如果你既人生好似打機一樣……: 2.5, 再鋒利既刀都有生鏽既一日
對面換入最後一個人，亦即係個矮仔。
只要再做低佢地一個，咁樣對面就會打小個！
我希望可以一直咁嬴落去，因為我唔想桑妮上場；隻猩猩咁兇恨，比佢一球射中要害的話真係醫院都有得入。
個矮仔究竟乜料呢，等我查下先。
《矮仔
健康度Ｃ、攻擊力Ｃ、防禦力Ｃ、智慧Ｂ、幸運度Ｄ、耐性Ｄ、靈活度Ｓ＋……
總體評價Ｃ－，若需要詳細評價請繼續……》
靈活度Ｓ＋？ ＷＴＦ？
「水牛，依條矮仔有料到……」我警告水牛。
「你又知？」
「你唔好理，總之我就係知。」
水牛聽到依到都無再回應。
開球既係暴龍，因為頭先發生既事，所以佢地都唔敢再瞄我，反而轉攻Mandy。
Mandy攻擊力麻麻，但係防守力都唔錯，所以一般既球都無辦法收到Mandy皮。
當佢避左個波之後，水牛係個波進入猩猩進食範圍前接得住，然後佢已經瞄準好。
睇個波既方向……佢瞄既係矮仔？
依一球真係非常之靚，睇黎今次矮仔都係凍過水，但係靈活Ｓ＋既能力避唔係講笑！再加上佢細少既體型令到佢十分之難被擊中，然後個波落左係光管腳手中，佢出球喇！
個球既角度非常之怪，佢唔係瞄緊我地任何一個人……即係……？
仆街D班又抄橋！
因為個波扔得非常之高，而且我地並無預備到，所以根本接唔到個波，但係猩猩就唔同，佢已經CAMP實個波好耐！
「仆街了！」頭先多得呀飯救左Mandy所以佢先無中到招，今次有邊個救到佢？
由於依球實在太出乎意料，所以我地完全漏晒位，塊面仲望向前面既Mandy已經避唔開依一球喇！
「咇－－－－三比三！」
再次被對方追平，更加仆街既係，桑妮依家要落場！
「Sorry……」Mandy同我地道歉，但我覺得佢已經做得好好，何況最應該道歉果個都未道歉。
Mandy走回後備席，而桑妮亦都行左入黎內場。
「你掂唔掂呀？」我依然好擔心佢，桑妮睇起上黎真係好弱不襟風。
「嗯。」桑妮眼神非常之認真，所以我都無再追問。
打到依家都仲未有任何一隻金剛出局，真係好失敗！
望見對方既招績樣真係好想打佢一身，你估你依家嬴左呀？三比三咋我地！
發球權係我地依面，由於我已經掌握到點玩angry bird，所以我主動要左個波。
我深呼吸一下，然後準備發球。
於我跳起準備擊球前一刻，同一間Angry bird關卡出現，今次我已經開始掌握到要點，所以得分更加高。
兩粒星，係兩粒星呀。
依球我依然無瞄準左光管腳，頭先我見到個矮仔咁都避得到，我就覺得瞄佢係浪費時間。
「一定要中呀！」
依球亦都打得非常之好，而光管腳雙眼瞇得非常之細，根本睇唔清楚我既舉動。
嘿嘿，我已經計算好晒，我頭先特登跳起就係想背住太陽，我睇你地點捉我路！
雖然光管腳郁唔到，但係旁邊既暴龍都唔係戇尻仔，於事佢一手推開左光管腳，而個波就直飛往我地既外場；外場得呀方就話靠唔住姐，但係我地仲有呀飯喎！
呀飯接實個波，然後扔向比暴龍推跌左既光管腳，你走唔甩喇仆街！
「咇－－－－－－－－－－－－四比三！」
得左喇！光管腳出局！
見到光管腳成隻敗家犬既表情真係好爽，佢旁邊既暴龍都唔好得去邊。
「波仔你今日食左偉哥呀？」遠方既呀飯笑問，而同班既其他同學都笑左出黎。
「食左偉哥都無我依家咁勇呀！」依家既我真係自信爆棚，旁邊既桑妮都笑得好開心。
「水牛，我依球波靚唔靚？」
我拍拍兄弟既肩頭，佢呆左一呆，然後笑住話：「無得頂！」
「今日你威到盡啦，係時侯到我都出下招。」水牛眼神相當興奮，睇黎佢都戰意高漲！
雖然本身我想繼續開波，但係水牛開到聲要波，無理由仲霸住。
水牛開出既依然係非常好既球，瞄準既竟然仲係矮仔，我真係唔明點解佢會咁做。
而矮仔亦都運用佢犯規既靈活性避過，而個波亦都比暴龍接住左。
佢出球喇！瞄既係桑妮！
桑妮雙手勉強地檔開個波，然後跌低左，而個波就彈左去水牛到。
我想去扶桑妮既時侯佢示意，話自己黎就得。
「呀波小心！」水牛好緊張咁提醒我。
有上次爭d中伏既經驗，今次我比較淡定，四周景物開始慢落黎既同時，我將個波打開，傳去水牛果面；水牛今次無講太多野，佢只係靜俏俏咁接住個波，然後回敬D班。
如是者，個波又開始來來回回，間中個波會傳到去我地外場，但係我地並無因此而佔太多甜頭。
戰況又開始膠著。
雖然水牛既表情無變到，但係從佢不斷要波既行為，我覺得佢開始急燥。
「水牛，你實得既！」我無直接指出佢既問題，只係希望鼓勵佢，令到佢自己意識到自己既問題。
「唔會令你失望。」佢又發球，今次瞄既唔係矮仔，而係最後一隻狗乸。
係水牛既強攻之下，狗乸唔洗旨意避得到，而自身難保既暴龍亦都無閒情去救隻狗乸，就係咁我地又拎到一分。
「YES!」水牛顯得好興奮，但換轉係平時，收條廢柴皮既佢一定唔會咁興奮。
我地C班既觀眾亦都非常之興奮，但係係場入面既我就好清楚，小隻狗乸對戰局根本唔會有大影響，因為剩低既都係最麻煩既對手！
「剩番三個咋，我地一齊夾手夾腳嬴左佢！」我又再拍拍水牛肩頭。
「好，等我地速戰速決。」
「暫停！」暴龍要求暫停，我亦都可以趁機會回下氣，本身體力唔好既我，依家真係喘晒氣。
忽然間額頭傳來一陣涼快感，係桑妮。
「抹汗啦。」桑妮竟然主動拎毛巾比我，佢上一次對我咁好果陣，已經係小學既事。
回想起小學，原來我曾經都好似依家咁，係眾人既焦點……
一輪休息之後，對面終於可以繼續，但係陣式改變左。
矮仔一個人打內場，其餘兩個係外場！
面對擁有絕對防守既矮仔，仲有咁強大既外場，究竟我地可以點呢？
發球權係矮仔手上，佢既攻擊力真係好差，但係我地一日打唔中佢，我地都吹佢唔漲。
「水牛你點睇？」我問水牛意見，始終佢係攻擊得矮仔最多既人。
「你講得岩，佢真係有料到。」水牛中肯地回答。
《矮仔
健康度Ｃ、攻擊力Ｃ、防禦力Ｃ、智慧Ｂ、幸運度Ｄ、耐性Ｄ、靈活度Ｓ＋……
總體評價Ｃ－，若需要詳細評價請繼續……》
我再睇一睇矮仔既評分，忽然發現我一直遺漏左既野。
若需要詳細評價請繼續。
我繼續忽略左咁重要既資訊！
《矮仔
於班中一直是被欺凌的對象，經常於小息或午飯時被同學丟粉刷或其他雜物作弄，因此閃避能力極度。頭腦不錯，但有點膽小。》
原來佢就係5D班既呀方，雖然佢比人欺凌咁慘我真係唔想落井下石，但係為左嬴，我唔理得咁多。
於事我同水牛商量一番之後，佢唔同意我既戰略。
「對弱者做出咁既行為……我做唔出。」水牛似乎好同情矮仔。
既然係咁，我唯有努力打個三星出黎，希望會打中矮仔。
矮仔向桑妮投出一個唔係好快既球，而水牛就搶係我之前接左依一球。
佢唔比我開波睇黎係怕我真係實踐我同佢提到既策略。
但係水牛打出既依球全無力水，唔通水牛你放水？
矮仔輕鬆接住依球，我見到外場既呀方同呀飯都非常之意外。
而矮仔將個波扔高，我同桑妮要接的話實在太遠，但係水牛要接依球應該易如反掌。
郁啦水牛，郁啦！
水牛完全無反應，今次仆街鳥。
我祈禱，希望外場既暴龍同猩猩會甩左個波，可惜依個可能性仲低過呀方溝到女可能性。
接到波既猩猩立即發功，佢見到發緊呆既水牛，真係用屎忽諗都知佢想點。
睇黎又要我既能力……
停落黎啦！
「咳……咳……」頭先午餐果陣出現過既果種感覺再出現，我既肺好似穿左窿咁完全郁唔到，依家既我就只可以目送個波……
「水牛！」
猩猩既發球非常強勁，當水牛意識到危險想反應果陣已經太遲！
個波擊中水牛既雙腿，因為衝力太大，水牛失去平衡趴左係地。
五比四。
一直係人生大嬴家既水牛，依家竟然該好似隻死狗咁趴左係地？