唔開心呀！
係隔離聽住既桑妮即係有反應：「琴晚你地唔係去左M記溫書咩？」
「係就係……但係之後……」呀飯個樣笑得好奸。
一路唔出聲既呀方聽到之後都手肘黎頂一頂我，個樣笑得勁淫。
「我地溫完書十一點鐘左右就番左屋企喇，琴日你又唔黎。」我要解圍，仲要將個波扔番比桑妮。
「車，都唔好玩既。」想玩既就去買出奇蛋啦，一次過滿足你三個願望呀！
「我都好想黎架，但係屋企人唔比無辦法。」其實我都知道，但係我想解圍姐……
下一秒，有一個身型龐大既出現左係我地張枱既隔離。
「哈佬。」佢出招喇！
「早晨。」我地四個都好禮貌，亦都好見外咁同佢講左聲早晨。
依條友就係猩猩。
「范同學，你隻手無事丫麻？」
「哦無，小小事姐。」同時間呀飯亦都本能地扭下隻手以示佢無野。
我印像中我地班無人同依隻大猩猩熟，佢知道呀飯既名應該係有備而來。
「咁就好喇，琴日你打得好好。」
「講到好，邊夠我地依位5C MVP好波丫。」呀飯撻開手掌指向我依面。
我微笑點頭示意。
「你係……」
「我叫劉驚波。」我伸出手掌。
依條友琴日先同我握完手，依家就唔記得左我，佢個腦既容量同呀方有得揮！
「哦哦，原來你就係傳聞中Ace既基……丫唔係，老友先岩。我叫廖智星。你兩個係到水牛都唔黎既？」佢都伸出左手同我握手，但係佢好快就收番埋。佢頭先想講既一定係基友，果啲低B流言智商高小小都唔信啦！
佢知道我、呀飯都同水牛熟，依家我可以更肯定佢係做過功課。
自我介紹完之後，佢好快就令番向呀飯果一面。
「我地可唔可以做個朋友？」後面剩低既七大金剛起哄。
「哦好，無問題，多啲朋友梗係好。」聽完之後猩猩好開心咁伸出隻手。
呀飯你點會咁無防人之心架！
「唔洗喇，陣間考試喇喎，你仲唔番去同你啲朋友溫書作最後衝刺？」呀飯完全無伸手既意圖。
後面既七大金剛有人恥笑，有人發出「扯～～」聲。
聽到之後猩猩都好愕然，但係為左唔好係全部中五男生面前柒，於事笑住咁話：「好丫，多謝你既提醒，祝你地陣間考試順利。」
「大家咁話。」呀飯答完佢之後，猩猩就行開左。
明眼人一睇都知，條友睇中左呀飯。
相信平時一開聲就大把女既金剛猩猩竟然食檸檬，佢自己都好估唔到，但係同男神水牛日對夜對既呀飯要求高小小都唔奇怪。
「佢睇黎想溝你喎。」我直接同呀飯講。
「依啲狂風浪蝶我都遇過唔少。」然後佢向前傾，雙手用力搣我番面：「但都係你最得人鐘意！」
佢一定係講比隻猩猩聽，但係就犧牲左我；係角落頭其餘七隻金剛笑到GAPGAP聲，但係猩猩塊面就燶晒，今次一定得罪左佢。
「咁你又到依家都仲未拍拖既？」條件咁好既呀飯無拖拍又唔收兵（或者係我依家比佢嘗試收緊），到底點解呢。
「唔通你係LES既？」呀方又發功。
呀飯即刻拎起一疊書同Notes，然後車埋呀方塊面到，我地依張枱又再成為全場焦點。
「Les你個死人頭！」係隔離一路無乜出聲既桑妮都笑左出黎。
呀飯已經坐番低，然後話：「睇唔岩咪拍拖囉，依家又唔係去街市買菜，點可以睇唔岩就焗住要咁求其？」
我忽然間覺得呀飯同水牛處境好相似，因為條件好，而且由細睇好野睇到大，所以眼角都高左。
「一定係你群得水牛多，所以眼角高左。」我直接講出自己既推論。
「唉，最衰都係佢！如果唔係佢一直都無女朋友，我就唔會比人當係佢緋問女友，搞到依家咁煩。係就話抵比人話姐，但係我同水牛之間真係白過呀方份試卷，就算解釋都無人會信。」原來佢同我都有同樣感受。
「不如你同我拍拖，咁啲人咪無聲出囉！」呀飯你又玩尻我！桑妮仲在場添，唔得！一定要玩番佢。
「好呀，既然你咁主動，我地就黎啦！」我啜起個嘴。
「你就想，咁咪益左你！」佢用手將我個頭推開，而鐘聲亦都響起，考試開始。