如果你既人生好似打機一樣……: 3.5, 兄弟間既信任係無條件

 
「水牛聽住，我以下講既野可能好荒謬，但係你信就信，唔信就算。」
「你講。」水牛神息凝重。
 
「琴晚我打打下機既時侯，忽然間暈左，昏迷果陣我竟然見到個好似小智既人係我夢中出現。」
水牛無講到任何野，但係佢眼神話比我知佢好驚訝。
 
「然後，佢就比左個特殊能力我，依家我既生活就好似打緊機咁；我會接到任務、我會有exp、我會有能力值、我仲會有技能同埋好感度。舉個例，如果我想既話，我可以即時睇到你既能力值。」
水牛雙眼望住佢本筆記，睇黎係思考緊。
 




我將成件事講出黎，係因為我覺得件事咁荒謬，講出黎都無人會信。
要厄水牛唔易，咁短時間之內我無可能作個故仔厄到佢，咁倒不如我將個無人信既事實講出黎，令佢死心？
「就算係咁，你都信我？」
「信！」水牛眼神十分堅定。
 
「我信，如果咁既話，成件事都好合附邏輯！」
單係你信左我依一點黎講，成件事已經無晒邏輯可言囉！
 
講真，我無諗過水牛竟然會信我，友誼既威力係唔係真係咁驚人？
 




「如果可以既話，詳細啲話比我知。」水牛顯得非常之興奮。
換轉係阿方，我同佢講同樣既說話佢一定會叫我FF小陣……
 
既然水牛問到，咁我都照直講晒所有發生過既事比佢知。
 
「大致上我明白，我覺得係一件好事，但係我要求既野只有一樣。」
佢竟然照單全收，仲一本正經咁拜託我？
 
唔通佢好似Sony咁想我脫毒？
 




「大家咁老友，做到我實做。」講真，我依家心情真係好唔穩定；雖然水牛肯定唔會出賣我，但係有人知道我既情況始終令我好無安全感。
 
「唔好查我能力，唔好。」水牛既要求竟然係依個！？
 
「我應承你。」
如果我同呀方之間係友誼係承擔、責任，咁我同水牛之間既友誼，就係羈絆。
 
水牛係我係依個世界上最能信任既人，而我頭先講既野佢都肯信，我估我係佢心目中既地位亦都唔輕。
 
將件事講出黎之後我如釋重負，於事就開始傾番閒計。
「係呢，今日場波揀人果陣，呀飯係你耳邊講左啲乜？」
 
「咳咳……」水牛乾咳，睇黎佢唔係好想提起，但係做兄弟既係無隱瞞，於事佢繼續講：「今日朱純真咪幫我檔左球波既？」
 
係，果一刻我真係對佢完全改觀，佢真係好鐘意水牛先會捱猩猩果一下猛攻。




 
「其實我同呀飯一早知道佢會咁做。」
「所以呀飯同你講既係……」原來係咁！
 
「無錯，佢講既就係必要時，朱純真可以幫我檔一球。」佢用手搞拌食剩既薯條：「但係欺負弱者唔係我所為……」
 
「所以你頭先就唔係陰個矮仔？」依個係另一個我好想知既問題。
佢無直接答我，只係點點頭。
 
雖然水牛係一個有性格既人，但係果種呆企咁耐既反應，我依然覺得好唔尋常。
 
傾多陣之後就十一點，住得比較遠既水牛都係時侯番屋企。
而住得近既我都決定盡地主之誼送佢去搭車。
 
要傾既都傾晒，所以行去車站既一小程路上，我同佢都無乜野講。




到左車站既時侯，無所事事既我抬頭望向夜空，雖然因為高樓既光茫而睇唔到天上既星星，但係我好清楚佢地係存在。
 
雖然我地無出聲，但係我地無任何尷尬，真正既友情係乜野都唔洗講。
我老師話過中學生活係人生中識真心朋友既尾班車，我好慶幸自己一早就上左依班車。
 
我唔知道未來會面對乜野人，面對乜野事，我只知道萬一我真係有咩問題，只要我一開聲水牛就會幫我。
佢係我最後一個，亦都係最可依靠既後盾。
 
車來了。
 
架車埋站既時侯，水牛開口：「多謝你咁坦白……」然後佢步入車廂中，然後望住我續道：「你放心啦，我唔會同任何人講有關你既野。」同一時間車門關左，車廂入面既水牛向我揮手，而我亦都揮手示意。
 
水牛，我一秒都無懷疑過我地之間既信任，以前無，依家無，將來都無。
番到屋企之後，老母因為聽朝要早起番工，所以一早訓左。
係陰暗既客廳，我望住今日無乜點用過既電腦，明明就係一日之前，電腦係我不可或缺既物件，但係依家我竟然覺得我同電腦既距離好遙遠。




 
只係獲得依種能力第一日，我既人生已經轉變左咁多，我唔敢想象將來會變成點。
 
驚唔驚？唔多唔少都有，但係我唔會逃避，因為我知道我既前路總會係有苦有甜，有高低起伏。
就好似今日咁，短短一場閃避球戰可以為我嬴盡掌聲，但係之後我亦都輕易被擊沉。
 
依家既我已經掌握住機會，跟住落黎就要追番我失去左既青春。
面對依種全新而又未知既未來，我全身既肌肉都係到抖動，我好興奮！
 
我興奮到大嗌左出黎！
「呀－－－－－－－－－－－－－－－－－－－－－！」
 
 
 
「屌你訓啦柒頭，聽日唔洗番工咩！」