如果你既人生好似打機一樣……: 4.1, 考試前15分鐘仲溫緊書既人無資格擔心自己既成績
《登 登 登能登》
就係Pokemon經典既補血聲之後，我已經訓醒。
老母已經出左門口，屋入面得番我；時間仲好鬆動，於事我打開電腦上facebook.
成版最新動態都比呀方條戇尻洗左，條友成日去讚左先睇得果d戇尻網頁，我唔記得左自己同佢講過幾多次，果啲野一辜狗就有。
除此之外，中間仲夾離住啲好撚中二病既句子，而且永遠都無人回，永遠都係自己讚自己。
我click一click個status右上角既箭嘴，然後拉落去。
「取消訂閱追蹤Edwin Yau? Yes please.」
你已成功取消訂閱Edwin Yau.
成個最新動態無晒污染物，終於耳根清靜。
其實我Facebook朋友唔多，得八十零個，已經都係打機識既毒撚居多。
所以我既朋友List裡面，搵張真人相黎睇都無，大部份都係毒到核爆頭像，例如初音呀，k-on之類既人物。
唔好問我點解會識，當你有一個超毒既朋友成日同你講，同埋打機既時侯見到係唔同online game入面都見到同樣既人名，你就會有興趣去查下究竟係乜黎。
當然，除左二次元之外，有啲人都會貼下三次元既野既，akb48你岩唔岩？
其實我唔討厭依種人，你唔影響到我就得，但係我落網吧成日聽到有條友播akb既歌播到勁大聲，我真係好想起身打尻佢。
咦，原來有幾個人想同我做朋友喎。
Sony Cheung，立即accept。
Michelle Rice？邊尻個呀，個頭像係唔知來自邊套動畫既肌肉猛男，一定係唔知邊條重口味既毒撚！
共同朋友Sony Cheung，Ace Pong
咁似係同學喎，Add左先算。
當我Accept完之後，依位肌肉猛男立即add我。
「果然係毒，一起身就即刻開電腦 」
你自己都唔好得去邊囉，你fb腥訊息唔洗開電腦？
「你當我係用電話腥唔得？」
「算數啦，你部Sony Ericson W910i 」比佢攻擊我手機既口味添，唔得，我要反擊！
「講到毒點都唔夠你，睇下你既頭像幾重口味 」
見到佢張頭像，有無巴打j得落？
「嘿，粗獷既身軀再加上滄桑既眼眸先至係男人中既極品！」
腦海中即刻聯想到水牛，佢既眼神同佢既年齡不相稱……等等，我唔可以比依條重口味感染到！I am not gay！
「你慢慢Ｊ飽佢，我沖涼番學先。」
點解我身邊咁多不可理喻既人，呀方一個已經夠晒，依家又整多件……
我熄左部電腦，然後入浴室沖涼，煮多個麵食就出門口。
落到樓下，我趁福伯同師奶甲傾緊計既時侯即刻竄左出去，睇黎我已經有看更恐懼症。
太陽依然升起，呀方依然戇尻；非訓醒既呀方已經係到等住我。
「波仔，最衰都係你，我琴晚開唔成團……」
好喇好喇，你黎M記搞完屎棍累完我喇，然後開團走喇，到最尾竟然連團都開唔成？
「你既存在到底要無意義到乜野地步？」
依條問題係抽水之餘，我亦都好想知道呀方對自己既存在到底點諗。
「我既存在有咩意義？無坦點打副本呀！？」
笛卡兒講過我思故我在，因此無腦既呀方由一開始就唔應該存在。
「當我番到去之後，發覺佢地已經搵左第二個替我喇……」佢發出抽啼聲。
男兒有淚不輕彈，就係因為打唔到副本你就喊左？咁琴晚比你害成咁既我係唔係應該上吊？
「今日放學之後，你一定要陪我開團！」呀方拍我肩頭。
「下？今日考試喎，你唔洗溫英文咩？」考試你仲打機？中五喇你！
「係喎屌！今日考試喎！」
…………………
就係前晚，你特登打黎比我CUT左兩次線，想問我有無為今日溫書，依家你竟然唔記得？
「屌，仲等我帶晒啲書番學添！」
個重點根本唔係到囉好唔好！今日考試，前日仲記得既你依家做乜會忽然失憶架？你係咪琴晚拆左個腦放落洗衣機洗唔記得放番落去呀？你個腦本身已經咁乾淨，做乜要洗左佢！
「反正你溫唔溫都一撚樣架啦屌。」我已經無氣理佢，佢真係好戇尻，如果一百分係滿分我會比65535分佢。
「你又講得幾岩喎，聽你咁講你都無溫架啦？」
「你知唔知琴晚水牛比我地搭枱係為左啲乜？」
「下？水牛？琴晚？丫係喎，水牛佢地琴晚係溫書喎！點呀，琴晚好唔好玩呀？」
依家記憶卡出到32gb喇！點解你個腦仲係512MB架？
校門口終於係我面前出現，如果朝朝我都係咁比依條戇尻仔激法，我諗過多兩日我仲會比佢激死，個故事亦都可以完結。
由於今日考試，所以平時係到當席既HEAD P亦都唔洗咁早係到罰企。
因為係考試，所以我地係唔會上班房，而係係小食部出面既長枱到等，夠鐘先上去。
水牛就係其中一張枱到氣定神閒咁，而坐係佢隔離既女同學就拎晒啲書同NOTES出黎要水牛教佢。
算勁數啦，你係有心讀就一早讀左啦，你睇下水牛坐定笠六咁就係最佳既模範。
「水牛早晨！」「喔械唷！」
呀方條毒撚又標奇立異，係女面前就發作。
「嗨，呀波。」水牛既反應好平常，但係佢隔離既女同學就好唔同，個個都帶住奇異既眼光望住我。
所謂好事不出門，醜事傳千里，依家資訊科技咁發達，佢地一定知道晒，仲分析埋再加埋料添！
佢地咁勤力講人是非，如果陣間份試卷係問我琴晚發生過乜野事，佢地一定全部拎晒A，份卷仲會比老師蓋個白兔印仔，係學校開放日拎出黎貼堂添。
對話視窗見到一堆堆下跌左既女同學好感度，so what？我連佢地個名都唔知，就証明佢地唔重要。