如果你既人生好似打機一樣……: 2.3, 太陽都有毀滅既一日，但係游立方既膠力係無窮止盡
完全唔知道發生咩事既我張開眼，見到呀方趴左係地上面，而企係後面既鞏偉就好愕然，個波仲係佢腳邊碌黎碌去。
原來呀方失驚無神爆SEED避到，而睇死呀方實避唔到既鞏偉就大意失賓周。
今次柒成咁真係有排比人恥笑，對咁要面既鞏偉黎講真係好大打擊。
而另一面，避到波既呀方就企番起身，以勝利者既姿態高舉雙手高呼。
我覺得呀方已經唔可以用戇尻黎形容，佢已經升左LV變成戇尻尻。
講真，對我黎講我寧願出局既係呀方，而D班意外拿下鞏偉，真係跌左個橙，執左舊金，賺到笑。
後備席既水牛企左起身，睇黎佢要上場。
水牛拍一拍鞏偉肩頭，然後鞏偉就成隻死狗咁番後備席；比自己睇唔起既人害死自己，仲比自己討厭既人可憐自己，連同佢無乜交情既我都有小小可憐佢。
講番轉頭，依兩個回合咁快就完左，除左光管腳之外，我對其他人完全唔了解。
如果水牛都失手的話今場就真係馬嬲玩ＪＪ，而且就算係水牛，係體育方面都只係同金剛五五波，問題水牛得一個，而金剛有三個。
發球權黎番我地依面，開球既當然係水牛，佢想瞄邊個呢？
我望住佢，佢同我打左個眼色，然後佢望左佢一個地方。
明白了！雖然我唔係運動健將，但係咁簡單既事我都應該做得到！
水牛發球，令所有人都非常意外，係一個唔快既球，而且仲係向住內場區無人既方向。
內場區無人姐，但係外場區有我！
佢個波丟得咁慢，就係希望作為毒撚既我都可以接得到，若果我接唔到個波出埋外場區，咁發球權就歸對面。
當我接到個球之後，立即瞄準光管腳對美腿丟過去，相信對面都十分之意外。
但係金剛就係金剛，除左無毛同廣東話講得唔正之外真係無得彈！
佢好靈活咁就避開左，而個波彈地而起，另一個金剛就接實左。
仆街了，佢瞄準既係水牛，睇黎對方都知道我地既底細想速戰速決！
金剛二號跳起，將球丟水牛既右面。
水牛見球不慌不忙，輕輕向左一避，球就往外場區飛去。
「你既後面就交比我啦！」呀方轉身面向外場，接左波既猩猩金剛，做左個非常兇恨既表情丟左個球，個球係前所未見既高速，瞄準既依然係水牛，食左依一球一定好甘！
呀方個仆街仔見狀竟然淆底，完全相信呀方既水牛完全無諗住避，依家先做動作避實在太遲啦！
要輸了。
與此同時企係水牛隔離既朱純真，好勇敢咁幫水牛食左個波，但係佢唔似頭先D班隻狗乸咁跌低嗌痛搏取可憐，反而佢依然屹立係場上面，一聲不出。
高掛既太陽仲有操場上佢既影子係此刻竟然顯得朱純真特別高大。
「我……我無事……」
朱純真雖然出局，但係佢依一著真係拯救左全世界，C班既同學立即起哄拍手。
「唔該晒。」水牛都比唔切反應，而聽到依句既朱純真，只係輕輕拍拍身上留下既球印，就輕輕離開球場，返回後備席。
依D就係單戀既威力？
二比一，形勢對我地不利，但只要水牛未跌低我地就仲有得打，而且換入黎既係呀飯，所以我地戰力又提高左！
如果對面隻猩猩真係咁犀利的話，只要我地個波一去到外場，我地就實死一個人，咁落去真係唔掂。
相反我作為外場實在太弱，咁落地真係輸撚梗！
「暫停一陣。」我舉手同林蛇示意。
我無理到來自D班既噓聲，黎到我地既內場之外，我同內場既人商量：「水牛，可唔可以派呀方黎後場？」
「下？我去外場咁大材小用？」呀方條戇尻尻仲好意思出聲。
「大材小用？頭先最大聲叫水牛放心然後比人嚇到淆底唔敢接球果個係邊個？」我依然係一貫無感情無起伏咁將成句句子講完，而呀方亦都唔敢再出聲。
咁樣其實對內場都有幫助，因為內場入面有四個人的話實在太迫，小個人的話水牛同呀飯可以更靈活咁移動；而且水牛亦都唔會錯信呀方奶多次野。
而對外場既我地黎講，多個人接波亦都可以令到內場進攻既方向更加靈活，雖然快既波我地未必接到，但多個人補位始終係好Ｄ。
番到去外場，比賽就快繼續，而係開始之前，我同呀方講：
「你最好醒醒定定，如果唔係我POST你張相上二千分，我睇你以後點係個壇做扮高人。」
「唔好呀大佬，我一定比盡心機打！」呀方依條戇尻尻唯一既自信來源就係係網路世界做鍵盤戰士，佢仲好似係果個論壇做到超版咁大添，如果POST佢張相出黎佢真係即係小好多FANS。
要破壞一個「網路高人」既形象，最簡單既方法比埋佢地真實既一面人地睇。
今次開波既係呀飯，佢既戰略係唔理D狗乸，專攻光管腳同另一個我稱為暴龍既金剛。
《金剛暴龍獸，小頭目級角色
健康度Ｂ、攻擊力Ａ、防禦力Ｃ、智慧Ｃ、幸運度Ｃ、耐性Ｂ、靈活度Ｂ……
整體評價Ｂ，若需要詳細評價請繼續……》
依條友都唔惹少，佢地既金剛全部都係場上面，除左係外場既大猩猩係絕對安全之外，係內場既暴龍同埋光管腳只要做低其中一個，都係好大既優勢！
因為光管腳既靈活度比較低，所以我決定做低佢先，但係點解先可以講比係內場既三個球員知呢？
呀飯瞄既係暴龍，速度雖然唔算快，但係角度都幾陰濕，所以暴龍依家失左平衡。
同一時間呀方接到波，好機會！快Ｄ做低暴龍啦！
呀方丟出一個與佢形象不相乎既好球，如果個球有咁既速度應該都黎得切係暴龍準備好之前擊中佢！
「二比二！」
………………
「呀方，睇黎我番屋企之後都要將我D珍藏好好整理一下。」
本來好高興既毒撚方聽到之後露出一個好懷疑既表情，然後問：「下？我做低左個人喎，咁都唔叫醒醒定定？」
我即刻用手掌拍佢個後腦，然後指住D班既內場話：「係就係做低左個，但係你做低D女有撚用咩？頭先咁好機會做低暴龍你都唔丟佢，你扔條女？」
暴龍望住呀方同光管腳細聲講大聲笑，一定係多謝緊呀方條戇尻尻放水。