如果你既人生好似打機一樣……: 2.6, 講英文好似好型，但係用錯Grammar串錯字就即刻關家姐

「對唔住。」企番起身既水牛，拍拍身上既塵再同我講，但係相比起勝負，我更加擔心佢。
「水牛你真係無野？」

「無野，真係無野。」水牛微笑，就係你咁講我先覺得你有野。

由頭先開始一直嗌住「Ａ屎Ａ屎」既C班女生，到依一刻氣氛都變得非常沉重。
相反係D班果面，見到C班靈魂人物被擊倒，開心到不得了。

佢地覺得自己已經嬴左咁，事實上我依家咁既身體情況，真係做唔到D乜。
「暫停！」係外場既呀飯要求暫停，佢首先去關心水牛一輪，但係後快就番到黎繼續傾策略。





「波仔，我留意到你頭先咳得好犀利，你可以繼續？」呀飯留意到我頭先氣促既情況。
「我應該可以繼續……但係想有好似頭先咁既表現，就紋水D囉……」我雖然抖番順條氣，但係個肺都仲係谷住谷住咁。

「如果你唔得既，就投降啦…」桑妮說，而於幾乎同一刻，我話：
「唔得！」緊接既係我一陣既咳嗽聲‧。

「我地仲嬴緊一個人，我有信心可以做低個矮仔，但係剩低既暴龍同猩猩，我需要你地幫我拖D時間，等我抖順條氣。」

於事我地就制定左個DUMP波鐘戰略。




個策略就係，我盡快搞掂個矮仔，然後就換番入後場抖順條氣，由呀飯番入內場拖時間。

但就算我搞佢唔掂，我都要入後場抖。

你可能會覺得，留個無攻擊力既矮仔係內場比我慢慢抖咪得？洗乜要搞掂矮仔之後要呀飯頂住暴龍或者猩猩其中一個咁危險。

但唔好唔記得，對面打到咁上下可以主動換人入番內場，到時我一定仆硬街。
總之一日唔搞掂矮仔，乜野都唔洗傾！

發球權係我依面，我觀察到矮仔好嚴肅既表情，依家未係時侯。





我並無好似頭先咁想打出個靚波，我暫時既目的只係靜待機會，因此Angry bird視窗亦都無係我眼前出現。
個波一直係對方內場中穿插，我同桑妮好努力咁唔比個波去後場，因為我地知道一旦個波去左後場，我地就會輸。

矮仔都開始留晒汗，但係任我同呀飯點樣瞄準都係打唔中個矮仔。
與此同時，校鐘響起，原來我地已經打左一堂，但因為依堂體肓堂係連堂，因此會繼續。

但係我留意到矮仔忽然放鬆左，機會！
我用盡力，打番一球好波，但依然無用到Angry bird視窗。

當個球就快擊中果陣，我大嗌：「你夠膽避個波既話我就打你一身！」
矮仔即時好驚咁停止晒所有動作，而個波亦都中左。

「咇－－－－－－－－－－－－」





六比四。
我即刻成身到鬆晒，但係係我地身後既暴龍同猩猩即刻走左去林蛇到理論。

「搞錯呀，條友出口術喎！」

佢兩個係到投訴，而我都懶得去解釋，望向對面，矮仔好似成碌木咁企左係到。
當我想搵水牛做個勝利手勢既時侯，我留意到佢係後備席果道，用一個好失望既眼神，搖住頭咁望住我。

於事我收起笑容，打消依個念頭。
最後林蛇既判決係，矮仔依然被當出局，因此暴龍或猩猩是旦一個需要番內場。

而同一時間，我就同呀飯交換位置，跟住落黎佢頂到幾耐就係關鍵。
跟住落黎，遊戲開始，對方剩低既可以話係最強組合。

首先有內場既暴龍，雖然佢無矮仔一樣咁避得，但係佢非常之接得，而且傷害力驚人。




而更加可怕既係「後場必殺」既猩猩，次次比佢拎到波我地隊都非死即傷，條友真係可以話係場波既mvp。

暴龍同猩猩默契驚人，個波不斷係我地內場穿插，我同呀方連波皮都掂唔到。
呀飯都仲避到暴龍同猩猩既強襲，但係桑妮仲好狼狽，有幾次呀飯甩左個波去外場，桑妮都爭d比人打中。

依家呀飯隻手咁樣，要寄望佢可以做低暴龍，迫猩猩番前場根本係無可能！
「我地係到乜都做唔到，睇住佢兩個比人地魚肉，你有無覺得自己好無用？」

點解最無用果條友仲好意思問我？依家既我真係為左慳番啖氣廢事答佢，但事實上佢講得好岩。

呀飯同桑妮一直都力保不失，都已經捱打左幾分鐘，而暴龍同猩猩開始有集火呀飯既共識。
睇黎捱唔到幾耐喇，好彩我都抖得七七八八，但係抖得一分鐘就係一分鐘，到依一刻呀飯已經有成為棄子既覺悟。

桑妮甩左個波，而猩猩又準備開餐，目標已經鎖定。
「咇－－－－－－－－－－」





六比五，出局者呀飯。
我同呀方立即上前關心，佢咁短時間之內中猩猩兩球都應該好傷。

「你無野丫嘛？」
「我盡左力喇，之後就交比你。」呀飯好大力咁拍我背脊。

「我唔會令你失望。」我都比番相應既信心呀飯，但事實上我心裡面都好無把握。
「係先好講呀，陣間輸左我咒你縮陽呀。」呀飯留低依句就番去後備席，而旁邊既水牛亦都好關心咁問侯。

「波仔。」呀方又想搞乜？
「點？」

「It's show time.」用英文講野係唔係真係型d先?
「Bullshit, I say that sin arm.」如果係的話，等我都型番下先。