如果你既人生好似打機一樣……: 2.7, 閃避球戰
依家CD班既觀眾都無頭先咁雀躍，一黎係係太陽底下，佢地開始無氣，二黎比賽亦都黎到最關鍵既地步。
「呀方，你想表演，就換你黎內場啦。」
「下？我？」佢眼神充滿恐懼。
「你記唔記得你頭先係外場同我講過D乜？依家比晒機會你。」
呀方逃避我既眼神，但係無幾耐之後佢都嘆一嘆氣。
「好啦，桑妮，外場就交比你！」呀方即刻同桑妮扮熟咁同佢講。
「無問題！」但桑妮似乎不抗拒。
暴龍同猩猩，睇下我點樣做芒亨屠宰你兩個啦！
哨子聲再響，我地係發球方。
要速戰速決！
我再次開啟Angry bird視窗，今次亦都係打出個兩星，希望夠做！
個波非常之強，但係C班內場得番暴龍一個，佢要避亦都唔係無可能。
面對咁既球速，暴龍都顯得無力，雖然佢避到個波，但係都趴左係地上面。
「弊！」暴龍講出依一句，就代表佢無運行。
「弊！」講出依句既係桑妮，然後係一眾驚訝聲。
由於我個波實在太快，係後場既桑妮接唔實。
桑妮一臉愕然，而又再逃過一劫既暴龍就鬆晒一口氣。
「咳……」雖然抖左陣，但係始終唔夠，睇黎我就只可以再用多一次憤怒鳥射球，但係對方仲剩低兩個人，點算好呢？
發球權番到對方手上，相信我地又要比人魚肉一番，但我係唔會放棄！
就算毒撚，都有想爭取既野，都想要有自尊；而自尊係通過表現爭取番黎！
雖然暴龍同猩猩既一輪猛攻我仲可以避到，但係我真係唔知道可以頂到幾耐。
有幾球好危險既發球我都爭D想開MATRIX黎檔，但係我好清楚只要我一開，我就再無氣用Angry bird，依一啖氣點都要留住！
但係無球既我，又點樣開Angry bird呢？依一刻我真係好矛盾，點算好？
大熱天時，身為毒撚既我同呀方都開始無乜氣，雖然猩猩同暴龍既攻勢無岩岩開始咁猛烈，但係佢地始終係運動健將，所以到依家依然鬆動有餘。
話口未完猩猩又接左球，今次瞄準既係喘緊氣既我。
完了！完了！
無情既波已經鎖定左我。
當我閉目準備中招既時侯，預想中既痛楚無出現，因此我再張開眼。
「阿方！」
阿方條淆底怪竟然幫我檔左依球？雖然係咁，但係腹部中波既佢痛到縮埋左一舊。
「你無野丫嘛？」雖然呀方之前做左好多戇尻野，但係依一刻佢為依場比賽重燃左希望！
「唔好……唔好將我d相放上二千分得唔得？」阿方苦笑。
「得得得！你捱得住既就乜都得！」今朝佢先比我撻完落地傷到背脊，依家腹部又中招，我真係怕佢會頂唔住。
「波仔，得你一個威晒點得呀……我講左啦，it's show time，我梗係要做番d野先得架。
我竟然有小小感動，雖然佢唔係真係死得。
「波仔……我型唔型呀？」呀方依個時侯仲問得出依個問題。
「型！」但係為左加強佢既意志，我都係決定厄佢。
「咁就得喇……」佢露出個好滿意既笑容，然後我扶番佢起身，佢抱住腹部行番番去後備席，接受在場所有人既目送。
果種目光，已經唔再係果種鄙視既目光！
雖然毒撚方比人做低左，但係佢為我換黎左好珍貴既發球權。
依個就係我唯一既機會，一旦我依球都射失左，我地就真係可以收尻皮。
我閉目調整呼吸，然後再打開雙眼，依家既我已經係唔同既我！
我打開angry bird視窗，然後用我之前累積落黎幾次既經驗去射隻藍雀。
完美既射擊！藍雀將隻豬外層既防禦解除得非常之後，然後落黎就係關鍵，我究竟做唔做得到呢？
「唔係相信你自己，而係相信一直相信住你既我！」我諗起水牛同呀飯既依一句。
無問題，依場波就等我幫你地嬴啦！
黃雀應聲飛出，直擊一直做縮頭烏龜既豬。
三星！
「吼－－－－－－」我用最後既氣力發出怒吼，而擊出既球亦都彷彿化作一道光，就好似各種運動漫畫入面勁誇張既表達方式。
「無可能架！」而暴龍面對咁既發球，亦都好似動漫入面既壞蛋，見到主角放出大招一樣，唔相信自己既命運。
可惜，同主角作對就只要收皮既下場，只可以係被擊飛既同時慘叫「好邪呀！」
暴龍應聲倒地，二比一！
C班全班跳起歡呼，我雖然咳到企唔到身，但係心裡面都非常激動。
係外場既桑妮都非常之開心，但當佢見到我咳成咁果陣都即係衝過黎睇下我點。
「你點呀？」桑妮顯得非常緊張，而且我地靠得好埋，我隱約聞到佢身上既體味……雖然佢流左好多汗，但唔係毒男果種體臭，佢滲出黎既係香味。
「有兩聲咳姐，唔洗咁緊張。」好辛苦，但係我唔可以比佢知。
「你真係唔洗抖？你今日已經做得好好，頂唔順既就投降啦！」
「唔得！」我依然好堅決，我唔理個肺有幾辛苦而講出依一句。
要係我就快爆擊之前放棄唔打？你當我有病？
更何況我地已經嬴硬。
「桑妮，我地今場嬴梗。」
我唔係尻吹，我係有根據，無左後場既D班，猩猩會迫住入內場，而佢一扔失個球，因為後場無人接，所以我地自動獲得發球權。
亦都因為咁，我決定比桑妮一個任務。
「桑妮，我要你番內場打！」
「我番內場打？我怕陣間中左招會令到你地辛苦打番黎既優勢盡失……」
「你聽住，相信你自己，唔係我相信住既你，亦都唔係你相信住既我，而係相信果個相信自己既你！」作為一個毒撚，係依個時間亦都只可以用依種勁毒既方法鼓勵桑妮。
雖然我講得非常之亂佢未必聽得明，但係佢都感受到我對佢既信任而點點頭。
另一面，猩猩到依個時侯亦都唔肯棄權，真係有鬥心，可惜未來就只有一個，就係我地嬴，佢地輸既未來！
發球權去番D班果面，但只要桑妮一直避到就唔會有問題，就算到最後夠鐘，林蛇都會判比較多人既我地嬴。
無得輸！
猩猩既發球依然威力十足，但係由於無人接應，佢再強大亦都無得打。
雖然桑妮避得好勉強，但總算獲得發球權。
其實我一直留意左猩猩好耐，佢真係好遲鈍；
我自問都係一個ＯＫ遲鈍既人，但係佢真係遲鈍過我十幾二十倍，
丫唔係，係一百倍先岩！
我係內場果陣發現，暴龍同光管腳一直都瞄住猩猩既所在處黎打，依個亦都係頭先呀飯頂到咁耐既主要原因。
只要桑妮個波傳到黎我依面，我有信心唔洗開憤怒鳥都可以請隻猩猩食蕉；話口未完，個波就已經係我頭頂上出現。
「食蕉啦大猩猩！」
我將球打番去中場，此時體型巨大既大猩猩係我眼中只係巨型標靶，想避都已經避唔切。
「咇咇－－－－－－－－－－－－－－GAME!」